‘Morru Agħmlu Dixxipli’
‘Morru Agħmlu Dixxipli’
“Lili ngħatat kull setgħa fis-sema u fl-art. Morru, mela, agħmlu dixxipli.”—MATTEW 28:18, 19.
1, 2. (a) Ġesù liema inkarigu ta lis-segwaċi tiegħu? (b) Liema mistoqsijiet rigward il-kmandi taʼ Ġesù se nikkunsidraw?
KIEN jum tar-rebbiegħa f’Iżrael fis-sena 33 E.K., u d-dixxipli taʼ Ġesù kienu miġburin fuq muntanja fil-Galilija. Il-Mulej tagħhom li kien ġie rxoxtat kien wasal biex jitlaʼ fis-smewwiet, imma l-ewwel kellu xi ħaġa importanti x’jgħidilhom. Ġesù kellu inkarigu għalihom. X’kien dan l-inkarigu? Id-dixxipli tiegħu kif irreaġixxew? U dan l-inkarigu kif japplika għalina llum?
2 Dak li qal Ġesù hu mniżżel f’Mattew 28:18-20: “Lili ngħatat kull setgħa fis-sema u fl-art. Morru, mela, agħmlu dixxipli mill-ġnus kollha, u għammduhom fl-isem tal-Missier u taʼ l-Iben u taʼ l-Ispirtu s-Santu, u għallmuhom iħarsu dak kollu li ordnajtilkom jien. U ara, jiena magħkom dejjem, sa l-aħħar taż-żmien.” Ġesù tkellem dwar “kull setgħa,” il-“ġnus kollha,” “dak kollu li ordnajtilkom,” u “magħkom dejjem.” Il-kmandi tiegħu li jinvolvu dawk l-erbaʼ espressjonijiet iqajmu xi mistoqsijiet importanti, u li jistgħu jinġabru fil-kliem għala? fejn? xiex? u meta? Ejja nikkunsidraw il-mistoqsijiet waħda waħda. *
“Lili Ngħatat Kull Setgħa”
3. Għala għandna nobdu l-kmand biex nagħmlu dixxipli?
3 L-ewwelnett, għala għandna nobdu l-kmand biex nagħmlu dixxipli? Ġesù qal: “Lili ngħatat kull setgħa fis-sema u fl-art. Morru, mela, agħmlu dixxipli.” Il-kelma “mela” tipponta lejn raġuni prinċipali għala għandna nobdu dan il-kmand. Ir-raġuni hi li Ġesù, dak li għamel il-kmand, għandu “kull setgħa.” Kemm hi estensiva s-setgħa tiegħu?
4. (a) Kemm hi estensiva s-setgħa taʼ Ġesu (b) Il-fatt li nifhmu x’setgħa għandu Ġesù kif għandu jinfluwenza l-ħarsa tagħna lejn il-kmand biex nagħmlu dixxipli?
4 Ġesù għandu s-setgħa fuq il-kongregazzjoni tiegħu, u mill-1914 ’l hawn kellu s-setgħa fuq is-Saltna t’Alla li kienet għadha kemm ġiet stabbilita. (Kolossin 1:13; Apokalissi 11:15) Bħala l-arkanġlu hu għandu s-setgħa fuq armata taʼ mijiet taʼ miljuni t’anġli fis-sema. (1 Tessalonikin 4:16; 1 Pietru 3:22; Apokalissi 19:14-16) Hu ngħata s-setgħa mingħand Missieru biex jeqred “kull ħakma u kull setgħa u kull qawwa” li jopponu prinċipji ġusti. (1 Korintin 15:24-26; Efesin 1:20-23) Is-setgħa li għandu Ġesù mhix limitata biss fuq il-ħajjin. Hu jaqdi wkoll bħala “mħallef tal-ħajjin u tal-mejtin” u għandu l-qawwa mogħtija minn Alla biex iqajjem lil dawk li raqdu fil-mewt. (Atti 10:42; Ġwanni 5:26-28) M’għandniex xi ngħidu, kmand mogħti mill-Wieħed li ngħata daqstant setgħa għandu jitqies bl-akbar importanza. Għalhekk, aħna nobdu b’rispett u minn jeddna l-kmand taʼ Kristu biex ‘immorru nagħmlu dixxipli.’
5. (a) Pietru kif obda l-kliem taʼ Ġesù? (b) L-ubbidjenza taʼ Pietru għall-istruzzjonijiet taʼ Ġesù wasslet għal liema barka?
5 Fil-bidu tal-ministeru tiegħu fuq l-art, Ġesù għallem lid-dixxipli tiegħu b’mod taʼ l-għaġeb li jekk jirrikonoxxu s-setgħa tiegħu u jobdu l-kmandi tiegħu, dan kien se jwassal għal barkiet. Hu darba qal lil Pietru, li kien sajjied: “Aqdef ’il barra fil-fond, u kalaw ix-xbiek tagħkom għas-sajd.” Pietru kien ċert li ma kienx hemm ħut, u għalhekk qal lil Ġesù: “Mgħallem, għamilna lejl sħiħ nitħabtu u ma qbadna xejn.” Madankollu, Pietru bl-umiltà żied: “Imma, la qiegħed tgħid int, ħa nkala x-xbiek.” Wara li Pietru obda l-kmand taʼ Kristu, hu qabad ‘kotra kbira taʼ ħut.’ Mistagħġeb, Pietru “nxteħet f’riġlejn Ġesù u qallu: ‘Tbiegħed minni, Mulej, għaliex jiena raġel midneb!’” Imma Ġesù wieġeb: “Tibżax; minn issa ’l quddiem tkun taqbad in-nies.” (Luqa 5:1-10; Mattew 4:18) X’nitgħallmu minn dan ir-rakkont?
6. (a) Ir-rakkont tal-qabda mirakoluża tal-ħut x’juri rigward it-tip t’ubbidjenza li jitlob Ġesù? (b) Kif nistgħu nimitaw lil Ġesù?
6 Ġesù ta lil Pietru, lil Indrì, u lil appostli oħra l-inkarigu li jkunu “sajjieda tal-bnedmin,” mhux qabel, imma wara li qabdu din il-kotra kbira taʼ ħut. (Mark 1:16, 17) Biċ-ċar, Ġesù ma talabx ubbidjenza għamja. Hu ta lill-irġiel raġuni konvinċenti għala kellhom jobduh. Sewwasew bħalma kellhom riżultati taʼ l-għaġeb meta obdew il-kmand taʼ Ġesù biex iniżżlu x-xbiek tagħhom, hekk ukoll kien se jkollhom barkiet kbar jekk jobdu l-kmand taʼ Ġesù biex ‘jaqbdu l-bnedmin.’ B’fidi sħiħa, l-appostli wieġbu għal dak li qal Ġesù. Ir-rakkont jikkonkludi: “Imbagħad ressqu d-dgħajjes maʼ l-art, telqu kollox u marru warajh.” (Luqa 5:11) Illum, waqt li ninkuraġġixxu lil oħrajn biex jieħdu sehem fix-xogħol taʼ li nagħmlu dixxipli, aħna nkunu qed nimitaw lil Ġesù. Aħna ma rridux sempliċement li n-nies jagħmlu dak li ngħidulhom, imma nagħtuhom raġunijiet konvinċenti biex jobdu l-kmand taʼ Ġesù.
Raġunijiet Konvinċenti u Motivi Xierqa
7, 8. (a) X’inhuma xi raġunijiet Skritturali għala nippridkaw dwar is-Saltna u nagħmlu dixxipli? (b) Liema skrittura timmotivak b’mod speċjali biex tkompli bix-xogħol taʼ l-ippridkar? (Ara wkoll in-nota taʼ taħt.)
7 Minħabba li nagħrfu s-setgħa taʼ Kristu, aħna nieħdu sehem fix-xogħol taʼ l-ippridkar tas-Saltna u taʼ li nagħmlu dixxipli. Liema raġunijiet Skritturali oħra dwar l-għala nagħmlu dan ix-xogħol nistgħu naqsmu maʼ dawk li nixtiquhom jimxu ’l quddiem għal xogħlijiet mill-aħjar? Ikkunsidra l-osservazzjonijiet li ġejjin taʼ diversi Xhieda leali minn pajjiżi differenti, u innota kif l-iskritturi ċitati jappoġġaw dak li jgħidu.
8 Roy, mgħammed fl-1951: “Meta ddedikajt ruħi lil Jehovah, wegħedtu li naqdih għal dejjem. Irrid inżomm kelmti.” (Salm 50:14; Mattew 5:37) Heather, mgħammda fl-1962: “Meta naħseb dwar dak kollu li Jehovah għamel għalija, irrid nurih kemm jien grata billi naqdih lealment.” (Salm 9:2, 10-12 [9:1, 9-11, NW]; Kolossin 3:15) Hannelore, mgħammda fl-1954: “Kull darba li nkunu fil-ministeru, aħna appoġġati mill-anġli—xi privileġġ!” (Atti 10:30-33; Apokalissi 14:6, 7) Honor, mgħammda fl-1969: “Meta jasal il-waqt għall-ġudizzju taʼ Jehovah, ma rrid lil ħadd fl-inħawi taʼ fejn noqgħod jakkuża lil Jehovah u lix-Xhieda tiegħu bi traskuraġni u jgħid, ‘Jien qatt ma ġejt imwissi!’” (Eżekjel 2:5; 3:17-19; Rumani 10:16, 18) Claudio, mgħammed fl-1974: “Meta nkunu qed nippridkaw, aħna nkunu ‘quddiem Alla’ u ‘fi sħubija maʼ Kristu.’ Immaġina ftit! Waqt li nkunu fil-ministeru, aħna ngawdu s-sħubija taʼ l-aqwa Ħbieb tagħna.”—2 Korintin 2:17, NW. *
9. (a) Ir-rakkont dwar l-esperjenza tas-sajd taʼ Pietru u appostli oħrajn x’jirrivela dwar il-motiv xieraq biex nobdu lil Kristu? (b) X’inhu l-motiv xieraq biex nobdu lil Alla u lil Kristu llum, u għala?
9 Ir-rakkont dwar il-qabda ħut taʼ l-għaġeb juri wkoll l-importanza taʼ li jkollna l-motiv xieraq biex nobdu lil Kristu—l-imħabba. Meta Pietru qal, “Tbiegħed minni, Mulej, għaliex jiena raġel midneb,” Ġesù ma tbigħedx, u lanqas ma kkundanna lil Pietru minħabba xi dnub. (Luqa 5:8) Ġesù lanqas biss ikkritika lil Pietru talli talbu jitlaq. Minflok, Ġesù b’qalb tajba wieġbu: “Tibżax.” Biżaʼ mhux xieraq kien ikun motiv ħażin biex jobdi lil Kristu. Minflok, Ġesù qal lil Pietru li hu u sħabu kienu se jkunu t’użu bħala sajjieda tal-bnedmin. Illum, aħna bl-istess mod ma nużawx il-biżaʼ jew emozzjonijiet negattivi simili, bħalma huma s-sens taʼ ħtija u mistħija, biex nisforzaw lill-oħrajn jobdu lil Kristu. Ubbidjenza b’qalb sħiħa u bbażata fuq l-imħabba għal Alla u għal Kristu biss tferraħ qalb Jehovah.—Mattew 22:37.
“Agħmlu Dixxipli mill-Ġnus Kollha”
10. (a) Liema dettall dwar il-kmand taʼ Ġesù biex jagħmlu dixxipli ħoloq sfida kbira għad-dixxipli tiegħu? (b) Id-dixxipli kif wieġbu għall-kmand taʼ Ġesù?
10 It-tieni mistoqsija li qamet f’konnessjoni mal-kmand taʼ Kristu hi, Fejn għandu jsir dan ix-xogħol taʼ li nagħmlu dixxipli? Ġesù qal lis-segwaċi tiegħu: “Agħmlu dixxipli mill-ġnus kollha.” Qabel iż-żmien tal-ministeru taʼ Ġesù, nies mill-ġnus kienu jiġu milqugħin meta kienu jmorru Iżrael biex jaqdu lil Jehovah. (1 Slaten 8:41-43) Ġesù nnifsu ppriedka l-iktar lil Lhud naturali, imma issa qal lis-segwaċi tiegħu biex imorru għand nies mill-ġnus kollha. Fir-realtà, il-postijiet għas-sajd, jew it-territorju għall-ippridkar, tad-dixxipli tiegħu kienu limitati għal “għadira” żgħira—il-Lhud naturali—imma f’qasir żmien dan kien se jinkludi l-“baħar” kollu kemm hu taʼ l-umanità. Għalkemm din il-bidla ħolqot sfida għad-dixxipli, huma obdew minnufih l-istruzzjoni taʼ Ġesù. Inqas minn 30 sena wara l-mewt taʼ Ġesù, l-appostlu Pawlu setaʼ jikteb li l-aħbar tajba kienet ġiet pridkata mhux biss lil-Lhud imma “lill-ħlejjaq kollha taħt is-smewwiet.”—Kolossin 1:23.
11. Liema tkabbir fil-‘postijiet għas-sajd’ seħħ mill-bidu tas-seklu 20 ’l hawn?
11 Fi żminijiet iktar reċenti, deher tkabbir simili fit-territorju taʼ l-ippridkar. Fil-bidu tas-seklu20, il-‘postijiet għas-sajd’ kienu limitati għal ftit pajjiżi. Madankollu, is-segwaċi taʼ Kristu lura f’dak il-perijodu imitaw l-eżempju tal-Kristjani taʼ l-ewwel seklu u b’ħeġġa kabbru t-territorju taʼ fejn kienu jippridkaw. (Rumani 15:20) Sal-bidu tas-snin 30, kienu qed jagħmlu dixxipli f’madwar mitt pajjiż. Illum, il-‘postijiet għas-sajd’ tagħna issa jinsabu f’235 pajjiż.—Mark 13:10.
“Mill-Ilsna Kollha tal-Ġnus”
12. Liema sfida tenfasizza l-profezija li tinsab f’Żakkarija 8:23?
12 Huwa taʼ sfida li nagħmlu dixxipli mill-ġnus kollha, mhux biss ġeografikament imma wkoll minħabba l-lingwi differenti li jeżistu. Permezz tal-profeta Żakkarija, Jehovah bassar: “F’dawk il-jiem għaxart irġiel mill-ilsna kollha tal-ġnus jaqbdu Lhudi u jżommuh minn tarf il-libsa tiegħu, u jgħidulu: ‘Ħa niġu magħkom, għaliex smajna li Alla magħkom!’” (Żakkarija 8:23, korsiv tagħna.) Fit-twettiq akbar taʼ din il-profezija, il-“Lhudi” jirrappreżenta l-fdal tal-Kristjani midlukin, filwaqt li l-“għaxart irġiel” jirrappreżentaw il-“kotra kbira.” * (Apokalissi 7:9, 10; Galatin 6:16) Din il-kotra kbira taʼ dixxipli taʼ Kristu kellhom jinstabu f’ħafna pajjiżi, u bħalma nnota Żakkarija, huma kienu se jkunu jitkellmu b’diversi lingwi. Turi l-istorja moderna tal-poplu t’Alla dan l-aspett taʼ li nagħmlu dixxipli? It-tweġiba hija ‘Iva.’
13. (a) Liema żvilupp rigward il-lingwi seħħ fost il-poplu t’Alla llum? (b) Il-klassi taʼ l-ilsir leali kif wieġbet għall-bżonn li dejjem jikber taʼ ikel spiritwali f’lingwi differenti? (Inkludi l-kaxxa “Pubblikazzjonijiet għal Dawk b’Nuqqas taʼ Dawl.”)
13 Fl-1950, il-lingwa taʼ madwar 3 minn kull 5 Xhieda taʼ Jehovah madwar id-dinja kienet l-Ingliż. Sa l-1980, din ir-rata nbidlet għal madwar 2 minn kull 5, u llum il-lingwa taʼ madwar 1 minn kull 5 Xhieda biss hija l-Ingliż. Il-klassi taʼ l-ilsir leali u diskret kif wieġbet għal din il-bidla lingwistika? Billi pprovdiet ikel b’iktar u iktar lingwi. (Mattew 24:45, NW) Per eżempju, fl-1950 il-letteratura tagħna kienet pubblikata f’90 lingwa, imma llum dan in-numru telaʼ għal madwar 400. Kellha riżultati din iż-żjieda fl-interess lejn in-nies taʼ lingwi differenti? Iva! Medja taʼ xi 5,000 persuna ‘minn kull ilsien’ isiru dixxipli taʼ Kristu kull ġimgħa tas-sena! (Apokalissi 7:9) U ż-żjieda għadha għaddejja. F’xi pajjiżi “x-xbiek” qed jaqbdu ħafna ħut!—Luqa 5:6; Ġwanni 21:6.
Ministeru Premjanti —Tistaʼ Tieħu Sehem Fih?
14. Kif nistgħu ngħinu lil dawk fit-territorju tagħna li jitkellmu lingwa barranija? (Inkludi l-kaxxa “L-Użu tal-Lingwa tas-Sinjali biex Nagħmlu Dixxipli.”)
14 F’ħafna pajjiżi tal-punent, il-wasla taʼ l-immigranti ġabet l-isfida taʼ li nagħmlu dixxipli min-nies taʼ ‘kull ilsien’ f’pajjiżna stess. (Apokalissi 14:6) Kif nistgħu ngħinu lil dawk fit-territorju tagħna li jitkellmu lingwa differenti minn tagħna? (1 Timotju 2:4) Nistgħu nużaw l-apparat għas-sajd xieraq, biex ngħidu hekk. Offri lil dawn l-individwi letteratura bil-lingwa tagħhom. Jekk inhu possibbli, irranġa biex Xhud li jitkellem il-lingwa tagħhom imur iżurhom. (Atti 22:2) Issa sar iktar faċli biex isiru dawn l-arranġamenti, ladarba ħafna Xhieda tgħallmu jitkellmu lingwa oħra sabiex jgħinu lill-barranin isiru dixxipli taʼ Kristu. Rapporti juru li jekk tgħin b’dan il-mod tgawdi esperjenza premjanti.
15, 16. (a) Liema eżempji juru illi huwa premjanti li tgħin lil dawk li jitkellmu lingwa barranija? (b) Liema mistoqsijiet rigward is-servizz fil-qasam tal-lingwa barranija nistgħu nikkunsidraw?
15 Ikkunsidra żewġ eżempji mill-Olanda, fejn l-ippridkar tas-Saltna qed jiġi organizzat f’34 lingwa. Koppja li huma Xhieda offrew minn jeddhom biex imorru jagħmlu dixxipli fost immigranti li jitkellmu l-Pollakk. Ir-reazzjoni għall-isforzi tagħhom tant kienet kbira li r-raġel ħass li kellu jnaqqas mix-xogħol sekulari sabiex ikollu ġurnata oħra fil-ġimgħa disponibbli biex jistudja maʼ dawk li kienu qed juru interess. Wara ftit taż-żmien, it-tnejn li huma kienu qed jikkonduċu iktar minn 20 studju tal-Bibbja kull ġimgħa. Huma qalu: “Il-ministeru tagħna jagħmilna ferħanin ħafna.” Dawk li jagħmlu dixxipli jħossuhom ferħanin speċjalment meta dawk li jisimgħu l-veritajiet tal-Bibbja bil-lingwa tagħhom stess jiġu mqanqlin jesprimu l-apprezzament tagħhom. Per eżempju, waqt laqgħa li nżammet bil-Vjetnamiż, raġel imdaħħal fiż-żmien qam bil-wieqfa u talab permess biex jitkellem. Bid-dmugħ f’għajnejh, hu qal lix-Xhieda: “Grazzi taʼ l-isforzi li qed tagħmlu biex titgħallmu l-lingwa diffiċli tiegħi. Jien grat ħafna li fi xjuħiti qed nitgħallem tant affarijiet meraviljużi mill-Bibbja.”
16 Għalhekk, mhix taʼ sorpriża li dawk li jaqdu f’kongregazzjonijiet taʼ lingwa barranija jħossuhom ippremjati bil-kbir. Koppja mill-Ingilterra qalet: “Il-ministeru fil-qasam tal-lingwa barranija huwa wieħed mill-iktar eċċitanti li esperjenzajna waqt l-40 sena tagħna fis-servizz tas-Saltna.” Tistaʼ forsi tirranġa ċ-ċirkustanzi tiegħek sabiex tieħu sehem f’dan il-ministeru tant stimulanti? Jekk għadek tattendi l-iskola, tistaʼ tistudja lingwa barranija bħala preparazzjoni għal dan it-tip taʼ ministeru? Il-fatt li tagħmel dan jistaʼ jiftaħlek it-triq għal ħajja sodisfaċenti mimlija barkiet. (Proverbji 10:22) Għala ma tiddiskutix dan mal-ġenituri tiegħek?
Invarjaw il-Metodi Tagħna
17. Kif nistgħu forsi nilħqu iktar nies fit-territorju tal-kongregazzjoni tagħna stess?
17 Aħna nifhmu li minħabba ċ-ċirkustanzi, il-maġġuranza minna ma nistgħux nitfgħu “x-xbiek” tagħna fit-territorji taʼ lingwa barranija. Madankollu, forsi nistgħu nilħqu iktar nies milli qed nilħqu issa fit-territorju tal-kongregazzjoni tagħna stess. Kif? Billi invarjaw, mhux il-messaġġ tagħna, imma l-metodi tagħna. F’ħafna postijiet hemm numru li dejjem qed jiżdied taʼ wħud li jgħixu f’bini b’sigurtà kbira. Ħafna oħrajn ma jkunux id-dar meta nżuruhom waqt il-ministeru tagħna minn dar għal dar. Għalhekk forsi hemm bżonn li nitfgħu “x-xbiek” tagħna f’ħinijiet differenti u f’postijiet differenti. B’hekk inkunu qed nimitaw lil Ġesù. Hu sab modi kif jitkellem man-nies f’diversi sitwazzjonijiet.—Mattew 9:9; Luqa 19:1-10; Ġwanni 4:6-15.
18. L-ippridkar f’sitwazzjonijiet differenti kif wera li hu effettiv? (Inkludi l-kaxxa “Nagħmlu Dixxipli min-Nies tan-Negozju.”)
18 F’xi partijiet tad-dinja, l-ippridkar kulfejn hemm in-nies huwa metodu importanti biex nagħmlu dixxipli. Uħud esperjenzati f’li jagħmlu dixxipli qed jagħtu iktar attenzjoni għall-ippridkar f’postijiet differenti. Minbarra li jieħdu sehem fil-ministeru minn dar għal dar, xi pubblikaturi issa qed jippridkaw fl-ajruporti, fl-uffiċċji, fil-ħwienet, f’postijiet fejn jipparkjaw il-karozzi, fejn in-nies jistennew il-karozzi tal-linja, fit-toroq, fil-ġonna, fejn il-baħar, u f’postijiet oħra. Numru mhux ħażin taʼ Xhieda li m’ilhomx li tgħammdu fil-Ħawajj ġew kuntattjati għall-ewwel darba f’postijiet bħal dawn. Li invarjaw il-metodi tagħna jgħinna nwettqu bis-sħiħ il-kmand taʼ Ġesù biex nagħmlu dixxipli.—1 Korintin 9:22, 23.
19. Liema aspetti tal-kmand li tana Ġesù se nikkunsidraw fl-artiklu li jmiss?
19 L-inkarigu taʼ Ġesù biex nagħmlu dixxipli inkluda dettalji mhux biss dwar għala u fejn għandna nagħmlu dan ix-xogħol, imma wkoll dwar xiex nippridkaw u sa meta għandna nkomplu nwettquh. Dawn iż-żewġ aspetti tal-kmand li tana Ġesù se jiġu kunsidrati fl-artiklu li jmiss.
[Noti taʼ taħt]
^ par. 2 Se nikkunsidraw l-ewwel żewġ mistoqsijiet f’dan l-artiklu. L-aħħar żewġ mistoqsijiet se jiġu kunsidrati fl-artiklu li jmiss.
^ par. 8 Raġunijiet oħra għala nippridkaw jinsabu fi Proverbji 10:5; Għamos 3:8; Mattew 24:42; Mark 12:17; Rumani 1:14, 15.
^ par. 12 Għal iktar informazzjoni dwar it-twettiq taʼ din il-profezija, ara t-Torri taʼ l-Għassa tal-15 taʼ Mejju, 2001, paġna 12, u l-Profezija taʼ Isaija—Dawl għall-Bnedmin Kollha, it-Tieni Volum, paġna 408, pubblikati mix-Xhieda taʼ Jehovah.
Tiftakar Int?
• Għal liema raġunijiet u b’liema motiv nieħdu sehem fl-ippridkar tas-Saltna u li nagħmlu dixxipli?
• Il-qaddejja taʼ Jehovah illum sa liema punt wettqu l-inkarigu taʼ Ġesù biex jagħmlu dixxipli min-nies tal-ġnus kollha?
• Kif nistgħu invarjaw ‘il-metodu tas-sajd’ tagħna, u għala għandna nagħmlu dan?
[Mistoqsijiet taʼ Studju]
[Kaxxa/Stampi f’paġna 10]
Pubblikazzjonijiet għal Dawk b’Nuqqas taʼ Dawl
Albert huwa anzjan Kristjan u ministru full-time li jgħix fl-Istati Uniti. Hu nieqes mid-dawl. Il-letteratura Biblika bil-Braille tgħinu jkun iktar effettiv fil-ministeru tiegħu, kif ukoll biex iwettaq l-attivitajiet tiegħu bħala indokratur tas-servizz. Kif qed ikampa maʼ l-inkarigu tiegħu fil-kongregazzjoni?
“Aħna qatt ma kellna indokratur tas-servizz effettiv daqs Albert fil-kongregazzjoni tagħna,” jgħid James, l-indokratur li jippresiedi. Albert hu wieħed minn madwar 5,000 persuna neqsin mid-dawl fl-Istati Uniti li, matul is-snin, irċivew pubblikazzjonijiet ibbażati mill-Bibbja bil-Braille Ingliż u Spanjol. Fil-fatt, mill-1912 ’il quddiem, il-klassi taʼ l-ilsir leali pprovdiet iktar minn mitt pubblikazzjoni differenti bil-Braille. Permezz taʼ metodi avanzati, fil-preżent l-istamperiji tax-Xhieda taʼ Jehovah jipproduċu miljuni taʼ paġni bil-Braille kull sena f’iktar minn għaxar lingwi u jqassmuhom f’iktar minn 70 pajjiż. Taf lil xi ħadd li jistaʼ jibbenefika mill-pubblikazzjonijiet ibbażati fuq il-Bibbja għal dawk b’nuqqas taʼ dawl?
[Kaxxa/Stampa f’paġna 11]
L-Użu tal-Lingwa tas-Sinjali biex Nagħmlu Dixxipli
Eluf taʼ Xhieda madwar id-dinja, inkluż ħafna żgħażagħ żelużi, tgħallmu l-lingwa tas-sinjali biex jgħinu lil dawk neqsin mis-smigħ isiru dixxipli taʼ Kristu. Bħala riżultat, fil-Brażil biss, 63 individwu neqsin mis-smigħ tgħammdu f’sena reċenti u 35 Xhud neqsin mis-smigħ f’dan il-post jaqdu bħala evanġelizzaturi full-time. Madwar id-dinja, hemm iktar minn 1,200 kongregazzjoni u grupp tal-lingwa tas-sinjali. L-uniku circuit fir-Russja tal-lingwa tas-sinjali huwa, b’mod ġeografiku, l-akbar circuit fid-dinja, għax ikopri r-Russja kollha!
[Kaxxa f’paġna 12]
Nagħmlu Dixxipli min-Nies tan-Negozju
Waqt li kienet qed iżżur lin-nies tan-negozju fl-uffiċċji fejn jaħdmu, Xhud fil-Ħawajj iltaqgħet maʼ direttur taʼ kumpanija tat-trasport. Għalkemm kellu ħafna x’jagħmel, ir-raġel aċċetta li jistudja l-Bibbja għal 30 minuta kull ġimgħa fl-uffiċċju tiegħu. Kull nhar t’Erbgħa fil-għodu, hu jgħid lill-ħaddiema tiegħu biex ma jtellfuhx bit-telefonati ħalli b’hekk jikkonċentra għalkollox fuq l-istudju. Xhud oħra fil-Ħawajj tistudja l-Bibbja darba f’ġimgħa maʼ sid taʼ ħanut fejn isewwu ż-żraben. L-istudju jinżamm hemmhekk fuq il-bank tal-ħanut. Meta jidħol xi klijent, ix-Xhud tersaq fil-ġenb. Meta l-klijent jitlaq, huma jkomplu bl-istudju.
Kemm id-direttur u kemm is-sid tal-ħanut ġew kuntattjati għaliex ix-Xhieda ħadu l-inizjattiva biex jitfgħu “x-xbiek” tagħhom f’postijiet differenti. Tistaʼ taħseb f’postijiet fit-territorju tal-kongregazzjoni tiegħek fejn tistaʼ tikkuntattja nies li huwa diffiċli biex issibhom id-dar?
[Stampa f’paġna 12]
Tistaʼ taqdi f’qasam taʼ lingwa barranija?