“Sabiex Tagħmlu Isem Jehovah Magħruf”

MAD-​DINJA kollha, ir-​rivisti It-​Torri taʼ l-​Għassa u Stenbaħ!, li joħorġu flimkien, huma apprezzati għall-​kontenut spiritwali u l-​valur informattiv tagħhom. Dan jidher ċar minn dak li kitbet waħda qarrejja minn Franza f’din l-​ittra:

“Proprjament, jien żagħżugħa mill-​Afrika u ma tantx naf skola. M’ilux wisq bdejt naqra r-​rivisti tagħkom. Is-​suġġetti tant jolqtuni li qed niskopri l-​valur tal-​qari. Grazzi għalikom, tejjibt il-​vokabolarju tiegħi u nistaʼ nikteb ittra b’inqas żbalji.

“Niskanta kif tippubblikaw artikli fuq kull ħaġa li għandha x’taqsam mal-​bniedem, il-​pjaneta, u l-​Ħallieq. Dawn l-​artikli tant huma faċli biex tifhimhom li jġagħluk tkun trid issir qarrej ħerqan. M’hemm ħadd iktar li għandu l-​abbiltà li jgħallem fl-​istess ħin lil kull tip taʼ nies.

“Niskanta wkoll meta nara li dan kollu ma jsirx għall-​qligħ tal-​flus, imma sempliċement sabiex tagħmlu isem Jehovah magħruf. Naf li għandkom l-​approvazzjoni tiegħu, u nirringrazzjakom. Jekk jogħġobkom, komplu strieħu fuq il-​Ħallieq sabiex jagħtikom is-​saħħa li tgħallmu.”

Ix-Xhieda taʼ Jehovah bħalissa qed ikomplu bix-​xogħol edukattiv tagħhom minn fuq il-​Bibbja f’235 pajjiż. It-​Torri taʼ l-​Għassa huwa pubblikat b’148 lingwa u Stenbaħ! b’87 lingwa. Dawn ir-​rivisti m’humiex stampati biex ifaħħru lil xi bniedem. Il-​pariri bbażati fuq il-​Bibbja u l-​informazzjoni aġġornata misjuba fihom għandhom l-​iskop li jonoraw lill-​Ħallieq, li jgħid: “Jien [Jehovah] . . . ngħallmek għall-​ġid tiegħek.” (Isaija 48:17) Jalla tagħmel il-​ġid lilek innifsek billi taqra l-​Iskrittura Mqaddsa regolarment flimkien maʼ dawn l-​għajnuniet għall-​istudju tal-​Bibbja.