Titgħaxxaq Int bil-“Liġi tal-Mulej”?
Titgħaxxaq Int bil-“Liġi tal-Mulej”?
“Hieni l-bniedem li. . . fil-liġi tal-Mulej hi l-għaxqa tiegħu.”—SALM 1:1, 2.
1. Għala aħna henjin bħala l-qaddejja taʼ Jehovah?
JEHOVAH iberikna u jappoġġana bħala l-qaddejja leali tiegħu. Veru, aħna niffaċċjaw ħafna provi. Imma ngawdu wkoll hena ġenwin. Din m’hijiex xi ħaġa stramba, għaliex aħna naqdu lill-“Alla l-hieni,” u l-ispirtu qaddis tiegħu jipproduċi lhena f’qalbna. (1 Timotju 1:11, NW; Galatin 5:22) L-hena hu kundizzjoni taʼ ferħ li tiġi meta individwu jkun qed jistenna xi ħaġa tajba jew jiksibha. U Missierna tas-sema żgur li jagħtina għotjiet tajbin. (Ġakbu 1:17) Mhux taʼ b’xejn li aħna henjin!
2. Liema salmi se niddiskutu?
2 L-hena jispikka ħafna fil-ktieb tas-Salmi. Per eżempju, dan hu minnu dwar Salmi 1 u 2. Is-segwaċi tal-bidu taʼ Ġesù indikaw li t-tieni salm inkiteb mis-Sultan David taʼ Iżrael. (Atti 4:25, 26) Il-kittieb taʼ l-ewwel salm, li ma nafux x’jismu, jibda l-għanja ispirata tiegħu bil-kliem: “Hieni l-bniedem li ma jimxix fuq il-parir tal-ħżiena.” (Salm 1:1) F’dan l-artiklu u f’dak li jmiss, ejja naraw kif Salmi 1 u 2 jagħtuna raġuni għalxiex nifirħu.
Is-Sigriet taʼ l-Hena
3. Skond Salm 1:1, x’inhuma xi raġunijiet għala min josserva l-liġijiet t’Alla hu hieni?
3 Salm 1 juri għala individwu li josserva l-liġijiet t’Alla hu hieni. Is-salmista jagħti xi raġunijiet għal dan l-hena u jkanta: “Hieni l-bniedem li ma jimxix fuq il-parir tal-ħżiena, li ma jiqafx fi triq il-ħatjin, li ma joqgħodx fil-laqgħat taż-żeblieħa.”—Salm 1:1.
4. Liema ħajja eżemplari għexu Żakkarija u Eliżabetta?
4 Sabiex inkunu verament henjin, irridu nimxu fi qbil mal-ħtiġijiet ġusti taʼ Jehovah. Żakkarija u Eliżabetta, li kellhom il-privileġġ li jsiru l-ġenituri taʼ Ġwanni l-Għammied, “kienu nies ġusti quddiem Alla u jimxu bla nuqqas taʼ xejn skond il-preċetti u l-kmandamenti kollha tal-Mulej.” (Luqa 1:5, 6) Aħna nistgħu nkunu henjin jekk infittxu li ngħixu ħajja bħal din u nirrifjutaw b’mod sod ‘li nimxu fuq il-parir tal-ħżiena’ jew li nħalluhom jiggwidawna bil-pariri ħżiena tagħhom.
5. X’jistaʼ jgħinna nevitaw “triq il-ħatjin”?
5 Jekk niċħdu l-mod taʼ ħsieb tal-ħżiena, mhux se noqogħdu “fi triq il-ħatjin.” Fil-fatt, żgur li mhux se nkunu fejn spiss ikunu huma—f’postijiet taʼ divertiment immorali jew taʼ fama ħażina. Imma xi ngħidu jekk nitħajru ningħaqdu mal-midinbin fl-imġiba mhux skritturali tagħhom? F’dak il-każ, ħa nitolbu lil Alla għall-għajnuna tiegħu fi qbil mal-kliem taʼ l-appostlu Pawlu: “La tintrabtux mal-pagani taħt madmad wieħed li ma jiġikomx. X’għandhom x’jaqsmu bejniethom il-ġustizzja u l-ħażen? X’xirka hemm bejn id-dawl u d-dlam?” (2 Korintin 6:14) Jekk nistrieħu fuq Alla u aħna ‘safja f’qalbna,’ niċħdu l-ispirtu u l-mod taʼ ħajja tal-midinbin u jkollna motivi u xewqat nodfa, flimkien maʼ “fidi sinċiera.”—Mattew 5:8; 1 Timotju 1:5.
6. Għala għandna noqogħdu attenti minn dawk li jwaqqgħu għaċ-ċajt?
6 Żgur li ‘ma rridux noqogħdu fil-laqgħat taż-żeblieħa’ jekk irridu nogħġbu lil Jehovah. Xi wħud iwaqqgħu għaċ-ċajt il-fatt stess li wieħed josserva l-liġijiet t’Alla stess, imma f’dawn “l-aħħar jiem,” dawk li qabel kienu Kristjani u li issa saru apostati spiss jagħmlu dan b’disprezz. L-appostlu Pawlu wissa lil sħabu fit-twemmin: “Ħuti għeżież . . . tafu, l-ewwelnett: li fl-aħħar jiem jiġu nies kollhom tmaqdir u jwaqqgħu kollox għaż-żuffjett, nies li jaġixxu skond ix-xewqat ħżiena tagħhom; u jibdew jgħidu: ‘Fejn hi l-wegħda tal-miġja tiegħu? Għax sa minn meta mietu missirijietna, kollox baqaʼ miexi kif kien sa mill-bidu tal-ħolqien.’ ” (2 Pietru 3:1-4) Jekk qatt ma ‘noqogħdu fil-laqgħat taż-żeblieħa,’ nevitaw id-diżastru li żgur se jiġi fuqhom.—Proverbji 1:22-27.
7. Għala għandna nieħdu bis-serjetà l-kliem li nsibu f’Salm 1:1?
7 Jekk ma niħdux bis-serjetà l-kliem li jiftaħ bih Salm 1 nistgħu nitilfu l-ispiritwalità li ksibna permezz taʼ l-istudju taʼ l-Iskrittura. Fil-fatt, imbagħad nistgħu mmorru mill-ħażin għall-agħar. It-triq għan-niżla nistgħu naqbduha billi nsegwu l-pariri tal-ħżiena. Imbagħad forsi nibdew nissieħbu magħhom fuq bażi regulari. Maż-żmien, nistgħu saħansitra nsiru apostati bla fidi li jwaqqgħu l-affarijiet għaċ-ċajt. M’għandniex xi ngħidu, sħubija maʼ nies ħżiena tistaʼ tkebbes fina spirtu li ma jkunx fi qbil mar-rieda divina, u dan jistaʼ jkisser ir-relazzjoni tagħna m’Alla Jehovah. (1 Korintin 15:33; Ġakbu 4:4) Jalla qatt ma nħallu dan jiġri lilna!
8. X’se jgħinna nżommu moħħna ffokat fuq affarijiet spiritwali?
8 It-talb se jgħinna nżommu moħħna ffokat fuq l-affarijiet spiritwali u nevitaw is-sħubija maʼ wħud li huma ħżiena. Pawlu kiteb: “Tħabbtu raskom b’xejn. Fit-talb kollu tagħkom itolbu u uru lil Alla xi jkollkom bżonn, u iżżuh ħajr. U s-sliem taʼ Alla, sliem li jgħaddi kull ma l-moħħ jistaʼ jifhem, iżommilkom qalbkom u moħħkom sħaħ fi Kristu Ġesù.” L-appostlu inkuraġġiena naħsbu f’kull ma hu veru, f’kull ma hu xieraq, f’kull ma hu ġust, f’kull ma hu safi, f’kull ma jiġbed l-imħabba, f’kull ma jistħoqqlu l-ġieħ, f’kull ma hu virtù, f’kull ma ħaqqu t-tifħir. (Filippin 4:6-8) Ejja naġixxu fi qbil mal-parir taʼ Pawlu u ma naqgħu qatt fil-livell baxx tal-ħżiena.
9. Għalkemm nevitaw prattiċi ħżiena, kif nipprovaw ngħinu lil kull xorta taʼ nies?
9 Għalkemm niċħdu prattiċi ħżiena, aħna nagħtu xiehda bit-tattika lil oħrajn, bl-istess mod bħalma l-appostlu Pawlu tkellem mal-Gvernatur Ruman Feliċ “fuq il-ġustizzja, fuq it-trażżin tal-passjonijiet u fuq il-ġudizzju li għad irid jiġi.” (Atti 24:24, 25; Kolossin 4:6) Aħna nippridkaw l-aħbar tajba tas-Saltna lil kull xorta taʼ nies, u nittrattawhom b’qalb tajba. Aħna fiduċjużi li dawk li għandhom attitudni xierqa lejn il-ħajja taʼ dejjem se jemmnu u jitgħaxxqu bil-liġi t’Alla.—Atti 13:48.
“Fil-Liġi tal-Mulej Hi l-Għaxqa Tiegħu”
10. X’se jgħinna biex il-ħin li nqattgħu fi studju persunali jħalli effett dejjiemi f’moħħna u f’qalbna?
10 Dwar il-bniedem hieni s-salmista jkompli jgħid: “Fil-liġi tal-Mulej hi l-għaxqa tiegħu, lejl u nhar [“jaqra minn taħt l-ilsien,” NW] fil-liġi tiegħu.” (Salm 1:2) Bħala l-qaddejja t’Alla, aħna nsibu ‘l-għaxqa tagħna fil-liġi tal-Mulej.’ Meta jkun possibbli, waqt perijodi taʼ studju persunali u meditazzjoni, aħna nistgħu naqraw “minn taħt l-ilsien” u nisimgħu l-kliem li naqraw. Jekk nagħmlu dan meta naqraw kwalunkwe parti mill-Iskrittura niġu megħjunin biex dak li naqraw iħalli effett dejjiemi f’moħħna u f’qalbna.
11. Għala għandna naqraw il-Bibbja “lejl u nhar”?
11 “L-ilsir leali u diskret” iħeġġiġna naqraw il-Bibbja kuljum. (Mattew 24:45, NW) Minħabba x-xewqa qawwija li nsiru nafu aħjar il-messaġġ t’Alla għall-umanità, ikun tajjeb li naqraw il-Bibbja “lejl u nhar”—iva, anki meta għal xi raġuni ma nkunux nistgħu norqdu. Pietru ħeġġiġna: “Bħal trabi tat-twelid, ixxennqu għall-ħalib safi, il-ħalib tar-ruħ [“tal-kelma,” KŻ], biex bih tikbru sa ma taslu għas-salvazzjoni.” (1 Pietru 2:1, 2) Titgħaxxaq int bil-qari tal-Bibbja kuljum u bil-meditazzjoni fuq il-Kelma t’Alla u l-iskopijiet tiegħu bil-lejl? Is-salmista hekk kien jagħmel.—Salm 63:7 (63:6, NW).
12. X’se nagħmlu jekk nitgħaxxqu bil-liġi taʼ Jehovah?
12 Il-ferħ etern tagħna jiddependi minn kemm nitgħaxxqu bil-liġi t’Alla. Hija perfetta u ġusta, u hemm premju kbir għal min jgħix fi qbil magħha. (Salm 19:8-12 [19:7-11, NW]) Id-dixxiplu Ġakbu kiteb: “Dak li jgħarbel sewwa l-liġi perfetta tal-ħelsien, u jżomm sħiħ magħha, ma jkunx wieħed li jismaʼ biss u jinsa, iżda jkun wieħed li jagħmilha; hieni dan fl-għemil tiegħu.” (Ġakbu 1:25) Jekk aħna verament nitgħaxxqu bil-liġi taʼ Jehovah, allura kuljum se nwarrbu l-ħin biex nikkunsidraw l-affarijiet spiritwali. Tabilħaqq, aħna se niġu mqanqlin biex ‘ngħarblu kollox, sa fil-qiegħ taʼ Alla’ u nżommu l-interessi tas-Saltna l-ewwel f’ħajjitna.—1 Korintin 2:10-13; Mattew 6:33.
“Hu bħal Siġra”
13-15. F’liema sens nistgħu nkunu bħal siġra mħawla ħdejn sors abbundanti taʼ ilma?
13 Is-salmista jkompli jiddeskrivi bniedem sewwa u jgħid: “Hu bħal siġra mħawwla ħdejn nixxigħat taʼ l-ilma li tagħmel il-frott fi żmienha, u l-weraq tagħha ma jidbielx; hu jirnexxi f’kull ma jagħmel.” (Salm 1:3) Bħall-bnedmin imperfetti kollha, aħna li naqdu lil Jehovah ngħaddu minn diffikultajiet f’ħajjitna. (Ġob 14:1) Nistgħu nbatu minħabba l-persekuzzjoni u diversi provi oħra konnessi mal-fidi tagħna. (Mattew 5:10-12) Madankollu, bl-għajnuna t’Alla jirnexxilna nifilħu għall-provi, l-istess bħalma siġra b’saħħitha tiflaħ għal irwiefen li jkunu qawwijin iktar mis-soltu.
14 Siġra li tinżeraʼ fejn sors taʼ ilma li ma jieqaf qatt ma tinxifx f’temp sħun jew waqt xi nixfa. Jekk aħna wħud li nibżgħu minn Alla, is-saħħa tagħna tiġi minn Sors li ma jieqaf qatt—Alla Jehovah. Pawlu kien idur lejn Alla għall-għajnuna u setaʼ jgħid: “Għal kollox niflaħ bis-saħħa taʼ dak [Jehovah] li jqawwini.” (Filippin 4:13) Meta niġu gwidati u sostnuti spiritwalment mill-ispirtu qaddis taʼ Jehovah, aħna ma nidbilux, ma nsirux bla frott u mmutu spiritwalment. Aħna nagħmlu l-frott fis-servizz t’Alla u nuru wkoll il-frott taʼ l-ispirtu tiegħu.—Ġeremija 17:7, 8; Galatin 5:22, 23.
15 Billi juża l-kelma Ebrajka li tiġi tradotta “bħal,” is-salmista jagħmel tixbiha. Hu jxebbah żewġ affarijiet li huma differenti, għalkemm għandhom kwalità partikulari li hi l-istess. Il-bnedmin u s-siġar huma differenti, imma l-ġmiel taʼ siġra mħawla ħdejn sors abbundanti taʼ ilma milli jidher ifakkar lis-salmista fil-prosperità spiritwali taʼ min “fil-liġi tal-Mulej hi l-għaxqa tiegħu.” Jekk aħna nitgħaxxqu bil-liġi t’Alla, il-jiem tagħna jistgħu jkunu numerużi bħal dawk taʼ siġra. Fil-fatt nistgħu ngħixu għal dejjem.—Ġwanni 17:3.
16. Għala u b’liema mod ‘nirnexxu f’kulma nagħmlu’?
16 Hekk kif inkomplu nipprovaw ngħixu ħajja sewwa, Jehovah jgħinna nissaportu l-provi u d-diffikultajiet. Aħna nkunu henjin u nagħmlu l-frott fis-servizz t’Alla. (Mattew 13:23; Luqa 8:15) ‘Nirnexxu f’kull ma nagħmlu’ minħabba li l-mira prinċipali tagħna hi li nagħmlu r-rieda taʼ Jehovah. Peress li l-iskopijiet tiegħu dejjem jirnexxu u aħna nsibu l-għaxqa tagħna fil-kmandamenti tiegħu, nimxu ’l quddiem spiritwalment. (Ġenesi 39:23; Ġożwè 1:7, 8; Isaija 55:11) Dan hu minnu anki meta niffaċċjaw l-inkwiet.—Salm 112:1-3; 3 Ġwanni 2.
Il-Ħżiena Donnhom Jirnexxu
17, 18. (a) Is-salmista maʼ xiex ixebbah lill-ħżiena? (b) Saħansitra jekk il-ħżiena jirnexxu materjalment, għala m’għandhom ebda sigurtà dejjiema?
17 Kemm hi differenti l-ħajja tal-ħżiena minn dik tat-tajbin! Il-ħżiena jistgħu jidhru li qed jirnexxu materjalment għal xi żmien, imma huma mhux qed jirnexxu spiritwalment. Dan jidher ċar mill-kliem li jkompli jgħid is-salmista: “Mhux hekk il-ħżiena, mhux hekk; iżda huma bħal tibna [“karfa,” NW] li jtajjarha r-riħ. Għalhekk il-ħżiena ma jifilħux għall-ħaqq, ma joqogħdux il-ħatja fil-ġemgħat tat-tajbin.” (Salm 1:4, 5) Innota li s-salmista jgħid, “mhux hekk il-ħżiena, mhux hekk.” Hu qed jgħid li l-ħżiena m’humiex bħal dawk li josservaw il-liġijiet t’Alla u li għadhom kif ġew imqabbla maʼ siġar li jagħmlu l-frott u li jdumu ħajjin.
18 Anki jekk il-ħżiena jirnexxu materjalment, huma m’għandhom ebda sigurtà dejjiema. (Salm 37:16; 73:3, 12) Huma bħar-raġel għani u iblah li semma Ġesù fit-tixbiha li ta, meta ntalab jagħmel deċiżjoni fi kwistjoni li kienet tinvolvi l-wirt. Ġesù qal lil dawk li kienu preżenti: “Iftħu għajnejkom u ħarsu rwieħkom minn kull regħba, għax imqar jekk wieħed ikollu bir-radam, ħajtu ma tiddependix mill-ġid li jkollu.” Ġesù wera dan il-punt billi qal li r-rabaʼ taʼ ċertu raġel għani tant ipproduċa li hu ppjana biex iħott l-imħażen li kellu u jibni oħrajn akbar ħalli jesgħu ġidu kollu. Imbagħad ir-raġel kiel, xorob, u xxala. Imma Alla qallu: “Iblah li int! Dan il-lejl stess jitolbuk ruħek lura. U l-ħwejjeġ li ħejjejt għalik, taʼ min ikunu?” Biex jenfasizza l-punt tiegħu, Ġesù kompla jżid: “Hekk jiġrilu min jiġmaʼ l-ġid għalih innifsu bla ma jistagħna quddiem Alla.”—Luqa 12:13-21.
19, 20. (a) Iddeskrivi l-proċess li kienu jużaw fl-antik biex jidirsu u jderru. (b) Għala l-ħżiena jitqabblu mal-karfa?
19 Il-ħżiena ma ‘jistagħnux quddiem Alla.’ Għalhekk, huma m’għandhomx sigurtà bħalma m’għandhiex sigurtà l-karfa, il-qoxra rqiqa tal-qamħ. Fl-antik, wara li jinħasad, il-qamħ kien jittieħed fil-qiegħa tad-dris, post ċatt li ġeneralment kien ikun fl-għoli. Hemmhekk il-qamħ kien jiġi mfarrak u separat mill-karfa permezz taʼ slitti miġbudin mill-annimali u li minn taħt kien ikollhom snien jaqtgħu tal-ġebel jew tal-ħadid. Imbagħad, kienu jużaw il-midra biex iderru t-taħlita kollha, billi jiġbruha u jgħolluha fl-arja kontra r-riħ. (Isaija 30:24) Iż-żerriegħa tal-qamħ kienet taqaʼ lura fuq il-qiegħa tad-dris, waqt li ż-żiffa kienet titfaʼ t-tiben fil-ġenb u ttajjar ’l hemm il-karfa. (Rut 3:2) Wara li ż-żerriegħa tal-qamħ kienet tiġi mgħoddija minn għarbiel sabiex jitneħħa l-ġebel żgħir u affarijiet oħra, kienet tkun lesta biex tiġi maħżuna jew mitħuna. (Luqa 22:31) Imma l-karfa kienet tkun telqet kollha.
20 Bħalma ż-żerriegħa tal-qamħ kienet taqaʼ fl-art u tiġi preservata waqt li l-karfa kienet tittajjar mir-riħ, hekk ukoll il-ġusti se jibqgħu u l-ħżiena jitneħħew. Għalhekk, żgur li aħna henjin minħabba li dawn l-uħud li jagħmlu l-ħażen dalwaqt se jispiċċaw għal dejjem. Ladarba dawn ikunu tneħħew min-nofs, min jitgħaxxaq bil-liġi taʼ Jehovah se jitbierek bil-kbir. Tabilħaqq, il-bnedmin ubbidjenti eventwalment se jirċievu r-rigal t’Alla taʼ ħajja taʼ dejjem.—Mattew 25:34-36; Rumani 6:23.
“Triq it-Tajbin” Imbierka
21. Kif inhu li Jehovah ‘jaf triq it-tajbin’?
21 L-ewwel salm jikkonkludi b’dan il-kliem: “Għax triq it-tajbin il-Mulej jafha; imma triq il-ħżiena tintemm fix-xejn.” (Salm 1:6) Alla kif ‘jaf triq it-tajbin’? Jekk aħna qed ngħixu ħajja ġusta, nistgħu nkunu ċerti li Missierna tas-sema jinnota kif inħarsu l-liġijiet tiegħu f’ħajjitna u jqisna bħala l-qaddejja approvati tiegħu. Min-naħa tagħna, aħna nistgħu u għandna nitfgħu l-ansjetà kollha tagħna fuqu bil-konvinzjoni li hu tassew jimpurtah minna.—Eżekjel 34:11; 1 Pietru 5:6, 7.
22, 23. X’se jiġrilhom il-ħżiena u t-tajbin?
22 “Triq it-tajbin” se tibqaʼ għal dejjem, imma l-ħżiena li ma jridux jaġġustaw ruħhom se jinqerdu minħabba l-kundanna taʼ Jehovah. U t-“triq” tagħhom, jew il-mod kif jgħixu ħajjithom, se tintemm magħhom. Jistaʼ jkollna fiduċja fit-twettiq taʼ kliem David: “Ftit ieħor, u l-ħażin ma jkunx aktar; għad tħares fejn kien u ma ssibux. Imma l-ġwejdin għad jirtu l-art, u bi sliem kotran jitgħaxxqu. Il-ġusti jirtu l-art, u jgħammru fiha għal dejjem.”—Salm 37:10, 11, 29.
23 X’ferħ se nesperjenzaw jekk ikollna l-privileġġ li ngħixu f’ġenna taʼ l-art meta l-ħżiena mhux se jibqgħu jeżistu! Il-ġwejdin u t-tajbin imbagħad se jgawdu paċi vera għaliex se jitgħaxxqu bil-“liġi tal-Mulej” għal dejjem. Madankollu, qabel ma dan iseħħ, irid jitwettaq “id-digriet tal-Mulej.” (Salm 2:7a) L-artiklu li jmiss se jgħinna naraw x’inhu dan id-digriet u x’se jkun ifisser għalina u għall-bnedmin kollha.
Int Kif Twieġeb?
• Individwu li josserva l-liġijiet t’Alla għala hu hieni?
• X’juri li aħna nitgħaxxqu bil-liġi taʼ Jehovah?
• Individwu kif jistaʼ jkun bħal siġra msoqqija sew?
• Triq it-tajbin kif inhi differenti minn triq il-ħżiena?
[Mistoqsijiet taʼ Studju]
[Stampa f’paġna 11]
It-talb se jgħinna nevitaw is-sħubija mal-ħżiena
[Stampa f’paġna 12]
Individwu tajjeb b’liema mod hu bħal siġra?