Iż-​Żwieġ Jistaʼ Jirnexxi fid-​Dinja taʼ Llum

“Ilbsu l-​imħabba, għax hi rabta perfetta li tgħaqqad.”—Kolossin 3:​14.

1, 2. (a) Liema fatt hu inkuraġġanti dwar il-​kongregazzjoni Kristjana? (b) Kif ikun żwieġ li jirnexxi?

 META nħarsu lejn il-​kongregazzjoni Kristjana, ma jqawwilniex qalbna li naraw tant koppji miżżewġin li ilhom leali lejn xulxin għal 10, 20, 30 sena jew saħansitra iktar? Huma baqgħu maʼ l-​imseħbin tagħhom fit-​tajjeb u l-​ħażin.​—Ġenesi 2:​24.

² Ħafna jammettu li ż-​żwieġ tagħhom ma kienx mingħajr sfidi. Osservatur wieħed kiteb: “Iż-​żwiġijiet hienja m’humiex mingħajr problemi. Ikollhom żminijiet tajbin u żminijiet ħżiena . . . Imma b’xi mod . . . nies henjin fiż-​żwieġ tagħhom baqgħu miżżewġin minkejja t-​[taqlib] tal-​ħajja moderna.” Koppji li rnexxew tgħallmu jkampaw mat-​taqlib u l-​kriżijiet li jiġu żgur minħabba l-​pressjonijiet tal-​ħajja, speċjalment jekk rabbew it-​tfal. L-​esperjenza għallmet lil dawn il-​koppji li l-​imħabba vera “ma tbatti qatt.”—1 Korintin 13:8.

3. L-​istatistiki x’jindikaw dwar iż-​żwieġ u d-​divorzju, u dan iqajjem liema mistoqsijiet?

³ B’kuntrast, miljuni taʼ żwiġijiet tkissru. Rapport wieħed jgħid: “Nofs iż-​żwiġijiet Amerikani llum huma mistennijin li jispiċċaw f’divorzju. U nofs dawk [id-divorzji] se jseħħu [qabel jgħaddu l-​ewwel tmien] snin taż-​żwieġ . . . Fost il-​75 fil-​mija min-​nies li jerġgħu jiżżewġu, 60 fil-​mija se jerġgħu jiddivorzjaw.” Anki pajjiżi li qabel kellhom rata tad-​divorzju baxxa meta mqabbla maʼ dik taʼ pajjiżi oħra issa qed jaraw bidla. Per eżempju, fil-​Ġappun ir-​rata tad-​divorzju kważi rdoppjat f’dawn l-​aħħar snin. Liema huma xi wħud mill-​pressjonijiet li wasslu għal din is-​sitwazzjoni, pressjonijiet li kultant jeffettwaw saħansitra lill-​membri tal-​kongregazzjoni Kristjana? X’hemm bżonn biex iż-​żwieġ jirnexxi minkejja l-​isforzi taʼ Satana biex idgħajjef dan l-​arranġament?

 Perikli li Għandek Tevita

4. Liema huma xi fatturi li jistgħu jdgħajfu ż-​żwieġ?

⁴ Il-​Kelma t’Alla tgħinna nifhmu l-​fatturi li jistgħu jdgħajfu ż-​żwieġ. Ikkunsidra, per eżempju, il-​kliem taʼ l-​appostlu Pawlu dwar il-​kundizzjonijiet li kellhom jeżistu f’dawn l-​aħħar jiem: “Fl-​aħħar jiem ikun hawn żminijiet kritiċi li diffiċli biex issib tarfhom. Għax in-​nies ikunu jħobbu lilhom infushom, iħobbu l-​flus, minfuħin bihom infushom, suppervi, midgħija, diżubbidjenti lejn il-​ġenituri, ingrati, żleali, mingħajr imħabba naturali, ma jkunux iridu jiftiehmu, kalunnjaturi, mingħajr rażna, feroċi, mingħajr imħabba għat-​tajjeb, tradituri, rashom iebsa, imkabbrin, iħobbu l-​pjaċiri minflok ma jħobbu lil Alla, ikollhom għamla taʼ devozzjoni lejn Alla imma ma jurux bil-​fatti l-​qawwa tagħha; nies bħal dawn aħrabhom.”—2 Timotju 3:​1-5.

5. Għala min ‘iħobb lilu nnifsu’ jkun qed jhedded iż-​żwieġ tiegħu, u x’inhu l-​parir tal-​Bibbja dwar dan?

⁵ Meta neżaminaw il-​kliem taʼ Pawlu, naraw li ħafna mill-​affarijiet li semma jistgħu jikkontribwixxu għat-​tkissir tar-​relazzjoni bejn il-​miżżewġin. Per eżempju, dawk li “jħobbu lilhom infushom” huma egoisti u ma jurux konsiderazzjoni lejn l-​oħrajn. L-​irġiel jew nisa li jħobbu biss lilhom infushom huma determinati li tgħaddi tagħhom. M’humiex flessibbli, ma jċedux. Tistaʼ attitudni bħal din tgħin biex iż-​żwieġ ikun hieni? Lanqas xejn. L-​appostlu Pawlu b’mod għaqli ta l-​parir lill-​Kristjani, inkluż il-​koppji miżżewġin: “[Ma għandkom tkunu qed] tagħmlu xejn bi ġlied jew bi kburija, imma b’umiltà tqisu lill-​oħrajn superjuri għalikom. Tfittxux l-​interessi persunali tagħkom biss, imma wkoll l-​interessi persunali taʼ l-​oħrajn.”​—Filippin 2:​3, 4.

6. Kif tistaʼ l-​imħabba għall-​flus iddgħajjef ir-​relazzjoni bejn il-​miżżewġin?

⁶ L-​imħabba għall-​flus tistaʼ tifred lir-​raġel u l-​mara. Pawlu wissa: “Dawk li huma determinati li jsiru għonja jaqgħu f’tentazzjoni u f’nassa u f’ħafna xewqat bla sens li jwasslu għall-​ħsara u li jixħtu lill-​bnedmin f’qerda u f’rovina. Għax l-​imħabba għall-​flus hi l-​għerq taʼ kull tip taʼ ħsara u, billi rawmu din l-​imħabba, xi wħud ġew żvijati mill-​fidi u ferew lilhom infushom b’ħafna weġgħat.” (1 Timotju 6:​9, 10) B’dispjaċir, it-​twissija taʼ Pawlu qed isseħħ f’ħafna żwiġijiet illum. Minħabba li jfittxu l-​għana, ħafna mseħbin fiż-​żwieġ jinjoraw il-​bżonnijiet tal-​parti l-​oħra, inkluż il-​bżonn bażiku għal appoġġ emozzjonali u sħubija regulari kollha mħabba.

7. F’ċerti każi, x’wassal għan-​nuqqas taʼ lealtà fiż-​żwieġ?

⁷ Pawlu qal ukoll li xi wħud fl-​aħħar jiem kienu se jkunu “żleali, mingħajr imħabba naturali, ma jkunux iridu jiftiehmu.” Il-​wegħda taż-​żwieġ hija waħda solenni li għandha twassal għal rabta permanenti, mhux għal tradiment. (Malakija 2:​14-​16) Però, xi wħud bdew jagħtu l-​attenzjoni romantika tagħhom lil individwi oħrajn li m’humiex l-​imseħbin tagħhom fiż-​żwieġ. Mara miżżewġa li għandha fuq it-​30 sena u li żewġha telaqha spjegat li anki qabel telaqha hu kien jaġixxi maʼ nisa oħra b’mod familjari żżejjed u b’affezzjoni żejda. Hu naqas li jirrikonoxxi li l-​imġiba tiegħu ma kinitx xierqa għal raġel miżżewweġ. Hi ħassitha mweġġgħa ħafna meta rat x’kien qed jiġri u bit-​tattika pprovat twissih dwar il-​perikli tat-​triq li kien qabad. Xorta waħda, hu għamel adulterju. Avolja ngħatawlu twissijiet b’qalb tajba, dak is-​sieħeb li għamel il-​ħażin ma riedx jagħti kas. Hu malajr waqaʼ fin-​nasba.​—Proverbji 6:​27-​29.

8. X’jistaʼ jwassal għall-​adulterju?

⁸ Kemm tagħti twissija ċara l-​Bibbja kontra l-​adulterju! “Hekk min jiżni hu bniedem bla moħħ, jeqred lilu nnifsu min jagħmel hekk.” (Proverbji 6:​32) Ġeneralment, l-​adulterju ma jkunx spontanju, għemil taʼ dak il-​ħin. Bħalma semma Ġakbu, wieħed mill-​kittieba tal-​Bibbja, dnub bħall-​adulterju ġeneralment isir biss wara li dak li jkun jaħseb fih u  jibqaʼ jaħseb fuq li jwettqu. (Ġakbu 1:​14, 15) L-​imseħbin li jagħmlu dan, bil-​mod il-​mod ma jibqgħux leali lejn il-​parti l-​oħra li jkunu wegħdulha l-​lealtà tagħhom għal ħajjithom kollha. Ġesù qal: “Smajtu li ntqal, ‘Tagħmilx adulterju.’ Imma jien ngħidilkom li kulmin jibqaʼ jħares lejn mara biex jixtieqha jkun diġà għamel adulterju magħha f’qalbu.”​—Mattew 5:​27, 28.

9. Liema parir għaqli nsibu fi Proverbji 5:​18-​20?

⁹ Għalhekk, il-​ktieb taʼ Proverbji jinkuraġġixxi t-​triq għaqlija u leali: “Tkun imbierka l-​għajn tiegħek, mart żgħożitek! Ifraħ biha. Hi bħal ċerva għażiża, bħal għażżiela ħelwa. Jimliek dejjem bl-​għaxqa ż-​żegħil tagħha, issaħħrek bla heda mħabbitha. Għaliex tiġġennen, ibni, wara mara oħra, u tħaddan miegħek mara żienja?”​—Proverbji 5:​18-​20.

Tgħaġġilx biex Tiżżewweġ

10. Għala hu għaqli li nieħdu l-​ħin biex insiru nafu lis-​sieħeb jew is-​sieħba tagħna tal-​futur?

¹⁰ Il-​problemi fiż-​żwieġ jistgħu jinqalgħu meta koppja tiżżewweġ malajr malajr. Huma forsi jkunu għadhom żgħar wisq u bla esperjenza. Jew forsi ma jiħdux iż-​żmien biex isiru jafu lil xulxin​—dak li jogħġobhom u ma jogħġobhomx, il-​miri taʼ ħajjithom, u l-​isfond tal-​familja. Huwa għaqli li tkun paċenzjuż u tieħu ż-​żmien biex issir taf is-​sieħeb jew is-​sieħba tal-​futur tiegħek. Aħseb dwar Ġakobb, bin Iżakk. Hu kellu jaħdem għal dak li kien se jsir il-​kunjatu tiegħu sebaʼ snin sħaħ qabel ma setaʼ jiżżewweġ lil Rakel. Hu kien lest jagħmel dan għaliex is-​sentimenti tiegħu kienu bbażati fuq l-​imħabba vera, mhux sempliċement fuq l-​attrazzjoni fiżika.​—Ġenesi 29:​20-​30.

11. (a) X’tgħaqqad flimkien ir-​rabta taż-​żwieġ? (b) Għala hu importanti li fiż-​żwieġ il-​kliem jintuża bl-​għaqal?

¹¹ Iż-​żwieġ hu iktar minn sempliċi relazzjoni romantika. Ir-​rabta taż-​żwieġ tgħaqqad flimkien lil żewġ persuni minn trobbija differenti, b’personalitajiet u kwalitajiet emozzjonali varjati, u spiss sfond taʼ edukazzjoni differenti. Kultant tinvolvi wkoll li jingħaqdu żewġ kulturi, u saħansitra żewġ lingwi. Mill-​inqas, tgħaqqad flimkien żewġ ilħna bl-​abbiltà li jesprimu opinjonijiet differenti fuq kull tip taʼ kwistjoni. Dawn iż-​żewġ opinjonijiet huma tabilħaqq parti minn rabta taż-​żwieġ. Jistgħu joqogħdu dejjem jikkritikaw u jilmentaw inkella jinkuraġġixxu bl-​imħabba u jibnu lil xulxin. Iva, bi kliemna nistgħu nweġġgħu jew infejqu lill-​imseħbin tagħna. Kliem mhux kontrollat jistaʼ jagħmel pressjoni kbira fuq iż-​żwieġ.​—Proverbji 12:18; 15:​1, 2; 16:24; 21:9; 31:26.

12, 13. Liema ħarsa realistika lejn iż-​żwieġ hija inkuraġġita?

¹² Għalhekk, hu għaqli li nieħdu l-​ħin biex tassew insiru nafu lis-​sieħeb jew sieħba prospettiva tagħna. Oħt Kristjana taʼ l-​esperjenza darba qalet: “Meta tħares lejn xi ħadd li fil-​futur jistaʼ jkun is-​sieħeb tiegħek fiż-​żwieġ, aħseb dwar forsi għaxar ħtiġijiet li tixtieq tara f’dan l-​individwu. Jekk tistaʼ ssib sebgħa biss,  staqsi lilek innifsek, ‘Lest jien ngħalaq għajnejja għat-​tlieta li huma neqsin? Kapaċi jien nittollera dawn in-​nuqqasijiet kuljum?’ Jekk għandek xi dubji, ieqaf ftit u erġaʼ aħsibha.” M’għandniex xi ngħidu, trid tkun realistiku. Jekk trid tiżżewweġ, kun af li qatt m’int se ssib sieħeb jew sieħba perfetta. Imma, fl-​istess ħin, lanqas int ma tistaʼ tkun perfett għal min se jiżżewġek!—Luqa 6:​41.

¹³ Iż-​żwieġ jinvolvi s-​sagrifiċċji. Pawlu semma dan meta qal: “Irridkom tkunu meħlusin mill-​ansjetà. Ir-​raġel mhux miżżewweġ hu ansjuż għal dak li hu tal-​Mulej, kif jikseb l-​approvazzjoni tal-​Mulej. Imma r-​raġel miżżewweġ hu ansjuż għal dak li hu tad-​dinja, kif jikseb l-​approvazzjoni taʼ martu, u hu maqsum fih innifsu. Jerġaʼ, il-​mara mhix miżżewġa, u l-​verġni, hi ansjuża għal dak li hu tal-​Mulej, sabiex tkun qaddisa kemm f’ġisimha kif ukoll fl-​ispirtu tagħha. Madankollu, il-​mara miżżewġa hi ansjuża għal dak li hu tad-​dinja, kif tikseb l-​approvazzjoni taʼ żewġha.”​—1 Korintin 7:​32-34.

Għala Xi Żwiġijiet Ifallu

14, 15. X’jistaʼ jikkontribwixxi biex ir-​rabta taż-​żwieġ tiddgħajjef?

¹⁴ Mara Kristjana dan l-​aħħar għaddiet mit-​trawma tad-​divorzju meta żewġha telaqha wara li kienu ilhom miżżewġin 12-il sena u beda relazzjoni maʼ mara oħra. Innotat xi sinjali taʼ twissija qabel ma sseparaw? Hi tispjega: “Wasal sal-​punt li ma kienx għadu jitlob. Hu kien juża skużi banali biex jitlef il-​laqgħat Kristjani u l-​attività taʼ l-​ippridkar. Kien isostni li kien ikollu wisq x’jagħmel jew li kien ikun għajjien wisq biex iqattaʼ l-​ħin miegħi. Lanqas kien ikellimni. Ma baqax jiddiskuti affarijiet spiritwali miegħi. Veru ddispjaċieni għalih. Ma kienx għadu r-​raġel li żżewwiġt.”

¹⁵ Oħrajn jgħidu li nnotaw sinjali simili, inkluż traskuraġni fl-​istudju persunali tal-​Bibbja, fit-​talb, jew fl-​attendenza għal-​laqgħat Kristjani. Fi kliem ieħor, ħafna individwi li maż-​żmien telqu lill-​imseħbin tagħhom ħallew ir-​relazzjoni tagħhom maʼ Ġeħova tiddgħajjef. Bħala riżultat, ma baqgħux iffokati fuq affarijiet spiritwali. Ma baqgħux jaraw lil Ġeħova bħala l-​Alla l-​ħaj. Il-​wegħda tad-​dinja l-​ġdida taʼ ġustizzja ma baqgħetx reali għalihom. F’ċerti każi, din l-​ispiritwalità bdiet tiddgħajjef saħansitra qabel ma l-​imseħbin ifformaw relazzjoni barra ż-​żwieġ.​—Ebrej 10:​38, 39; 11:6; 2 Pietru 3:​13, 14.

16. Xi jsaħħaħ iż-​żwieġ?

¹⁶ B’kuntrast, tnejn li jinsabu verament kuntenti jagħtu l-​kredtu għas-​suċċess taż-​żwieġ tagħhom lir-​rabtiet spiritwali b’saħħithom li għandhom. Huma jitolbu u jistudjaw flimkien. Ir-​raġel jgħid: “Aħna naqraw il-​Bibbja flimkien. Noħorġu fil-​ministeru flimkien. Nieħdu gost nagħmlu l-​affarijiet flimkien.” It-​tagħlima hija ċara: Relazzjoni tajba maʼ Ġeħova se tgħin ħafna biex iż-​żwieġ ikun b’saħħtu.

Kun Realistiku u Ikkomunika

17. (a) Liema żewġ affarijiet jgħinu biex iż-​żwieġ jirnexxi? (b) Pawlu kif jiddeskrivi l-​imħabba Kristjana?

¹⁷ Hemm żewġ affarijiet oħra li jgħinu biex żwieġ jirnexxi: l-​imħabba Kristjana u l-​komunikazzjoni. Meta żewġ individwi jieħdu grazzja maʼ xulxin, ikun hemm it-​tendenza li jinjoraw id-​difetti taʼ xulxin. Il-​koppja tistaʼ tidħol fiż-​żwieġ bi stennijiet esaġerati, forsi bbażati fuq dak li jkunu qraw fir-​rumanzi jew raw fil-​films. Madankollu, maż-​żmien, il-​koppja jkollha tiffaċċja r-​realtà. Imbagħad, dgħjufijiet żgħar jew drawwiet li jirritaw xi ftit jistgħu jsiru problemi kbar. Jekk jiġri hekk, il-​Kristjani jridu juru l-​frott taʼ l-​ispirtu, li wieħed mill-​aspetti tiegħu hu l-​imħabba. (Galatin 5:​22, 23) L-​imħabba hija tabilħaqq b’saħħitha​—mhux l-​imħabba romantika imma l-​imħabba Kristjana. Pawlu ddeskriva din l-​imħabba Kristjana, billi qal: “L-​imħabba tistabar fit-​tul u  qalbha tajba. . . . Ma tfittixx l-​interessi tagħha, ma tiġix provokata. Ma żżommx kont tal-​ħsara. . . . Kollox tiflaħ, kollox temmen, kollox tittama, kollox tissaporti.” (1 Korintin 13:​4-7) Jidher ċar li l-​imħabba tittollera d-​dgħjufijiet umani. B’mod realistiku, ma tistenniex il-​perfezzjoni.​—Proverbji 10:12.

18. Kif tistaʼ l-​komunikazzjoni ssaħħaħ relazzjoni?

¹⁸ Il-​komunikazzjoni wkoll hija vitali. Ilhom kemm ilhom miżżewġin, l-​imseħbin għandhom jitkellmu maʼ xulxin u verament jisimgħu wieħed lill-​ieħor. Raġel miżżewweġ jgħid: “Li jkollna ngħidu ngħiduh imma b’qalb tajba.” Bl-​esperjenza, l-​imseħbin jitgħallmu jisimgħu mhux biss dak li jintqal imma anki dak li ma jintqalx. Fi kliem ieħor, hekk kif jgħaddu s-​snin, tnejn li jkunu ferħanin fiż-​żwieġ tagħhom jitgħallmu jindunaw xi tkun qed taħseb jew tħoss il-​parti l-​oħra mingħajr maʼ din tkun qalet jew esprimiet xi ħaġa. Xi nisa jgħidu li l-​irġiel tagħhom ma jisimgħuhomx sew. Xi rġiel jilmentaw li n-​nisa tagħhom donnhom dejjem ikunu jridu jikkomunikaw fl-​iktar ħinijiet inkonvenjenti. Il-​komunikazzjoni tinvolvi l-​mogħdrija u li tifhem lil dak li jkun. Komunikazzjoni effettiva hija taʼ benefiċċju kemm għar-​raġel u kemm għall-​mara.​—Ġakbu 1:19.

19. (a) Għala jistaʼ jkun diffiċli li titlob maħfra? (b) X’se jqanqalna nitolbu maħfra?

¹⁹ Il-​komunikazzjoni kultant tinkludi li tintalab maħfra. Dan mhux dejjem ikun faċli. Trid tkun umli biex tammetti l-​iżbalji tiegħek. Madankollu, x’differenza tagħmel fiż-​żwieġ! Apoloġija sinċiera tistaʼ tneħħi kull possibbiltà li jerġaʼ jqum konflitt fil-​futur u twitti t-​triq għal maħfra sinċiera u għal soluzzjoni għall-​problema. Pawlu qal: “Komplu issaportu lil xulxin u aħfru lil xulxin mill-​qalb jekk xi ħadd għandu għalxiex jilmenta kontra ħaddieħor. Bħalma Ġeħova ħafrilkom mill-​qalb, agħmlu hekk intom ukoll. Imma, minbarra dawn l-​affarijiet kollha, ilbsu l-​imħabba, għax hi rabta perfetta li tgħaqqad.”​—Kolossin 3:​13, 14.

20. Kristjan miżżewweġ kif għandu jittratta lill-​parti l-​oħra fil-​privat u fil-​preżenza taʼ l-​oħrajn?

²⁰ Fiż-​żwieġ huwa vitali wkoll li ż-​żewġ naħat  jappoġġaw lil xulxin. Il-​Kristjani miżżewġin għandhom iħossuhom komdi jafdaw lil xulxin, u jistrieħu fuq xulxin. Ħadd minnhom m’għandu jbaxxi lill-​ieħor jew b’modi oħra jtelliflu l-​fiduċja tiegħu fih innifsu. Bl-​imħabba, aħna nfaħħru lill-​imseħbin tagħna fiż-​żwieġ u ma nikkritikawhomx bl-​aħrax. (Proverbji 31:28b) Żgur li aħna ma nċekknuhomx billi ngħidu ċajt iblah u bla konsiderazzjoni biex indaħħqu lil ħaddieħor bihom. (Kolossin 4:6) Dan l-​appoġġ miż-​żewġ naħat jissaħħaħ permezz taʼ espressjonijiet regulari t’affezzjoni. Sempliċi karezza jew kelma t’affezzjoni minn taħt l-​ilsien tistaʼ tgħid: “Għadni nħobbok. Kuntent li int miegħi.” Dawn huma ftit mill-​affarijiet li jistgħu jinfluwenzaw relazzjoni u jgħinu ż-​żwieġ biex jirnexxi fid-​dinja taʼ llum. Hemm modi oħra, u l-​artiklu li jmiss se joffri iktar gwida mill-​Iskrittura dwar kif żwieġ jistaʼ jirnexxi. a

[Nota taʼ taħt]

Tistaʼ Tispjega?

• X’inhuma xi affarijiet li jistgħu jdgħajfu ż-​żwieġ?

• Għala m’huwiex għaqli li wieħed jgħaġġel biex jiżżewweġ?

• L-ispiritwalità kif teffettwa ż-​żwieġ?

• Liema affarijiet jgħinu biex żwieġ ikun stabbli?

[Mistoqsijiet taʼ Studju]

[Stampa f’paġna 12]

Iż-​żwieġ hu iktar minn sempliċi relazzjoni romantika

[Stampi f’paġna 14]

Relazzjoni b’saħħitha maʼ Ġeħova tistaʼ tgħin lil koppja biex tirnexxi fiż-​żwieġ