Leali fil-​Provi

KMIENI f’April taʼ l-​1951, il-​gvern Sovjetiku setgħan attakka għal għarrieda grupp taʼ Kristjani innoċenti fil-​punent taʼ l-​Unjoni Sovjetika​—ix-​Xhieda taʼ Ġeħova. Eluf taʼ familji​—inkluż tfal żgħar, nisa tqal, u xjuħ​—ġew mitfugħin fil-​vaguni taʼ ferrovija għal vjaġġ iebes taʼ 20 ġurnata lejn is-​Siberja. Huma kienu se jiġu eżiljati b’mod permanenti f’kundizzjonijiet ħorox u primittivi.

F’April taʼ l-​2001, f’Moska ġie ċelebrat il-​50 anniversarju taʼ din il-​ġrajja storika, bil-​ħruġ taʼ vidjo li jiddokumenta l-​oppressjoni li saret fuq ix-​Xhieda taʼ Ġeħova għal għexur taʼ snin f’dik li qabel kienet l-​Unjoni Sovjetika. Fid-​dokumentarju, kittieba taʼ l-​istorja u wħud li raw dan kollu b’għajnejhom stess jirrakkontaw kif ix-​Xhieda rnexxielhom jibqgħu ħajjin u saħansitra ssaħħew minkejja l-​pressjoni estrema li sofrew.

Dan id-​dokumentarju, Faithful Under Trials​—Jehovah’s Witnesses in the Soviet Union (Leali fil-​Provi—Ix-​Xhieda taʼ Ġeħova fl-​Unjoni Sovjetika), issa rawh miljuni taʼ nies fir-​Russja u f’postijiet oħra, u ntlaqaʼ tajjeb ħafna mill-​pubbliku in ġenerali u mill-​kittieba taʼ l-​istorja. Dawn li ġejjin huma żewġ kummenti minn studjużi Russi li jgħixu fl-​inħawi fejn ġew deportati l-​maġġuranza tal-​familji tax-​Xhieda.

“Ħadt pjaċir ħafna b’dan il-​film. Dejjem laqtuni r-​rappreżentanti tar-​reliġjon tagħkom, imma wara li rajt il-​film, l-​impressjoni tajba li kelli tagħkom kompliet titjieb. Il-​film kien magħmul b’mod tassew professjonali! Għoġobni b’mod partikulari l-​mod kif ippreżentajtu kull persuna bħala individwu. Għalkemm jien Ortodoss u m’għandix intenzjoni nibdel ir-​reliġjon tiegħi, nieħu pjaċir ħafna bix-​Xhieda. Nixtieq li l-​fakultà tagħna [fl-università] iżżomm kopja taʼ dan il-​film. Jien u l-​kollegi tiegħi ddeċidejna li nuruh lill-​istudenti tagħna u ninkluduh fil-​kurrikulu.”​—Il-​Professur Sergei Nikolayevich Rubtsov, kap tal-​fakultà taʼ l-​istorja fl-​Università Pedagoġika taʼ l-​Istat, f’Irkutsk, ir-​Russja.

“Ħadt pjaċir meta ħareġ dan il-​film. Meta wieħed ikun qed jagħmel film dwar it-​tirannija, dejjem isibha diffiċli ħafna biex jiżviluppa l-​istorja b’mod loġiku. Imma intom irnexxielkom tagħmlu dan. Jekk jogħġobkom tiddejqux iġġibuli iktar films minn tagħkom.”​—Il-​Professur Sergei Ilyich Kuznetsov, kap tal-​fakultà taʼ l-​istorja fl-​Università taʼ l-​Istat taʼ Irkutsk, ir-​Russja.

Ix-Xhieda taʼ Ġeħova li jgħixu fis-​Siberja wkoll apprezzaw ferm dan id-​dokumentarju. Dawn huma ftit mir-​reazzjonijiet tagħhom:

“Fiż-​żmien meta kienu qed iseħħu l-​ġrajjiet deskritti f’dan il-​film, ħafna nies fir-​Russja kellhom informazzjoni żbaljata dwar l-​attivitajiet tax-​Xhieda taʼ Ġeħova. Imma wara li jaraw  il-​film, jistgħu jindunaw li l-​organizzazzjoni tagħna m’hijiex xi sempliċi setta, bħalma kienu jaħsbu qabel. Oħrajn li saru Xhieda f’dawn l-​aħħar snin qalu: ‘Ma stajniex nimmaġinaw li konna qed ngħixu u naħdmu m’aħwa Kristjani li ssaportew tant!’ Wara li ra l-​film, wieħed Xhud esprima x-​xewqa tiegħu li jsir pijunier, jew ministru full-time.”​—Anna Vovchuk, li ġiet eżiljata fis-​Siberja.

“Meta fil-​film dehru l-​pulizija sigrieta jħabbtu l-​bieb taʼ dar taʼ familja Xhud, qabadni l-​bard. Kien qisu meta ħabbtu fuq il-​bieb tagħna, u niftakar lil ommi tgħid: ‘Forsi qabad xi mkien.’ Imma l-​film fakkarni wkoll li ħafna Xhieda batew iżjed minni. Din l-​informazzjoni kollha tagħtina iktar saħħa u entużjażmu biex inkomplu naqdu lil Ġeħova.”​—Stepan Vovchuk, li ġie eżiljat fis-​Siberja.

“Jien it-​tifel taʼ Xhieda li ġew eżiljati. Għalhekk, kien mingħalija li kont diġà smajt ħafna dwar dawk iż-​żminijiet. Imma wara li rajt dan il-​film, irrealizzajt li fil-​fatt ma kont naf xejn. Hekk kif qgħadt nismaʼ l-​intervisti, għajnejja mtlew bid-​dmugħ. Issa l-​esperjenzi m’għadhomx iktar stejjer għalija imma ħajja reali. Il-​film saħħaħli r-​relazzjoni tiegħi m’Alla u għenni nipprepara ruħi biex nissaporti d-​diffikultajiet futuri kollha.”​—Vladimir Kovash, Irkutsk.

“Għalija dan il-​film kien ferm iżjed effettiv minn xi rakkont miktub. Meta rajt u smajt l-​intervisti maʼ l-​aħwa, ħassejtni bħallikieku għext magħhom l-​esperjenzi kollha li kellhom. L-​eżempju tal-​ħu li waqt li kien il-​ħabs kien joqgħod ipinġi l-​kartolini għat-​tfal żgħar tiegħu jqanqalni biex anki jien nipprova nilħaq qalb uliedi bil-​veritajiet tal-​Bibbja. Grazzi! Dan il-​film għen lix-​Xhieda taʼ Ġeħova fir-​Russja jħossuhom parti mill-​organizzazzjoni dinjija taʼ Ġeħova iktar minn qatt qabel.”​—Tatyana Kalina, Irkutsk.

“Il-​qawl, ‘Tara darba hu aħjar milli tismaʼ mitt darba’ żgur li japplika għal dan il-​film. Tant hu ħaj, tant hu reali, tant hu simili għas-​sitwazzjoni tagħna! Wara li rajtu, kelli bżonn ħafna ħin biex naħseb. Il-​film tani ċ-​ċans nintilef fil-​ħajjiet taʼ dawk ix-​Xhieda eżiljati. Issa meta nqabbel iċ-​ċirkustanzi tiegħi maʼ tagħhom, nistaʼ nħares b’mod differenti lejn il-​problemi li niffaċċjaw illum.”​—Lidia Beda, Irkutsk.

Faithful Under Trials s’issa nħareġ b’25 lingwa u qed jiġi milqugħ tajjeb ħafna mad-​dinja kollha. a Id-​dokumentarju kollu ntwera minn stazzjonijiet televiżivi f’San Pietruburgu, Omsk, u bliet oħra fir-​Russja, kif ukoll f’Vynnytsya, Kerch, Melitopol u bliet oħra fir-​reġjun taʼ Lʹviv fl-​Ukraina. Barra minn hekk, kiseb ukoll xi premjijiet minn kumitati internazzjonali li jeżaminaw il-​films.

Il-​qawwa tal-​messaġġ taʼ dan id-​dokumentarju qiegħda fl-​eżempji t’eluf taʼ nies komuni li wrew kuraġġ u saħħa spiritwali straordinarji matul snin twal taʼ persekuzzjoni. Ix-​Xhieda taʼ Ġeħova fl-​Unjoni Sovjetika wrew li huma tassew leali fil-​provi. Jekk tixtieq tara dan id-​dokumentarju, ix-​Xhieda taʼ Ġeħova jieħdu pjaċir iġibulek wieħed. Jekk jogħġbok ikkuntattja lil xi ħadd minnhom fil-​komunità tiegħek.

[Nota taʼ taħt]

[Sors tal-​Istampa f’paġna 8]

Stalin: U.S. Army photo

[Sors tal-​Istampa f’paġna 9]

Stalin: U.S. Army photo