Ġesù Jinfluwenza lin-Nies Madwar id-Dinja Kollha
Ġesù Jinfluwenza lin-Nies Madwar id-Dinja Kollha
“DAK kollu li qal Ġesù, fil-privat u fil-pubbliku, kif inhu rapportat fl-evanġelji setaʼ qalu f’sagħtejn,” kiteb it-traduttur tal-Bibbja Edgar Goodspeed. “Madankollu, dak il-ftit tant qanqal u effettwa lin-nies li nistgħu ngħidu bil-libertà kollha li ħadd ma influwenza lid-dinja daqsu.”
Meta Ġesù Kristu temm il-ministeru tiegħu fuq l-art fis-sena 33 E.K., kien hemm minn taʼ l-inqas xi 120 raġel u mara li kienu segwaċi tiegħu. (Atti 1:15) Illum, iktar minn żewġ biljun ruħ jgħidu li huma Kristjani. Mijiet taʼ miljuni oħrajn jaċċettaw lil Ġesù bħala profeta. It-tagħlim tiegħu tassew influwenza lill-bnedmin b’mod taʼ l-għaġeb.
Anki mexxejja li m’humiex Kristjani ammettew li Ġesù influwenza lin-nies madwar id-dinja kollha. Per eżempju, ir-rabbi Lhudi Hyman Enelow kiteb: “Ġesù sar l-iktar persunaġġ popolari, l-iktar studjat, u l-iktar li influwenza lil oħrajn fl-istorja reliġjuża tal-bnedmin.” Enelow qal ukoll: ‘Min jistaʼ jikkalkula kemm Ġesù influwenza lill-bnedmin? L-imħabba li qanqal, il-faraġ li ta, il-ġid li għamel, it-tama u l-ferħ li nissel—ħadd fl-istorja tal-bniedem m’għamel dan kollu. Fost in-nies
famużi u tajbin li qatt għexu, ħadd qatt ma ħabbatha maʼ Ġesù fil-mod kif effettwa u laqat lin-nies. Hu sar l-iktar persunaġġ interessanti fl-istorja.’ U l-mexxej Ħindu Mohandas K. Gandhi qal: “Ma naf b’ebda persuna oħra li għamlet iktar ġid għall-bnedmin minn Ġesù. Fil-fatt, m’hemm xejn ħażin fil-Kristjanità.” Madankollu, hu żied: “Il-problema hija intom il-Kristjani. Lanqas xejn ma tgħixu fi qbil mat-tagħlim tagħkom.”Il-Kristjaneżmu ilu żmien twil jonqos li jgħix fi qbil mat-tagħlim taʼ Ġesù. Cecil John Cadoux, storjografu tal-Kristjanità, innota li l-mexxejja Kristjani kien ilhom sa mis-sena 140 A.D. li nnotaw li bil-mod il-mod u kontinwament il-morali fil-Knisja kienu qed isiru iktar laxki. Hu osserva li l-fatt li l-moralità ma baqgħetx tinżamm b’mod strett bħalma kien isir fil-Kristjanità tal-bidu ovvjament wassal għall-qbil maʼ l-istili tad-dinja.
Fir-rabaʼ seklu, meta l-Imperatur Ruman Kostantinu ħaddan il-Kristjanità, il-morali komplew sejrin lura. “L-istorjografi ma naqsux li jinnotaw, u f’xi każi jiddispjaċihom,” kiteb Cadoux, “li l-Knisja għamlet kompromess immens bl-alleanza tagħha maʼ Kostantinu.” Matul is-sekli taʼ wara, l-hekk imsejħin Kristjani għamlu ħafna affarijiet mill-agħar li jiddiżonoraw l-isem taʼ Kristu.
Mela l-mistoqsijiet li jinteressawna huma: Ġesù x’għallem fir-realtà? U t-tagħlim tiegħu kif għandu jinfluwenzana?
[Stampa f’paġna 3]
“Ma naf b’ebda persuna oħra li għamlet iktar ġid għall-bnedmin minn Ġesù.”—Mohandas K. Gandhi
[Stampa f’paġna 3]
“Ħadd ma influwenza lid-dinja daqsu.”—Edgar Goodspeed
[Sors]
Culver Pictures