Mistoqsijiet mill-Qarrejja
Mistoqsijiet mill-Qarrejja
Il-fatt li David u l-irġiel li kienu miegħu kielu mill-ħobż tal-preżenza jindika li f’ċirkustanzi diffiċli l-liġi t’Alla tistaʼ tinkiser mingħajr kastig?—1 Samwel 21:2-7 (21:1-6, NW).
Skond Levitiku 24:5-9, il-ħobż tal-preżenza li kien jinbidel kull Sabat kien jinżamm biex jittiekel mill-qassisin. Il-prinċipju wara din il-prattika kien li l-ħobż kien qaddis u kellu jservi bħala ikel għal dawk l-irġiel li kienu jaqdu lil Alla—il-qassisin. Li kieku ngħata lil xi ħaddiem komuni jew ittiekel għal gost żgur kien ikun ħażin. Madankollu, il-qassis Aħimelek ma dinibx meta qasam il-ħobż tal-preżenza maʼ David u l-irġiel li kienu miegħu.
David milli jidher kellu xi inkarigu speċjali mis-Sultan Sawl. David u l-irġiel li kienu miegħu kienu bil-ġuħ. Aħimelek l-ewwel għamel ċert li huma kienu nodfa ċerimonjalment. Għalkemm teknikament kien kontra l-liġi li jieklu mill-ħobż tal-preżenza, huma ma marrux kontra l-użu bażiku tiegħu. Din il-konsiderazzjoni ppermettiet lil Aħimelek jagħmel eċċezzjoni. Ġesù Kristu stess uża din il-ġrajja sabiex juri li ma kienx xieraq li wieħed iżomm għalxejn u b’mod riġidu mal-liġi tas-Sabat skond kif interpretawha l-Fariżej.—Mattew 12:1-8.
Madankollu, dan ma jfissirx li l-liġi t’Alla tistaʼ tiġi miksura meta ċ-ċirkustanzi jkunu diffiċli. Biex nieħdu eżempju, il-gwerriera Iżraelin dehru li kienu f’sitwazzjoni verament diffiċli meta kienu qed jiġġieldu kontra l-Filistin. Is-Sultan Sawl kien qal: “Misħut il-bniedem li jiekol xi ikel qabel ma jidlam u nitħallas mill-għedewwa tiegħi.” Il-Bibbja tgħid: “Dakinhar huma kissru l-Filistin.” Is-suldati kienu bil-ġuħ u għajjenin minħabba l-ġlied, u ‘l-poplu qatel l-annimali fl-art u kiel il-laħam bid-demm.’ (1 Samwel 14:24, 31-33) Huma dinbu kontra Ġeħova billi kisru l-liġi tiegħu dwar id-demm. L-azzjonijiet tagħhom ma kinux fi qbil maʼ l-uniku mod kif Alla ried li jintuża d-demm, jiġifieri li jpatti għad-dnubiet. (Levitiku 17:10-12; Ġenesi 9:3, 4) Ġeħova aċċetta bil-ħniena s-sagrifiċċji speċjali għan-nom taʼ dawk li dinbu.—1 Samwel 14:34, 35.
Iva, Ġeħova jistenna li nobdu l-liġijiet tiegħu f’kull ċirkustanza. “L-imħabba t’Alla tfisser dan,” jgħid l-appostlu Ġwanni, “li nosservaw il-kmandamenti tiegħu.”—1 Ġwanni 5:3.
[Stampa f’paġna 30]
Il-ħobż ġdid għal preżentazzjoni kien jitqiegħed fit-tabernaklu kull Sabat