Punti Prinċipali mill-Ktieb taʼ l-Ewwel Samwel
Il-Kelma taʼ Ġeħova Hi Ħajja
Punti Prinċipali mill-Ktieb taʼ l-Ewwel Samwel
HIJA s-sena 1117 Q.E.K., xi tliet mitt sena wara li Ġożwè temm il-konkwista taʼ l-Art Imwiegħda. Ix-xjuħ taʼ Iżrael jersqu fuq il-profeta taʼ Ġeħova b’talba straordinarja. Il-profeta jitlob dwar il-kwistjoni, u Ġeħova jagħtihom dak li jridu. Dan jimmarka t-tmiem tal-perijodu taʼ l-Imħallfin u l-bidu taż-żmien meta f’Iżrael bdew jaħkmu s-slaten umani. Il-ktieb Bibliku taʼ l-Ewwel Samwel jirrakkonta l-ġrajjiet eċċitanti li ġraw f’dan iż-żmien importanti fl-istorja tal-poplu taʼ Iżrael.
L-Ewwel Samwel inkiteb minn Samwel, Natan, u Gad, u jkopri perijodu taʼ mija u sentejn—mill-1180 sa l-1078 Q.E.K. (1 Kronaki 29:29) Huwa rakkont dwar erbaʼ mexxejja taʼ Iżrael. Tnejn jaqdu bħala mħallfin, tnejn bħala slaten; tnejn huma ubbidjenti lejn Ġeħova, u tnejn m’humiex. Niltaqgħu wkoll maʼ żewġ nisa eżemplari u maʼ gwerrier kuraġġuż imma ġentili. Eżempji bħal dawn jgħallmuna ħafna affarijiet siewja dwar l-attitudnijiet u l-azzjonijiet li għandna nimitaw jew nevitaw. Għalhekk, il-kontenut taʼ l-Ewwel Samwel jinfluwenza ħafna l-ħsibijiet u l-għemejjel tagħna.—Ebrej 4:12.
SAMWEL ISIR IMĦALLEF WARA GĦELI
Hu żmien il-Festa tal-Ġbir, jew taʼ l-Għerejjex, u Anna, li toqgħod f’Rama, se ttir bil-ferħ. * Ġeħova wieġeb it-talb tagħha, u hi wildet tifel. Sabiex iżżomm il-wegħda tagħha, Anna tieħu ’l binha Samwel għas-servizz “fid-dar tal-Mulej.” Hemmhekk it-tifel “jaqdi l-Mulej taħt għajnejn Għeli, il-qassis.” (1 Samwel 1:24; 2:11) Meta Samwel ikun għadu daqsxejn taʼ tfajjel, Ġeħova jkellmu u jħabbar il-ġudizzju kontra d-dar t’Għeli. Hekk kif Samwel ikompli jikber, il-poplu Iżraeli kollu jirrikonoxxih bħala profeta taʼ Ġeħova.
Maż-żmien, il-Filistin jinvadu lil Iżrael. Huma jaħtfu l-Arka u joqtlu liż-żewġ subien t’Għeli. Malli jismaʼ l-aħbar, ix-xwejjaħ Għeli jmut, wara li “kien ilu jaħkem lil Iżrael għal erbgħin sena.” (1 Samwel 4:18) Minkejja li l-Filistin għandhom l-Arka taħt idejhom, din xejn ma tiswielhom tajjeb, u għalhekk jiħduha lura għand l-Iżraelin. Issa Samwel hu mħallef fuq Iżrael, u fil-pajjiż hemm il-paċi.
Mistoqsijiet Skritturali Mweġbin:
2:10—Anna għala talbet lil Ġeħova biex “jagħti s-saħħa lis-sultan tiegħu” ladarba ma kien hemm ebda sultan uman jaħkem fuq Iżrael? Il-fatt li l-Iżraelin kien se jkollhom sultan uman kien ġie mbassar fil-Liġi Mosajka. (Dewteronomju 17:14-18) Fil-profezija li lissen meta kien qed imut, Ġakobb qal: “Ix-xettru [simbolu t’awtorità rjali] minn id Ġuda ma jitneħħiex.” (Ġenesi 49:10) Iktar minn hekk, rigward Sara—l-antenata taʼ l-Iżraelin—Ġeħova qal: “Minnha joħorġu slaten taʼ ġnus.” (Ġenesi 17:16) Mela Anna kienet qed titlob dwar sultan futur.
3:3—Samwel kien jorqod fl-Iktar Qaddis? Le, ma kienx. Samwel kien Levita mill-familja tal-Keħatin, li l-membri tagħha ma kinux qassisin. (1 Kronaki 6:18-23 [1 Kronaki 6:33-38, NW]) Għaldaqstant, hu ma setax ‘jidħol u jara s-santwarju,’ jew il-ħwejjeġ qaddisa. (Numri 4:17-20) L-unika parti mis-santwarju li setaʼ jidħol fiha kienet il-bitħa tat-tabernaklu. Allura, wisq probabbli kien jorqod hemmhekk. Milli jidher, Għeli wkoll kien jorqod xi mkien fil-bitħa. Jidher ċar li l-espressjoni “fejn kien hemm l-arka taʼ Alla” tirreferi għall-inħawi tat-tabernaklu.
7:7-9, 17—Samwel għala offra sagrifiċċju tal-ħruq f’Misfa u bena artal f’Rama, ladarba s-sagrifiċċji kellhom ikunu offerti dejjem f’post magħżul minn Ġeħova? (Dewteronomju 12:4-7, 13, 14; Ġożwè 22:19) Meta l-Arka sagra tneħħiet mit-tabernaklu f’Silo, il-preżenza taʼ Ġeħova ma baqgħetx evidenti hemmhekk. Għalhekk, bħala r-rappreżentant t’Alla, Samwel offra sagrifiċċju tal-ħruq f’Misfa u bena wkoll artal f’Rama. Milli jidher dawn l-azzjonijiet kienu approvati minn Ġeħova.
Lezzjonijiet Għalina:
1:11, 12, 21-23; 2:19. L-attitudni t’Anna lejn it-talb, l-umiltà tagħha, l-apprezzament li kellha għall-qalb tajba taʼ Ġeħova, u l-affezzjoni li baqgħet turi bħala omm huma t’eżempju għan-nisa kollha li għandhom il-biżaʼ t’Alla.
1:8. Elkana ħalla eżempju tassew mill-aqwa taʼ kif wieħed jistaʼ jsaħħaħ lil oħrajn bi kliemu! (Ġob 16:5) Meta ra lil Anna tant imdejqa, hu l-ewwel staqsieha b’tali mod li ma jkunx qed jiġġudikaha: “Għala int qalbek sewda?” Dan inkuraġġieha biex titkellem dwar dak li kienet qed tħoss. Imbagħad Elkana żguraha mill-affezzjoni tiegħu, billi qalilha: “M’iniex jien aħjar għalik minn għaxar ulied?”
2:26; 3:5-8, 15, 19. Billi nibqgħu nwettqu l-inkarigi li ngħatajna minn Alla, nieħdu vantaġġ mit-taħriġ spiritwali, u nkunu edukati u nuru rispett, se ‘ninġiebu [iktar] quddiem’ Alla u l-bnedmin.
4:3, 4, 10. Jidher ċar li anki xi ħaġa qaddisa bħall-arka tal-patt ma setgħetx tintuża għall-protezzjoni. Irridu ‘nħarsu ruħna mill-idoli.’—1 Ġwanni 5:21.
L-EWWEL SULTAN TAʼ IŻRAEL —SUĊĊESS JEW FALLIMENT?
Samwel jibqaʼ juri fedeltà lejn Ġeħova għal ħajtu kollha, imma wliedu ma jimxux fil-mogħdijiet t’Alla. Meta x-xjuħ taʼ Iżrael jitolbu biex ikollhom sultan uman, Ġeħova jħallihom ikollhom wieħed. Samwel isegwi d-direzzjoni taʼ Ġeħova u jidlek bħala sultan lil Sawl, żagħżugħ sabiħ mit-tribù taʼ Benjamin. Sawl isaħħaħ il-pożizzjoni tiegħu bħala sultan billi jegħleb lill-Għammonin.
L-iben kuraġġuż taʼ Sawl, Ġonatan, jegħleb waħda mill-għases tal-Filistin. Il-Filistin jitilgħu kontra Iżrael b’armata kbira. Sawl jinħakem mill-biżaʼ u b’mod diżubbidjenti jaqbad u joffri sagrifiċċju tal-ħruq hu stess. Il-kuraġġuż Ġonatan jattakka għassa oħra tal-Filistin, akkumpanjat biss mill-iskudier tiegħu. Madankollu, minħabba l-wegħda impulsiva li jagħmel Sawl, ir-rebħa m’hijiex sħiħa. Sawl ikompli ‘jagħmel gwerra lill-għedewwa tiegħu kollha taʼ madwaru.’ (1 Samwel 14:47) Iżda, meta jegħleb lill-Għamalekin, hu jonqos milli jobdi lil Ġeħova billi jħalli ħaj dak li kien ‘imwarrab,’ jew “iddedikat biex ikun meqrud għalkollox” (Karm Żammit). (Levitiku 27:28, 29) Minħabba f’hekk, Ġeħova jwarrab lil Sawl bħala sultan.
Mistoqsijiet Skritturali Mweġbin:
9:9—X’inhu sinifikanti dwar l-espressjoni “dak li llum isejjħulu profeta, dari kienu jsejjħulu veġġent [jew, dak li jara]”? Dan il-kliem jistaʼ jindika li hekk kif il-profeti bdew isiru iżjed prominenti fi żmien Samwel u fil-perijodu tas-slaten taʼ Iżrael, minflok il-kelma “veġġent” daħal it-terminu “profeta.” Samwel jitqies bħala l-ewwel wieħed fil-lista tal-profeti.—Atti 3:24.
14:24-32, 44, 45—Tilef Ġonatan il-favur t’Alla talli kiser il-wegħda taʼ Sawl u kiel l-għasel? B’dan l-att ma jidhirx li Ġonatan tilef il-favur t’Alla. Qabel xejn, Ġonatan lanqas biss kien jaf bil-wegħda taʼ missieru. Iżjed minn hekk, din il-wegħda, imqanqla minn żelu falz jew minn ħarsa żbaljata lejn l-awtorità taʼ sultan, ħolqot ħafna problemi għall-poplu. Kif setgħet din il-wegħda jkollha l-approvazzjoni t’Alla? Għalkemm Ġonatan kien lest li jaċċetta l-konsegwenzi talli kiser il-wegħda, hu ma nqatilx.
15:6—Il-Kenin għala ngħataw konsiderazzjoni speċjali minn Sawl? Il-Kenin kienu wlied ħaten Mosè. Huma għenu lill-Iżraelin wara li dawn telqu minn ħdejn il-Muntanja Sinaj. (Numri 10:29-32) Fl-art taʼ Kangħan, il-Kenin għamlu wkoll xi żmien jgħixu maʼ wlied Ġuda. (Imħallfin 1:16) Avolja iktar tard kienu jgħixu fost l-Għamalekin u popli oħra, il-Kenin baqgħu ħbieb taʼ Iżrael. Għalhekk, Sawl kellu raġuni tajba għalxiex jeħles lill-Kenin.
Lezzjonijiet Għalina:
9:21; 10:22, 27. Il-modestja u l-umiltà li Sawl kellu fil-bidu meta sar sultan żammewh milli jaġixxi b’nuqqas t’għaqal meta “xi rġiel ħżiena” m’aċċettawhx bħala sultan fuqhom. Kemm hija taʼ protezzjoni din l-attitudni kontra azzjonijiet bla sens!
12:20, 21. Qatt tħalli l-frugħat, bħall-fiduċja fil-bniedem u fil-qawwa militari tal-ġnus, jew l-idolatrija, idawruk milli taqdi lil Ġeħova.
12:24. Għajnuna importanti biex nibqgħu nibżgħu minn Alla u nirrispettawh kif ukoll biex nibqgħu naqduh b’qalbna kollha hi li ‘nqisu l-ħwejjeġ kbar li għamel’ għall-poplu tiegħu kemm fil-passat u kemm illum.
13:10-14; 15:22-25, 30. Oqgħod għassa għall-prużunzjoni—sew jekk tkun murija b’atti taʼ diżubbidjenza u sew jekk b’attitudni taʼ kburija.—Proverbji 11:2.
ŻAGĦŻUGĦ RAGĦAJ MAGĦŻUL BIEX IKUN SULTAN
Samwel jidlek lil David mit-tribù taʼ Ġuda biex ikun is-sultan futur. Ftit wara dan, David joqtol lill-ġgant Filisti Gulija b’ċagħqa u żbandola. Bejn David u Ġonatan tiżviluppa ħbiberija kbira. Sawl iqiegħed lil David fuq in-nies tiegħu tal-gwerra. B’riżultat tal-ħafna rebħiet li jagħmel David, in-nisa taʼ Iżrael jibdew ikantaw: “L-eluf tiegħu qatel Sawl; u David l-għaxriet taʼ l-eluf tiegħu.” (1 Samwel 18:7) Mikul bl-għira, Sawl jipprova joqtol lil David. Wara tliet attentati taʼ Sawl, David jaħrab.
Matul is-snin li jqattaʼ jgħix bħala maħrub, David darbtejn ikollu ċ-ċans li joqtol lil Sawl imma ma jagħmilx hekk. Hu jiltaqaʼ wkoll m’Abigajl u maż-żmien jiżżewweġ lil din il-mara sabiħa. Hekk kif il-Filistin jitilgħu kontra Iżrael, Sawl idur lejn Ġeħova għall-gwida. Imma Ġeħova jkun ħallieh. Samwel kien miet. Iddisprat, Sawl imur għand mara li tikkonsulta maʼ l-ispirti u din tgħidlu li kien se jinqatel fil-battalja kontra l-Filistin. Matul dik il-battalja, Sawl jiġi ferut serjament, u wliedu jinqatlu. Ir-rakkont jispiċċa bil-mewt taʼ Sawl, wara li dan ikun falla bħala sultan. David għadu mistoħbi.
Mistoqsijiet Skritturali Mweġbin:
16:14—Liema spirtu ħażin ħabbat, jew werwer, lil Sawl? L-ispirtu ħażin li ma ħalliex lil Sawl ikollu l-paċi tal-moħħ kien l-inklinazzjoni ħażina taʼ moħħu u qalbu—il-forza ġewwinija tiegħu biex jagħmel il-ħażen. Meta Ġeħova neħħa l-ispirtu qaddis tiegħu minn fuq Sawl, dan tilef il-protezzjoni tiegħu u kien iddominat mill-ispirtu ħażin tiegħu stess. Ladarba Alla ħalla lil dan l-ispirtu jieħu post l-ispirtu qaddis Tiegħu, dan l-ispirtu ħażin jissejjaħ ‘spirtu ħażin mibgħut mill-Mulej.’
17:55—Meta tikkunsidra l-1 Samwel 16:17-23, Sawl għala staqsa min kien missier David? Il-mistoqsija taʼ Sawl ma kinitx biss biex ikun jaf x’jismu missier David. X’aktarx li hu ried ikun jaf x’tip taʼ missier kellu dan iż-żagħżugħ li kien għadu kif wettaq l-azzjoni taʼ l-għaġeb li joqtol ġgant.
Lezzjonijiet Għalina:
16:6, 7. Minflok ma nħallu d-dehra taʼ barra t’oħrajn timpressjonana jew inkella naqbdu u niġġudikawhom malajr malajr, irridu nipprovaw narawhom kif jarahom Ġeħova.
17:47-50. Aħna nistgħu niffaċċjaw b’kuraġġ l-oppożizzjoni jew il-persekuzzjoni minn għedewwa li jkunu qishom Gulija għax “il-gwerra f’idejn il-Mulej.”
18:1, 3; 20:41, 42. Il-ħbieb veri jistgħu jinstabu fost dawk li jħobbu lil Ġeħova.
21:13, 14 (21:12, 13, NW). Ġeħova jistenna li aħna nużaw il-fakultajiet u l-abbiltajiet mentali tagħna biex niffaċċjaw sitwazzjonijiet diffiċli fil-ħajja. Hu tana l-Kelma mnebbħa tiegħu li tgħinna nkunu għaqlin u jkollna l-għarfien u l-abbiltà taʼ ħsieb. (Proverbji 1:4) Għandna wkoll l-għajnuna t’anzjani Kristjani maħturin.
24:7 (24:6, NW); 26:11. X’eżempju mill-aqwa ħalla David fil-mod kif wera rispett ġenwin lejn il-maħturin taʼ Ġeħova!
25:23-33. Is-sensibilità t’Abigajl hija eżemplari.
28:8-19. Fl-isforzi tagħhom biex jiżvijaw jew iweġġgħu lin-nies, l-ispirti mill-agħar jistgħu jippretendu li huma ċerti individwi mejtin. Irridu nevitaw kull forma taʼ spiritiżmu.—Dewteronomju 18:10-12.
30:23, 24. Din id-deċiżjoni, ibbażata fuq Numri 31:27, turi li Ġeħova japprezza lil dawk li jaqdu biex jappoġġaw il-kongregazzjoni. Għalhekk, kulma nagħmlu, ejja ‘nagħmluh b’ruħna kollha qisu għal Ġeħova, u mhux għall-bnedmin.’—Kolossin 3:23.
X’Inhu “Aqwa mis-Sagrifiċċji”?
Liema verità fundamentali hija enfasizzata bl-esperjenzi t’Għeli, Samwel, Sawl, u David? Hija din: “L-ubbidjenza hi aqwa mis-sagrifiċċji; is-smigħ, aħjar mix-xaħam tal-muntun. Ir-ribelljoni daqs id-dnub tas-seħer, u li twebbes rasek daqs il-ħażen tal-qima tax-xbihat.”—1 Samwel 15:22, 23.
Xi privileġġ għandna li nieħdu sehem fix-xogħol globali taʼ l-ippridkar dwar is-Saltna u taʼ li nagħmlu dixxipli! Hekk kif noffru lil Ġeħova “frott xufftejna,” irridu nagħmlu l-aħjar tagħna biex nobdu d-direzzjoni li jagħtina permezz tal-Kelma miktuba tiegħu u l-organizzazzjoni li għandu fuq l-art.—Hosegħa 14:3 (14:2, NW); Ebrej 13:15.
[Nota taʼ taħt]
^ par. 3 Sabiex tkun taf fejn qegħdin id-diversi postijiet imsemmijin fil-ktieb taʼ l-Ewwel Samwel, ara paġni 18-19 tal-browxer “See the Good Land,” pubblikat mix-Xhieda taʼ Ġeħova.
[Stampa f’paġna 23]
Minn ħakkiem umli u modest, l-ewwel sultan taʼ Iżrael sar monarka kburi u prużuntuż
[Stampa f’paġna 24]
Dwar xiex nistgħu nkunu fiduċjużi meta niffaċċjaw l-oppożizzjoni minn għedewwa li jkunu qishom Gulija?