Sansun Jittrijonfa bis-Saħħa taʼ Ġeħova!
Sansun Jittrijonfa bis-Saħħa taʼ Ġeħova!
B’VINDIKAZZJONI dawk li jaqbduh jaqilgħulu għajnejh u jitfgħuh jaħdem xogħol iebes. Imbagħad joħorġuh mill-ħabs u jiħduh f’tempju pagan biex jipprovdu divertiment għall-folla. Jisforzawh jimmarċja quddiem eluf taʼ spettaturi u jiddieħqu bih. Il-priġunier la hu kriminal u lanqas kmandant t’armata taʼ l-għadu. Hu jadura lil Ġeħova u ilu jaqdi bħala mħallef f’Iżrael għal 20 sena.
Sansun—l-iktar bniedem b’saħħtu fiżikament li qatt għex—kif spiċċa f’sitwazzjoni umiljanti bħal din? Kienet is-saħħa straordinarja tiegħu se ssalvah? X’kien is-sigriet tas-saħħa taʼ Sansun? Hemm xi ħaġa li nistgħu nitgħallmu mill-istorja taʼ ħajtu?
Hu Se “Jibda Jeħles lil Iżrael”
Ulied Iżrael kemm-il darba tbiegħdu mill-qima vera. Għalhekk, meta “baqgħu jagħmlu l-ħażin f’għajnejn il-Mulej, . . . il-Mulej telaqhom f’idejn il-Filistin għal erbgħin sena.”—Mħallfin 13:1.
L-istorja taʼ Sansun bdiet meta l-anġlu taʼ Ġeħova deher lill-mara sterili taʼ wieħed Iżraeli jismu Manuħa, u informaha li kienet se tiled iben. “Il-mus ma jgħaddix minn fuq rasu,” ordnalha l-anġlu, “għax it-tifel ikun nażir ikkonsagrat lil Alla sa minn ġuf ommu, u hu jibda jeħles lil Iżrael minn id il-Filistin.” (Mħallfin 13:2-5) Qabel ma tnissel Sansun, Ġeħova ddetermina li Sansun kellu jkollu inkarigu speċifiku. Mit-twelid tiegħu ’l quddiem, kellu jkun Nażir—wieħed magħżul għal tip speċjali taʼ servizz sagru.
“Dik Togħġobni”
Hekk kif Sansun kompla jikber, Ġeħova kompla jbierku. (Mħallfin 13:24) Jum wieħed Sansun resaq fuq missieru u ommu u qalilhom: “Rajt mara f’Timna mill-bniet tal-Filistin, u issa rridkom teħduhieli b’marti.” (Mħallfin 14:2) Immaġina kif baqgħu skantati. Minflok ma jeħles lil Iżrael minn idejn l-oppressuri, binhom ried jifforma alleanza taʼ żwieġ magħhom. Kien kontra l-Liġi t’Alla li wieħed jieħu mara minn fost dawk li jaduraw allat pagani. (Eżodu 34:11-16) Għaldaqstant il-ġenituri tiegħu oġġezzjonaw: “Ma hemmx mara fost il-bniet taʼ ħutek u fost il-poplu kollu tiegħek, biex int tmur tieħu mara minn fost il-Filistin bla ħtin?” Xorta waħda, Sansun insista: “Ħudli lilha, għax dik togħġobni.”—Mħallfin 14:3.
B’liema mod kienet ‘togħġbu’ din il-mara Filistea partikulari lil Sansun? Mhux fis-sens li kienet “sabiħa, ħelwa, attraenti,” tissuġġerixxi s-Cyclopedia taʼ McClintock u Strong, “imma togħġbu biex jilħaq għan, skop, jew mira.” Liema għan? Mħallfin 14:4 jispjega li Sansun “kien qiegħed ifittex” opportunità biex “jeħodha mal-Filistin.” Sansun kien interessat f’din il-mara għal dan l-iskop. Hekk kif Sansun beda jikber u jsir adult, “l-ispirtu tal-Mulej beda jaħdem ġewwa fih,” jew iqanqlu biex jaġixxi. (Mħallfin 13:25) Għalhekk, kien l-ispirtu taʼ Ġeħova li qanqal lil Sansun biex jagħmel it-talba stramba li jiżżewweġ lil din il-mara, kif ukoll immotivah fil-karriera kollha tiegħu bħala mħallef fuq Iżrael. Sabha Sansun l-opportunità li kien qed ifittex? L-ewwel ejja nikkunsidraw kif Ġeħova żgurah li kien qed jappoġġah.
Sansun kien qed jivvjaġġa lejn il-belt taʼ Timna fejn kienet toqgħod il-mara li kien se jiżżewweġ. “Xħin waslu fl-oqsma tad-dwieli taʼ Timna,” jgħid ir-rakkont Skritturali, “Sansun jilmaħ ferħ taʼ ljun jgħajjat riesaq lejh. L-ispirtu tal-Mulej ħakem lil Sansun u dan tertqu bħalma wieħed itertaq gidi.” Din it-turija taʼ l-għaġeb taʼ saħħa saret meta Sansun kien waħdu. Ma kien hemm ħadd li rah. Kien dan il-mod kif Ġeħova jiżgura lil Sansun li bħala Nażir setaʼ jwettaq l-inkarigu tiegħu mogħti minn Alla? Il-Bibbja ma tgħidx, imma Sansun żgur irrealizza li din is-saħħa mhux normali ma kinitx tiegħu. Żgur li kienet ġejja minn Alla. Setaʼ jistrieħ fuq Ġeħova biex jgħinu fix-xogħol li kellu quddiemu. Imsaħħaħ bil-ġrajja taʼ l-iljun, Sansun “niżel u kellem lill-mara, u din għoġbitu.”—Mħallfin 14:5-7.
Meta Sansun iktar tard mar lura biex jieħu l-mara d-dar, hu “lewa biex jara l-ġisem mejjet taʼ l-iljun, u jsib ferħ naħal u għasel.” Sansun żamm din il-ġrajja f’moħħu u fit-tieġ għamel din il-ħaġa moħġaġa lil 30 żagħżugħ Filisti li kienu miegħu: “L-ikel ħareġ mill-wikkiel, u mill-qawwi ħarġet il-ħlewwa.” Jekk jaqtgħu t-tifsira tagħha, Sansun kellu jagħtihom 30 qmis taʼ l-għażel u tibdila ħwejjeġ. Jekk le kien ikollhom jagħtuhomlu huma. Il-Filistin damu tlett ijiem ma jistgħux isibu rkaptu tal-ħaġa moħġaġa. Fir-rabaʼ jum, spiċċaw bdew jheddu lill-mara. Mħallfin 14:8-15.
Qalulha: “Żiegħel b’żewġek ħalli jgħidilna x’inhi, inkella naħarqu lilek u lil dar missierek.” X’kefrija! Jekk il-Filistin kienu jittrattaw lil nieshom stess b’dan il-mod, aħseb u ara kemm kienu jaħqru lill-Iżraelin!—Il-mara mwerwra għamlet pressjoni fuq Sansun biex jgħidilha t-tweġiba. Billi wriet nuqqas taʼ mħabba u lealtà lejn Sansun, hi mill-ewwel marret tgħid liż-żgħażagħ. Dawn qatgħu l-ħaġa moħġaġa, u Sansun kien jaf għala. Hu qalilhom: “Li ma ħrattux bl-għoġla tiegħi, ma kontux tikxfu l-moħġaġa tiegħi.” Issa fl-aħħar Sansun ġietu l-opportunità li kien ilu jistenna. “L-ispirtu tal-Mulej ġie fuqu, u Sansun niżel f’Askalon, u qatel tletin raġel minnhom, neżżagħhom minn ħwejjiġhom, u ta t-tibdiliet lil dawk li fissrulu l-ħaġa moħġaġa; mbagħad saħan bl-għadab u raġaʼ talaʼ f’dar missieru.”—Mħallfin 14:18, 19.
Kien l-aġir taʼ Sansun f’Askalon imqanqal minn xewqa li jivvendika ruħu? Le. Kien att t’Alla permezz tal-ħellies magħżul minnu. Permezz taʼ Sansun, Ġeħova beda ġlieda kontra dawk li bi krudeltà kienu jaħqru lin-nies tiegħu. Din il-kampanja kellha tkompli. Opportunità oħra qamet meta Sansun mar iżur lil martu.
Jiggwerra Waħdu
Meta wasal lura Timna, Sansun skopra li missier il-mara kien żewwiġha lil raġel ieħor għax ħaseb li Sansun kien jobgħodha. Sansun deher li ħa għalih. Hu qabad 300 xakall u rabathom tnejn tnejn bil-ħatab tan-nar bejn denbhom. Meta ħelishom, bdew iqabbdu l-għelieqi, id-dwieli, u l-imsaġar taż-żebbuġ, u hekk qerdu t-tliet uċuħ tar-rabaʼ prinċipali li kellha l-Filistja dik is-sena. Il-Filistin mgħaddbin aġixxew b’kefrija. Huma kkunsidraw lil mart Sansun u missierha responsabbli u ħarquhom. Minħabba l-vendetta krudili tagħhom, Sansun ħataf l-opportunità biex jattakkahom u jagħmel ħerba minnhom.—Mħallfin 15:1-8.
Fehmu l-Iżraelin li Alla Ġeħova kien qed ibierek lil Sansun, u b’hekk ngħaqdu miegħu biex itemm id-dominju mill-Filistin? Żgur li le. Biex jevitaw l-inkwiet, in-nies taʼ Ġuda bagħtu 3,000 raġel biex jarrestaw lill-mexxej magħżul minn Alla u jagħtuh f’idejn l-għedewwa tiegħu. Madankollu, dan in-nuqqas taʼ lealtà mill-Iżraelin ta l-opportunità lil Sansun biex ikompli jagħmel ħsara lill-għedewwa tiegħu. Hekk kif kien se jingħata f’idejn il-Filistin, “ħakmu l-ispirtu tal-Mulej, u l-ħbula li kellu maʼ dirgħajh saru bħal ħajt tal-kittien maħruq bin-nar, u l-irbit inħall minn idejh.” Imbagħad qabad xedaq taʼ ħmar u bih darab elf ruħ mill-għadu.—Mħallfin 15:10-15.
F’talba lil Ġeħova, Sansun qal: “Int tajtna b’id il-qaddej tiegħek din ir-rebħa kbira, se tħallini issa mmut bil-għatx, u naqaʼ f’idejn in-nies bla ħtin?” Ġeħova semaʼ t-talba taʼ Sansun u weġibha. “Alla xaqq il-blata tal-ħofra . . . , u ħareġ minnha l-ilma; u hu xorob, ħa r-ruħ u staħja.”—Mħallfin 15:18, 19.
Sansun kien determinat li jwettaq il-mira tiegħu, jiġifieri li jiġġieled kontra l-Filistin. Hu qagħad fid-dar taʼ mara żienja f’Gaża biex jiġġieled kontra l-għedewwa t’Alla. Sansun kellu bżonn post fejn jgħaddi l-lejl f’belt taʼ l-għadu, u dan irnexxielu jsibu f’dar taʼ mara żienja. Sansun ma kellu l-ebda skop immorali f’moħħu. Hu ħalla d-dar tal-mara f’nofsillejl, qabad il-battenti tal-bieb tal-belt u ż-żewġ waqqafiet, u ġarrhom sal-quċċata taʼ muntanja biswit Ħebron, li kienet xi 60 kilometru ’l bogħod. Dan sar bl-approvazzjoni divina u bis-saħħa mogħtija minn Alla.—Mħallfin 16:1-3.
Il-mod kif ħadem l-ispirtu qaddis fil-każ taʼ Sansun kien uniku minħabba ċ-ċirkustanzi mhux tas-soltu. Il-qaddejja leali t’Alla Luqa 11:13.
llum jistgħu jistrieħu fuq l-istess spirtu biex iqawwihom. Ġesù żgura lis-segwaċi tiegħu li Ġeħova se “jagħti l-ispirtu qaddis lil dawk li jitolbuh!”—Ġeħova Għala ‘Warrab Minn Sansun’?
Ġara li Sansun sar iħobb mara li kien jisimha Dalila. Il-ħames kapijiet alleati tal-Filistin tant kienu ħerqanin li jeliminaw lil Sansun li talbu l-għajnuna tagħha. Huma marru għand Dalila u qalulha: “Żiegħel bih u ara mnejn ġejja s-saħħa kbira li għandu, u tkixxfilna biex inkunu nistgħu norbtuh u nrażżnuh.” Bħala tixħim, kull wieħed mill-ħames kapijiet offrielha “elf u mitt xekel tal-fidda.”—Mħallfin 16:4, 5.
Jekk kull biċċa fidda kienet xekel, l-offerta taʼ 5,500 xekel kienet verament tixħim kbir. Abraham ħallas 400 xekel biex jixtri post għad-dfin għal martu, u lsir kien jinbiegħ għal 30 biċċa biss. (Ġenesi 23:14-20; Eżodu 21:32) Il-fatt li l-kapijiet—ħakkiema taʼ ħames bliet Filistin—immiraw lejn ir-regħba taʼ Dalila u mhux lejn il-lealtà tagħha għal ġensha jissuġġerixxi li forsi kienet mara Iżraelija. Kien x’kien il-każ, Dalila aċċettat l-offerta.
Għall-mistoqsijiet taʼ Dalila, Sansun tliet darbiet weġibha b’mod li ġagħalha taħseb xi ħaġa li ma kinitx minnha. U t-tliet darbiet li huma hi ttradietu billi pprovat tagħtih f’idejn l-għedewwa tiegħu. Imma “billi dejjqitu bi kliemha u taʼ kuljum baqgħet issus warajh, iddejjaq għall-mewt.” Sansun fl-aħħar kixef il-verità—xagħru qatt ma kien qatgħu. Jekk jaqtgħu, kien se jitlef saħħtu u jsir bħall-irġiel l-oħrajn kollha.—Mħallfin 16:6-17.
Dan kien il-kaġun tar-rovina taʼ Sansun. Dalila ġabitu f’sitwazzjoni fejn setaʼ jitqarwiżlu xagħru. Madankollu, is-saħħa taʼ Sansun ma kinitx letteralment f’xagħru. Xagħru kien sempliċement jirrappreżenta r-relazzjoni speċjali tiegħu m’Alla bħala Nażir. Meta Sansun ħalla lilu nnifsu jiġi f’sitwazzjoni li effettwat is-servizz tiegħu taʼ Nażir minħabba t-tqarwiż taʼ xagħru, Ġeħova “warrab minnu.” Il-Filistin issa għelbu lil Sansun, għamewh, u tefgħuh il-ħabs.—Mħallfin 16:18-21.
X’tagħlima qawwija jagħtina dan! M’għandniex aħna ngħożżu r-relazzjoni tagħna maʼ Ġeħova bħala xi ħaġa prezzjuża ferm? Jekk b’xi mod nagħmlu kompromess fejn tidħol id-dedikazzjoni Kristjana tagħna, kif nistgħu nistennew li Alla jkompli jberikna?
“Ħa Mmut Jien mal-Filistin”
Il-Filistin ferħanin irringrazzjaw lil alla tagħhom Dagon talli rebħu lil Sansun. Biex jiċċelebraw ir-rebħa, huma ħadu l-ilsir tagħhom lejn it-tempju taʼ Dagon. Imma Sansun kien jaf ir-raġuni vera għala rebħulu. Kien jaf għala Ġeħova ħallieh, u Sansun nidem min-nuqqas tiegħu. Waqt li Sansun kien il-ħabs, xagħru reġaʼ beda jitwal ħafna. Issa li kien jinsab quddiem eluf taʼ Filistin, x’kien se jagħmel?
“Mulej, Sidi,” talab Sansun, “ftakar fija! Agħtini l-forza, mqar għal din id-darba, o Alla, u f’salt wieħed nitħallas taż-żewġ għajnejja mill-Filistin.” Imbagħad qabad iż-żewġ plieri tan-nofs tal-bini, u “miel ’il quddiem fuqhom b’saħħtu kollha.” X’kien ir-riżultat? “Iġġarrfet id-dar fuq il-kapijiet u fuq il-poplu kollu li kien hemm fiha. U l-għadd tal-mejtin, li qatel f’mewtu, kien akbar minn kemm kien qatel f’ħajtu.”—Mħallfin 16:22-30.
Għas-saħħa fiżika, Sansun ma kienx hemm bħalu fost il-bnedmin. L-atti setgħana tiegħu kienu tassew taʼ min jinnotahom. Imma l-iktar importanti, il-Kelma taʼ Ġeħova tinkludi lil Sansun fost dawk b’saħħithom fil-fidi.—Ebrej 11:32-34.
[Stampa f’paġna 26]
X’kien is-sigriet tas-saħħa taʼ Sansun?