Ġeħova Għadd ‘Saħansitra x-​Xagħar taʼ Rasek’

“Lanqas wieħed [mill-għasafar tal-​bejt] ma jaqaʼ fl-​art mingħajr ma jkun jaf Missierkom. Għax saħansitra x-​xagħar taʼ raskom kollu hu magħdud.”—MATTEW 10:​29, 30.

1, 2. (a) Ġob għala ħassu abbandunat minn Alla? (b) Kienu l-​espressjonijiet taʼ Ġob ifissru li hu ħadha kontra Ġeħova? Spjega.

 “JIEN ngħajjatlek u ma tweġibnix, nibqaʼ nsejjaħ u ma tagħtix kasi! M’għadekx li kont, sirt krudil miegħi, bil-​qawwa kollha taʼ driegħek tagħmel għalija.” Ir-​raġel li qal dan il-​kliem kien għaddej minn diqa kbira, u mhux taʼ b’xejn! Hu kien tilef il-​ħeġġa kollha, diżastru tal-​biżaʼ qatillu lil uliedu, u issa kien milqut b’marda li xorbitlu saħħtu. Isem ir-​raġel kien Ġob, u l-​prova taʼ niket kbir tiegħu ġiet imniżżla fil-​Bibbja għall-​benefiċċju tagħna.—Ġob 30:​20, 21.

² Il-​kliem taʼ Ġob jistaʼ jagħtina x’naħsbu li hu ħadha kontra Alla, imma dan ma kienx il-​każ. Ġob sempliċement tkellem mill-​fond tal-​qalb imnikkta tiegħu. (Ġob 6:​2, 3) Hu ma kienx jaf li Satana kien qed jikkaġunalu l-​provi tiegħu, u allura bi żball ikkonkluda li Alla kien telqu. F’waqt minnhom, Ġob saħansitra qal lil Ġeħova: “Għax taħbi wiċċek minni, u tqisni għadu tiegħek?” *—Ġob 13:24.

3. Meta jinqalaʼ l-​inkwiet, liema ħsibijiet jistgħu jiġuk f’moħħok?

³ Illum, ħafna wħud mill-​poplu taʼ Ġeħova qed ibatu kontinwament minn diffikultajiet minħabba l-​gwerer, it-​taqlib politiku jew soċjali, id-​diżastri naturali, ix-​xjuħija, l-​għaks, u projbizzjonijiet mill-​gvern. Probabbilment anki int għaddej minn xi tip taʼ prova. Kultant għandek mnejn taħseb li Ġeħova qed jaħbi wiċċu minnek. Int tafu sew il-​kliem fi Ġwanni 3:16: “Alla tant ħabb lid-​dinja li ta l-​Iben uniġenitu tiegħu.” Xorta waħda, meta tkun qed tbati mingħajr ma tara ebda serħan quddiemek, għandek mnejn tistaqsi: ‘Alla tassew iħobb lili? Jinnota dak li għaddej minnu? Jimpurtah minni bħala individwu?’

4. Liema sitwazzjoni kontinwa kellu jissaporti Pawlu, u b’liema mod tistaʼ sitwazzjoni bħal din teffettwana?

⁴ Ikkunsidra x’ġara lill-​appostlu Pawlu. “Ngħatajt xewka fil-​laħam, anġlu taʼ Satana, biex tibqaʼ ssawwatni,” kiteb hu, u żied: “Tliet darbiet tlabt bil-​ħrara lill-​Mulej biex titbiegħed minni.” Ġeħova semaʼ t-​talb bil-​ħrara tiegħu. Minkejja dan, hu indika lil Pawlu li ma kienx se jintervieni permezz taʼ soluzzjoni mirakoluża. Minflok, Pawlu kellu jistrieħ fuq il-​qawwa t’Alla biex tgħinu jkampa max-​“xewka fil-​laħam” li kellu. * (2 Korintin 12:​7-9) Bħal Pawlu, għandek mnejn qed tiffaċċja xi prova kontinwa. Forsi tistaqsi, ‘Il-​fatt li Ġeħova jidher li m’għamel xejn dwar il-​prova tiegħi jfisser li ma jafx bis-​sitwazzjoni tiegħi jew li ma jimpurtahx minni?’ It-​tweġiba żgur li hija le! Ġesù enfasizza kemm Ġeħova jimpurtah ferm mill-​qaddejja leali tiegħu permezz tal-​kliem li qal lill-​appostli tiegħu ftit wara li għażilhom. Ejja naraw kif kliemu jistaʼ jkun taʼ inkuraġġiment illum.

 “Tibżgħux”—Għala?

5, 6. (a) Ġesù kif għen lill-​appostli tiegħu biex ma jibżgħux minn dak li kien se jseħħ fil-​futur? (b) Pawlu kif wera li kellu fiduċja fil-​fatt li Ġeħova kien jimpurtah minnu?

⁵ L-​appostli rċivew qawwiet straordinarji mingħand Ġesù, inkluż l-​“awtorità fuq l-​ispirti mhux nodfa, sabiex ikeċċuhom, u jfejqu kull xorta taʼ mard u kull xorta taʼ nuqqas taʼ saħħa.” Però, dan ma kienx ifisser li ħajjithom kienet se tkun ħielsa mill-​provi u d-​diffikultajiet. Kuntrarju għal dan, Ġesù tahom deskrizzjoni bid-​dettall dwar xi ftit mill-​affarijiet li kellhom jiffaċċjaw. Però, hu ħeġġiġhom: “Tibżgħux minn dawk li joqtlu l-​ġisem imma ma jistgħux joqtlu r-​ruħ; imma minflok ibżgħu minn dak li jistaʼ jeqred kemm ir-​ruħ u kemm il-​ġisem f’Geħenna.”—Mattew 10:​1, 16-22, 28.

⁶ Biex jgħin lill-​appostli jifhmu għala ma kellhomx għalfejn jibżgħu, Ġesù kompla jkellimhom billi tahom żewġ tixbihat. Hu qalilhom: “Ma jinbigħux żewġ għasafar tal-​bejt għal munita taʼ valur żgħir? Iżda lanqas wieħed minnhom ma jaqaʼ fl-​art mingħajr ma jkun jaf Missierkom. Għax saħansitra x-​xagħar taʼ raskom kollu hu magħdud. Għalhekk tibżgħux: intom tiswew iktar minn ħafna għasafar tal-​bejt.” (Mattew 10:​29-31) Innota li Ġesù għamel konnessjoni bejn li ma nibżgħux meta niffaċċjaw id-​diffikultajiet u li nkunu fiduċjużi li Ġeħova jimpurtah minna personalment. Jidher ċar li Pawlu kellu dan it-​tip taʼ fiduċja. Hu kiteb: “Jekk Alla hu favur tagħna, min se jkun kontra tagħna? Hu li lanqas lil Ibnu stess ma ħelisha imma tah għalina lkoll, għala ma jagħtiniex miegħu wkoll b’qalb tajba l-​affarijiet l-​oħra kollha?” (Rumani 8:​31, 32) Ikunu xi jkunu l-​ostakli li tiffaċċja, int ukoll tistaʼ tkun ċert li Ġeħova jimpurtah minnek personalment sakemm tibqaʼ leali lejh. Dan se jidher iktar u iktar ċar hekk kif neżaminaw iktar mill-​qrib it-​twissija taʼ Ġesù lill-​appostli tiegħu.

Il-​Valur t’Għasfur tal-​Bejt

7, 8. (a) Fi żmien Ġesù, in-​nies kif kienu jqisu l-​għasafar tal-​bejt? (b) Milli jidher, f’Mattew 10:29 għala tintuża l-​kelma Griega għal “għasafar tal-​bejt” li tfisser id-​diminuttiv tagħhom?

⁷ It-​tixbihat taʼ Ġesù jiddeskrivu b’mod effettiv l-​interess taʼ Ġeħova f’kull wieħed mill-​qaddejja Tiegħu. L-​ewwel ikkunsidra l-​kwistjoni dwar l-​għasafar tal-​bejt. Fi żmien Ġesù, l-​għasafar tal-​bejt kienu jittieklu, imma minħabba li kienu taʼ theddida għall-​prodotti tar-​rabaʼ, ħafna nies kienu jarawhom bħala għasafar li jagħmlu ħsara. Tant kien hemm għasafar tal-​bejt u tant kienu rħas li stajt tixtri tnejn b’inqas minn żewġ ċenteżmi taʼ llum. Bid-​doppju taʼ dan l-​ammont kont tixtri mhux erbaʼ għasafar tal-​bejt imma ħamsa—l-​għasfur  żejjed kien jiżdied bla ħlas, bħallikieku ma kellu valur taʼ xejn!—Luqa 12:6.

⁸ Aħseb ukoll dwar id-​daqs taʼ dan l-​għasfur komuni. Meta tqabblu maʼ ħafna għasafar oħra, anki għasfur tal-​bejt li jkun laħaq id-​daqs naturali tiegħu jkun ċkejken. Madankollu, il-​kelma Griega tradotta “għasafar tal-​bejt” f’Mattew 10:29 tirreferi speċifikament għall-​għasafar tal-​bejt żgħar. Jidher ċar li Ġesù ried lill-​appostli tiegħu jimmaġinaw għasfur li hu taʼ l-​inqas valur possibbli. Bħalma jgħid xogħol wieħed taʼ referenza, “Ġesù jsemmi għasfur tassew żgħir u juża saħansitra d-​diminuttiv tiegħu!”

9. Liema punt qawwi jagħmel Ġesù permezz tat-​tixbiha taʼ l-​għasafar tal-​bejt?

⁹ L-​analoġija li juża Ġesù dwar l-​għasafar tal-​bejt tagħmel punt qawwi: Dak li jidher bla valur fil-​ħarsa tal-​bnedmin huwa importanti għal Alla Ġeħova. Ġesù kompla jenfasizza kemm hu minnu dan billi żied li ebda għasfur tal-​bejt żgħir “ma jaqaʼ fl-​art” mingħajr ma jinnotah Ġeħova. * It-​tagħlima hija ċara. Jekk Alla Ġeħova jinnota saħansitra lill-​iżgħar għasfur li għandu l-​inqas sinifikat, kemm iktar se jinteressah mis-​sitwazzjoni diffiċli taʼ bniedem li jkun għażel li jaqdih!

10. Xi tfisser l-​istqarrija: “Saħansitra x-​xagħar taʼ raskom kollu hu magħdud”?

¹⁰ Minbarra t-​tixbiha tiegħu dwar l-​għasafar tal-​bejt, Ġesù kompla jgħid: “Saħansitra x-​xagħar taʼ raskom kollu hu magħdud.” (Mattew 10:30) Din l-​istqarrija fil-​qosor imma profonda tenfasizza l-​punt tat-​tixbiha taʼ Ġesù dwar l-​għasafar tal-​bejt. Ikkunsidra dan: Ras taʼ bniedem ġeneralment ikun fiha xi 100,000 xagħra. Ġeneralment, ix-​xagħar kollu jidher li hu l-​istess, u ma noqogħdux neżaminaw xagħarna waħda waħda. Però, Alla Ġeħova jinnota kull xagħra u jgħoddha. Ladarba dan hu l-​każ, hemm xi dettall f’ħajjitna li Ġeħova jistaʼ ma jkunx jafu? Żgur li Ġeħova jifhem kif kull wieħed mill-​qaddejja tiegħu hu magħmul b’mod uniku. Tabilħaqq, hu ‘jara l-​qalb.’—1 Samwel 16:7.

11. David kif esprima li kien fiduċjuż li Ġeħova jieħu interess fih personalment?

¹¹ David kien jaf xi tfisser it-​tbatija u kien fiduċjuż li Ġeħova kien jinnotah. “Mulej, int tgħarbilni u tagħrafni,” kiteb hu. “Int taf meta noqgħod u meta nqum, int tagħraf mill-​bogħod ħsibijieti.” (Salm 139:​1, 2) Int ukoll tistaʼ tkun ċert li Ġeħova jafek personalment. (Ġeremija 17:10) Tgħaġġilx biex tassumi li int insinifikanti wisq biex għajnejn Ġeħova li jaraw kollox jinnotaw lilek ukoll!

“Iġmaʼ fi Flixkun id-​Dmugħ Tiegħi”

12. Kif nafu li Ġeħova jaf sew dwar it-​tbatijiet li jgħaddi minnhom il-​poplu tiegħu?

¹² Ġeħova mhux biss jaf lil kull wieħed mill-​qaddejja tiegħu individwalment imma wkoll jaf kull dettall dwar it-​tbatijiet li jesperjenza kull wieħed minnhom. Per eżempju, meta l-​Iżraelin kienu qed jinħaqru fil-​jasar, Ġeħova qal lil Mosè: “Jien ħarist u rajt it-​tbatija tal-​poplu tiegħi fl-​Eġittu. U jien smajt il-​karba tagħhom minħabba fl-​argużini tagħhom u għaraft l-​uġigħ tagħhom.” (Eżodu 3:7) Kemm hu taʼ faraġ li nirrealizzaw li meta nkunu qed nissaportu xi prova, Ġeħova jara dak li jkun  qed jiġri u jismaʼ l-​karba tagħna! Żgur li mhux se jinjora t-​tbatija tagħna.

13. X’jurina li Ġeħova tassew iħoss għall-​qaddejja tiegħu?

¹³ L-​interess taʼ Ġeħova f’dawk li daħlu f’relazzjoni miegħu jidher iktar ċar mis-​sentimenti tiegħu għall-​Iżraelin. Avolja spiss it-​tbatija tagħhom kienet tiġi minħabba r-​ras iebsa li kellhom, Isaija kiteb dwar Ġeħova: “Fid-​dwejjaq tagħhom kollha kien imnikket.” (Isaija 63:​9, Karm Żammit) Allura, bħala qaddej leali taʼ Ġeħova, int tistaʼ tkun ċert li meta tħossok muġugħ, Ġeħova jħoss l-​uġigħ tiegħek. Ma tħossokx imqanqal minn dan biex tiffaċċja d-​diffikultajiet bla biżaʼ u tkompli tagħmel l-​aħjar tiegħek biex taqdih?—1 Pietru 5:​6, 7.

14. X’kienu ċ-​ċirkustanzi tas-​salmista meta kkompona Salm 56?

¹⁴ Il-​konvinzjoni tas-​Sultan David li Ġeħova kien jinteressah fih u jħoss għalih tidher biċ-​ċar f’Salm 56, li David ikkompona meta kien qed jaħrab mis-​Sultan Sawl li ried joqtlu. David ħarab lejn Gad, imma beżaʼ li se jinqabad meta l-​Filistin għarfuh. Hu kiteb: “Il-​jum kollu jkasbruni l-​għedewwa tiegħi, għax ħafna huma dawk li jeħduha miegħi.” Minħabba s-​sitwazzjoni perikoluża tiegħu, David mar għand Ġeħova għall-​għajnuna. “Il-​jum kollu jqassu u jgħidu fuqi,” qal hu. “Ħsiebhom biss kif jagħmluli l-​ħsara.”—Salm 56:​3, 6 (56:​2, 5, NW).

15. (a) David x’ried ifisser meta talab lil Ġeħova biex jiġmaʼ d-​dmugħ tiegħu fi flixkun jew fi ktieb? (b) Meta nkunu qed nissaportu sitwazzjoni li hi taʼ prova għall-​fidi tagħna, dwar xiex nistgħu nkunu ċerti?

¹⁵ Imbagħad, bħalma hemm imniżżel f’Salm 56:9 (56:​8, NW), David jagħmel dawn l-​istqarrijiet mill-​isbaħ: “Int għaddejt kull ċaqliqa tiegħi; iġmaʼ fi flixkun id-​dmugħ tiegħi. M’huwiex dan fil-​ktieb tiegħek?” X’deskrizzjoni li tmisslek qalbek taʼ kif Ġeħova jieħu ħsiebna b’tenerezza! Meta nkunu għaddejjin minn xi stress, għandna mnejn insejħu lil Ġeħova bid-​dmugħ f’għajnejna. Anki l-​bniedem perfett Ġesù għamel dan. (Ebrej 5:7) David kien konvint li Ġeħova kien qed jarah u li kien se jiftakar fit-​tbatija tiegħu, bħallikieku kien qed jiġmaʼ fi flixkun id-​dmugħ tiegħu jew jiktibhom fi ktieb. * Jistaʼ jkun li tħoss li d-​dmugħ tiegħek jimla parti kbira minn dan il-​flixkun jew ħafna paġni minn ktieb bħal dan. Jekk dan hu l-​każ, tistaʼ tfarraġ ruħek. Il-​Bibbja taċċertana: “Qrib il-​Mulej lejn dawk b’qalbhom maqsuma, jgħin lil dawk b’ruħhom mifnija.”—Salm 34:19 (34:​18, NW).

Kif Issir Ħabib Intimu t’Alla

16, 17. (a) Kif nafu li Ġeħova ma jinjorax il-​problemi li jiffaċċja l-​poplu tiegħu? (b) Ġeħova x’għamel biex in-​nies ikunu jistgħu jgawdu relazzjoni intima miegħu?

¹⁶ Il-​fatt li Ġeħova għadd ‘ix-​xagħar taʼ rasna kollu’ jurina xi privileġġ għandna li nqimu Alla li josserva u li jaf jieħu ħsiebna. Għalkemm se jkollna nistennew sakemm id-​dinja l-​ġdida mwiegħda biex l-​uġigħ u t-​tbatija kollha jispiċċaw, Ġeħova qed jagħmel xi ħaġa meraviljuża għall-​poplu tiegħu minn issa. David kiteb: “Midħla l-​Mulej taʼ dawk li jibżgħu minnu, lilhom jgħarraf il-​patt tiegħu.”—Salm 25:14.

¹⁷ Inkunu ‘midħla tal-​Mulej.’ Bħala bnedmin imperfetti bilkemm nistgħu nifhmu xi jfisser dan għalina! Però, Ġeħova jistieden lil dawk li jibżgħu minnu biex jgħammru fid-​dar tiegħu. (Salm 15:​1-5) U Ġeħova x’jagħmel għal dawk li jistieden biex jgħammru fid-​dar tiegħu? Skond David hu jgħarrafhom il-​patt tiegħu. Ġeħova jafdahom, juri “l-​ħwejjeġ moħbija” lill-​profeti tiegħu, sabiex ikunu jafu x’inhuma l-​iskopijiet tiegħu u xi jridu jagħmlu biex jgħixu fi qbil magħhom.—Għamos 3:7.

18. Kif nafu li Ġeħova jrid li jkollna relazzjoni mill-​qrib miegħu?

 ¹⁸ Fir-​realtà, huwa taʼ ferħ li nkunu nafu li aħna bħala bnedmin imperfetti nistgħu nsiru ħbieb intimi taʼ l-​Iktar Għoli, Alla Ġeħova. Fil-​fatt, hu jħeġġiġna nagħmlu eżatt hekk. “Ersqu qrib lejn Alla, u hu jersaq qrib lejkom,” tgħid il-​Bibbja. (Ġakbu 4:8) Ġeħova jrid li jkollna relazzjoni intima miegħu. Fil-​fatt, hu diġà ħa l-​passi biex jagħmilha possibbli li jkollna relazzjoni bħal din. Is-​sagrifiċċju taʼ fidwa taʼ Ġesù fetħilna t-​triq biex ikun jistaʼ jkollna ħbiberija m’Alla li Jistaʼ Kollox. Il-​Bibbja tgħid: “Ngħidu għalina, aħna nħobbu, għax hu ħabbna l-​ewwel.”—1 Ġwanni 4:19.

19. Is-​sabar tagħna kif jistaʼ jtejjeb ir-​relazzjoni tagħna maʼ Ġeħova?

¹⁹ Din ir-​relazzjoni titjieb meta nissaportu f’ċirkustanzi taʼ prova. Id-​dixxiplu Ġakbu kiteb: “Ħallu s-​sabar iwettaq xogħlu għalkollox, sabiex b’hekk tkunu kompluti u sħaħ f’kull aspett bla ma jonqoskom xejn.” (Ġakbu 1:4) Liema ‘xogħol’ jitwettaq meta nissaportu t-​tbatija? Ftakar fix-​“xewka fil-​laħam” li kellu Pawlu. Xi pproduċa s-​sabar fil-​każ tiegħu? Pawlu qal dan dwar il-​provi tiegħu: “Għalhekk, b’ferħ kbir, nippreferi niftaħar bid-​dgħjufijiet tiegħi biex il-​qawwa tal-​Kristu tibqaʼ fuqi bħal tinda. Għaldaqstant nitgħaxxaq bid-​dgħjufijiet, bl-​insulti, bl-​għaks, bil-​persekuzzjonijiet u d-​diffikultajiet, għal Kristu. Għax meta nkun dgħajjef, inkun setgħan.” (2 Korintin 12:​9, 10) L-​esperjenza taʼ Pawlu kienet li Ġeħova kien se jagħtih il-​qawwa li kellu bżonn—“il-​qawwa iktar min-​normal” jekk kien hemm bżonn—sabiex ikun jistaʼ jissaporti. Mill-​banda l-​oħra, dan ressqu iktar qrib lejn Kristu u lejn Alla Ġeħova.—2 Korintin 4:7; Filippin 4:​11-13.

20. Kif nistgħu nkunu ċerti li Ġeħova se jappoġġana u jfarraġna meta niffaċċjaw id-​diffikultajiet?

²⁰ Jistaʼ jagħti l-​każ li Ġeħova ppermetta li l-​provi tiegħek jibqgħu għaddejjin. Jekk inhu hekk, żomm f’moħħok il-​wegħda li għamel lil dawk li jibżgħu minnu: “Żgur ma nitilqikx u żgur ma nabbandunakx.” (Ebrej 13:5) Int tistaʼ tesperjenza appoġġ u faraġ bħal dan. Ġeħova għadd ‘saħansitra x-​xagħar taʼ rasek.’ Hu jara s-​sabar tiegħek. Hu jħoss l-​uġigħ tiegħek. Hu jinteressah fik ġenwinament. U hu qatt ma se ‘jinsa għemilek u l-​imħabba li wrejt għal ismu.’—Ebrej 6:10.

[Noti taʼ taħt]

Tiftakar Int?

• Liema affarijiet jistgħu jġagħlu lil individwu jħossu li Alla abbandunah?

• Liema tagħlima nieħdu mit-​tixbihat taʼ Ġesù dwar l-​għasafar tal-​bejt u dwar l-​għadd tax-​xagħar kollu taʼ rasna?

• Xi jfisser li Ġeħova jżomm id-​dmugħ tagħna fil-​“flixkun” jew fil-​“ktieb” tiegħu?

• Kif nistgħu nibbenefikaw milli nsiru “midħla tal-​Mulej”?

[Mistoqsijiet taʼ Studju]

[Stampa f’paġna 22]

Ġeħova għala ma neħħiex ix-​“xewka fil-​laħam” li kellu Pawlu?

[Stampa f’paġna 23]

X’nistgħu nitgħallmu mit-​tixbiha taʼ Ġesù dwar l-​għasafar tal-​bejt?

[Sors]

© J. Heidecker/VIREO

[Stampa f’paġna 25]

Meta naqraw il-​Bibbja regolarment, inkunu nistgħu nħossuna ċerti li Ġeħova jinteressah fina personalment