Meta Għandek Għalxiex Tieħu Għalik?

F’KOĦÈLET 7:9 (NW), il-​Bibbja tgħid: “Li wieħed jieħu għalih huwa dak li jistrieħ fi ħdan l-​istupidi.” Dan il-​vers juri li m’għandniex inkunu sensittivi żżejjed meta xi ħadd joffendina; minflok, għandna nkunu lesti li naħfrulu.

Però, qiegħed Koħèlet 7:9 jgħid li qatt m’għandna nieħdu għalina minħabba xi ħaġa jew xi ħadd, li għandna naħfru kwalunkwe offiża minkejja kemm tkun kbira jew kemm-il darba ssir u li m’għandna nagħmlu xejn dwarha? Għandna ninjoraw il-​fatt li kultant noffendu lil xi ħadd b’kelma jew azzjoni minħabba li nafu li l-​individwu għandu jaħfrilna? Dan ma jistax ikun il-​każ.

Alla Ġeħova hu l-​personifikazzjoni taʼ l-​imħabba, il-​ħniena, il-​maħfra, u s-​sabar fit-​tul. Però, fil-​Bibbja, spiss naqraw li ġie offiż. Meta l-​offiża kienet gravi, hu aġixxa kontra min għamilha. Ikkunsidra xi eżempji.

Offiżi Kontra Ġeħova

Ir-​rakkont taʼ l-​1 Slaten 15:30 jitkellem dwar id-​dnubiet taʼ Ġerobogħam “li dineb hu u ġagħal lil Iżrael jidinbu, u b’hekk għaddab [“offenda,” NW] il-​Mulej.” Fit-​2 Kronaki 28:​25, il-​Bibbja tgħid dwar is-​Sultan Aħaż taʼ Ġuda: “Bena santwarji f’kull belt taʼ Ġuda biex jaħarqu fuqhom l-​inċens lil allat oħra, u hekk kompla saħħan il-​korla tal-​Mulej [“offenda lil Ġeħova,” NW], Alla taʼ missirijietu.” Insibu eżempju ieħor fi Mħallfin 2:​11-14: “Wlied Iżrael għamlu l-​ħażin f’għajnejn il-​Mulej u servew lill-​allat Bagħalim . . . , u nkurlaw [“offendew,” NW] lill-​Mulej. . . . Xegħlet il-​korla tal-​Mulej għal Iżrael, u telaqhom f’idejn il-​ħallelin li serquhom.”

Hemm affarijiet oħra li offendew lil Ġeħova u li kienu jeħtieġu minnu li jieħu azzjoni qawwija. Per eżempju, f’Eżodu 22:​17-19 (22:​18-20, NW) naqraw: “Saħħara, tħallihiex tgħix. Kull min jorqod maʼ bhima, ikun ħaqqu l-​mewt. Kull min joffri sagrifiċċji lill-​allat, ħlief lill-​Mulej, ikun meqrud.”

Ġeħova ma ħafirx kontinwament l-​offiżi kbar taʼ Iżrael tal-​qedem meta baqgħu joffenduh u ma wrewx indiema vera. Meta ma kienx hemm indiema vera u ma għamlu xejn biex jindikaw li kienu se jduru lura u jobdu lil Ġeħova, Alla mbagħad ħalliehom jinqerdu. Dan ġara fuq skala nazzjonali fis-​sena 607 Q.E.K., meta nqerdu mill-​Babiloniżi, u għal darb’oħra fis-​sena 70 E.K. meta nħatfu mir-​Rumani.

Iva, Ġeħova jieħu għalih minħabba l-​affarijiet ħżiena li jgħidu u jagħmlu n-​nies, u hu spiss jagħmel ħaqq minn dawk li jagħmlu dnubiet gravi u ma jindmux. Imma allura Ġeħova hu bħal dak li jiddeskrivi Koħèlet 7:9? Lanqas xejn. Hu għandu raġun jieħu għalih meta jkun hemm dnubiet gravi u dejjem jagħmel ħaqq b’mod ġust. Il-​Bibbja tgħid dwar Ġeħova: “Perfett għemilu; u lkoll ġusti t-​triqat tiegħu. Alla taʼ kelmtu u ma jqarraqx; kollu ħaqq u kollu sewwa.”—Dewteronomju 32:4.

Offiżi Serji Kontra Individwi

Fil-​Liġi li Alla ta lil Iżrael tal-​qedem, kien hemm konsegwenzi serji għal offiżi kbar  kontra individwi. Per eżempju, jekk ħalliel kien jidħol f’dar bil-​lejl u sid id-​dar kien joqtlu, ma kien ikun hemm ebda ħtija tad-​demm fuq sid id-​dar. Hu kien vittma innoċenti taʼ att kriminali kbir. Għalhekk naqraw: “Jekk il-​ħalliel jinqabad huwa u jiftaħ, u jaħbtu għalih u joqtluh, ħadd ma jkun ħati taʼ ħajtu.”—Eżodu 22:1 (22:​2, NW).

Mara li tkun ġiet stuprata għandha kull dritt tieħu għaliha bil-​kbir għaliex dan hu att kriminali serju fil-​ħarsa t’Alla. Taħt il-​Liġi Mosajka, raġel li jistupra mara kellu jmut “bħal meta jħebb wieħed għal għajru, u jneħħilu ħajtu.” (Dewteronomju 22:​25, 26) Għalkemm m’għadniex taħt dik il-​Liġi, din tgħinna nifhmu kif iħossu Ġeħova dwar l-​istupru—dnub ikrah ferm.

Anki fi żmienna, l-​istupru huwa att kriminali kbir li jiġi kastigat bl-​aħrax. Il-​vittma għandha kull dritt tirrapporta l-​każ lill-​pulizija. B’dan il-​mod, l-​awtoritajiet xierqa jkunu jistgħu jikkastigaw lil min jikkaġunah. U jekk il-​vittma tkun minorenni, il-​ġenituri għandhom mnejn ikunu jixtiequ jirrapportaw huma.

Offiżi Iżgħar

Madankollu, mhux l-​offiżi kollha jeħtieġu l-​azzjoni taʼ l-​awtoritajiet. Għalhekk, m’għandniex nagħmluha bi kbira dwar żbalji t’oħrajn li jkunu relattivament żgħar, imma għandna nkunu lesti li naħfru.  Kemm-il darba għandna naħfru? L-​appostlu Pietru staqsa lil Ġesù: “Mulej, kemm-il darba jistaʼ ħija jidneb kontrija u naħfirlu? Sa sebaʼ darbiet?” Ġesù wieġbu: “Ma ngħidlikx, Sa sebaʼ darbiet, imma, Sa sebgħa u sebgħin darba.”—Mattew 18:​21, 22.

Mill-​banda l-​oħra, aħna għandna bżonn inkomplu naħdmu fuq il-​personalità Kristjana tagħna billi nipprovaw ma noffendu lil ħadd. Per eżempju, meta tkellem lil oħrajn, ġieli tkun goff, bla tattika, jew insolenti? Min jitkellem b’dan il-​mod wisq probabbli se joffendi lil oħrajn. Minflok ma jwaħħal fil-​vittma għax tieħu għaliha u jħoss li hi għandha d-​dmir taħfirlu, min jagħmel l-​offiża għandu jirrealizza li l-​persuna ħadet għaliha minħabba fih. Dak li jagħmel l-​offiża għandu jaħdem fuq li jikkontrolla għemilu u kliemu ħalli l-​ewwel u qabel kollox ma joffendi lil ħadd. Dan l-​isforz se jnaqqas l-​għadd taʼ drabi li nweġġgħu s-​sentimenti taʼ oħrajn. Il-​Bibbja tfakkarna: “Min iqassas b’ilsienu jinfed bħal sejf, imma lsien l-​għorrief idewwi.” (Proverbji 12:18) Meta noffendu lil oħrajn, anki jekk ma tkunx l-​intenzjoni tagħna, jekk nitolbu maħfra se ngħinu ħafna biex titranġa s-​sitwazzjoni.

Il-Kelma t’Alla turi li għandna “niġru wara l-​affarijiet li jġibu l-​paċi u l-​affarijiet li bihom nibnu lil xulxin.” (Rumani 14:19) Meta nużaw it-​tattika u l-​qalb tajba, inkunu qed napplikaw il-​proverbju: “Bħal tuffieħ tad-​deheb fuq platt tal-​fidda, hi l-​kelma li tingħad f’waqtha.” (Proverbji 25:11) Kemm inħallu impressjoni tajba u pjaċevoli b’dan il-​mod! Kliem ħelu li jingħad bit-​tattika jistaʼ anki jibdel attitudnijiet ebsin f’oħrajn: “Bil-​kelma t-​tajba tkisser l-​għadam.”—Proverbji 25:15.

Għalhekk, il-​Kelma t’Alla tagħtina l-​parir: “Ħa jkun kliemkom dejjem kollu ħlewwa, imħawwar bil-​melħ, sabiex tkunu tafu kif għandkom twieġbu lil kulħadd.” (Kolossin 4:6) “Imħawwar bil-​melħ ifisser” li nagħmlu kliemna jogħġob lil oħrajn, u għalhekk ikun hemm inqas ċans li noffendu lil xi ħadd. Kemm bil-​kliem u kemm bil-​fatti, il-​Kristjani jistinkaw biex japplikaw it-​twissija tal-​Bibbja: ‘Fittxu l-​paċi u iġru warajha.’—1 Pietru 3:11.

Għalhekk, Koħèlet 7:9 jrid ifisser li għandna noqogħdu lura milli nieħdu għalina minħabba d-​dnubiet t’oħrajn li huma relattivament żgħar. Dawn jistgħu jsiru minħabba l-​imperfezzjoni tal-​bniedem jew jistgħu jkunu apposta imma ma jkunux gravi. Imma meta offiża tkun dnub serju, huwa raġunevoli li l-​vittma tħossha offiża u tistaʼ tagħżel li tieħu l-​azzjoni li jkun hemm bżonn.—Mattew 18:​15-17.

[Stampa f’paġna 14]

Ġeħova ħalla lill-​Iżraelin li ma kinux niedma jinqerdu mir-​Rumani fis-​sena 70 E.K.

[Stampa f’paġna 15]

“Bħal tuffieħ tad-​deheb . . . hi l-​kelma li tingħad f’waqtha”