L-​Interpretazzjoni tas-​Sinjali Hi Kwistjoni Serja!

“Għall-​ewwel ħsibt li t-​tifel tagħna Andreas kellu sempliċi wġigħ taʼ ras. Imma mbagħad inqatagħlu l-​ġuħ u telagħlu deni qawwi. L-​uġigħ taʼ ras kiber, u jien bdejt ninkwieta. Meta żewġi ġie d-​dar, ħadna lil Andreas għand it-​tabib. Dan iċċekkja s-​sintomi u bagħtu dritt l-​isptar. Il-​problema kienet iktar serja minn sempliċi wġigħ taʼ ras. Andreas kellu l-​meninġite. Ġie kkurat u fi żmien qasir fieq.”—Gertrud, omm fil-​Ġermanja.

L-​ESPERJENZA taʼ Gertrud probabbilment hija familjari għal ħafna ġenituri. Huma josservaw is-​sinjali li jindikaw li t-​tfal tagħhom jistgħu jkunu morda. Għalkemm mhux kull marda hija serja, il-​ġenituri ma jistgħux jirriskjaw li jinjoraw is-​sintomi tal-​mard t’uliedhom. Meta dak li jkun josserva s-​sinjali u jaġixxi skond il-​bżonn ikun hemm differenza kbira. Hija kwistjoni serja.

Dan huwa minnu anki fi kwistjonijiet li m’humiex marbutin mas-​saħħa. Eżempju taʼ dan hu d-​diżastru tat-​tsunami f’Diċembru taʼ l-​2004 fl-​inħawi madwar l-​Oċean Indjan. L-​aġenziji f’postijiet bħall-​Awstralja u l-​Ħawajj indunaw bit-​terremot enormi fit-​tramuntana taʼ Sumatra u raw bil-​quddiem il-​periklu li setaʼ jġib miegħu. Però, in-​nies taʼ l-​inħawi li kienu fil-​periklu ma kellhom ebda mezz disponibbli biex jirċievu t-​twissija u jwieġbu għaliha. Minħabba f’hekk, mietu iktar minn 220,000 ruħ.

Sinjali Ferm Iktar Importanti

Meta Ġesù Kristu kien fuq l-​art, hu ta tagħlima lis-​semmiegħa tiegħu dwar kif josservaw is-​sinjali u jaġixxu fuqhom. Hu kien qed jitkellem dwar xi ħaġa li kienet tassew importanti. Il-​Bibbja tirrapporta: “Resqu lejh il-​Fariżej u s-​Sadduċej biex iġarrbuh u talbuh jurihom sinjal mis-​sema. Wieġeb u qalilhom: ‘Meta jasal fil-​għaxija intom imdorrijin tgħidu, “Se jkun temp sabiħ, għax is-​sema aħmar nar”; u fil-​għodu, “Se jkun temp ikrah u bix-​xita llum, għax is-​sema  aħmar nar, imma mdallam.” Intom tafu tinterpretaw id-​dehra tas-​sema imma ma tafux tinterpretaw is-​sinjali taż-​żminijiet.’”​—Mattew 16:​1-3.

Meta semma “s-​sinjali taż-​żminijiet,” Ġesù indika li s-​semmiegħa Lhud taʼ l-​ewwel seklu messhom kienu attenti għall-​urġenza taż-​żminijiet li kienu qed jgħixu fihom. Is-​sistema Lhudija kienet se tgħaddi minn taqliba kbira li kienet se teffettwahom ilkoll. Ftit jiem qabel mewtu, Ġesù kellem lid-​dixxipli tiegħu dwar sinjal ieħor—is-​sinjal tal-​preżenza tiegħu. Dak li qal f’din l-​okkażjoni hu taʼ importanza vitali għal kulħadd illum.