Qiegħed Tagħrfu s-Sinjal tal-Preżenza taʼ Ġesù?
Qiegħed Tagħrfu s-Sinjal tal-Preżenza taʼ Ġesù?
ĦADD ma jixtieq ikun marid serjament jew jinqabad f’xi diżastru. Sabiex jevita inkwiet bħal dan, min hu għaqli joqgħod attent għas-sinjali li jindikaw il-periklu u jieħu l-passi meħtieġa. Ġesù Kristu ddeskriva sinjal partikulari li għandna bżonn nagħrfu. Dak li kien qed jirreferi għalih kien se jolqot lid-dinja kollha u jeffettwa lill-bnedmin kollha. Dan jinkludi lilek u lill-familja tiegħek.
Ġesù tkellem dwar is-Saltna t’Alla, li se tneħħi l-ħażen u tagħmel id-dinja Ġenna taʼ l-art. Id-dixxipli tiegħu kienu kurjużi dwar dan u riedu jkunu jafu meta kellha tiġi dik is-Saltna. Huma staqsew: “X’se jkun is-sinjal tal-preżenza tiegħek u taʼ tmiem is-sistema?”—Mattew 24:3.
Ġesù kien jaf li wara li jinqatel u jiġi rxoxtat, kellhom jgħaddu mijiet taʼ snin qabel ma jingħata t-tron fis-sema bħala s-Sultan Messjaniku ħalli jaħkem fuq l-umanità. Ladarba l-bnedmin ma setgħux jarawh jieħu t-tron, Ġesù ta sinjal li kien se jippermetti lis-segwaċi tiegħu jagħrfu l-“preżenza” tiegħu kif ukoll “tmiem is-sistema.” Dan is-sinjal hu magħmul minn diversi fatturi li flimkien jingħaqdu f’marka, jew sinjal sħiħ—is-sinjal tal-preżenza taʼ Ġesù.
Mattew, Marku, u Luqa, il-kittieba taʼ l-Evanġelji, ilkoll niżżlu bir-reqqa t-tweġiba taʼ Ġesù. (Mattew, kapitli 24 u 25; Marku, kapitlu 13; Luqa, kapitlu 21) Kittieba oħra tal-Bibbja żiedu xi dettalji mas-sinjal. (2 Timotju 3:1-5; 2 Pietru 3:3, 4; Rivelazzjoni 6:1-8; 11:18) M’għandniex biżżejjed wisaʼ f’dan l-artiklu biex neżaminaw id-dettalji kollha, imma se nikkunsidraw ħames elementi prinċipali li flimkien jifformaw is-sinjal imsemmi minn Ġesù. Int se ssib li dan hu sinifikanti u importanti għalik personalment.—Ara l-kaxxa f’paġna 6.
“Bidla li Ġabet Era Ġdida”
“Ġens iqum kontra ġens u saltna kontra saltna.” (Mattew 24:7) Ir-rivista Ġermaniża Der Spiegel tirrapporta li qabel l-1914, in-nies “kienu jemmnu f’futur tad-deheb b’iktar libertà, progress, u prosperità.” Imbagħad inbidel kollox. “Il-gwerra li bdiet f’Awissu taʼ l-1914 u spiċċat f’Novembru taʼ l-1918 kienet ġrajja drammatika. Ġabet bidla f’daqqa fl-istorja, u firdet il-qadim mill-ġdid,” tgħid ir-rivista GEO. Iktar minn 60 miljun suldat minn ħames kontinenti kienu involuti fi ġlied aħrax. Bħala medja, 6,000 suldat inqatlu kuljum. Minn dakinhar ’l hawn, l-istudjużi taʼ l-istorja taʼ kull ġenerazzjoni u taʼ kull naħa politika ħarsu lejn “is-snin taʼ l-1914 sa l-1918 bħala bidla li ġabet era ġdida.”
L-ewwel gwerra dinjija ġabet bidliet fis-soċjetà umana li ma jistgħux jitreġġgħu lura u tefgħet lill-umanità fl-aħħar jiem taʼ din is-sistema. Il-bqija taʼ dak is-seklu kien karatterizzat minn iktar gwerer, ġlied bl-armi, u terroriżmu. L-affarijiet ma nbiddlux għall-aħjar fl-ewwel snin taʼ dan is-seklu. Minbarra l-gwerra, hemm partijiet oħra tas-sinjal li huma viżibbli.
Ġuħ, Mard li Jittieħed, u Terremoti
“Ikun hemm nuqqas taʼ ikel.” (Mattew 24:7) Il-ġuħ laqat l-Ewropa matul l-ewwel gwerra dinjija, u n-nuqqas taʼ ikel ilu jgħakkes l-umanità minn dakinhar ’l hawn. L-istudjuż taʼ l-istorja Alan Bullock kiteb li fir-Russja u l-Ukraina fl-1933, “folol kbar taʼ nies imġewħa kienu jiġġerrew fil-kampanja . . . Il-katavri kienu jiġu mitfugħin fuq xulxin maʼ ġenb it-toroq.” Fl-1943, il-ġurnalista T. H. White ra b’għajnejh il-ġuħ fil-provinċja Ċiniża taʼ Henan. Hu kiteb: “Fil-ġuħ, kważi kollox jispiċċa tajjeb għall-ikel u jistaʼ jkun mitħun, mikul u mibdul f’enerġija mill-ġisem uman. Imma jrid ikollok il-biżaʼ li tmut biex tasal sal-punt li tibda taħseb biex tiekol dak li, is-soltu, ma tikolx.” B’dispjaċir, il-ġuħ fl-Afrika sar kważi xi ħaġa taʼ kuljum matul dawn l-aħħar għexur taʼ snin. Għalkemm l-art tipproduċi biżżejjed ikel għal kulħadd, l-Organizzazzjoni taʼ l-Ikel u l-Biedja tal-ĠM tikkalkula li madwar id-dinja xi 840 miljun ruħ bilkemm għandhom x’jieklu.
“F’post wara l-ieħor ikun hemm mard li jittieħed.” (Luqa 21:11) “Huwa stmat li l-influwenza Spanjola qatlet bejn l-20 u l-50 miljun ruħ fl-1918, iktar mill-pesta jew l-ewwel gwerra dinjija,” tirrapporta l-gazzetta Süddeutsche Zeitung. Minn dakinhar ’l hawn, numru bla għadd taʼ nies intlaqtu minn mard bħall-malarja, il-ġidri, it-tuberkulosi, il-poljo, u l-kolera. U d-dinja kollha tibqaʼ maħsuda minħabba l-ħeffa li biha qed tinxtered l-AIDS. Issa ninsabu f’sitwazzjoni li ġġagħlek tikkonfondi minħabba li l-mard xorta għadu jeżisti avolja sar progress taʼ l-għaġeb fil-mediċina. Din il-kontradizzjoni, li sa żmienna l-umanità ma kinitx rat bħalha, tgħinna nidentifikaw iż-żmien mhux tas-soltu li ngħixu fih.
“Terremoti.” (Mattew 24:7) Matul dawn l-aħħar mitt sena, it-terremoti qatlu mijiet t’eluf taʼ nies. Skond sors wieħed, it-terremoti li jifilħu jeqirdu l-bini u jiftħu l-art beraħ kellhom medja taʼ xi 18 kull sena mill-1914 ’l hawn. It-terremoti li jkunu iktar qattiela, qawwijin biżżejjed biex iġibu l-bini fix-xejn, iseħħu xi darba fis-sena. Minkejja l-avanzi fit-teknoloġija, ir-rata taʼ l-imwiet tibqaʼ għolja minħabba li ħafna bliet li qed jikbru malajr jinsabu fil-post eżatt fejn tinqasam l-art meta jsir terremot.
Aħbar Sabiħa!
Ħafna aspetti tas-sinjal taʼ l-aħħar jiem huma taʼ niket. Imma Ġesù tkellem ukoll dwar aħbar sabiħa.
“Din l-aħbar tajba tas-saltna tiġi pridkata fl-art abitata kollha bħala xiehda lill-ġnus kollha.” (Mattew 24:14) Ix-xogħol li beda Ġesù nnifsu—l-ippridkar taʼ l-aħbar tajba tas-Saltna—kellu jilħaq quċċata fl-aħħar jiem. Dan żgur li qed iseħħ. Ix-Xhieda taʼ Ġeħova qed jippridkaw il-messaġġ tal-Bibbja u jgħallmu lil min irid biex japplika dak li jitgħallem fil-ħajja taʼ kuljum. Bħalissa, iktar minn sitt miljun Xhud qed jippridkaw f’235 pajjiż u f’iktar minn 400 lingwa.
Innota li Ġesù ma qalx li l-ħajja kienet se tieqaf minħabba l-kundizzjonijiet inkwetanti fid-dinja. Lanqas ma qal li d-dinja kollha kienet se tkun aljenata minn fattur wieħed biss tas-sinjal. Imma hu bassar għadd taʼ ġrajjiet li flimkien kienu se jifformaw sinjal li jistaʼ jintgħaraf minn kull parti tad-dinja.
Meta tħares lejn il-ġrajjiet jew l-inċidenti kollha flimkien, tarahom int bħala ġabra taʼ ġrajjiet li jifformaw sinjal taʼ importanza globali? Dak li qed jiġri jeffettwa lilek u lill-familja
tiegħek. Nistgħu nistaqsu, Imma għala hemm daqshekk ftit nies li jagħtu kas?L-Interessi Persunali Jiġu l-Ewwel
“Tgħumx Hawnhekk!,” “Voltaġġ Għoli!,” “Naqqas il-Veloċità.” Dawn huma ftit mis-sinjali u t-twissijiet li naraw imma li spiss jiġu injorati. Għala? Malajr niġu effettwati minn dak li naħsbu li hu tajjeb għalina. Per eżempju, forsi nħossu l-bżonn li nsuqu b’iktar veloċità milli tippermetti l-liġi, jew forsi nkunu verament nixtiequ ngħumu fejn hu projbit. Imma m’huwiex għaqli li ninjoraw is-sinjali.
Per eżempju, il-valangi fil-muntanji Alpini taʼ l-Awstrija, Franza, l-Italja, u l-Isvizzera kultant joqtlu lil ħafna turisti li jinjoraw is-sinjali li jwissuhom biex meta jiskijjaw jew jirkbu l-isnowboard jevitaw rotot perikolużi. Skond is-Süddeutsche Zeitung, ħafna turisti li jinjoraw it-twissijiet jgħixu skond il-frażi, Jekk m’hemmx riskju, m’hemmx gost. B’dispjaċir, min jinjora s-sinjali taʼ twissija jistaʼ jbati konsegwenzi traġiċi.
In-nies liema raġuni għandhom biex jinjoraw is-sinjal deskritt minn Ġesù? Jistgħu jkunu mogħmijin mir-regħba, indifferenti minħabba l-apatija, paralizzati mill-indeċiżjoni, mifnijin bir-rutina, jew maħkumin mill-biżaʼ li jitilfu l-prestiġju. Jistaʼ jkun li xi waħda minn dawn qed iġġagħlek tinjora s-sinjal tal-preżenza taʼ Ġesù? Ma jkunx iktar għaqli li tagħraf is-sinjal u taġixxi fuqu?
Il-Ħajja f’Art Magħmula Ġenna
Għadd li dejjem jikber taʼ nies qed jagħtu kas is-sinjal tal-preżenza taʼ Ġesù. Kristian, żagħżugħ miżżewweġ fil-Ġermanja jikteb: “Dawn huma żminijiet mudlama. Żgur li qed ngħixu fl-‘aħħar jiem.’” Hu u martu jqattgħu ħafna ħin ikellmu lil oħrajn dwar is-Saltna Messjanika. Frank jgħix fl-istess pajjiż. Hu u martu jinkuraġġixxu lil oħrajn bl-aħbar tajba mill-Bibbja. Frank jgħid: “Minħabba s-sitwazzjoni fid-dinja, ħafna nies illum huma ansjużi dwar il-futur. Aħna nipprovaw ninkuraġġuhom bil-profeziji tal-Bibbja dwar art magħmula ġenna.” Kristian u Frank b’dan il-mod jgħinu fit-twettiq taʼ fattur wieħed tas-sinjal taʼ Ġesù—l-ippridkar taʼ l-aħbar tajba tas-Saltna.—Mattew 24:14.
Hekk kif l-aħħar jiem jilħqu l-quċċata tagħhom, Ġesù se jiknes lil din is-sistema qadima u lin-nies li jappoġġawha. Is-Saltna Messjanika mbagħad se tieħu ħsieb l-attivitajiet fuq l-art, li se terġaʼ lura għall-kundizzjonijiet imbassra taʼ Ġenna taʼ l-art. Il-bnedmin se jeħilsu mill-mard u l-mewt, u l-mejtin se jiġu rxoxtati għall-ħajja fuq l-art. Dawn huma l-prospetti pjaċevoli li qed jistennew lil dawk li jagħrfu s-sinjal taż-żminijiet. Ma jkunx għaqli li titgħallem iktar dwar is-sinjal u dwar x’għandu jagħmel dak li jkun biex isalva fit-tmiem taʼ din is-sistema? Żgur li din għandha tkun kwistjoni urġenti għal kulħadd.—Ġwanni 17:3.
[Kumment f’paġna 4]
Ġesù bassar li ħafna ġrajjiet li jseħħu flimkien kellhom jifformaw sinjal li jistaʼ jintgħaraf minn kull parti tad-dinja
[Kumment f’paġna 6]
Tara int ġabra taʼ ġrajjiet li jifformaw sinjal taʼ importanza globali?
[Kaxxa/Stampi f’paġna 6]
SINJALI LI JIDENTIFIKAW L-AĦĦAR JIEM
Gwerer li qatt ma kien hawn bħalhom.—Mattew 24:7; Rivelazzjoni 6:4
Nuqqas taʼ ikel.—Mattew 24:7; Rivelazzjoni 6:5, 6, 8
Mard li jittieħed.—Luqa 21:11; Rivelazzjoni 6:8
Jiżdied il-ħażen.—Mattew 24:12
Terremoti.—Mattew 24:7
Żminijiet kritiċi li diffiċli biex issib tarfhom.—2 Timotju 3:1
Imħabba eċċessiva għall-flus.—2 Timotju 3:2
Diżubbidjenza lejn il-ġenituri.—2 Timotju 3:2
Nuqqas taʼ mħabba naturali.—2 Timotju 3:3
Imħabba għall-pjaċiri minflok għal Alla.—2 Timotju 3:4
Nuqqas taʼ rażna.—2 Timotju 3:3
Mingħajr imħabba għat-tajjeb.—2 Timotju 3:3
Ma jagħtux kas il-periklu imminenti.—Mattew 24:39
Uħud li jwaqqgħu għaċ-ċajt jiċħdu l-provi dwar l-aħħar jiem.—2 Pietru 3:3, 4
Ippridkar globali dwar is-Saltna t’Alla.—Mattew 24:14
[Sors tal-Istampas f’paġna 5]
Suldati fl-ewwel gwerra dinjija: Mill-ktieb The World War—A Pictorial History, 1919; familja fqira: AP Photo/Aijaz Rahi; vittma tal-poljo: © WHO/P. Virot