Imxi m’Alla, u Aħsad it-​Tajjeb

“Huma jiżirgħu r-​riħ, għad jaħsdu r-​riefnu.” ​—HOSEGĦA 8:7.

1. Kif nistgħu nimxu maʼ Ġeħova?

 VJAĠĠ f’reġjun perikoluż ikun inqas taʼ periklu jekk miegħek ikollok gwida taʼ l-​esperjenza li turik mnejn għandek tgħaddi. Ikun għaqli li nimxu maʼ gwida bħal din minflok ma nitilqu għal rasna. F’ċerti affarijiet, dan jixbah is-​sitwazzjoni li ninsabu fiha. B’mod figurattiv, Ġeħova offra li jiggwidana mid-​deżert vast tad-​dinja mill-​agħar preżenti. Inkunu għaqlin jekk nimxu miegħu minflok ma nipprovaw immexxu l-​passi tagħna stess. Kif nistgħu nimxu m’Alla? Billi nsegwu l-​gwida li jipprovdi fil-​Kelma tiegħu.

2. X’se jiġi diskuss f’dan l-​artiklu?

² L-​artiklu taʼ qabel ikkunsidra d-​dramm simboliku li jinsab f’Hosegħa kapitlu 1 sa 5. Bħalma rajna, dan id-​dramm fih lezzjonijiet li jistgħu jgħinuna nimxu m’Alla. Issa ejja niddiskutu xi punti prinċipali minn kapitlu 6 sa 9. Ikun tajjeb li nibdew billi nagħtu daqqa t’għajn malajr lejn dawn l-​erbaʼ kapitli.

Daqqa t’Għajn Malajr

3. Semmi fil-​qosor dak li hemm f’Hosegħa kapitlu 6 sa 9.

³ Ġeħova bagħat lil Hosegħa biex jipprofetizza primarjament lis-​saltna taʼ Iżrael b’għaxar tribujiet fit-​tramuntana. Dan il-​ġens, magħruf ukoll bħala Efrajm, li hu l-​isem tat-​tribù prinċipali tiegħu, kien tbiegħed minn Alla. Hosegħa kapitlu 6 sa 9 juru li n-​nies urew nuqqas taʼ lealtà billi kisru l-​patt taʼ Ġeħova u pprattikaw il-​ħażen. (Hosegħa 6:7) Huma fdaw f’alleanzi dinjin minflok ma reġgħu lura għand Ġeħova. Minħabba li komplew jiżirgħu l-​ħażin, kellhom jaħsdu l-​ħażin. Fi kliem ieħor, il-​ġudizzju kien wara l-​għatba! Madankollu, il-​profezija taʼ Hosegħa kien fiha wkoll messaġġ li jqawwi l-​qalb. Lin-​nies aċċertahom li setgħu jduru lura lejn Ġeħova u jekk kienu se juru ndiema mill-​qalb kienu se jintwerew ħniena.

4. Liema lezzjonijiet prattiċi mill-​profezija taʼ Hosegħa se nikkunsidraw?

⁴ Minn dawn l-​erbaʼ kapitli tal-​profezija taʼ Hosegħa, nistgħu nisiltu iktar gwida li se tgħinna nimxu m’Alla. Ejja nikkunsidraw erbaʼ lezzjonijiet prattiċi: (1) L-​indiema vera tintwera bl-​azzjonijiet, mhux bil-​kliem biss; (2) is-​sagrifiċċji waħedhom ma jogħġbux lil Alla; (3) Ġeħova jħossu mweġġaʼ meta l-​aduraturi tiegħu jitilquh; u (4) biex naħsdu t-​tajjeb irridu niżirgħu t-​tajjeb.

Kif Tintwera l-​Indiema Vera

5. X’inhuma l-​aspetti sinifikanti taʼ dak li hemm miktub f’Hosegħa 6:​1-3?

⁵ Il-​profezija taʼ Hosegħa tgħallimna ħafna dwar l-​indiema u l-​ħniena. F’Hosegħa 6:​1-3 naqraw: “Imxi, ħa nerġgħu lura għand il-​Mulej, għax huwa tertaqna, imma se jdewwina, hu sawwat, imma se jinfaxxalna l-​ġrieħi. Wara jumejn jerġaʼ jagħtina l-​ħajja, mbagħad fit-​tielet jum jerġaʼ jqajjimna, sabiex quddiemu ngħixu. Nagħrfu l-​Mulej, u nfittxu nagħrfuh iżjed, daqs kemm hu żgur is-​sebħ, hekk il-​ħruġ tiegħu; hu jiġi bħalma tiġi x-​xita fuqna, bħax-​xita mwaħħra illi ssaqqi l-​art.”

6-8. X’kien hemm ħażin fl-​indiema taʼ Iżrael?

⁶ Min qal il-​kliem imniżżel f’dawn il-​versi? Xi wħud jgħidu li dan qaluh l-​Iżraelin żleali u li n-​nies diżubbidjenti kienu qed jippretendu li huma nedmin u jieħdu vantaġġ mill-​ħniena t’Alla. Madankollu, oħrajn jgħidu li l-​profeta Hosegħa kien qed ikellem u jitlob bil-​ħrara lin-​nies ħalli jduru lura lejn Ġeħova. Qalu min qalu dan il-​kliem, il-​mistoqsija fundamentali hi, Veru li n-​nies tas-​saltna taʼ Iżrael b’għaxar tribujiet in ġenerali daru lura lejn Ġeħova u wrew indiema ġenwina? It-​tweġiba hi le. Permezz taʼ Hosegħa, Ġeħova jgħid: “U x’naqbad nagħmel jien bik, Efrajm? X’se naqbad nagħmel bik, Ġuda? It-​tjieba tagħkom qisha s-​sħab taʼ l-​għodwa, tixbah lin-​nida li tinxtorob kmieni.” (Hosegħa 6:4) Kemm juri ċar dan il-​kliem il-​qagħda spiritwali batuta li kien jinsab fiha l-​poplu t’Alla! It-​tjieba, jew skond in-​New World Translation, il-​qalb tajba bl-​imħabba jew l-​imħabba leali, kienet kważi għabet​—bħas-​sħab tan-​nida taʼ fil-​għodu li jgħib malajr maʼ tlugħ ix-​xemx. Għalkemm milli jidher in-​nies għamlu taʼ bir-​ruħhom li huma nedmin, Ġeħova ma sab l-​ebda bażi biex iħenn għalihom. X’kienet il-​problema?

⁷ L-​Iżraelin ma kinux verament nedmin minn qalbhom. Hosegħa 7:14 jgħid hekk dwar il-​fatt li Ġeħova ma kienx qed jieħu pjaċir bil-​poplu tiegħu: “Qatt ma sejjħuli minn qalbhom, meta joqogħdu jnewwħu fuq friexhom.” Vers 16 iżid: “U jduru lejn ix-​xejn”​—jiġifieri, bħalma jindika l-​kliem oriġinali, “ma jdurux lejn forma superjuri taʼ qima.” In-​nies ma kinux lesti li jduru lura lejn il-​qima superjuri taʼ Ġeħova billi jagħmlu l-​bidliet neċessarji biex jirranġaw ir-​relazzjoni tagħhom miegħu. Tabilħaqq, mhux veru riedu jimxu m’Alla.

⁸ Kien hemm problema oħra fl-​indiema taʼ Iżrael. In-​nies kienu għadhom qed jidinbu​—fil-​fatt, kienu qed jagħmlu diversi dnubiet—fosthom frodi, qtil, serq, idolatrija, u kienu qed jifformaw alleanzi fiergħa maʼ ġnus oħra. F’Hosegħa 7:​4, in-​nies huma mxebbhin maʼ “forn,” bħal tal-​furnar, milli jidher minħabba x-​xewqat ħżiena li kienu mkebbsin fihom. Kien jixirqilhom ħniena meta nqisu l-​qagħda spiritwali tagħhom tant ħażina? Lanqas xejn! Hosegħa jgħid lin-​nies ribellużi li Ġeħova se “jiftakar fi ħżunithom” u “jikkastiga ħtijiethom.” (Hosegħa 9:9) Ma kienu se jintwerew ebda ħniena!

9. Il-​kliem taʼ Hosegħa x’jgħallimna dwar l-​indiema u l-​ħniena?

⁹ Minn kliem Hosegħa, x’nitgħallmu dwar l-​indiema u l-​ħniena? L-​eżempju taʼ twissija taʼ l-​Iżraelin bla fidi jgħallimna li biex nibbenefikaw mill-​ħniena taʼ Ġeħova, irridu nuru  l-​indiema mill-​qalb. Kif nuruha ndiema bħal din? Ġeħova ma jiġix imqarraq minn dmugħ jew sempliċi kliem. L-​indiema ġenwina tintwera bl-​azzjonijiet. Biex jintwera ħniena, wieħed li jkun għamel il-​ħażin irid jitlaq għalkollox l-​għemejjel midinba tiegħu u jġib ħajtu fi qbil mal-​livelli għoljin tal-​qima superjuri taʼ Ġeħova.

Sagrifiċċji Waħedhom Ma Jogħġbux lil Ġeħova

10, 11. Bħalma naraw fil-​każ taʼ Iżrael, Ġeħova għala ma jogħġbuhx is-​sagrifiċċji waħedhom?

¹⁰ Issa ejja niddiskutu t-​tieni tagħlima li tistaʼ tgħinna nimxu maʼ Ġeħova. Hija din: Is-​sagrifiċċji waħedhom ma jogħġbux lil Alla. Hosegħa 6:6 jgħid: “Jiena [Ġeħova] tjieba [“qalb tajba bl-​imħabba,” NW] rrid, mhux sagrifiċċju; li tagħrfu ’l Alla rrid, u mhux vittmi maħruqa.” Innota li Ġeħova jieħu pjaċir bil-​qalb tajba bl-​imħabba​—jew l-​imħabba leali, kwalità li ġejja mill-​qalb​—u bl-​għarfien dwaru. Imma forsi qed taħseb: ‘Il-​vers għala qed jgħid li Ġeħova ma jiħux pjaċir bis-​“sagrifiċċju” u bil-​“vittmi maħruqa”? Ma kinux dawn ħtieġa fil-​Liġi Mosajka?’

¹¹ Iva, is-​sagrifiċċji u l-​offerti kienu meħtiġin fil-​Liġi, però n-​nies taʼ żmien Hosegħa kellhom problema serja. Milli jidher, kien hemm Iżraelin li għamlu dawn l-​offerti bi dmir biex minn barra jidhru devoti. Madankollu, fl-​istess ħin, in-​nies baqgħu fid-​dnub. Billi komplew jidinbu wrew li ma kellhomx imħabba leali f’qalbhom. Huma wrew ukoll li kienu ċaħdu l-​għarfien dwar Alla, għax żgur li ma kinux qed jgħixu fi qbil maʼ dan. Ladarba qalb in-​nies ma kinitx f’kundizzjoni tajba u ma kinux qed jgħixu kif suppost, x’valur kellhom is-​sagrifiċċji tagħhom? Is-​sagrifiċċji tagħhom kienu offensivi għal Alla Ġeħova.

12. Hosegħa 6:6 fih liema twissija għan-​nies illum?

¹² Kliem Hosegħa fih twissija għal ħafna minn dawk li jmorru fil-​knejjes illum. Dawn jagħmlu offerti lil Alla permezz taʼ prattiċi reliġjużi. Madankollu, il-​qima tagħhom ftit li xejn teffettwa l-​imġiba tagħhom taʼ kuljum, jekk teffettwaha. Qegħdin dawn in-​nies verament jogħġbu lil Alla, jekk qalbhom ma tqanqalhomx jieħdu għarfien eżatt dwaru u japplikaw dak l-​għarfien billi jevitaw prattiki midinbin? Ħalli ħadd ma jimmaġina li l-​għemejjel reliġjużi waħedhom huma biżżejjed biex jogħġbu lil Alla. Ġeħova ma jiħux pjaċir b’nies li jipprovaw jiksbu l-​approvazzjoni tiegħu billi jagħtu biss qima formali minflok ma jgħixu verament fi qbil mal-​Kelma tiegħu.​—2 Timotju 3:5.

13. Liema tip taʼ sagrifiċċji noffru aħna, imma x’għandna nżommu f’moħħna dwar il-​valur tagħhom?

¹³ Bħala Kristjani veri, aħna wkoll irridu niftakru li s-​sagrifiċċji waħedhom ma jogħġbux lil Alla. Veru, aħna ma noffrux sagrifiċċji t’annimali lil Ġeħova. Madankollu, aħna “noffru dejjem sagrifiċċju taʼ tifħir lil Alla, jiġifieri, il-​frott tax-​xofftejn li jistqarru ismu pubblikament.” (Ebrej 13:15) Huwa vitali li ma naqgħux fl-​istess nassa li waqgħu fiha l-​Iżraelin midinbin taʼ żmien Hosegħa u naħsbu li nistgħu npattu għall-​ħażen billi noffru sagrifiċċji spiritwali bħal dawn lil Alla. Ikkunsidra  l-​eżempju taʼ waħda żagħżugħa li kienet qed tieħu sehem fl-​immoralità sesswali bil-​moħbi. Iktar tard ammettiet: “Żidt il-​ministeru tiegħi taʼ l-​għalqa għax ħsibt li b’xi mod dan kien se jgħatti l-​ħażen tiegħi.” Dan kien simili għal dak li pprovaw jagħmlu l-​Iżraelin diżubbidjenti. Madankollu, is-​sagrifiċċju tagħna taʼ tifħir hu aċċettat minn Ġeħova biss jekk il-​motiv taʼ qalbna jkun xieraq u l-​imġiba tagħna togħġob lilu.

Ġeħova Jħossu Mweġġaʼ Meta l-​Aduraturi Tiegħu Jitilquh

14. Il-​profezija taʼ Hosegħa x’tikxef dwar is-​sentimenti t’Alla?

¹⁴ It-​tielet lezzjoni li nitgħallmu minn Hosegħa kapitlu 6 sa 9 hija rigward kif iħossu Ġeħova meta l-​aduraturi tiegħu jitilquh. Alla għandu sentimenti kemm qawwija u kemm teneri. Hu għandu sentimenti teneri taʼ ferħ u mogħdrija lejn dawk li jindmu minn dnubiethom. Però, meta l-​poplu tiegħu ma jindimx, hu jieħu azzjoni soda u deċiżiva. Peress li Alla jimpurtah ħafna minna, hu jifraħ meta nimxu miegħu bil-​fedeltà. Salm 149:4 jgħid: “Il-​Mulej jitgħaxxaq bil-​poplu tiegħu.” Imma Alla kif iħossu meta l-​qaddejja tiegħu juru nuqqas taʼ fedeltà?

15. Skond Hosegħa 6:​7, xi Iżraelin kif kienu qed jaġixxu?

¹⁵ Meta jirreferi għall-​Iżraelin żleali, Ġeħova jgħid: “Huma bħal Adam kisru l-​patt, u ma baqgħux fidili lejja.” (Hosegħa 6:7) Il-​kelma Ebrajka tradotta “ma baqgħux fidili” tfisser ukoll “qarrqu.” F’Malakija 2:​10-16, tintuża l-​istess kelma biex tiddeskrivi l-​imġiba żleali taʼ dawk l-​Iżraelin li ma kinux fidili lejn il-​parti l-​oħra fiż-​żwieġ. Rigward l-​użu taʼ din il-​kelma f’Hosegħa 6:​7, xogħol wieħed taʼ referenza jgħid li din hi “metafora dwar iż-​żwieġ, waħda li ddaħħal kwalitajiet persunali fir-​relazzjoni . . . Is-​sitwazzjoni hija waħda persunali li fiha l-​imħabba ġiet diżonorata.”

16, 17. Iżrael kif aġixxa rigward il-​patt li Alla għamel miegħu? (b) X’għandna niftakru rigward l-​azzjonijiet tagħna?

¹⁶ B’mod figurattiv, Ġeħova tkellem dwar Iżrael bħala martu minħabba l-​patt li għamel mal-​ġens. Allura meta l-​poplu tiegħu injora  l-​kundizzjonijiet tal-​patt, kien bħallikieku qed jagħmel adulterju. Alla kien bħal raġel miżżewweġ leali, imma l-​poplu tiegħu telqu!

¹⁷ Xi ngħidu dwarna? Alla jimpurtah jekk aħna nimxux miegħu jew le. Nagħmlu tajjeb li niftakru li “Alla hu mħabba” u li l-​azzjonijiet tagħna jeffettwawh. (1 Ġwanni 4:​16) Jekk insegwu triq ħażina se nweġġgħu lil Ġeħova u żgur mhux se nogħġbuh. Jekk nibqgħu niftakru dan se jkollna tfakkira qawwija biex ma nċedux għat-​tentazzjoni.

Kif Nistgħu Naħsdu t-​Tajjeb

18, 19. Liema prinċipju nsibu f’Hosegħa 8:​7, u dan il-​prinċipju kif seħħ fil-​każ taʼ l-​Iżraelin?

¹⁸ Issa ejja nikkunsidraw ir-​rabaʼ lezzjoni mill-​profezija taʼ Hosegħa​—kif nistgħu naħsdu t-​tajjeb. Rigward l-​Iżraelin u l-​bluha u l-​frugħa taʼ l-​imġiba tagħhom bla fidi, Hosegħa jikteb: “Ladarba huma jiżirgħu r-​riħ, għad jaħsdu r-​riefnu.” (Hosegħa 8:7) Hawnhekk insibu prinċipju li tajjeb inżommuh f’moħħna: Dak li nagħmlu issa hu konness direttament maʼ dak li jiġrilna iktar ’il quddiem. Dan il-​prinċipju kif kien minnu fil-​każ taʼ l-​Iżraelin żleali?

¹⁹ Billi baqgħu jidinbu, dawk l-​Iżraelin kienu qed jiżirgħu l-​ħażin. Kien se jirnexxilhom ikomplu jagħmlu hekk mingħajr ma jbatu l-​konsegwenzi? Żgur li ma kinux se jaħarbu ġudizzju aħrax. Hosegħa 8:13 jgħid: “[Ġeħova] għad jiftakar fi ħżunithom u ħtijiethom jikkastigahom.” U f’Hosegħa 9:​17, naqraw: “Ikeċċihom Alla tiegħi, għax ma semgħux minnu, u jkunu jiġġerrew fost il-​ġnus.” Ġeħova kien se jitlob kont mingħand l-​Iżraelin għal dnubiethom. Peress li żergħu l-​ħażin kienu se jaħsdu l-​ħażin. Il-​ġudizzju t’Alla kontrihom ġie fis-​sena 740 Q.E.K. meta l-​Assirjani għelbu s-​saltna taʼ Iżrael b’għaxar tribujiet u ħadu lin-​nies tagħha fil-​jasar.

20. X’tgħallimna l-​esperjenza taʼ l-​Iżraelin?

²⁰ Dak li ġralhom dawk l-​Iżraelin jgħallimna verità li ma nistgħux naħarbu minnha: Dak li niżirgħu naħsdu. Il-​Kelma t’Alla twissina: “Titqarrqux; Alla ma jidħaq bih ħadd. Dak li bniedem jiżraʼ, dak ukoll jaħsad.” (Galatin 6:7) Jekk niżirgħu l-​ħażin, se naħsdu l-​ħażin. Per eżempju, dawk li jgħixu ħajja immorali se jaħsdu konsegwenzi taʼ niket. Se jkun hemm tmiem taʼ niket għal wieħed li jipprattika l-​ħażen u ma jindimx.

21. Kif nistgħu naħsdu dak li hu tajjeb?

²¹ Mela kif nistgħu naħsdu t-​tajjeb? Nistgħu nwieġbu din il-​mistoqsija b’tixbiha sempliċi. Jekk bidwi jrid jaħsad il-​bettieħ, xi jrid iħawwel? Id-​dulliegħ? Dażgur li le! Irid jiżraʼ dak li jixtieq jaħsad. Bl-​istess mod, jekk irridu naħsdu t-​tajjeb, mela rridu niżirgħu t-​tajjeb. Tixtieq tkompli taħsad it-​tajjeb​—ħajja hienja u sodisfaċenti issa bil-​prospett taʼ ħajja taʼ dejjem fid-​dinja l-​ġdida t’Alla? Jekk iva, mela trid tkompli tiżraʼ t-​tajjeb billi timxi m’Alla u tgħix fi qbil mal-​livelli ġusti tiegħu.

22. X’lezzjonijiet tgħallimna minn Hosegħa kapitlu 6 sa 9?

²² Minn kapitlu 6 sa 9 taʼ Hosegħa, ħadna erbaʼ lezzjonijiet li jistgħu jgħinuna nimxu m’Alla: (1) L-​indiema vera tintwera bl-​azzjonijiet; (2) is-​sagrifiċċji waħedhom ma jogħġbux lil Alla; (3) Ġeħova jħossu mweġġaʼ meta l-​aduraturi tiegħu jitilquh; u (4) biex naħsdu t-​tajjeb, irridu niżirgħu t-​tajjeb. Kif jistgħu l-​aħħar ħames kapitli taʼ dan il-​ktieb Bibliku jgħinuna nimxu m’Alla?

Int Kif Twieġeb?

• Kif tintwera l-​indiema ġenwina?

• Is-​sagrifiċċji waħedhom għala ma jogħġbux lil Missierna tas-​sema?

• Alla kif iħossu meta l-​qaddejja tiegħu jitilquh?

• X’għandna niżirgħu jekk irridu naħsdu dak li hu tajjeb?

[Mistoqsijiet taʼ Studju]

 [Stampa f’paġna 23]

L-​imħabba leali taʼ Iżrael sparixxiet bħas-​sħab tan-​nida taʼ fil-​għodu

[Stampa f’paġna 23]

Ix-​xewqat ħżiena taʼ Iżrael kienu mkebbsin bħal forn

[Stampa f’paġna 24]

Ġeħova għala m’aċċettax is-​sagrifiċċji tal-​poplu tiegħu?

[Stampa f’paġna 25]

Jekk irridu naħsdu t-​tajjeb, irridu niżirgħu t-​tajjeb