Membri Ġodda tal-Ġemgħa li Tiggverna
Membri Ġodda tal-Ġemgħa li Tiggverna
NHAR l-Erbgħa fil-għodu, l-24 t’Awissu, 2005, il-familji taʼ Betel fl-Istati Uniti u l-Kanada semgħu avviż eċċitanti permezz taʼ trasmissjoni fuq it-televixin. B’seħħ mill-1 taʼ Settembru, 2005, żewġ membri ġodda—Geoffrey W. Jackson u Anthony Morris III—kellhom jiżdiedu mal-Ġemgħa li Tiggverna tax-Xhieda taʼ Ġeħova.
Ħuna Jackson beda x-xogħol taʼ pijunier fi Frar taʼ l-1971 fil-gżira tat-Tasmanja, li hi stat taʼ l-Awstralja. F’Ġunju taʼ l-1974, hu żżewweġ lil Jeanette (Jenny). Ftit wara, huma nħatru biex jaqdu bħala pijunieri speċjali. Mill-1979 sa l-2003, huma qdew bħala missjunarji f’Tuvalu, Samoa, u l-Fiġi—gżejjer fin-nofsinhar tal-Paċifiku. Meta kienu f’dawn il-gżejjer, Ħuna u Oħtna Jackson taw sehem kbir fix-xogħol tat-traduzzjoni tal-letteratura Biblika. Mill-1992, Ħuna Jackson beda jaqdi fil-Kumitat tal-Fergħa f’Samoa, u mill-1996, fil-Kumitat tal-Fergħa fil-Fiġi. F’April taʼ l-2003, hu u Jenny saru parti mill-familja Betel taʼ l-Istati Uniti u bdew jaħdmu fid-Dipartiment tas-Servizzi tat-Traduzzjoni. Ftit wara, Ħuna Jackson inħatar bħala ajjutant għall-Kumitat tat-Tagħlim tal-Ġemgħa li Tiggverna.
Ħuna Morris beda fis-servizz taʼ pijunier fl-1971 fl-Istati Uniti. F’Diċembru taʼ dik is-sena, hu żżewweġ lil Susan, u huma komplew jaqdu bħala pijunieri għal kważi erbaʼ snin sakemm twieled l-ewwel iben tagħhom, Jesse. Xi żmien wara kellhom iben ieħor, Paul. Ħuna Morris reġaʼ daħal fis-servizz full-time fl-1979 bħala pijunier regulari. Martu ngħaqdet miegħu meta s-subien tagħhom bdew l-iskola. Il-familja qdiet fejn kien hemm bżonn kbir f’Rhode Island u f’North Carolina, l-Istati Uniti. F’North Carolina, Ħuna Morris qeda bħala sostitut għall-indokratur tas-circuit, u s-subien tiegħu daħlu fis-servizz bħala pijunieri regulari. Jesse u Paul ġew mistidnin jaqdu fil-fergħa taʼ l-Istati Uniti meta kellhom 19-il sena. Sadanittant, Ħuna Morris beda x-xogħol tas-circuit. Imbagħad, fl-2002 hu u Susan ġew mistidnin jaqdu f’Betel, u bdew l-inkarigu ġdid tagħhom fl-1 t’Awissu. Ħuna Morris ħadem fid-Dipartiment tas-Servizz f’Patterson u iktar tard bħala ajjutant għall-Kumitat tas-Servizz tal-Ġemgħa li Tiggverna.
Flimkien maʼ dawn iż-żewġ membri ġodda, il-Ġemgħa li Tiggverna hija magħmula minn C. W. Barber; J. E. Barr; S. F. Herd; T. Jaracz; M. S. Lett; G. Lösch; G. H. Pierce; A. D. Schroeder; D. H. Splane; u D. Sydlik. Il-membri kollha tal-Ġemgħa li Tiggverna huma Kristjani midlukin.