Iffoka fuq l-​Affarijiet Tajbin taʼ l-​Organizzazzjoni taʼ Ġeħova

“Aħna se nimtlew bl-​affarijiet tajbin taʼ darek.”​—SALM 65:4, NW.

1, 2. (a) L-arranġamenti b’konnessjoni mat-​tempju x’effett kien se jkollhom fuq il-​poplu t’Alla? (b) David liema provvedimenti għamel għall-​bini tat-​tempju?

 DAVID taʼ Iżrael tal-​qedem huwa wieħed mill-​iktar individwi impressjonanti diskussi fl-​Iskrittura Ebrajka. Dan ir-​ragħaj, mużiċist, profeta, u sultan kellu fiduċja sħiħa f’Alla Ġeħova. Ir-​relazzjoni mill-​qrib li David kellu maʼ Ġeħova qanqlet fih xewqa li jibni dar għal Alla. Din id-​dar, jew tempju, kellha ssir iċ-​ċentru tal-​qima vera f’Iżrael. David kien jaf li l-​arranġamenti b’konnessjoni mat-​tempju kienu se jġibu ferħ u barkiet għall-​poplu t’Alla. Għalhekk David kanta: “Hieni l-​bniedem li inti [Ġeħova] tagħżel u tqiegħdu jgħammar fit-​tempju tiegħek. [“Aħna se nimtlew bl-​affarijiet tajbin taʼ darek,” NW], fit-​tempju mqaddes tiegħek.”​—Salm 65:5 (65:​4, NW).

² David ma tħalliex jieħu ħsieb il-​bini tad-​dar taʼ Ġeħova. Minflok, dan il-​privileġġ inżamm għal ibnu Salamun. David ma gergirx għaliex ħaddieħor ngħata l-​privileġġ li hu nnifsu tant xtaq. Dak li interessah l-​iktar kien li t-​tempju jinbena. Hu b’qalbu kollha appoġġa l-​proġett billi ta lil Salamun il-​pjanijiet taʼ l-​arkitettura li kien irċieva mingħand Ġeħova. Iktar minn hekk, David organizza eluf taʼ Leviti f’diviżjonijiet taʼ servizz u ta ammonti kbar taʼ deheb u fidda għall-​bini tat-​tempju.​—1 Kronaki 17:​1, 4, 11, 12; 23:​3-6; 28:​11, 12; 29:​1-5.

3. X’attitudni għandhom il-​qaddejja t’Alla lejn l-​arranġamenti għall-​qima vera?

³ Iżraelin leali appoġġaw l-​arranġamenti li saru għall-​qima vera fid-​dar t’Alla. Bħala l-​qaddejja taʼ Ġeħova llum, aħna b’mod simili nappoġġaw arranġamenti li jkunu saru għall-​qima mill-​parti taʼ l-​organizzazzjoni taʼ Ġeħova li tinsab fuq l-​art. Aħna b’hekk nuru li għandna l-​istess attitudni li kellu David. Aħna m’għandniex attitudni taʼ tgergir. Minflok, niffokaw fuq l-​affarijiet tajbin taʼ l-​organizzazzjoni t’Alla. Ħsibt int dwar  il-​ħafna affarijiet tajbin li nistgħu nkunu tassew grati għalihom? Ejja nikkunsidraw xi wħud minnhom.

Grati għal Dawk li Qed Jieħdu t-​Tmexxija

4, 5. (a) L-“ilsir leali u għaqli” kif iwettaq l-​inkarigu tiegħu? (b) Xi Xhieda kif ħassewhom dwar l-​ikel spiritwali li rċivew?

⁴ Hemm raġunijiet tajbin għala għandna nkunu grati għall-​“ilsir leali u għaqli” maħtur minn Ġesù Kristu fuq dak li hu tiegħu fuq l-​art. Il-​klassi taʼ l-​ilsir taʼ Kristjani midlukin bl-​ispirtu tieħu t-​tmexxija fl-​ippridkar taʼ l-​aħbar tajba, tipprepara laqgħat għall-​qima, u tippubblika letteratura bbażata fuq il-​Bibbja b’iktar minn 400 lingwa. Miljuni taʼ persuni madwar id-​dinja bi gratitudni jieħdu mill-​ikel spiritwali “fiż-​żmien xieraq.” (Mattew 24:​45-​47) Żgur li m’hemm l-​ebda raġuni biex ingergru kontra dan l-​ikel spiritwali.

⁵ Għal ħafna snin, Xhud taʼ Ġeħova mdaħħla fiż-​żmien jisimha Elfi esperjenzat faraġ u appoġġ billi applikat il-​parir Skritturali li nsibu f’pubblikazzjonijiet tal-​klassi taʼ l-​ilsir. Apprezzament profond qanqal lil Elfi biex tikteb: “Kieku x’nagħmel mingħajr l-​organizzazzjoni taʼ Ġeħova?” Peter u Irmgard ukoll ilhom qaddejja taʼ Ġeħova għal għaxriet taʼ snin. Irmgard tesprimi l-​gratitudni tagħha għall-​provvedimenti kollha li tagħti “l-​organizzazzjoni taʼ Ġeħova li hi kollha mħabba u li tieħu interess.” Dawn il-​pubblikazzjonijiet jinkludu dawk disinjati għal nies bi bżonnijiet speċjali, bħal individwi li huma neqsin mid-​dawl jew mis-​smigħ.

6, 7. (a) L-attivitajiet tal-​kongregazzjonijiet madwar id-​dinja kif jiġu mħarsin? (b) Xi ntqal dwar il-​parti taʼ l-​organizzazzjoni taʼ Ġeħova li tinsab fuq l-​art?

⁶ L-​“ilsir leali” hu rappreżentat mill-​Ġemgħa li Tiggverna tax-​Xhieda taʼ Ġeħova, grupp żgħir taʼ rġiel midlukin bl-​ispirtu li jaqdu fil-​kwartieri ġenerali tax-​Xhieda taʼ Ġeħova fi Brooklyn, New York. Il-​Ġemgħa li Tiggverna taħtar qaddejja taʼ Ġeħova li għandhom l-​esperjenza biex jaqdu f’uffiċċji tal-​fergħa li jieħdu ħsieb l-​attivitajiet taʼ iktar minn 98,000 kongregazzjoni madwar id-​dinja. Irġiel li jilħqu l-​ħtiġijiet Bibliċi huma maħturin bħala anzjani u qaddejja ministerjali f’dawn il-​kongregazzjonijiet. (1 Timotju 3:​1-9, 12, 13) L-​anzjani jieħdu t-​tmexxija u bl-​imħabba jirgħu l-​merħla t’Alla li hija fil-​ħarsien tagħhom. X’barka għandna li nagħmlu parti minn din il-​merħla u nesperjenzaw l-​imħabba u l-​għaqda li jeżistu fost “il-​fratellanza kollha”!​—1 Pietru 2:​17; 5:​2, 3.

 ⁷ Minflok ma jilmentaw, individwi spiss jesprimu l-​apprezzament tagħhom għall-​gwida spiritwali kollha mħabba li jirċievu mingħand l-​anzjani. Per eżempju, ikkunsidra lil Birgit, mara miżżewġa Kristjana li għandha fuq it-​30 sena. Meta kienet adoloxxenti involviet ruħha f’kumpanija ħażina u kważi waqgħet fil-​ħażen. Imma l-​parir ċar li l-​anzjani tawha minn fuq il-​Bibbja u l-​appoġġ taʼ sħabha fit-​twemmin għenuha toħroġ minn dik li setgħet kienet sitwazzjoni taʼ ħsara. Issa kif tħossha Birgit? Hi tgħid: “Jien grata ħafna li għadni nagħmel parti mill-​organizzazzjoni meraviljuża taʼ Ġeħova.” Andreas, li għandu 17-il sena, jgħid: “Din tassew hija l-​organizzazzjoni taʼ Ġeħova, l-​aħjar organizzazzjoni fid-​dinja.” M’għandniex aħna nkunu grati għall-​affarijiet tajbin tal-​parti taʼ l-​organizzazzjoni taʼ Ġeħova li tinsab fuq l-​art?

Dawk li Jmexxu Huma Imperfetti

8, 9. Xi wħud li kienu jgħixu fi żmien David kif aġixxew, u David kif irreaġixxa għall-​aġir tagħhom?

⁸ M’għandniex xi ngħidu, dawk li huma maħturin biex jieħdu t-​tmexxija fil-​qima pura huma imperfetti. Ilkoll kemm huma jiżbaljaw, u xi wħud għandhom nuqqasijiet persistenti li huma qed jaħdmu iebes biex jikkontrollawhom. Għandna għalfejn inħossuna mdejqin minħabba f’dan? Le. Anki individwi li ngħataw responsabbiltà kbira f’Iżrael tal-​qedem għamlu żbalji kbar. Per eżempju, meta David kien għadu żgħir hu ġie msejjaħ biex jaqdi bħala mużiċist biex jikkalma lis-​Sultan Sawl li kien inkwetat. Iktar tard, Sawl ipprova joqtol lil David, li spiċċa biex kellu jaħrab ħalli jsalva ħajtu.​—1 Samwel 16:​14-​23; 18:​10-​12; 19:18; 20:​32, 33; 22:​1-5.

⁹ Iżraelin oħra kienu tradituri. Per eżempju, Ġowab, il-​kmandant militari taʼ David, qatel lil Abner, qarib taʼ Sawl. Absalom ikkonfoffa kontra David, missieru, għall-​kariga taʼ sultan. U Aħitofel, il-​konsulent fdat taʼ David, ittradieh. (2 Samwel 3:​22-30; 15:​1-17, 31; 16:​15, 21) Madankollu, David ma qagħadx jilmenta bl-​imrar; lanqas ma ta dahru għall-​qima pura. Fil-​fatt, ġara eżatt l-​oppost. L-​għawġ qanqal lil David biex iżomm sod maʼ Ġeħova u jżomm l-​attitudni mill-​aħjar li kellu meta ħarab minħabba Sawl. F’dak iż-​żmien, David kanta: “Ħenn għalija, o Alla, ħenn għalija, għax fik jiena nsib il-​kenn tiegħi; għad-​dell taʼ ġwenħajk nistkenn, sakemm jgħaddi l-​hemm minn fuqi.”​—Salm 57:2 (57:​1, NW).

10, 11. Mara Kristjana jisimha Gertrud x’esperjenzat bħala żagħżugħa, u x’qalet dwar in-​nuqqasijiet taʼ sħabha fit-​twemmin?

¹⁰ Aħna żgur li m’għandna l-​ebda raġuni biex nilmentaw dwar it-​tradiment fl-​organizzazzjoni t’Alla llum. La Ġeħova, la l-​anġli tiegħu, u lanqas ir-​rgħajja spiritwali ma jittolleraw il-​preżenza taʼ wħud mill-​agħar li huma tradituri fil-​kongregazzjoni Kristjana. Minkejja dan, ilkoll kemm aħna niffaċċjaw l-​imperfezzjoni umana​—tagħna stess u dik taʼ qaddejja oħrajn t’Alla.

¹¹ Meta Gertrud, oħt li ilha żmien twil taqdi lil Ġeħova, kienet għadha żagħżugħa, ġiet akkużata b’mod żbaljat li kienet qed tqarraq u li ma kinitx predikatriċi tas-​Saltna full-time. Hi kif irreaġixxiet? Gergret Gertrud minħabba dan it-​trattament? Le. Ftit qabel ma mietet fl-​2003 fl-​età taʼ 91 sena, hi rriflettiet fuq ħajjitha u spjegat: “Matul ħajti dawn l-​esperjenzi u oħrajn għallmuni li minkejja l-​iżbalji li jagħmlu l-​bnedmin, Ġeħova jidderieġi x-​xogħol kbir tiegħu li fih juża lilna, bnedmin imperfetti.” Meta ffaċċjat l-​imperfezzjonijiet taʼ qaddejja oħra t’Alla, Gertrud daret lejn Ġeħova b’talb ħerqan.

12. (a) Xi Kristjani taʼ l-​ewwel seklu x’eżempju ħażin ħallew? (b) Fuq xiex għandna niffokaw?

¹² Ladarba anki l-​iktar Kristjani leali u devoti huma imperfetti, meta qaddej maħtur jagħmel żball, ejja nkomplu nagħmlu “kollox bla tgergir.” (Filippin 2:​14) Kemm ikun  taʼ ħasra li kieku nsegwu l-​eżempju ħażin taʼ xi wħud fil-​kongregazzjoni Kristjana taʼ l-​ewwel seklu! Skond id-​dixxiplu Ġuda, għalliema foloz taʼ dakinhar kienu qed “jinjoraw lil min hu fuqhom u jmaqdru lill-​glorjużi.” Iktar minn hekk, dawk li kienu qed jagħmlu l-​ħażen kienu “dejjem igergru, [u] jilmentaw dwar xortihom.” (Ġuda 8, 16) Jalla niċħdu t-​triq li segwew dawk li gergru u lmentaw u niffokaw fuq l-​affarijiet mill-​aħjar li nirċievu mingħand l-​“ilsir leali.” Ejja napprezzaw l-​affarijiet tajbin taʼ l-​organizzazzjoni taʼ Ġeħova u ‘nibqgħu nagħmlu kollox bla tgergir.’

“Dan id-​Diskors Ikexkxek”

13. Xi wħud kif irreaġixxew għal ċertu tagħlim taʼ Ġesù Kristu?

¹³ Filwaqt li xi wħud fl-​ewwel seklu gergru kontra l-​qaddejja maħturin, oħrajn gergru kontra t-​tagħlim taʼ Ġesù. Kif inhu mniżżel fi Ġwanni 6:​48-​69, Ġesù qal: “Min jiekol laħmi u jixrob demmi għandu l-​ħajja taʼ dejjem.” X’ħin semgħu dan il-​kliem, “ħafna mid-​dixxipli tiegħu qalu: ‘Dan id-​diskors ikexkxek; min jiflaħ jisimgħu?’” Ġesù kien konxju li “d-​dixxipli tiegħu kienu qed igergru dwar dan.” Iktar minn hekk, “minħabba dan, ħafna [minnhom] marru lura lejn dak li ħallew warajhom u ma baqgħux mexjin warajh.” Imma mhux kull dixxiplu gerger. Innota x’ġara meta Ġesù staqsa lit-​12-il appostlu: “Ma tridux tmorru intom ukoll, hux?” L-​appostlu Pietru wieġeb: “Mulej, għand min tridna mmorru? Int għandek il-​kliem tal-​ħajja taʼ dejjem; u aħna emminna u sirna nafu li int il-​Qaddis t’Alla.”

14, 15. (a) Xi wħud għala ma jaqblux maʼ xi aspett tat-​tagħlim Kristjan? (b) X’nistgħu nitgħallmu mill-​każ taʼ raġel li jismu Emanuel?

¹⁴ Fi żmienna, numru żgħir ħafna fost il-​poplu t’Alla ma kienx kuntent b’xi aspett tat-​tagħlim Kristjan u gerger kontra l-​parti taʼ l-​organizzazzjoni taʼ Ġeħova li tinsab fuq l-​art. Dan għala jiġri? Tgergir bħal dan spiss iseħħ minħabba nuqqas taʼ fehma dwar il-​mod kif Alla jagħmel l-​affarijiet. Il-​Ħallieq b’mod progressiv jikxef il-​verità lill-​poplu tiegħu. Għalhekk, il-​fehma tagħna taʼ l-​Iskrittura żgur li se tiġi rfinata minn żmien għal żmien. Il-​maġġuranza mill-​poplu taʼ Ġeħova tifraħ b’dan l-​irfinar. Ftit huma li jsiru ‘ġusti żżejjed’ u ma jaċċettawx il-​bidliet. (Koħèlet 7:16) Il-​kburija tistaʼ tkun fattur, u xi wħud jaqgħu fin-​nassa li jaħsbu b’mod indipendenti. Tkun xi tkun ir-​raġuni, tgergir bħal dan huwa perikoluż, ladarba jistaʼ jiġbidna lura fid-​dinja u l-​modi tagħha.

¹⁵ Per eżempju, Emanuel kien Xhud li kkritika xi affarijiet li qara f’pubblikazzjonijiet taʼ “l-​ilsir leali u għaqli.” (Mattew 24:45) Hu waqaf jaqra l-​letteratura Kristjana tagħna u eventwalment qal lill-​anzjani tal-​kongregazzjoni lokali tiegħu li ma riedx jibqaʼ Xhud taʼ Ġeħova. Madankollu, f’perijodu qasir taʼ żmien, Emanuel irrealizza li t-​tagħlim taʼ l-​organizzazzjoni taʼ Ġeħova kien tabilħaqq korrett. Hu kkuntattja lix-​Xhieda, ammetta l-​iżball tiegħu, u reġaʼ sar Xhud taʼ Ġeħova. B’riżultat taʼ dan, hu reġaʼ sar raġel hieni.

16. X’jistaʼ jgħinna negħlbu dubji dwar ċertu tagħlim Kristjan?

¹⁶ Xi ngħidu jekk niġu ttantati biex ingergru minħabba li għandna dubji dwar ċertu tagħlim tal-​poplu taʼ Ġeħova? F’dan il-​każ ejja ma nkunux bla sabar. L-​“ilsir leali” jistaʼ eventwalment jippubblika xi ħaġa li twieġeb il-​mistoqsijiet tagħna, u b’hekk inneħħu d-​dubji tagħna. Ikun għaqli li nfittxu l-​għajnuna taʼ l-​anzjani Kristjani. (Ġuda 22, 23) It-​talb, l-​istudju persunali, u s-​sħubija maʼ sħabna fit-​twemmin li huma spiritwali jistgħu wkoll jgħinuna nneħħu dubji u nkabbru l-​apprezzament tagħna għall-​veritajiet Bibliċi li jsaħħu l-​fidi tagħna u li tgħallimniehom permezz tal-​mezzi tal-​komunikazzjoni li juża Ġeħova.

 Żomm Attitudni Pożittiva

17, 18. Minflok ma ngergru, liema attitudni għandu jkollna, u għala?

¹⁷ Irridu nammettu li l-​bnedmin imperfetti għandhom it-​tendenza li jidinbu, u xi wħud għandhom inklinazzjoni qawwija biex igergru bla bżonn. (Ġenesi 8:21; Rumani 5:12) Imma li kieku kellna nsiru wħud li jgergru l-​ħin kollu, inkunu qed nirriskjaw li nitilfu r-​relazzjoni tagħna m’Alla Ġeħova. Għalhekk, irridu nikkontrollaw kwalunkwe inklinazzjoni biex ingergru.

¹⁸ Minflok ma ngergru dwar affarijiet fil-​kongregazzjoni, nagħmlu tajjeb jekk inżommu attitudni pożittiva u nsegwu skeda li żżommna beżlin, ferħanin, devoti, bilanċjati, u f’saħħitna fil-​fidi. (1 Korintin 15:58; Titu 2:​1-5) Ġeħova jikkontrolla kollox fl-​organizzazzjoni tiegħu, u Ġesù hu konxju taʼ l-​iżviluppi li jkun hemm f’kull kongregazzjoni, bħalma kien fl-​ewwel seklu. (Rivelazzjoni 1:​10, 11) Stenna bil-​paċenzja lil Alla u lil Kristu, il-​Kap tal-​kongregazzjoni. Rgħajja responsabbli jistgħu jintużaw biex jikkoreġu kwistjonijiet li forsi jeħtieġu li jiġu aġġustati.​—Salm 43:5; Kolossin 1:18; Titu 1:5.

19. Sakemm is-​Saltna jkollha kontroll sħiħ fuq l-​umanità, fuq xiex għandna niffokaw l-​attenzjoni tagħna?

¹⁹ Dalwaqt din is-​sistema mill-​agħar se tintemm, u s-​Saltna Messjanika se tikseb kontroll sħiħ fuq l-​umanità. Sadanittant, kemm hu importanti li kull wieħed u waħda minna jżomm attitudni pożittiva! Dan se jgħinna nirrikonoxxu l-​virtujiet taʼ sħabna fit-​twemmin, minflok ma niffokaw fuq in-​nuqqasijiet tagħhom. Jekk niffokaw fuq l-​aspetti tajbin tal-​personalità tagħhom se nħossuna ferħanin. Minflok ma nħossuna eżawriti emozzjonalment minħabba t-​tgergir, aħna se nħossuna inkuraġġiti u mibnijin spiritwalment.

20. Attitudni pożittiva se tgħinna ngawdu liema barkiet?

²⁰ Attitudni pożittiva se tgħinna wkoll biex inżommu f’moħħna l-​ħafna barkiet li ngawdu minħabba li aħna assoċjati mal-​parti taʼ l-​organizzazzjoni taʼ Ġeħova li tinsab fuq l-​art. Din hi l-​unika organizzazzjoni fid-​dinja li hija leali lejn is-​Sovran taʼ l-​univers. Kif tħossok dwar il-​fatt u l-​privileġġ taʼ li tieħu sehem fil-​qima taʼ l-​uniku Alla veru, Ġeħova? Jalla l-​attitudni tiegħek tkun bħal dik taʼ David, li kanta: “Int, li tismaʼ talbna. Quddiemek jersaq kull bniedem. . . . Hieni l-​bniedem li inti tagħżel u tqiegħdu jgħammar fit-​tempju tiegħek. [“Aħna se nimtlew bl-​affarijiet tajbin taʼ darek,” NW].”​—Salm 65:​3-5 (65:​2, 4, NW ).

Tiftakar Int?

• Għala għandna nħossuna grati lejn dawk li jieħdu t-​tmexxija fil-​kongregazzjoni?

• X’għandha tkun ir-​reazzjoni tagħna meta aħwa responsabbli jagħmlu xi żball?

• Kif għandna nħarsu lejn l-​irfinar li jsir fuq il-​fehma taʼ l-​Iskrittura?

• X’jistaʼ jgħin lil Kristjan biex jegħleb xi dubji?

[Mistoqsijiet taʼ Studju]

[Stampa f’paġna 20]

David ta lil Salamun il-​pjanijiet tat-​tempju u appoġġa l-​qima vera b’qalbu kollha

[Stampa f’paġna 23]

Anzjani Kristjani jipprovdu għajnuna spiritwali bil-​ferħ