“Ġagħlitna Noqogħdu Għandha”

L-​OSPITALITÀ hija magħrufa sew f’pajjiżi tal-​Lvant. Per eżempju, fl-​Indja familja tistaʼ saħansitra toqgħod bil-​ġuħ sabiex titmaʼ mistieden li ma jkunx mistenni. Ġeneralment, l-​ommijiet fl-​Iran jieħdu ħsieb li jimlew il-​friġġ bl-​ikel sabiex ikunu jistgħu juru l-​ospitalità maʼ viżitaturi mhux mistennijin.

L-ispirtu t’għoti ġeneruż bħal dan kien evidenti fost ħafna nies imsemmijin fil-​Bibbja. Eżempju li jispikka hu dak taʼ Lidja, li probabbilment kienet proselita Lhudija li kienet tgħix f’Filippi, il-​belt prinċipali tad-​distrett tal-​Maċedonja. Darba minnhom f’jum is-​sabat, l-​appostlu Pawlu u dawk li kienu qed jivvjaġġaw miegħu ltaqgħu maʼ Lidja u maʼ xi nisa oħrajn li kienu miġburin ħdejn xmara barra Filippi. Ġeħova messilha qalbha hekk kif Pawlu kien qed jitkellem f’dik l-​okkażjoni. B’riżultat taʼ dan, hi tgħammdet flimkien maʼ xi membri tal-​familja tagħha. Imbagħad bil-​ħrara hi talbet lil dawk li kienu qed jivvjaġġaw: “Jekk tqisuni leali lejn Ġeħova, idħlu u oqogħdu f’dari.” Luqa, li kien qed jakkumpanja lil Pawlu, stqarr: “Ġagħlitna noqogħdu għandha.”​—Atti 16:​11-​15.

Bħal Lidja, il-​Kristjani llum juru l-​ospitalità maʼ sħabhom fit-​twemmin, bħall-​indokraturi li jivvjaġġaw u n-​nisa tagħhom. Dawk li jistidnuhom ‘iġagħluhom joqogħdu għandhom.’ Min-​naħa l-​oħra, dawk li juru l-​ospitalità jiġu mberkin b’konversazzjoni li tibni u sħubija spiritwali. Għalkemm ħafna mix-​Xhieda taʼ Ġeħova m’humiex sinjuri, huma ‘dejjem juru l-​ospitalità.’ (Rumani 12:13; Ebrej 13:2) L-​ispirtu tagħhom taʼ li jagħtu jagħmilhom henjin. Ċertament li Ġesù kien qed jgħid is-​sewwa meta qal: “Hemm iktar hena meta tagħti milli meta tirċievi.”​—Atti 20:35.