Id-​Demonji—Kif Nistgħu Nirreżistuhom?

“Lill-​anġli li ma żammewx il-​pożizzjoni oriġinali tagħhom imma abbandunaw il-​post xieraq fejn kellhom jgħammru, [Alla] żammhom marbutin għal dejjem fi dlam ċappa għall-​ġudizzju tal-​jum il-​kbir.”​—ĠUDA 6.

1, 2. Liema mistoqsijiet iqumu dwar Satana x-​Xitan u d-​demonji?

 “IBQGĦU f’sensikom, oqogħdu għassa,” iwissi l-​appostlu Pietru. “L-​avversarju tagħkom, ix-​Xitan, iħuf bħal iljun jgħajjat, jipprova jiblaʼ lil xi ħadd.” (1 Pietru 5:8) Rigward id-​demonji, l-​appostlu Pawlu jgħid: “Ma rridkomx tieħdu sehem mad-​demonji. Ma tistgħux tixorbu l-​kies taʼ Ġeħova u l-​kies tad-​demonji; ma tistgħux tieħdu sehem mill-​‘mejda taʼ Ġeħova’ u mill-​mejda tad-​demonji.”​—1 Korintin 10:​20, 21.

² Iżda, min huma Satana x-​Xitan u d-​demonji? Kif u meta bdew jeżistu? Kien Alla li ħalaqhom? Kemm hi qawwija l-​influwenza tagħhom fuq il-​bnedmin? Liema difiża, jekk hemm, għandna kontrihom?

Satana u d-​Demonji Minfejn Ġew?

3. Anġlu t’Alla kif sar Satana x-​Xitan?

³ Kmieni fl-​istorja umana, fil-​bidu taʼ lumanità fil-​ġnien taʼ l-​Għeden, anġlu t’Alla sar ribelluż. Għala? Għax hu ma kienx sodisfatt bl-​irwol tiegħu fl-​organizzazzjoni taʼ Ġeħova fis-​sema. Bil-​ħolqien taʼ Adam u Eva, hu ra opportunità biex ibiegħed l-​ubbidjenza u l-​qima tagħhom mill-​Alla l-​veru u jdawwarhom lejh innifsu. Billi rribella kontra Alla u billi ħajjar lill-​ewwel koppja umana biex jaqbdu t-​triq tad-​dnub, dan l-​anġlu għamel lilu nnifsu Satana x-​Xitan. Maż-​żmien, anġli oħrajn involvew ruħhom f’dan l-​irvell. Kif?​—Ġenesi 3:1-6; Rumani 5:12; Rivelazzjoni 12:9.

4. Xi anġli ribellużi x’għamlu qabel id-​Dilluvju taʼ żmien Noè?

⁴ L-​Iskrittura mnebbħa tgħidilna li f’xi żmien qabel id-​Dilluvju l-​kbir taʼ żmien Noè, xi anġli bdew jieħdu interess mhux f’loku fin-​nisa fuq l-​art. Bi skop ħażin, “raw ulied Alla [tas-sema] li l-​bniet tal-​bnedmin kienu ħelwin,” tgħid il-​Bibbja, “u ’l dawk li  għoġbuhom ħaduhom b’nisa tagħhom.” Dawn ir-​relazzjonijiet ma kinux naturali, u huma pproduċew nisel imħallat magħruf bħala n-​Nefilim. (Ġenesi 6:​2-4) Għalhekk, il-​ħlejjaq spirti li m’obdewx lil Alla ngħaqdu fl-​irvell taʼ Satana kontra Ġeħova.

5. Xi ġralhom ir-​ribelli meta Ġeħova ġab qerda permezz tad-​Dilluvju l-​kbir?

⁵ Meta Ġeħova ġab id-​Dilluvju fuq l-​umanità, in-​Nefilim u l-​ommijiet umani tagħhom inqerdu. L-​anġli ribellużi kienu mġagħlin iħallu l-​iġsma umani tagħhom u jmorru lura lejn il-​qasam taʼ l-​ispirti. Madankollu, ma setgħux iżommu “l-​pożizzjoni oriġinali tagħhom” m’Alla. Minflok, huma kienu mibgħutin fi “dlam ċappa” spiritwalment, magħruf bħala Tartaru.​—Ġuda 6; 2 Pietru 2:4.

6. Id-​demonji kif iqarrqu bin-​nies?

⁶ Mindu l-​anġli mill-​agħar tilfu “l-​pożizzjoni oriġinali tagħhom,” huma saru l-​imseħbin demoniċi taʼ Satana u qdew l-​interessi mill-​agħar tiegħu. Minn dak iż-​żmien ’l hawn, id-​demonji qatt iktar ma kellhom il-​qawwa li jimmaterjalizzaw ruħhom f’iġsma umani. Madankollu, huma jistgħu jħajru lill-​irġiel u lin-​nisa biex jieħdu sehem f’diversi forom taʼ perverżjoni sesswali. Id-​demonji b’mod attiv iqarrqu wkoll bil-​bnedmin permezz taʼ l-​ispiritiżmu, li jistaʼ jinvolvi affarijiet bħalma huma s-​sħarijiet, il-​vudu, u n-​nies li jikkuntattjaw l-​ispirti. (Dewteronomju 18:​10-​13; 2 Kronaki 33:6) It-​tmiem taʼ l-​anġli mill-​agħar se jkun l-​istess tmiem tax-​Xitan​—qerda eterna. (Mattew 25:41; Rivelazzjoni 20:​10) Però, sadanittant irridu nieħdu waqfa soda u nirreżistuhom. Inkunu għaqlin jekk nikkunsidraw kemm hu qawwi Satana u kif jistaʼ jirnexxilna nirreżistu lilu u lid-​demonji tiegħu.

Kemm Hu Qawwi Satana?

7. X’qawwa għandu Satana fuq id-​dinja?

⁷ Satana mmalafama lil Ġeħova matul l-​istorja. (Proverbji 27:11) U hu influwenza parti kbira mill-​umanità. L-​1 Ġwanni 5:19 jgħid: “Id-​dinja kollha qiegħda taħt il-​qawwa tal-​Ħażin.” Huwa għalhekk li x-​Xitan setaʼ jittanta lil Ġesù billi offrielu l-​awtorità u l-​glorja tas-​“saltniet kollha taʼ l-​art abitata.” (Luqa 4:​5-7) Rigward Satana, l-​appostlu Pawlu qal: “Issa, jekk l-​aħbar tajba li nxandru hi tassew moħbija b’velu, hi moħbija għal dawk li qed jinqerdu, li fosthom l-​alla taʼ din is-​sistema għema l-​imħuħ taʼ dawk li ma jemmnux, biex ma jarawx jiddi d-​dawl taʼ l-​aħbar tajba glorjuża dwar il-​Kristu, li hu x-​xbieha t’Alla.” (2 Korintin 4:​3, 4) Satana huwa “giddieb u missier il-​gidba,” iżda jpinġi lilu nnifsu bħala “anġlu tad-​dawl.” (Ġwanni 8:​44; 2 Korintin 11:14) Hu għandu l-​qawwa u l-​metodi neċessarji biex jagħmi l-​imħuħ tal-​mexxejja dinjin u tas-​sudditi tagħhom. Permezz taʼ l-​informazzjoni ħażina u tal-​ħrejjef u l-​gideb reliġjuż, hu qarraq bl-​umanità.

8. Il-​Bibbja x’tindika dwar l-​influwenza taʼ Satana?

⁸ Il-​qawwa u l-​influwenza taʼ Satana kienu evidenti fi żmien il-​profeta Danjel, madwar ħames sekli qabel l-​Era Komuni tagħna. Meta Ġeħova bagħat anġlu biex iwassal messaġġ inkuraġġanti lil Danjel, l-​anġlu ltaqaʼ maʼ reżistenza mill-​“prinċep [spirtu] tas-​saltna tal-​Persja.” L-​anġlu leali nżamm għal 21 jum sakemm “Mikiel, wieħed mill-​prinċpijiet ewlenin,” ġie biex jgħinu. L-​istess rakkont jitkellem ukoll dwar “il-​prinċep [demonju] tal-​Greċja.” (Danjel 10:​12, 13, 20) U f’Rivelazzjoni 13:​1, 2, Satana huwa mpinġi bħala “d-​dragun” li jagħti lill-​bhima salvaġġa politika “l-​qawwa u t-​tron tagħha u awtorità kbira.”

9. Kontra min qed jiġġieldu l-​Kristjani?

⁹ Mhux taʼ b’xejn li l-​appostlu Pawlu kiteb: “Aħna ma nissarawx kontra d-​demm u l-​laħam, imma kontra l-​gvernijiet, kontra l-​awtoritajiet, kontra l-​ħakkiema dinjin taʼ dan id-​dlam, kontra l-​forzi taʼ l-​ispirti mill-​agħar fil-​postijiet tas-​sema.” (Efesin 6:​12) Anki llum, il-​forzi demoniċi fil-​kontroll  taʼ Satana x-​Xitan jinsabu wara l-​kwinti, għandhom influwenza fuq il-​mexxejja umani u fuq l-​umanità in ġenerali, u jġagħluhom jikkommettu atti tal-​waħx taʼ ġenoċidju, terroriżmu, u qtil. Issa ejja neżaminaw kif aħna jistaʼ jirnexxilna nirreżistu dawn il-​forzi taʼ l-​ispirti qawwijin.

Liema Difiża Għandna?

10, 11. Kif nistgħu aħna nirreżistu lil Satana u lill-​anġli mill-​agħar tiegħu?

¹⁰ Aħna ma nistgħux nirreżistu lil Satana u lill-​anġli mill-​agħar tiegħu permezz tas-​saħħa fiżika jew mentali tagħna stess. Pawlu jagħtina l-​parir: “Komplu iksbu l-​qawwa fil-​Mulej u fis-​setgħa tas-​saħħa tiegħu.” Għandna bżonn induru lejn Alla għall-​protezzjoni. Pawlu jżid jgħid: “Ilbsu l-​armatura sħiħa mingħand Alla biex tkunu tistgħu żżommu sod kontra t-​tnassis tax-​Xitan . . . Ħudu l-​armatura sħiħa mingħand Alla, sabiex tkunu tistgħu tirreżistu fil-​jum il-​ħażin u, wara li tkunu għamiltu kollox bis-​sħiħ, iżżommu sod.”​—Efesin 6:​10, 11, 13.

¹¹ Pawlu darbtejn iħeġġeġ lill-​Kristjani sħabu biex jilbsu “l-​armatura sħiħa mingħand Alla.” Il-​kelma “sħiħa” tindika li m’huwiex biżżejjed li wieħed ikollu attitudni indifferenti biex jirreżisti l-​attakki demoniċi. Għalhekk, x’inhuma l-​biċċiet vitali taʼ l-​armatura spiritwali li l-​Kristjani llum jeħtieġu b’mod urġenti sabiex jirreżistu lid-​demonji?

“Żommu Sod”​—Kif?

12. Il-​Kristjani kif jistgħu jħażżmu ġenbejhom bil-​verità?

¹² Pawlu jispjega: “Żommu sod, b’ġenbejkom imħażżmin bil-​verità, u lebsin il-​kurazza tas-​sewwa.” (Efesin 6:​14) Iż-​żewġ biċċiet t’armatura li jirreferi għalihom hawnhekk huma l-​ħżiem, jew ċinturin, u l-​kurazza. Suldat kellu jżomm iċ-​ċinturin tiegħu ssikkat miegħu sabiex jipproteġi lil ġismu, minn żaqqu sa ġenbejh, u biex ikun jiflaħ iġorr il-​piż tas-​sejf tiegħu. B’mod simili, jeħtieġ li l-​verità tal-​Bibbja tkun issikkata sew madwarna, bħallikieku kienet dan iċ-​ċinturin letterali, sabiex aħna ngħixu fi qbil magħha. Għandna aħna skeda għall-​qari tal-​Bibbja kuljum? Hija involuta l-​familja kollha kemm hi? Għandna rutina biex nikkunsidraw l-​iskrittura tal-​jum bħala familja? Iktar minn hekk, inżommu ruħna aġġornati maʼ l-​ispjegazzjonijiet li nsibu fil-​pubblikazzjonijiet provduti mill-​“ilsir leali u għaqli”? (Mattew 24:45) Jekk iva, qegħdin inħabirku biex napplikaw il-​parir taʼ Pawlu. Ukoll, għandna vidjos u DVDs li jistgħu jipprovdu gwida Skritturali. Qabda soda mal-​verità tistaʼ tgħinna nagħmlu deċiżjonijiet għaqlin u tipproteġina milli naqbdu triq ħażina.

13. Kif nistgħu nipproteġu l-​qalb figurattiva tagħna?

¹³ Il-​kurazza letterali kienet isservi biex tipproteġi s-​sider, il-​qalb, u organi vitali oħrajn tas-​suldat. Il-​Kristjani jistgħu jipproteġu l-​qalb figurattiva tagħhom​—il-​persuna taʼ ġewwa​—billi jikkultivaw imħabba għas-​sewwa t’Alla u billi jżommu qrib mal-​livelli ġusti taʼ Ġeħova. Il-​kurazza figurattiva tipproteġina milli nnaqqsu l-​importanza tal-​Kelma t’Alla. Hekk kif niġu biex ‘nobogħdu d-​deni u nħobbu l-​ġid,’ aħna nżommu saqajna lura  “minn kull triq ħażina.”​—Għamos 5:​15; Salm 119:101.

14. Xi jfisser li jkollna ‘saqajna mixdudin bit-​tagħmir taʼ l-​aħbar tajba tal-​paċi’?

¹⁴ Saqajn is-​suldati Rumani normalment kienu jkunu armati sewwa bi żraben adattati għal mixi fit-​tul matul il-​mijiet taʼ mili tat-​toroq prinċipali Rumani li kienu jaqsmu l-​imperu kollu. Xi tfisser l-​espressjoni ‘saqajn mixdudin bit-​tagħmir taʼ l-​aħbar tajba tal-​paċi’ għall-​Kristjani? (Efesin 6:​15) Tfisser li aħna mħejjijin għall-​azzjoni. Aħna lesti li naqsmu l-​aħbar tajba tas-​Saltna t’Alla f’kull okkażjoni xierqa. (Rumani 10:​13-​15) Jekk inżommu ruħna attivi fil-​ministeru Kristjan se jkun taʼ protezzjoni kontra “t-​tnassis” taʼ Satana.​—Efesin 6:​11.

15. (a) X’juri li t-​tarka kbira tal-​fidi hija importanti ħafna? (b) Liema “vleġeġ tan-​nar” jistaʼ jkollhom effett distruttiv fuq il-​fidi tagħna?

¹⁵ Pawlu jkompli jgħid: “Fuq kollox, aqbdu f’idejkom it-​tarka kbira tal-​fidi, li biha tkunu tistgħu titfu l-​vleġeġ tan-​nar kollha tal-​Ħażin.” (Efesin 6:​16) Il-​parir biex nerfgħu t-​tarka kbira tal-​fidi jibda bl-​espressjoni “fuq kollox,” u dan jindika li din il-​biċċa armatura hija importanti ħafna. M’għandu jkun hemm ebda nuqqas fil-​fidi tagħna. Bħal tarka kbira protettiva, il-​fidi tagħna tipproteġina mill-​“vleġeġ tan-​nar” taʼ Satana. Dawn x’jistgħu jirrappreżentaw illum? Jistgħu jkunu insulti ħorox, gideb, u nofs veritajiet imferrxin mill-​għedewwa u mill-​apostati li jipprovaw idgħajfu l-​fidi tagħna. Dawn il-​“vleġeġ” jistgħu jkunu wkoll it-​tentazzjonijiet biex inkunu materjalistiċi, u  b’hekk iġagħluna nsiru medhijin fix-​xiri taʼ ħafna affarijiet u saħansitra jħajruna biex nikkompetu maʼ dawk li ċedew għal stil taʼ ħajja kollha tlellix. Forsi huma investew fi djar u karozzi akbar u aħjar jew jiftaħru bil-​ġojjelli tagħhom li jiswew ħafna flus u bil-​ħwejjeġ taʼ l-​aħħar moda. Jagħmel x’jagħmel ħaddieħor, aħna jrid ikollna fidi b’saħħitha biżżejjed biex inbiegħdu minna dawn il-​“vleġeġ tan-​nar.” Aħna kif nibnu u nżommu fidi b’saħħitha?​—1 Pietru 3:​3-5; 1 Ġwanni 2:​15-​17.

16. X’jistaʼ jgħinna nibnu fidi b’saħħitha?

¹⁶ Aħna nistgħu nersqu qrib lejn Alla permezz taʼ studju tal-​Bibbja persunali u regulari kif ukoll permezz taʼ talb mill-​qalb. Nistgħu nitolbu bil-​ħrara lil Ġeħova biex isaħħilna l-​fidi u mbagħad naħdmu fi qbil mat-​talb tagħna bl-​azzjonijiet meħtiġin. Per eżempju, nippreparaw aħna bir-​reqqa għall-​Istudju tat-​Torri taʼ l-​Għassa taʼ kull ġimgħa bil-​ħsieb li nipparteċipaw? Il-​fidi tagħna se tkun b’saħħitha jekk nistudjaw il-​Bibbja u pubblikazzjonijiet ibbażati fuqha.​—Ebrej 10:​38, 39; 11:6.

17. Kif nistgħu ‘naċċettaw l-​elmu tas-​salvazzjoni’?

¹⁷ Pawlu jikkonkludi d-​deskrizzjoni tiegħu taʼ l-​armatura spiritwali b’dan il-​parir: “Aċċettaw l-​elmu tas-​salvazzjoni, u s-​sejf taʼ l-​ispirtu, jiġifieri, il-​kelma t’Alla.” (Efesin 6:​17) L-​elmu kien jipproteġi r-​ras tas-​suldat u l-​moħħ, li minnu jittieħdu d-​deċiżjonijiet. Bl-​istess mod, it-​tama Kristjana tagħna tipproteġilna l-​abbiltajiet mentali tagħna. (1 Tessalonikin 5:8) Minflok ma nimlew moħħna b’miri dinjin u xewqat materjalistiċi, għandna niffokaw il-​ħsibijiet tagħna fuq it-​tama li tana Alla, bħalma għamel Ġesù.​—Ebrej 12:2.

18. Għala m’għandniex nittraskuraw l-​iskeda tagħna taʼ qari regulari tal-​Bibbja?

¹⁸ Il-​protezzjoni aħħarija tagħna kontra l-​influwenza taʼ Satana u d-​demonji tiegħu hija l-​kelma, jew il-​messaġġ, t’Alla mniżżla fil-​Bibbja. Din hija raġuni oħra għala m’għandniex nittraskuraw l-​iskeda tagħna tal-​qari tal-​Bibbja fuq bażi regulari. Għarfien eżatt tal-​Kelma t’Alla jipproteġina mill-​gideb taʼ Satana u mill-​propaganda demonika kif ukoll mid-​diskors ostili taʼ l-​apostati.

“Ibqgħu Itolbu f’Kull Okkażjoni”

19, 20. (a) X’hemm jistenniehom lil Satana u d-​demonji tiegħu? (b) X’jistaʼ jsaħħaħna spiritwalment?

¹⁹ It-​tneħħija taʼ Satana, id-​demonji tiegħu, u d-​dinja mill-​agħar hija fil-​qrib. Satana jaf li baqagħlu “żmien qasir.” Hu jinsab inkorlat u fi gwerra maʼ dawk “li josservaw il-​kmandamenti t’Alla u li għandhom ix-​xogħol li jixhdu dwar Ġesù.” (Rivelazzjoni 12:​12, 17) Huwa vitali li nirreżistu lil Satana u d-​demonji tiegħu.

²⁰ Kemm għandna għalxiex inkunu grati għat-​twissija biex nilbsu l-​armatura sħiħa mingħand Alla! Pawlu jtemm id-​diskussjoni tiegħu dwar l-​armatura spiritwali b’dan il-​parir: “B’kull xorta taʼ talb u suppliki ibqgħu itolbu f’kull okkażjoni bl-​ispirtu. U għal dan l-​għan, ibqgħu mqajmin il-​ħin kollu u itolbu bil-​ħerqa għall-​qaddisin kollha.” (Efesin 6:​18) It-​talb jistaʼ jsaħħaħna spiritwalment u jgħinna nibqgħu għassa. Ejja nieħdu l-​kliem taʼ Pawlu bis-​serjetà u nkomplu nitolbu, għaliex dan se jgħinna nirreżistu lil Satana u d-​demonji tiegħu.

X’Tgħallimt?

• Satana u d-​demonji tiegħu minfejn ġew?

• Kemm hu qawwi x-​Xitan?

• Liema difiża għandna kontra Satana u d-​demonji tiegħu?

• Kif nistgħu nilbsu l-​armatura sħiħa mingħand Alla?

[Mistoqsijiet taʼ Studju]

[Stampi f’paġna 26]

‘Ulied Alla raw il-​bniet tal-​bnedmin’

[Stampa f’paġna 28]

Tistaʼ tidentifika s-​sitt biċċiet taʼ l-​armatura spiritwali tagħna?

[Stampi f’paġna 29]

Is-​sehem tagħna f’dawn l-​attivitajiet kif inhu taʼ difiża kontra Satana u d-​demonji tiegħu?