Il-​Miġja taʼ Kristu—Dak li Se Twettaq

“TERRUR F’SÃO PAULO.” Ir-​rivista Veja hekk iddeskriviethom l-​erbat ijiem f’Mejju taʼ l-​2006, meta l-​kriminalità organizzata ġabet lill-​akbar u l-​iktar belt sinjura fil-​Brażil “daharha mal-​ħajt.” Madwar 150 uffiċjal tal-​pulizija, kriminali, u ċittadini ordinarji nqatlu ‘f’iktar minn 100 siegħa taʼ terrur.’

Il-vjolenza tinsab fuq quddiem fl-​aħbarijiet fi kważi kull rokna taʼ l-​art. Il-​mexxejja umani donnhom m’humiex kapaċi jwaqqfuha. Id-​dinja tagħna qed issir post iktar perikoluż biex tgħix fih. Forsi int tħossok skuraġġit minħabba li, tħares fejn tħares, issib li hemm tant aħbarijiet koroh. Madankollu, iż-​żmien għal bidla jinsab fil-​qrib.

Ġesù għallem lis-​segwaċi tiegħu biex jitolbu ħalli tiġi s-​Saltna t’Alla u biex isseħħ ir-​rieda t’Alla “kif fis-​sema, ukoll fuq l-​art.” (Mattew 6:​9, 10) Din is-​Saltna hija gvern b’Ġesù Kristu bħala s-​Sultan maħtur minn Alla. Hi se ssolvi l-​problemi kollha taʼ l-​umanità. Madankollu, biex is-​Saltna t’Alla ġġib bidliet fuq l-​art, irid ikun hemm bidla mill-​ħakma tal-​bniedem għall-​ħakma taʼ Kristu. Dan hu eżatt dak li se twettaq il-​miġja taʼ Kristu.

Bidla Paċifika?

In-​nazzjonijiet sejrin jissottomettu ruħhom paċifikament għall-​ħakma taʼ Kristu? L-​appostlu Ġwanni ngħata viżjoni li tipprovdi t-​tweġiba. Ġwanni qal: “Rajt il-​bhima salvaġġa [is-sistema politika dinjija] u s-​slaten taʼ l-​art u l-​armati tagħhom miġburin biex jiggwerraw kontra dak [Ġesù] li kien riekeb fuq iż-​żiemel u kontra l-​armata tiegħu.” (Rivelazzjoni 19:19) X’se jiġrilhom is-​slaten taʼ l-​art f’din il-​gwerra? Is-​Sultan midluk taʼ Ġeħova ‘se jkissirhom b’virga tal-​ħadid, bħal ġarra tal-​fuħħar [hu] frak jagħmilhom,’ tgħid il-​Bibbja. (Salm 2:​9) Is-​sistema politika se tiġi mfarrka għalkollox. Is-​Saltna t’Alla se “tfarrak u ttemm is-​saltniet [umani] l-​oħra kollha waqt li hi tibqaʼ wieqfa għal dejjem.”​—Danjel 2:​44.

Xi ngħidu għan-​nies li jopponu s-​Saltna t’Alla? “Fir-​rivelazzjoni tal-​Mulej Ġesù mis-​sema maʼ l-​anġli setgħana tiegħu f’nar iħeġġeġ,” Ġesù huwa deskritt bħala wieħed li “jġib vendetta fuq dawk li ma jafux lil Alla u  dawk li ma jobdux l-​aħbar tajba.” (2 Tessalonikin 1:​7, 8) “Imma l-​ħżiena,” jgħid Proverbji 2:​22, “mill-​art jitqaċċtu, u l-​qarrieqa jinqalgħu minnha.”

Rigward il-​miġja taʼ Kristu, il-​Bibbja tgħid: “Ara! Hu ġej mas-​sħab, u kull għajn tarah.” (Rivelazzjoni 1:7) In-​nies mhux se jarawh bl-​għajnejn letterali tagħhom. Mindu telaʼ s-​sema, Ġesù huwa persuna spirtu “li jgħammar f’dawl li ma tistax tersaq lejh, li ebda bniedem ma ra jew jistaʼ jara.”​—1 Timotju 6:​16.

Ġesù m’għandux bżonn jieħu sura taʼ bniedem biex ikunu jistgħu “jarawh” labitanti taʼ l-​art, sewwasew bħalma Ġeħova ma kellux bżonn jidher b’mod viżibbli meta ġab l-​Għaxar Kastigi fuq l-​Eġizzjani fi żmien Mosè. In-​nies taʼ dak iż-​żmien ma kellhom ebda dubju li Ġeħova kien qed jikkaġuna l-​kastigi, u huma kienu mġegħlin jirrikonoxxu l-​qawwa tiegħu. (Eżodu 12:31) B’mod simili, meta Kristu jieħu azzjoni bħala l-​Esekutur t’Alla, il-​ħżiena se jkunu mġegħlin “jaraw,” jew jifhmu, li Ġesù qed jintuża minn Alla biex jiġġudikahom. Dan se jsiru jafuh għaliex il-​bnedmin se jkunu mwissijin bil-​quddiem. Iva, “kull għajn tarah [lil Ġesù], u t-​tribujiet kollha taʼ l-​art iħabbtu fuq sidirhom bin-​niket minħabba fih.”​—Rivelazzjoni 1:7.

Il-qerda tal-​ħżiena u t-​tneħħija tal-​ħakmiet ħżiena huma essenzjali sabiex il-​paċi vera u l-​prosperità jkunu jistgħu jiġu mġeddin. Ġesù se jwettaq dan. Imbagħad hu se jieħu ħsieb l-​affarijiet kollha li għandhom x’jaqsmu maʼ l-​art, u b’hekk se jseħħu bidliet kruċjali.

Tiġdid li Se Jġib il-​Barkiet

L-​appostlu Pietru tkellem dwar ‘it-​tiġdid taʼ l-​affarijiet kollha li Alla tkellem dwarhom b’fomm il-​profeti mqaddsa tiegħu tal-​qedem.’ (Atti 3:​21) Dan it-​tiġdid jinkludi t-​trasformazzjoni li se sseħħ fuq l-​art matul il-​ħakma taʼ Kristu. Fost il-​profeti li permezz tagħhom Alla tkellem dwar ‘it-​tiġdid taʼ l-​affarijiet kollha’ fuq l-​art insibu l-​profeta Isaija, fit-​tmien seklu Q.E.K. Hu bassar li Ġesù Kristu, il-​“Prinċep tas-​Sliem,” kellu jġedded il-​paċi fuq l-​art. Rigward il-​ħakma taʼ Kristu, il-​profezija taʼ Isaija tgħid: “Kbira tkun setegħtu, u s-​sliem bla qjies.” (Isaija 9:​5, 6 [9:​6, 7, NW]) Ġesù se jeduka lill-​ġnus taʼ l-​art biex jgħixu fil-​paċi. Dawk li se jgħixu fuq l-​art “bi sliem kotran jitgħaxxqu.”​—Salm 37:11.

X’se jsir mill-​faqar u l-​ġuħ taħt il-​ħakma taʼ Kristu? Isaija qal: “Jagħmel il-​Mulej taʼ l-​eżerċti għall-​popli kollha fuq din il-​muntanja, mejda b’ikel fin, mejda bi nbejjed ħelwa, b’laħam imsemmen bil-​mudullun, u nbejjed fini.” (Isaija 25:6) Is-​salmista għanna: “Ikun kotran il-​qamħ fuq l-​art, jogħla sal-​qċaċet taʼ l-​għoljiet.” (Salm 72:16) Iktar minn hekk, rigward l-​abitanti taʼ l-​art, naqraw: “Huma għad jibnu djarhom u jgħammru fihom, iħawwlu d-​dwieli u jieklu frotthom. Ma jibnux biex jgħammar ħaddieħor, u ma jħawwlux biex jiekol ħaddieħor; għax il-​poplu tiegħi jgħix daqs kemm jgħixu s-​siġar, u l-​magħżulin tiegħi jistgħallu xogħol idejhom.”​—Isaija 65:​21, 22.

Isaija bassar bil-​quddiem ukoll dwar tmiem il-​mard u l-​mewt. Alla tkellem permezz taʼ Isaija, u qal: “Mbagħad jinfetħu għajnejn l-​għomja, jinfetħu widnejn it-​torox. Mbagħad iz-​zopp jaqbeż bħal għażżiela u lsien l-​imbikkma jinħall bil-​ferħ.” (Isaija 35:​5, 6) Imbagħad “ħadd minn min jgħammar hemm ma jgħid: ‘Jien marid.’” (Isaija 33:24) Alla se “jeqred il-​mewt għal dejjem, jixxotta Sidi l-​Mulej id-​dmugħ minn fuq kull wiċċ.”​—Isaija 25:8.

Xi ngħidu għall-​mejtin kollha li jinsabu “fl-​oqbra tat-​tifkira”? (Ġwanni 5:​28, 29) Isaija pprofetizza: “Jgħixu mill-​ġdid il-​mejtin  tiegħek. . . . Iqumu lkoll.” (Isaija 26:19) Iva, dawk reqdin fil-​mewt se jerġgħu lura għall-​ħajja!

“Alla Hu t-​Tron Tiegħek Għal Dejjem”

Il-​miġja taʼ Kristu se twassal għal tiġdid sħiħ tal-​pjaneta Art. L-​art se tiġi mibdula f’ġenna mill-​isbaħ, u l-​umanità se tkun magħquda fil-​qima taʼ l-​Alla l-​veru. Nistgħu aħna nkunu ċerti li Ġesù Kristu se jirnexxilu jneħħi l-​ħażen minn fuq l-​art u jġib kundizzjonijiet ġusti?

Ikkunsidra s-​sors tal-​qawwa u l-​awtorità li ngħataw lil Ġesù. B’referenza għall-​Iben, il-​Bibbja tgħid: “Alla hu t-​tron tiegħek għal dejjem taʼ dejjem, u x-​xettru taʼ saltnatek hu xettru tas-​sewwa. Int ħabbejt il-​ġustizzja, u bgħadt il-​ksur tal-​liġi.” (Ebrej 1:​8, 9) It-​tron taʼ Ġesù, jiġifieri l-​ħatra jew l-​awtorità tiegħu, ġej minn Ġeħova. Alla huwa l-​Oriġinatur u d-​Donatur taʼ dan it-​tron. L-​ebda problema m’hi se tkun daqshekk diffiċli għal Ġesù biex isolviha.

Wara l-​irxoxt tiegħu, Ġesù qal lid-​dixxipli tiegħu: “Lili ngħatat kull awtorità fis-​sema u fuq l-​art.” (Mattew 28:18) “L-​anġli u l-​awtoritajiet u l-​qawwiet intgħamlu sottomessi lejh,” jgħid l-​1 Pietru 3:​22. L-​ebda qawwa jew awtorità ma se jirnexxilha tiħodha kontra Ġesù. Xejn ma jistaʼ jwaqqfu milli jġib benefiċċji dejjiema lill-​umanità.

Kif il-​Miġja taʼ Kristu Teffettwa lin-​Nies

Fl-​ittra tiegħu lit-​Tessalonikin, l-​appostlu Pawlu kiteb: “Bla waqfien inżommu f’moħħna l-​għemil tagħkom li ġej mill-​fidi u t-​taħbit tagħkom bl-​imħabba u s-​sabar tagħkom minħabba t-​tama tagħkom fil-​Mulej tagħna Ġesù Kristu quddiem Alla u Missierna.” (1 Tessalonikin 1:3) Pawlu attribwixxa x-​xogħol li jrendi l-​frott u s-​sabar lit-​tama f’Ġesù Kristu. Din it-​tama tinkludi l-​fidi fil-​miġja taʼ Kristu u fit-​tiġdid li għaliha titħejja t-​triq. Tama bħal din tistaʼ ssostni lill-​Kristjani veri, jew tgħinhom jissaportu, saħansitra minkejja xi sitwazzjonijiet diffiċli ħafna.

Ikkunsidra l-​eżempju taʼ Carlos, li joqgħod f’São Paulo, il-​Brażil. F’Awissu taʼ l-​2003, Carlos sar jaf li kellu kanċer. Minn dakinhar ’il quddiem, hu għamel tmien operazzjonijiet li kellhom effetti taʼ wġigħ u li dgħajfulu saħħtu. Minkejja dan, hu kompla jkun sors taʼ inkuraġġiment għal ħaddieħor. Per eżempju, waqt li kien qed jippriedka fit-​toroq quddiem sptar kbir, hu ltaqaʼ maʼ waħda mix-​Xhieda taʼ Ġeħova, li r-​raġel tagħha kien qed jieħu l-​kura tal-​kimoterapija. Peress li Carlos esperjenza l-​effetti devastanti tal-​kanċer, hu setaʼ jkun taʼ inkuraġġiment u taʼ faraġ kemm għar-​raġel kif ukoll għall-​mara. Wara dan, huma qalu li għalihom il-​konversazzjoni kienet waħda li tqawwi l-​qalb. Għaldaqstant, Carlos esperjenza kemm huwa minnu dan il-​kliem li qal Pawlu: “[Alla] jfarraġna fit-​tribulazzjoni kollha tagħna, biex inkunu nistgħu nfarrġu lil dawk li jkunu f’kull xorta taʼ tribulazzjoni bil-​faraġ li aħna stess qed niġu mfarrġin bih minn Alla.”​—2 Korintin 1:4.

X’jgħin lil Carlos isib is-​saħħa biex ikompli jinkuraġġixxi lil oħrajn minkejja l-​marda tiegħu? It-​tama fil-​miġja taʼ Kristu u f’dak kollu li se jwettaq timmotiva lil Carlos biex ikompli ‘jagħmel dak li hu tajjeb.’​—Galatin 6:9.

Ikkunsidra wkoll il-​każ taʼ Samuel, li ħuh inqatel xi 50 metru ’l bogħod mid-​dar taʼ missieru. Ġew sparati għaxar tiri f’ġisem ħuh. Il-​katavru baqaʼ fil-​ġenb tat-​triq għal tmien sigħat waqt li l-​pulizija kienet qed tinvestiga d-​delitt. Samuel ma jistax jinsa dak li ġara dakinhar. Madankollu, hu jinsab imsaħħaħ bit-​tama li Kristu se jneħħi l-​ħażen kollu minn fuq l-​art, u bit-​tama li l-​ħakma ġusta se ġġib barkiet għall-​umanità. Spiss  Samuel jimmaġina lilu nnifsu jgħannaq lil ħuh irxoxtat fil-​Ġenna taʼ l-​art.​—Atti 24:15.

X’Għandek Tagħmel Int?

Se ssib ħafna faraġ fit-​tama tal-​miġja taʼ Kristu u f’dak li se twettaq. Ġesù Kristu żgur li se jsolvi l-​problemi kollha tal-​bnedmin minn għeruqhom u tal-​ħażen li nġieb fuqna.

X’għandek tagħmel biex tgawdi l-​barkiet li se jiġu msawbin fuq l-​umanità permezz tal-​ħakma taʼ Kristu? Ibda studju bir-​reqqa tal-​Kelma t’Alla, il-​Bibbja. F’talba lil Missieru, Ġesù qal: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.” (Ġwanni 17:3) Agħmilha l-​mira tiegħek li teżamina x’tgħallem il-​Bibbja. Ix-​Xhieda taʼ Ġeħova fl-​inħawi tiegħek se jkunu ferħanin biex jgħinuk f’dan ir-​rigward. Int mistieden kordjalment biex tikkuntattjahom jew biex tikteb lill-​pubblikaturi taʼ din ir-​rivista.

[Stampi f’paġna 7]

Il-​miġja taʼ Kristu se twassal għal tiġdid sħiħ taʼ l-​art

[Sors]

L-​isfond biss: Rhino and Lion Park, Gauteng, South Africa