Il-​Miġja taʼ Kristu—Għandna Nibżgħu Minnha?

KIF timmaġinaha l-​miġja taʼ Ġesù Kristu? Tqisha bħala li hi xi avveniment li se jġib kundanna, ħerba, u kastig fuq l-​umanità? Jew tistenna li se ġġib tmiem għall-​problemi kollha tagħna? Hija l-​miġja taʼ Kristu xi ħaġa li għandna nibżgħu minnha? Jew għandna nħarsu ’l quddiem għaliha?

Rigward il-​miġja taʼ Kristu, il-​Bibbja tgħid: “Ara! Hu ġej mas-​sħab, u kull għajn tarah, . . . u t-​tribujiet kollha taʼ l-​art iħabbtu fuq sidirhom bin-​niket minħabba fih.” (Rivelazzjoni 1:7) Din il-​miġja tirreferi għal meta Ġesù se jidher fil-​futur biex jippremja lill-​ġusti u jikkastiga lill-​ħżiena.

Minflok ma beżaʼ minnha, l-​appostlu Ġwanni ħares ’il quddiem għall-​miġja taʼ Kristu. Wara li rċieva r-​rivelazzjoni dwar din il-​miġja u dwar x’se tkun tfisser għall-​art, Ġwanni bil-​ħerqa talab: “Ejja, Mulej Ġesù.” (Rivelazzjoni 22:20) Iżda għala “t-​tribujiet kollha taʼ l-​art iħabbtu fuq sidirhom bin-​niket minħabba fih”? B’liema mod “kull għajn” se tarah? X’se twettaq il-​miġja taʼ Kristu? Kif nistgħu nibbenefikaw issa jekk inpoġġu fidi fiha? L-​artiklu li jmiss se jwieġeb dawn il-​mistoqsijiet.