L-​Anġli​—Kif Jeffettwaw lill-​Bnedmin

“Wara dan rajt anġlu ieħor nieżel mis-​sema, b’awtorità kbira . . . U għajjat b’leħen qawwi u qal: ‘Waqgħet! Waqgħet Babilonja l-​Kbira!’”​—RIVELAZZJONI 18:​1, 2.

1, 2. X’juri li Ġeħova juża l-​anġli biex iwettaq ir-​rieda tiegħu?

 EŻILJAT fuq il-​gżira taʼ Patmos, l-​appostlu xwejjaħ Ġwanni jingħata viżjonijiet profetiċi. Hu jara ġrajjiet eċċitanti meta “b’ispirazzjoni” jsib lilu nnifsu “f’jum il-​Mulej.” Dan il-​jum jibda bil-​ħatra taʼ Ġesù Kristu fl-​1914 u jibqaʼ sejjer sa tmiem ir-​Renju t’Elf Sena tiegħu.​—Rivelazzjoni 1:​10.

² Alla Ġeħova ma tax din ir-​rivelazzjoni direttament lil Ġwanni. Hu uża mezz. Rivelazzjoni 1:1 jgħid: “Rivelazzjoni minn Ġesù Kristu, li tahielu Alla, biex juri lill-​ilsiera tiegħu dak li jrid iseħħ dalwaqt. Hu bagħat lill-​anġlu tiegħu, u permezz taʼ dan l-​anġlu ppreżentaha b’sinjali lill-​ilsir tiegħu Ġwanni.” Ġeħova, permezz taʼ Ġesù, uża anġlu biex jgħarraf lil Ġwanni dwar l-​affarijiet meraviljużi rigward “jum il-​Mulej.” F’ħin minnhom, Ġwanni ra wkoll “anġlu ieħor nieżel mis-​sema, b’awtorità kbira.” X’kien l-​inkarigu taʼ dan l-​anġlu? “Għajjat b’leħen qawwi u qal: ‘Waqgħet! Waqgħet Babilonja l-​Kbira!’” (Rivelazzjoni 18:​1, 2) Dan l-​anġlu setgħan kellu l-​privileġġ li jħabbar il-​waqgħa taʼ Babilonja l-​Kbira, l-​imperu dinji tar-​reliġjon falza. Għalhekk, ma jistaʼ jkun hemm ebda dubju dwar li Ġeħova juża l-​anġli b’mod importanti biex iwettaq ir-​rieda tiegħu. Qabel neżaminaw fid-​dettall l-​irwol li għandhom l-​anġli fl-​iskop t’Alla u kif aħna niġu effettwati minnhom, ejja nikkunsidraw minfejn ġew dawn il-​ħlejjaq spirti.

L-​Anġli Minfejn Ġew?

3. Liema idea żbaljata dwar l-​anġli għandhom ħafna nies?

³ Miljuni taʼ nies illum jemmnu li l-​anġli jeżistu. Iżda ħafna għandhom ideat żbaljati dwarhom u dwar l-​oriġini tagħhom. Per eżempju, xi nies reliġjużi jaħsbu li meta jmut xi ħadd għażiż, dan jissejjaħ biex jingħaqad m’Alla u jsir anġlu. Huwa dan dak li tgħallem il-​Kelma t’Alla dwar il-​ħolqien, l-​eżistenza, u l-​iskop taʼ l-​anġli?

4. L-​Iskrittura x’tgħidilna dwar l-​oriġini taʼ l-​anġli?

⁴ L-​anġlu, li għandu l-​iktar qawwa u awtorità​—l-​anġlu ewlieni​—jismu Mikiel l-​arkanġlu. (Ġuda 9) Dan m’hu ħadd ħlief Ġesù Kristu. (1 Tessalonikin 4:​16) Żmien twil ilu, meta Ġeħova ddeċieda li jsir Ħallieq, dan l-​Iben anġeliku kien proprju l-​ewwel fost il-​ħolqien tiegħu. (Rivelazzjoni 3:​14) Iktar tard, permezz taʼ dan l-​ewwel Iben imwieled, Ġeħova ħalaq il-​ħlejjaq spirti l-​oħrajn kollha. (Kolossin 1:​15-​17) Meta rrefera għal dawn il-​ħlejjaq anġeliċi bħala wliedu, Ġeħova staqsa lill-​patrijarka Ġob: “Fejn kont int jien u nqiegħed sisien l-​art? Għidli, jekk għandek id-​dehen. Min qiegħed ras il-​għareb tagħha, hi u tgħanni l-​ġemgħa tal-​kwiekeb taʼ filgħodu, u tgħajjat bil-​ferħ ix-​xirka taʼ wlied Alla?” (Ġob 38:​4, 6, 7) B’mod ċar, l-​anġli huma l-​ħolqien t’Alla u dawn bdew jeżistu ħafna qabel m’eżistew il-​bnedmin.

5. L-​anġli kif inhuma organizzati?

⁵ L-​ewwel Korintin 14:33 jgħid: “Alla  m’huwiex Alla tad-​diżordni, imma tal-​paċi.” Fi qbil maʼ dan, Ġeħova organizza lill-​ulied spirti tiegħu fi tliet kategoriji bażiċi: (1) is-​serafini, li jservu bħala qaddejja mat-​tron t’Alla, jiddikjaraw il-​qdusija tiegħu, u jżommu l-​poplu tiegħu nadif spiritwalment; (2) il-​kerubini, li jappoġġaw is-​sovranità taʼ Ġeħova, u (3) anġli oħrajn li jwettqu r-​rieda tiegħu. (Salm 103:20; Isaija 6:​1-3; Eżekjel 10:​3-5; Danjel 7:​10) Liema huma xi modi li bihom dawn il-​ħlejjaq spirti jeffettwaw lill-​bnedmin?​—Rivelazzjoni 5:​11.

L-​Anġli Liema Rwol Għandhom?

6. Ġeħova kif uża l-​kerubini b’konnessjoni mal-​ġnien taʼ l-​Għeden?

⁶ L-​ewwel referenza diretta għall-​ħlejjaq spirti tinsab f’Ġenesi 3:​24, fejn naqraw: “[Ġeħova] ħareġ lill-​bniedem, u qiegħed il-​kerubini n-​naħa tal-​lvant tal-​ġnien taʼ l-​Għeden, u s-​sejf tan-​nar iżiġġ, biex iħarsu t-​triq għas-​siġra tal-​ħajja.” Dawn il-​kerubini għamluha impossibbli għal Adam u Eva li jerġgħu jidħlu fil-​ġnien oriġinali tagħhom. Dan kien fil-​bidu taʼ l-​istorja umana. Liema rwol wettqu l-​anġli minn dak iż-​żmien ’l hawn?

7. It-​tifsira tal-​kliem fil-​lingwa oriġinali għal “anġlu” x’turi dwar wieħed mill-​irwoli li għandhom l-​anġli?

⁷ L-​anġli jissemmew kważi 400 darba fil-​Bibbja. Kemm il-​kelma Ebrajka kif ukoll il-​kelma Griega għal “anġlu” jistgħu jiġu tradotti “messaġġier.” B’hekk, l-​anġli servew bħala mezz taʼ komunikazzjoni bejn Alla u l-​umanità. Bħalma ssemma fl-​ewwel żewġ paragrafi taʼ dan l-​artiklu, Ġeħova uża anġlu biex iwassal il-​messaġġ tiegħu lill-​appostlu Ġwanni.

8, 9. (a) Iż-żjajjar minn anġlu kif effettwaw lil Manuħa u lil martu? (b) Il-​ġenituri x’jistgħu jitgħallmu miż-​żjara li Manuħa kellu mill-​anġlu t’Alla?

⁸ L-​anġli huma użati wkoll biex jagħtu l-​appoġġ u l-​inkuraġġiment lill-​qaddejja t’Alla fuq l-​art. Per eżempju, lura fi żmien l-​Imħallfin f’Iżrael, Manuħa u martu, li kienet ħawlija, xtaqu ħafna li jkollhom tarbija. Ġeħova bagħat lill-​anġlu tiegħu biex jgħarraf lil mart Manuħa li hi kienet se tiled iben. Ir-​rakkont jgħidilna: “Ara, int se titqal u tiled iben, u l-​mus ma jgħaddix minn fuq rasu, għax it-​tifel ikun nażir ikkonsagrat lil Alla sa minn ġuf ommu, u hu jibda jeħles lil Iżrael minn id il-​Filistin.”​—Mħallfin 13:​1-5.

⁹ Maż-​żmien, mart Manuħa wildet iben, Sansun, li sar famuż fl-​istorja tal-​Bibbja. (Mħallfin 13:24) Qabel twieldet it-​tarbija, Manuħa talab li l-​anġlu jerġaʼ jmur għandhom u jgħidilhom kif għandhom irabbu lit-​tifel. Manuħa staqsa: “X’se jsir il-​mod taʼ ħajja tal-​wild u x-​xogħol tiegħu?” L-​anġlu taʼ Ġeħova rripeta l-​istruzzjonijiet li kien ta lil mart Manuħa. (Mħallfin 13:​6-​14) Min jaf kemm ħassu inkuraġġit Manuħa! L-​anġli ma jżurux lil individwi bl-​istess mod illum, imma bħal Manuħa, il-​ġenituri jistgħu jfittxu l-​istruzzjoni taʼ Ġeħova meta jħarrġu lil uliedhom.​—Efesin 6:4.

10, 11. (a) Eliżew u l-​qaddej tiegħu kif ġew effettwati mill-​armata Sirjana li invadiethom? (b) Kif nistgħu nibbenefikaw meta nikkunsidraw din il-​ġrajja?

 ¹⁰ Kien hemm eżempju impressjonanti taʼ l-​appoġġ anġeliku fi żmien il-​profeta Eliżew. Eliżew kien qed joqgħod f’Dotan, belt f’Iżrael. Ġurnata minnhom meta l-​qaddej t’Eliżew qam kmieni fil-​għodu u ħares ’il barra, hu ra li l-​belt kienet imdawra biż-​żwiemel u l-​karrijiet tal-​gwerra. Is-​sultan tas-​Sirja kien bagħat forza militari b’saħħitha biex jaħtaf lil Eliżew. Kif irreaġixxa l-​qaddej t’Eliżew? Imbeżżaʼ, u forsi b’xi ftit paniku, hu għajjat: “Ah! sidi, x’se nagħmlu?” Għalih kollox kien jidher bla tama. Iżda Eliżew wieġeb: “La tibżax! hemm nies aktar magħna milli magħhom.” X’ried ifisser?​—2 Slaten 6:​11-​16.

¹¹ Eliżew kien konxju li l-​qtajjaʼ taʼ l-​anġli kienu preżenti biex jappoġġawh. Madankollu, il-​qaddej tiegħu ma ra xejn. Għalhekk, “Eliżew beda jitlob u jgħid: ‘Mulej, iftaħlu għajnejh biex jara.’ U l-​Mulej fetaħ għajnejn il-​qaddej, u dan ra l-​għolja mimlija żwiemel u karrijiet tan-​nar madwar Eliżew.” (2 Slaten 6:​17) Imbagħad, il-​qaddej setaʼ jara l-​qtajjaʼ taʼ l-​anġli. B’dehen spiritwali, aħna wkoll nistgħu naraw li l-​anġli, kollha taħt id-​direzzjoni taʼ Ġeħova u Kristu, jagħtu l-​għajnuna u l-​protezzjoni lill-​poplu taʼ Ġeħova.

Appoġġ Anġeliku fi Żmien Kristu

12. Liema appoġġ irċiviet Marija mingħand l-​anġlu Gabrijel?

¹² Ikkunsidra l-​appoġġ li rċiviet il-​verġni Lhudija Marija meta semgħet l-​aħbar: “Int tnissel f’ġufek u tiled iben, u ssemmih Ġesù.” Eżatt qabel ma wassal dan il-​messaġġ sorprendenti, l-​anġlu Gabrijel, li ntbagħat minn Alla, qalilha: “Tibżax, Marija, għax int sibt favur m’Alla.” (Luqa 1:​26, 27, 30, 31) Min jaf kemm ħassitha inkuraġġita u msaħħa Marija minn dan il-​kliem li żguraha mill-​approvazzjoni t’Alla!

13. L-​anġli kif appoġġaw lil Ġesù?

¹³ Okkażjoni oħra taʼ l-​appoġġ anġeliku kienet wara li Ġesù rreżista t-​tliet tentazzjonijiet li Satana poġġielu quddiemu fix-​xagħri. Ir-​rakkont jgħidilna li fi tmiem il-​provi, “ix-​Xitan ħallieh, u ara, ġew l-​anġli u bdew jaqduh.” (Mattew 4:​1-​11) Fil-​lejl taʼ qabel miet Ġesù seħħet xi ħaġa simili. Imnikket, Ġesù niżel għarkopptejh u beda jitlob: “‘Missier, jekk trid, warrab minni dan il-​kies. Madankollu, ħa sseħħ ir-​rieda tiegħek u mhux  tiegħi.’ Imbagħad deherlu anġlu mis-​sema jqawwilu qalbu.” (Luqa 22:​42, 43) Iżda x’tip t’appoġġ anġeliku għandna llum?

L-​Appoġġ Anġeliku fiż-​Żmien Modern

14. Liema persekuzzjoni kellhom jissaportu xXhieda taʼ Ġeħova fiż-​żmien modern, u x’kien ir-​riżultat?

¹⁴ Meta nikkunsidraw l-​istorja moderna tax-​xogħol taʼ l-​ippridkar tax-​Xhieda taʼ Ġeħova, ma narawx aħna evidenza taʼ l-​appoġġ anġeliku? Per eżempju, il-​poplu taʼ Ġeħova kien kapaċi jissaporti l-​attakki tan-​Nazisti fil-​Ġermanja u fl-​Ewropa tal-​Punent qabel u matul it-​tieni gwerra dinjija (1939-​45). Taħt ir-​reġimi Kattoliċi Faxxisti fl-​Italja, Spanja, u l-​Portugall, huma kellhom jissaportu l-​persekuzzjoni saħansitra għal iktar żmien. U għal għaxriet taʼ snin, huma ssaportew il-​persekuzzjoni f’dik li qabel kienet l-​Unjoni Sovjetika u n-​nazzjonijiet li kienu taħt il-​ħakma tagħha. Eżempju ieħor huwa l-​persekuzzjoni li ssaportew ix-​Xhieda f’xi pajjiżi Afrikani. a Fi żminijiet iktar reċenti, il-​qaddejja taʼ Ġeħova sofrew persekuzzjoni ħarxa fil-​pajjiż tal-​Ġeorġja. Satana għamel dak kollu li setaʼ biex itemm l-​attività tax-​Xhieda taʼ Ġeħova. Madankollu, bħala organizzazzjoni, huma għaddew minn oppożizzjoni bħal din u ħarġu rebbiħin. Parti mir-​raġuni hi l-​protezzjoni li pprovdew l-​anġli.​—Salm 34:8 (34:​7, NW); Danjel 3:​95 (3:​28, NW); 6:​23, (6:​22, NW).

15, 16. Liema appoġġ anġeliku jirċievu x-​Xhieda taʼ Ġeħova fil-​ministeru madwar id-​dinja?

¹⁵ Ix-​Xhieda taʼ Ġeħova jiħduh bis-​serjetà l-​inkarigu tagħhom li jippridkaw l-​aħbar tajba tas-​Saltna t’Alla mad-​dinja kollha u li jagħmlu dixxipli billi jgħallmu l-​verità tal-​Bibbja lil uħud interessati kullimkien. (Mattew 28:​ 19, 20) Madankollu, huma tassew konxji li ma jistgħux iwettqu dan l-​inkarigu mingħajr l-​appoġġ taʼ l-​anġli. Għalhekk, dak li hemm imniżżel f’Rivelazzjoni 14:​6, 7 kien sors taʼ inkuraġġiment kontinwu għalihom. Hawnhekk naqraw: “[L-appostlu Ġwanni ra] anġlu ieħor itir f’nofs is-​sema, u kellu aħbar tajba taʼ dejjem biex ixandarha bħala bxara taʼ ferħ lil dawk li jgħammru fuq l-​art, u lil kull ġens u tribù u lsien u poplu, u qal b’leħen għoli: ‘Ibżgħu minn Alla u agħtuh glorja, għax waslet is-​siegħa biex jagħmel il-​ġudizzju, u għalhekk qimu lil Dak li għamel is-​sema u l-​art u l-​baħar u l-​għejun taʼ l-​ilmijiet.’”

¹⁶ Dan il-​kliem juri b’mod ċar li x-​xogħol mill-​aqwa taʼ l-​evanġelizzar madwar id-​dinja li jagħmlu x-​Xhieda taʼ Ġeħova għandu appoġġ u direzzjoni anġelika. Ġeħova qed juża l-​anġli tiegħu sabiex jidderieġi lin-​nies sinċieri lejn ix-​Xhieda tiegħu. L-​anġli wkoll iggwidaw lix-​Xhieda lejn uħud li jistħoqqilhom. Dan jispjega għala ħafna drabi​—spiss wisq biex jitqiesu bħala sempliċi kumbinazzjonijiet​—wieħed mix-​Xhieda taʼ Ġeħova jiltaqaʼ maʼ persuna fil-​ħin eżatt li tkun għaddejja minn kriżi u jkollha bżonn l-​għajnuna spiritwali.

Irwol Drammatiku fil-​Futur Qarib

17. Xi ġralhom l-​Assirjani meta ġew attakkati minn anġlu wieħed biss?

¹⁷ Barra milli jaqdu bħala messaġġiera u ajjutanti li jsaħħu lill-​aduraturi taʼ Ġeħova, l-​anġli jwettqu skop ieħor. Fl-​imgħoddi, huma kienu jwettqu ġudizzji divini. Per eżempju, lura fit-​tmien seklu Q.E.K., Ġerusalemm kienet mhedda minn eżerċtu kbir taʼ suldati Assirjani. Ġeħova kif irreaġixxa? Hu qal: “Jiena nħares din il-​belt u nsalvaha minħabba fija nnifsi, u minħabba David, il-​qaddej tiegħi.” Ir-​rakkont Bibliku jgħidilna x’ġara: “Ġara li dak il-​lejl stess, ħareġ l-​anġlu tal-​Mulej fil-​kamp taʼ l-​Assiri u qered mija u ħamsa u tmenin elf ruħ. Xħin qamu l-​oħrajn fil-​għodu, hemm isibuhom ilkoll iġsma mejta.” (2 Slaten 19:​34, 35) Kemm huma dgħajfin l-​armati umani meta mqabblin mal-​qawwa t’anġlu wieħed biss!

18, 19. Liema rwol drammatiku se jwettqu l-​anġli fil-​futur qarib, u dan kif se jeffettwa lill-​bnedmin?

¹⁸ L-​anġli se jaqdu bħala l-​forzi esekuttivi t’Alla fil-​futur qarib. Issa dalwaqt, Ġesù se jiġi “maʼ l-​anġli setgħana tiegħu f’nar iħeġġeġ.” Il-​mira tagħhom se tkun li jġibu “vendetta fuq dawk li ma jafux lil Alla u dawk li ma jobdux l-​aħbar tajba dwar il-​Mulej tagħna Ġesù.” (2 Tessalonikin 1:​7, 8) X’effett se jkollha din l-​azzjoni fuq l-​umanità! Dawk li jirrifjutaw li jwieġbu għall-​aħbar tajba tas-​Saltna t’Alla li issa qed tiġi dikjarata mad-​dinja kollha se jġarrbu qerda. Dawk biss li jfittxu lil Ġeħova, il-​ġustizzja, u l-​umiltà ‘se jkollhom fejn jistkennu f’jum il-​korla tal-​Mulej’ u ma jġarrbux ħsara.​—Sofonija 2:3.

¹⁹ Nistgħu nkunu grati li Ġeħova juża lanġli setgħanin tiegħu biex jappoġġa u jsaħħaħ lill-​aduraturi tiegħu fuq l-​art. L-​apprezzament tagħna għall-​irwol li jwettqu l-​anġli fl-​iskop t’Alla huwa partikolarment taʼ faraġ, ladarba hemm anġli li rribellaw kontra Ġeħova u waqgħu taħt it-​tmexxija taʼ Satana. L-​artiklu li jmiss se jiddiskuti liema passi jistgħu jieħdu l-​Kristjani veri biex jipproteġu lilhom infushom mill-​influwenza qawwija taʼ Satana x-​Xitan u d-​demonji tiegħu.

[Nota taʼ taħt]

X’Tgħallimt?

• L-​anġli minfejn ġew?

• L-​anġli kif intużaw fi żminijiet Bibliċi?

• Rivelazzjoni 14:​6, 7 x’jirrivela dwar l-​attività taʼ l-​anġli llum?

• Liema rwol drammatiku se jwettqu l-​anġli fil-​futur qarib?

[Mistoqsijiet taʼ Studju]

[Stampa f’paġna 22]

Manuħa u martu ġew inkuraġġiti minn anġlu

[Stampa f’paġna 23]

“Hemm nies aktar magħna milli magħhom”