Aħna Magħmulin “b’Mod taʼ l-Għaġeb”
Aħna Magħmulin “b’Mod taʼ l-Għaġeb”
“B’mod taʼ l-għaġeb għamiltni.”—SALM 139:14.
1. Ħafna nies intelliġenti għala jagħtu l-kredtu lil Alla għall-affarijiet taʼ l-għaġeb fuq l-art?
ID-DINJA naturali hija mimlija ħlejjaq taʼ l-għaġeb. Minfejn oriġinaw? Xi wħud jemmnu li t-tweġiba tistaʼ tinstab mingħajr ma dak li jkun jirreferi għal Ħallieq intelliġenti. Oħrajn jemmnu li nkunu qed nillimitaw l-abbiltà tagħna biex nifhmu n-natura jekk naqbdu u nirrifjutaw l-eżistenza taʼ Ħallieq. Huma jemmnu li l-ħlejjaq taʼ l-art huma kumplessi wisq, varjati wisq u, tistaʼ tgħid, taʼ l-għaġeb wisq biex ġew b’kumbinazzjoni. Għal ħafna nies, inkluż xi xjenzati, l-evidenza turi li l-univers għandu Ħallieq għaref, setgħan, u qalbu tajba. *
2. X’qanqal lil David biex ifaħħar lil Ġeħova?
2 Is-Sultan David taʼ Iżrael tal-qedem kien wieħed li kien konvint li hemm Ħallieq li jistħoqqlu tifħir għall-ħlejjaq taʼ l-għaġeb Tiegħu. Għalkemm David kien jgħix ħafna qabel l-era xjentifika taʼ llum, hu fehem li kien imdawwar b’eżempji meraviljużi tax-xogħol kreattiv t’Alla. David kellu biss jikkunsidra lil ġismu stess biex iħoss riverenza profonda għall-abbiltà kreattiva t’Alla. Hu kiteb: “Nroddlok ħajr, għax b’mod taʼ l-għaġeb għamiltni: taʼ l-għaġeb huma l-għemejjel tiegħek, [“bħalma ruħi taf tajjeb,” NW].”—Salm 139:14.
3, 4. Għala huwa importanti li kull wieħed u waħda minna jaħseb fil-fond dwar ix-xogħlijiet taʼ Ġeħova?
3 David kellu din il-konvinzjoni soda għax kien jaħseb fil-fond. Illum, il-kurrikuli taʼ l-iskejjel u lmezzi tax-xandir huma mimlijin teoriji li jeqirdu l-fidi dwar l-oriġini tal-bniedem. Sabiex aħna jkollna fidi bħal dik taʼ David, aħna wkoll għandna naħsbu fil-fond. Ma nistgħux inħallu lil ħaddieħor jaħseb għalina, speċjalment fuq kwistjonijiet fundamentali bħall-eżistenza u l-irwol taʼ Ħallieq.
4 Iktar minn hekk, il-fatt li naħsbu dwar ix-xogħlijiet taʼ Ġeħova jsaħħaħ l-apprezzament tagħna għalih u jagħtina fiduċja fil-wegħdi tiegħu għall-futur. Imbagħad, dan jistaʼ jimmotivana biex insiru nafu lil Ġeħova saħansitra iktar u biex naqduh. Għalhekk, ejja nikkunsidraw kif ix-xjenza moderna kkonfermat il-konklużjoni taʼ David li aħna ‘magħmulin b’mod taʼ l-għaġeb.’
L-Iżvilupp Fiżiku Meraviljuż Tagħna
5, 6. (a) Kif bdiet il-ħajja taʼ kull wieħed u waħda minna? (b) Xi rwol għandhom il-kliewi tagħna?
5 “Għax int sawwart il-ġewwieni [“il-kliewi,” “NW”] tiegħi, u f’ġuf ommi inti nsiġtni.” (Salm ) Ilkoll kemm aħna bdejna l-ħajja tagħna f’ġuf ommna bħala ċellula waħda iżgħar minn ponta taʼ lapes. Din iċ-ċellula mikroskopika kienet kumplessa ħafna—laboratorju kimiku żgħir ħafna! Din kibret b’rata mgħaġġla. Sa tmiem it-tieni xahar tiegħek fil-ġuf, l-organi ewlenin tiegħek kienu diġà fformaw. Fosthom kien hemm il-kliewi. Meta twilidt, il-kliewi kienu lesti biex jiffiltraw iċ-ċirkulazzjoni tad-demm—billi jneħħu s-sustanzi velenużi u l-ilma żejjed imma jżommu s-sustanzi bżonnjużi. Jekk iż-żewġ kliewi tiegħek huma f’saħħithom, dawn jiffiltrawlek l-ilma f’demmek—madwar 5 litri f’adult—kull 45 minuta! 139:13
6 Il-kliewi jgħinu wkoll biex jikkontrollaw l-ammont taʼ minerali fid-demm tiegħek kif ukoll l-aċidu u l-pressjoni. Dawn jagħmlu ħafna funzjonijiet vitali oħrajn, bħal per eżempju jbiddlu l-vitamina D f’forma oħra neċessarja għall-iżvilupp tajjeb taʼ l-għadam u biex tipproduċi l-ormon erythropoietin, li jistimula l-produzzjoni taċ-ċelluli ħomor tad-demm fl-għadam tiegħek. Mhux taʼ b’xejn li l-kliewi ssejħu “l-aqwa spiżjar tal-ġisem”! *
7, 8. (a) Iddeskrivi l-iżvilupp tal-bidu taʼ tarbija li għadha ma twilditx. (b) Tarbija li qed tiżviluppa b’liema mod ‘tintiseġ fil-qigħan taʼ l-art’?
7 “Ma kienx moħbi għadmi minnek, meta kont qiegħed insir fis-satra u nintiseġ fil-qigħan taʼ l-art.” (Salm 139:15) Iċ-ċellula oriġinali nqasmet, u ċ-ċelluli l-ġodda baqgħu jinqasmu. Iċ-ċelluli ma damux ma bdew jinfirdu, jew jispeċjalizzaw, biex isiru ċelluli tan-nervituri, ċelluli tal-muskoli, ċelluli tal-ġilda, eċċetra. Ċelluli taʼ l-istess tip ngħaqdu flimkien biex jifformaw tessuti u mbagħad organi. Per eżempju, matul it-tielet ġimgħa mill-fertilizzazzjoni, int bdejt tiżviluppa s-sistema skeletali. Sakemm kellek biss sebaʼ ġimgħat u b’tul taʼ madwar 2.5 ċentimetri, il-206 għadmiet ifformati tiegħek kienu diġà f’posthom, għalkemm kienu żgħar ħafna u kienu għadhom ma bbisux.
8 Dan il-proċess meraviljuż taʼ żvilupp seħħ fil-ġuf t’ommok, mistur mill-għajn tal-bnedmin bħallikieku kien moħbi fil-fond taħt l-art. Tabilħaqq, il-bnedmin għad fadlilhom ħafna x’jitgħallmu dwar kif niżviluppaw. Per eżempju, x’ġiegħel lil ċerti ġeni fiċ-ċelluli tiegħek jibdew il-proċess biex jifirdu ċerti ċelluli minn oħrajn għal partijiet differenti tal-ġisem? Ix-xjenzati maż-żmien forsi jsiru jafu, imma bħalma osserva David wara, il-Ħallieq tagħna—Ġeħova—minn dejjem kien jifhem.
9, 10. Il-formazzjoni tal-partijiet t’embriju kif inhi ‘miktuba fil-ktieb’ t’Alla?
9 “Għajnejk rawni bħala embriju, u fil-ktieb tiegħek inkitbu l-partijiet kollha tiegħu, dwar iż-żmien meta ġew ifformati u ma kien għad hemm ebda parti teżisti.” (Salm 139:16, NW) L-ewwel ċellula tiegħek kien fiha l-pjan sħiħ għal ġismek kollu. Dan il-pjan iggwida l-iżvilupp tiegħek matul id-disaʼ xhur li qattajt fil-ġuf qabel it-twelid u mbagħad matul l-iktar minn 20 sena sakemm sirt adult. Matul dan iż-żmien, ġismek għadda minn diversi stadji, kollha gwidati mill-informazzjoni programmata f’dik l-ewwel ċellula.
10 David ma kellu l-ebda għarfien dwar iċ-ċelluli u l-ġeni, minħabba li lanqas mikroskopju ma kellu. Imma hu fehem tajjeb li l-iżvilupp taʼ ġismu stess kien evidenza taʼ ppjanar minn qabel. David forsi kellu xi ftit għarfien dwar kif jiżviluppa l-embriju, u għalhekk setaʼ jirraġuna li kull pass kellu jseħħ skond disinn u skeda li kienu diġà jeżistu. B’lingwa poetika, hu ddeskriva dan id-disinn bħala li hu ‘miktub fil-ktieb’ t’Alla.
11. X’jiddetermina l-karatteristiki fiżiċi tagħna?
11 Illum, huwa magħruf li l-karatteristiki li int uritt mingħand il-ġenituri u l-antenati tiegħek—bħat-tul tiegħek, il-fattizzi taʼ wiċċek, il-kulur t’għajnejk u taʼ xagħrek, u eluf taʼ karatteristiki oħrajn—ġew determinati mill-ġeni tiegħek. Kull waħda miċ-ċelluli tiegħek fiha għaxriet t’eluf taʼ ġeni, u kull ġene jagħmel parti minn katina twila magħmula mid-DNA (deoxyribonucleic acid). L-istruzzjonijiet tal-formazzjoni taʼ ġismek huma ‘miktubin’ fl-istruttura kimika tad-DNA persunali tiegħek. Kull darba li ċ-ċelluli tiegħek jinqasmu—biex jagħmlu ċelluli ġodda jew biex jieħdu post ċelluli antiki—id-DNA tiegħek jgħaddi dawn l-istruzzjonijiet, u b’hekk iżommok ħaj u bid-dehra bażika tiegħek. X’eżempju mill-aqwa tal-qawwa u l-għerf tal-Ħallieq tagħna tas-sema!
Il-Moħħ Uniku Tagħna
12. B’mod partikulari, x’hemm li jiddistingwi lill-bnedmin mill-annimali?
12 “Kemm huma [“prezzjużi,” “NW”] ħsibijietek għalija, o Alla! Kemm hu bla tarf l-għadd tagħhom! Li kelli ngħoddhom, huma aktar mir-ramel.” (Salm 139:17, 18a) L-annimali wkoll huma magħmulin b’mod taʼ l-għaġeb, u xi wħud minnhom għandhom ċerti sensi u abbiltajiet li huma aħjar minn tal-bnedmin. Imma Alla ta lill-bnedmin il-fakultajiet mentali li huma ħafna iktar superjuri minn dawk taʼ kwalunkwe annimal. “Għalkemm aħna l-bnedmin simili għal speċi oħrajn f’ħafna modi, aħna uniċi fost il-ħlejjaq taʼ l-art fl-abbiltà tagħna li nużaw il-lingwa u l-ħsieb,” jgħid ktieb tax-xjenza. “Aħna uniċi wkoll fil-kurżità kbira li għandna dwarna nfusna: Il-ġisem tagħna kif inhu magħmul? Kif ġejna fformati?” Dawn huma mistoqsijiet li David ukoll ħaseb dwarhom.
13. (a) David kif setaʼ jimmedita fuq il-ħsibijiet t’Alla? (b) Kif nistgħu nsegwu l-eżempju taʼ David?
13 L-iktar importanti, b’kuntrast maʼ l-annimali, aħna uniċi għax għandna l-abbiltà li nimmeditaw fuq il-ħsibijiet t’Alla. * Din l-għotja speċjali hija waħda mill-modi kif aħna maħluqin “fuq xbihat Alla.” (Ġenesi 1:27) David għamel użu tajjeb minn din l-għotja. Hu mmedita fuq l-evidenza taʼ l-eżistenza t’Alla u fuq il-kwalitajiet tajbin li dehru fid-dinja taʼ madwaru. David kellu wkoll l-ewwel kotba taʼ l-Iskrittura Mqaddsa, li fihom rivelazzjonijiet mingħand Alla dwaru u dwar ix-xogħlijiet tiegħu. Dawn il-kitbiet ispirati għenu lil David jifhem il-ħsibijiet, il-personalità, u l-iskop t’Alla. Hekk kif immedita fuq l-Iskrittura, il-ħolqien, u l-mod kif Alla ttrattah, David tqanqal biex ifaħħar lill-Ħallieq tiegħu.
Dak li Tinvolvi l-Fidi
14. Għala m’għandniex bżonn inkunu nafu kollox dwar Alla sabiex ikollna fidi fih?
14 Iktar ma David immedita fuq il-ħolqien u l-Iskrittura, iktar irrealizza li ma kienx kapaċi jifhem l-għarfien kbir u l-abbiltà kollha t’Alla. (Salm 139:6) L-istess hu minnu fil-każ tagħna. Qatt m’aħna se nifhmu kollox dwar l-għemejjel kreattivi kollha t’Alla. (Koħèlet 3:11; 8:17) Imma Alla tana biżżejjed għarfien ‘evidenti’ fl-Iskrittura u fin-natura biex uħud li jfittxu l-verità fi kwalunkwe perijodu taʼ żmien ikunu jistgħu jiksbu fidi bbażata fuq l-evidenza.—Rumani 1:19, 20; Ebrej 11:1, 3.
15. Agħti tixbiha li turi kif il-fidi u r-relazzjoni tagħna m’Alla huma marbutin flimkien.
15 Li jkollna l-fidi jinvolvi iktar milli sempliċement nagħrfu li l-ħajja u l-univers bilfors li għandhom Sors intelliġenti. Jinvolvi li nafdaw lil Alla Ġeħova bħala persuna—persuna li tridna nsiru nafuha u nżommu relazzjoni tajba magħha. (Ġakbu 4:8) Għandu mnejn jiġuna f’moħħna l-fidi u l-fiduċja li dak li jkun ikollu f’missier li juri l-imħabba. Li kieku xi ħadd xettiku kellu jiddubita jekk missierek kienx verament se jgħinek fi kriżi, għandek mnejn ma tkunx tistaʼ tikkonvinċih li missierek hu taʼ min jafdah. Madankollu, jekk bl-esperjenza int ġbart evidenza tal-karattru kollu mħabba taʼ missierek, int tistaʼ tkun fiduċjuż li hu mhux se jiddiżappuntak. B’mod simili, meta nsiru nafu lil Ġeħova billi nistudjaw l-Iskrittura, nimmeditaw fuq il-ħolqien, u nesperjenzaw l-għajnuna tiegħu meta jwieġeb it-talb tagħna, aħna niġu mqanqlin biex nafdawh. Dan iqanqalna biex inkunu rridu nsiru nafu iktar dwaru u biex infaħħruh għal dejjem bi mħabba u devozzjoni bla egoiżmu. Dan hu l-iktar skop nobbli li kwalunkwe bniedem jistaʼ jaħdem għalih.—Efesin 5:1, 2.
Fittex il-Gwida tal-Ħallieq Tagħna!
16. X’nistgħu nitgħallmu mir-relazzjoni intima taʼ David maʼ Ġeħova?
16 “Għarbilni, o Alla, u agħraf qalbi; iflini, u kun af ħsibijieti. Ara iniex miexi fi triq ħażina, u mexxini fit-triq taʼ dejjem.” (Salm 139:23, 24) David kien konxju li Ġeħova diġà kien jafu sewwa—dak kollu li ħaseb, qal, jew għamel kien mikxuf għall-Ħallieq tiegħu. (Salm 139:1-12; Ebrej 4:13) Għarfien intimu bħal dan min-naħa t’Alla għen lil David iħossu fis-sigurtà, sewwasew bħalma tifel ċkejken iħossu fis-sigurtà f’dirgħajn il-ġenituri kollhom imħabba tiegħu. David kien jgħożż din ir-relazzjoni intima maʼ Ġeħova u stinka biex iżommha billi ħaseb b’mod profond dwar l-għemejjel Tiegħu u billi talab Lilu. Fil-fatt, ħafna mis-salmi taʼ David—inkluż Salm 139—huma fil-fatt talb akkumpanjat bil-mużika. Bl-istess mod, il-meditazzjoni u t-talb jistgħu jgħinuna nersqu qrib lejn Ġeħova.
17. (a) David għala ried lil Ġeħova jeżaminalu qalbu? (b) Il-mod kif nużaw il-libertà taʼ l-għażla tagħna kif se jeffettwa ħajjitna?
17 Minħabba li aħna maħluqin fuq xbihat Alla, aħna ngħatajna l-libertà taʼ l-għażla. Nistgħu nagħżlu li nagħmlu t-tajjeb jew li nagħmlu l-ħażin. Din il-libertà ġġib magħha r-responsabbiltà morali. David ma riedx jiġi magħdud mal-ħżiena. (Salm 139:19-22) Hu ried jevita li jagħmel żbalji li jikkaġunaw l-uġigħ. B’hekk, hekk kif immedita fuq l-għarfien komplut taʼ Ġeħova, David bl-umiltà staqsa lil Alla biex jeżamina l-persuna ġewwinija tiegħu u biex jiggwidah fit-triq li twassal għall-ħajja. Il-livelli morali ġusti t’Alla japplikaw għal kulħadd; allura aħna wkoll irridu nagħmlu għażliet tajbin. Ġeħova jħeġġiġna lkoll biex nobduh. Meta nagħmlu dan niksbu l-favur tiegħu u ħafna benefiċċji. (Ġwanni 12:50; 1 Timotju 4:8) Jekk nimxu maʼ Ġeħova kuljum se niġu megħjunin biex nikkultivaw paċi ġewwinija, anki meta niffaċċjaw problemi serji.—Filippin 4:6, 7.
Segwi lill-Ħallieq taʼ l-Għaġeb Tagħna!
18. David għal liema konklużjoni wasal wara li mmedita fuq il-ħolqien?
18 Bħala żagħżugħ, David spiss kien ikun barra, jirgħa l-imrieħel. In-nagħaġ kienu jbaxxu rashom biex jieklu, imma hu kien jgħolli għajnejh lejn is-smewwiet. Fid-dlam taʼ fil-għaxija, David kien jirrifletti fuq il-kobor taʼ l-univers u x’kien ifisser dan kollu. David kiteb: “Is-smewwiet ixandru l-glorja taʼ Alla, għemil idejh tħabbar il-firxa tas-sema. Jum lil ieħor jagħti l-aħbar, lejl lil ieħor iwassal it-tagħrif.” (Salm 19:2, 3 [19:1, 2, NW]) David fehem li hu kellu jfittex u jsegwi lill-Wieħed li kien għamel kollox b’mod tant taʼ l-għaġeb. Aħna għandna bżonn nagħmlu l-istess.
19. Liema lezzjonijiet jistgħu jisiltu l-kbar u ż-żgħar mill-fatt li aħna ‘magħmulin b’mod taʼ l-għaġeb’?
19 David kien ix-xempju tal-parir li ibnu Salamun iktar tard ta liż-żgħażagħ: “Ftakar issa fil-Ħallieq [“Grandjuż,” NW] tiegħek f’jiem żgħożitek . . . Ibżaʼ minn Alla, u ħares il-kmandamenti tiegħu: għax dan hu d-dmir taʼ kull bniedem.” (Ekkleżjasti 12:1, 13, Karm Żammit) Bħala żagħżugħ, David kien diġà fehem li hu ‘magħmul b’mod taʼ l-għaġeb.’ Il-fatt li aġixxa fuq dan id-dehen ġablu benefiċċji kbar tul ħajtu. Jekk aħna, kbar u żgħar, infaħħru u naqdu lill-Ħallieq Grandjuż tagħna, il-ħajja tagħna issa u fil-futur se tkun pjaċevoli. Rigward dawk li jibqgħu qrib taʼ Ġeħova u jgħixu skond it-triqat ġusti tiegħu, il-Bibbja twiegħed: “Sa fi xjuħithom il-frott jagħmlu, kollhom ħajja u ħdura, biex ixandru li ġust hu l-Mulej.” (Salm 92:15, 16 [92:14, 15, NW]) U aħna se jkollna t-tama li ngawdu l-għemejjel taʼ l-għaġeb tal-Ħallieq tagħna għal dejjem.
[Noti taʼ taħt]
^ par. 1 Ara l-ħarġa taʼ l-Awake! tat-22 taʼ Ġunju, 2004, pubblikat mix-Xhieda taʼ Ġeħova.
^ par. 6 Ara wkoll “Your Kidneys—A Filter for Life” (Il-Kliewi Tiegħek—Filtru għal Għomrok), fil-ħarġa taʼ l-Awake! tat-8 t’Awissu, 1997.
^ par. 13 Il-kliem taʼ David f’Salm 139:18b donnu jfisser li kieku kellu jqattaʼ l-ġurnata kollha sakemm jorqod bil-lejl jgħodd il-ħsibijiet taʼ Ġeħova, x’ħin iqum fil-għodu, xorta jkun fadallu iżjed x’jgħodd.
Tistaʼ Tispjega?
• Il-mod kif jiżviluppa embriju kif juri li aħna ‘magħmulin b’mod taʼ l-għaġeb’?
• Għala għandna nimmeditaw fuq il-ħsibijiet taʼ Ġeħova?
• Il-fidi u r-relazzjoni tagħna maʼ Ġeħova kif inhuma marbutin flimkien?
[Mistoqsijiet taʼ Studju]
[Stampi f’paġna 23]
L-iżvilupp taʼ tarbija fil-ġuf isegwi disinn determinat minn qabel
“DNA”
[Sors]
Tarbija fil-ġuf: Lennart Nilsson
[Stampa f’paġna 24]
Bħat-tfal li jafdaw lil missier kollu mħabba, aħna għandna fiduċja f’Ġeħova
[Stampa f’paġna 25]
Hekk kif immedita fuq xogħol idejn Ġeħova, David tqanqal biex ifaħħru