Mistoqsijiet mill-Qarrejja
Mistoqsijiet mill-Qarrejja
Kellu saqajn is-serpent li kellem lil Eva?
Bħalma hu mniżżel f’Ġenesi 3:14, Alla Ġeħova indirizza lis-serpent li qarraq b’Eva fil-ġnien taʼ l-Għeden. Alla qal: “Talli għamilt dan, misħut int fost il-bhejjem kollha u fost l-annimali salvaġġi. Għal żaqqek titkaxkar, u t-trab taʼ l-art tiekol il-jiem kollha taʼ ħajtek.” Il-Bibbja ma tgħidx speċifikament li l-annimal użat biex jittanta lil Eva qabel kellu s-saqajn imma mbagħad tilifhom. Waqt li l-kliem taʼ Ġenesi 3:14 jistaʼ jwassal lil xi wħud biex jaħsbu hekk, aħna m’għandniex neċessarjament nikkonkludu li qabel ma s-serpent ġie misħut kellu s-saqajn. Għala le?
L-iżjed minħabba li l-mira tal-ġudizzju taʼ Ġeħova primarjament kienet Satana—l-ispirtu inviżibbli li uża ħażin dak l-annimal taʼ ftit li xejn importanza. Il-Bibbja tiddeskrivi lil Satana bħala “missier il-gidba” u “s-serp oriġinali.” Dawn iż-żewġ espressjonijiet milli jidher jirreferu għal Satana meta uża annimal viżibbli, serpent, bħala kelliemi tiegħu biex iħajjar lil Eva sabiex tikser il-kmand t’Alla.—Ġwanni 8:44; Rivelazzjoni 20:2.
Alla ħalaq is-serpenti, u Adam milli jidher tahom l-isem serpent qabel ma Satana wettaq l-att qarrieqi tiegħu. Is-serpent li ma kellux il-qawwa tar-raġuni u li tkellem m’Eva ma kellux ħtija. Is-serpent ma kienx jaf li Satana kien qiegħed jimmanipulah, u lanqas ma setaʼ jifhem il-ġudizzju li Alla wettaq kontra l-partijiet diżubbidjenti.
Mela, Alla għala tkellem dwar il-kundizzjoni fiżika baxxa tas-serpent? Il-mod kif jaġixxi serpent fl-ambjent naturali, jitkaxkar fuq żaqqu u joħroġ ilsienu bħallikieku qed jilgħaq it-trab, jissimbolizza eżattament il-kundizzjoni baxxa taʼ Satana. Peress li qabel kellu pożizzjoni għolja bħala wieħed mill-anġli t’Alla, hu issa kien kundannat għal pożizzjoni baxxa li l-Bibbja ssejħilha Tartaru.—2 Pietru 2:4.
Barra minn hekk, bħalma serpent letterali jistaʼ jikkaġuna ferita fl-għarqub taʼ raġel, Satana fl-istat baxx tiegħu kien se ‘jisħaq għarqub’ in-‘nisel’ t’Alla. (Ġenesi 3:15) Il-parti primarja taʼ dak in-nisel deher biċ-ċar li kien Ġesù Kristu, li sofra temporanjament taħt idejn l-aġenti taʼ Satana. Imma r-ras simbolika tas-serpent sejra, fi żmien imwaqqat, tinsaħaq għalkollox minn Kristu u minn sħabu l-Kristjani midlukin irxoxtati. (Rumani 16:20) Għalhekk, is-saħta t’Alla lejn is-serp viżibbli kienet b’mod xieraq tagħti stampa tal-qagħda baxxa u tal-qerda kompleta li se jġarrab is-“serp oriġinali” inviżibbli, Satana x-Xitan.