Imxi fit-​Triqat taʼ Ġeħova

“Hieni kull min jibżaʼ mill-​Mulej, kull min jimxi fit-​triqat tiegħu!”—SALM 128:1.

1, 2. Għala nistgħu nkunu ċerti li l-​hena jistaʼ jinkiseb?

 KULĦADD jixtieq ikun hieni. Imma żgur taqbel li x-​xewqa għall-​hena u anki t-​tfittxija għalih m’humiex l-​istess bħal meta tesperjenzah.

² Madankollu, l-​hena jistaʼ jinkiseb. Salm 128:1 jgħid: “Hieni kull min jibżaʼ mill-​Mulej, kull min jimxi fit-​triqat tiegħu!” Aħna nistgħu nkunu henjin jekk inqimu u nonoraw lil Alla u nimxu fit-​triqat tiegħu billi nagħmlu r-​rieda tiegħu. Liema effett jistaʼ jkollu dan fuq l-​imġiba tagħna u fuq il-​kwalitajiet li nuru?

Uri li Int taʼ Min Jafdak

3. Il-​fatt li nkunu taʼ min jafdana kif għandu x’jaqsam mad-​dedikazzjoni tagħna lil Alla?

³ Dawk li jibżgħu minn Ġeħova huma taʼ min jafdahom, saħansitra bħalma hu Ġeħova nnifsu. Hu wettaq kull wegħda li għamel lil Iżrael tal-​qedem. (1 Slat. 8:56) Id-​dedikazzjoni tagħna lil Alla hija l-​iktar wegħda sinifikanti li qatt nistgħu nagħmlu, u t-​talb regulari se jgħinna nżommu l-​wegħda tagħna. Nistgħu nitolbu bħalma għamel is-​salmista David: “Int, o Alla, smajt il-​wegħda tiegħi. . . . infaħħar ismek għal dejjem, jien u nrodd kuljum il-​wegħdiet tiegħi.” (Salm 61:6,9 [61:5, 8, NW]; Koħ. 5:3-6 [5:4-6, NW]) Sabiex inkunu ħbieb t’Alla, irridu nkunu taʼ min jafdana.—Salm 15:1, 4.

4. Ġefta u t-​tifla tiegħu kif aġixxew fi qbil mal-​wegħda li għamel lil Ġeħova?

⁴ Fi żmien l-​Imħallfin taʼ Iżrael, Ġefta wiegħed li jekk Ġeħova jagħtih rebħa fuq l-​Għammonin, hu kien se jagħti bħala “sagrifiċċju  tal-​ħruq” lill-​ewwel individwu li jilqgħu x’ħin jirritorna mill-​battalja. Dan l-​individwu ma kien ħadd ħlief it-​tifla taʼ Ġefta—l-​unika wild tiegħu. B’fidi f’Ġeħova, kemm Ġefta u kemm it-​tifla tiegħu li ma kinitx miżżewġa wettqu l-​wegħda tiegħu. Għalkemm iż-​żwieġ u t-​tfal kienu taʼ valur kbir f’Iżrael, it-​tifla taʼ Ġefta minn jeddha baqgħet ma żżewġitx u gawdiet il-​privileġġ taʼ servizz sagru fis-​santwarju taʼ Ġeħova.—Mħ. 11:28-40.

5. Anna b’liema mod uriet li kienet taʼ min jafdaha?

⁵ Anna, mara li kellha l-​biżaʼ t’Alla, tat prova li hi taʼ min jafdaha. Hi kienet tgħix mar-​raġel tagħha Elkana li kien Levita, u mal-​mara l-​oħra tiegħu, Peninna, fir-​reġjun muntanjuż t’Efrajm. Peninna kellha ħafna tfal u kienet tinki lil Anna minħabba li ma kellhiex tfal, speċjalment meta l-​familja kienet tmur it-​tabernaklu. F’waħda minn dawn l-​okkażjonijiet, Anna għamlet wegħda li jekk ikollha iben tagħtih lil Ġeħova. Ma damitx ma ħarġet tqila u wildet tifel li semmewh Samwel. Wara li nfatam, Anna offrietu lil Alla f’Silo, billi lil Samwel silfitu lil Ġeħova “l-​jiem kollha taʼ ħajtu.” (1 Sam. 1:11) B’hekk hi wettqet il-​wegħda tagħha avolja ma kinitx taf li iktar tard kien se jkollha tfal oħrajn.—1 Sam. 2:20, 21.

6. Tikiku kif wera li kien bniedem taʼ min jafdah?

⁶ Il-​Kristjan Tikiku taʼ l-​ewwel seklu kien raġel taʼ min jafdah u “ministru leali.” (Kol. 4:7) Tikiku vvjaġġa maʼ l-​appostlu Pawlu mill-​Greċja sal-​Maċedonja, sa l-​Asja Minuri, u forsi anki sa Ġerusalemm. (Atti 20:2-4) Għandu mnejn kien “il-​ħu” li għen lil Titu biex jamministra l-​għotja għal dawk il-​Kristjani li kienu fil-​bżonn fil-​Lhudija. (2 Kor. 8:18, 19; 12:18) L-​ewwel darba li Pawlu ġie mitfugħ il-​ħabs f’Ruma, hu qabbad lil Tikiku, rappreżentant taʼ min jafdah, biex jieħu xi ittri lil sħabu fit-​twemmin f’Efesu u f’Kolossi. (Efes. 6:21, 22; Kol. 4:8, 9) It-​tieni darba li ntefaʼ l-​ħabs f’Ruma, Pawlu bagħat lil Tikiku f’Efesu. (2 Tim. 4:12) Jekk aħna wħud taʼ min jafdana, aħna wkoll se ngawdu barkiet fis-​servizz taʼ Ġeħova.

7, 8. Għala nistgħu ngħidu li David u Ġonatan kienu ħbieb taʼ veru?

⁷ Alla jistenna li aħna nkunu ħbieb taʼ min jafdana. (Prov. 17:17) Ġonatan, bin is-​Sultan Sawl, sar ħabib taʼ David. Meta Ġonatan sar jaf li David kien qatel lil Gulija, “qalb Ġonatan intrabtet maʼ qalb David, u Ġonatan ħabbu bħalu nnifsu.” (1 Sam. 18:1, 3) Ġonatan saħansitra wissa lil David meta Sawl ried joqtlu. Wara li David ħarab, Ġonatan iltaqaʼ miegħu u għamel patt miegħu. Sawl kważi qatel lil Ġonatan minħabba li kellmu dwar David, imma ż-​żewġt iħbieb reġgħu ltaqgħu u saħħew il-​ħbiberija tagħhom. (1 Sam. 20:24-41) L-​aħħar darba li ltaqgħu, Ġonatan qawwa qalb David “f’Alla.”—1 Sam. 23:16-18.

⁸ Ġonatan miet f’battalja kontra l-​Filistin. (1 Sam. 31:6) F’għanja taʼ niket, David għanna: “Jien imgħolli għalik, Ġonatan ħija, l-​għożża tiegħi u l-​għaxqa għalija! Mħabbtek għalija egħżeż minn imħabbet in-​nisa!” (2 Sam. 1:26) Din l-​imħabba kienet affezzjoni taʼ bejn il-​ħbieb u ma kien hemm ebda inklinazzjoni sesswali fiha. David u Ġonatan kienu ħbieb taʼ veru.

 Dejjem Kun “Umli”

9. L-​importanza taʼ l-​umiltà kif tidher fi Mħallfin kapitlu 9?

⁹ Sabiex inkunu ħbieb t’Alla, irridu nkunu “umli.” (1 Pt. 3:8; Salm 138:6) L-​importanza taʼ l-​umiltà tidher fi Mħallfin kapitlu 9. Ġotam, bin Gidgħon, qal: “Darba marru s-​siġar biex jidilku sultan fuqhom.” Issemmew iż-​żebbuġa, it-​tina, u d-​dielja. Dawn irrappreżentaw individwi li kien jistħoqqilhom ir-​rispett u li ma fittxewx li jaħkmu fuq sħabhom l-​Iżraelin. Imma l-​għollieqa—tajba biss biex tqabbad in-​nar—tirrappreżenta s-​saltna t’Abimelek li kien kburi, qattiel, u għatxan biex jikkontrolla lil oħrajn. Għalkemm ‘ħakem taʼ prinċep għal tliet snin fuq Iżrael,’ hu miet ħesrem. (Mħ. 9:8-15, 22, 50-54) Kemm hu aħjar li nkunu “umli”!

10. X’tgħallimt mill-​fatt li Erodi naqas li ‘jagħti l-​glorja lil Alla’?

¹⁰ Fl-​ewwel seklu E.K., kien hemm tensjoni bejn il-​kburi Sultan Erodi Agrippa tal-​Lhudija u l-​abitanti taʼ Tir u Sidon li riedu jagħmlu paċi miegħu. Meta Erodi kien qed jagħti diskors pubbliku f’okkażjoni minnhom, huma għajtu: “Dan leħen t’alla, mhux taʼ bniedem!” Erodi ma rrifjutax dan it-​tifħir u l-​anġlu taʼ Ġeħova ħabat għalih, u b’hekk miet mewta kerha “għax ma tax il-​glorja lil Alla.” (Atti 12:20-23) Xi ngħidu jekk aħna kelliema jew għalliema xi ftit jew wisq tas-​sengħa taʼ veritajiet Bibliċi? Mela ejja nagħtu l-​kredtu lil Alla għal dak li jħallina nagħmlu.—1 Kor. 4:6, 7; Ġak. 4:6.

Kun Kuraġġuż u Agħmel il-​Ħila

11, 12. L-​esperjenza taʼ Ħenok kif turi li Ġeħova jagħti lill-​qaddejja tiegħu l-​kuraġġ u l-​ħila?

¹¹ Jekk bl-​umiltà nimxu fit-​triqat taʼ Ġeħova, hu se jagħtina kuraġġ u ħila. (Dt. 31:6-8, 23) Ħenok, is-​sebaʼ raġel fil-​linja ġenealoġika minn Adam, b’kuraġġ mexa m’Alla billi għex ħajja retta fost in-​nies mill-​agħar taʼ żmienu. (Ġen. 5:21-24) Ġeħova saħħaħ lil Ħenok biex iwasslilhom messaġġ qawwi minħabba l-​għemejjel u l-​kliem tagħhom bla devozzjoni. (Aqra Ġuda 14, 15.) Għandek int il-​kuraġġ meħtieġ biex tiddikjara l-​ġudizzji t’Alla?

¹² Ġeħova esegwixxa ġudizzju fuq dawk li ċaħdu lil Alla fid-​Dilluvju globali fi żmien Noè. Però, il-​profezija taʼ Ħenok hija taʼ inkuraġġiment għalina, għax dawk li jiċħdu lil Alla fi żmienna dalwaqt se jinqerdu mill-​mirjadi qaddisin t’Alla. (Riv. 16:14-16; 19:11-16) Bi tweġiba għat-​talb tagħna, Ġeħova jagħtina l-​kuraġġ biex niddikjaraw il-​messaġġ tiegħu, kemm jekk għandu x’jaqsam mal-​ġudizzji tiegħu u kemm jekk għandu x’jaqsam mal-​barkiet taħt il-​ħakma tas-​Saltna.

13. Għala nistgħu nkunu ċerti li Alla jistaʼ jipprovdi l-​kuraġġ u s-​saħħa li għandna bżonn sabiex inkampaw maʼ problemi dipressanti?

¹³ Għandna bżonn kuraġġ u saħħa mingħand Alla biex inkampaw maʼ problemi dipressanti. Meta Għesaw iżżewweġ żewġ nisa Ħittin, dawn “kienu taʼ mrar għal qalb Iżakk u Rebekka [il-ġenituri tiegħu].” Rebekka saħansitra lmentat: “Iddejjaqt minn ħajti minħabba l-​bniet taʼ Ħet. Jekk [it-tifel tagħna] Ġakobb jiżżewweġ xi waħda mill-​bniet taʼ Ħet bħal dawn, xi mara minn din l-​art, xi tkun tiswieli ħajti?” (Ġen. 26:34, 35; 27:46) Iżakk ħa azzjoni u bagħat lil Ġakobb biex isib mara minn fost il-​qaddejja taʼ Ġeħova. Għalkemm Iżakk u Rebekka ma setgħux ibiddlu dak li kien għamel Għesaw, Alla tahom l-​għerf, il-​kuraġġ, u s-​saħħa biex jibqgħu leali Lejh. Jekk nitolbu għall-​għajnuna li jkollna bżonn, Ġeħova se jagħmel l-​istess għalina.—Salm 118:5.

14. Waħda tifla ċkejkna Iżraelija kif uriet il-​kuraġġ?

¹⁴ Sekli wara, tifla ċkejkna Iżraelija li kienet ittieħdet bħala lsira minn qatgħa ħallelin saret qaddejja fid-​dar taʼ Nagħman, il-​kmandant taʼ l-​armata Sirjana, raġel milqut bil-​ġdiem. Minħabba li kienet semgħet dwar il-​mirakli li Alla għamel permezz tal-​profeta Eliżew, it-​tifla bil-​kuraġġ qalet lill-​mara taʼ Nagħman: ‘Jekk sidi jmur Iżrael, il-​profeta taʼ Ġeħova jfejqu mill-​ġdiem tiegħu.’ Nagħman mar Iżrael, u ġie mfejjaq b’miraklu. (2 Slat. 5:1-3)  Kemm hi t’eżempju mill-​aqwa din it-​tifla għaż-​żgħażagħ li jistrieħu fuq Ġeħova għall-​kuraġġ biex jagħtu xiehda lil għalliema, lil sħabhom taʼ l-​iskola, u lil oħrajn!

15. Liema azzjoni kuraġġuża ħa Għobadija, qaddej fid-​dar t’Aħab?

¹⁵ Il-​kuraġġ mogħti minn Alla jgħinna nissaportu l-​persekuzzjoni. Ikkunsidra lil Għobadija, qaddej fid-​dar tas-​Sultan Aħab, li kien jgħix fi żmien il-​profeta Elija. Meta r-​Reġina Ġeżabel ordnat il-​qtil tal-​profeti t’Alla, Għobadija ħeba 100 minnhom “ħamsin, ħamsin, fl-​għerien.” (1 Slat. 18:13; 19:18) Tkun lest int li bil-​kuraġġ tgħin lil sħabek fit-​twemmin li jkunu qed jiġu persegwitati, bħalma Għobadija għen lill-​profeti taʼ Ġeħova?

16, 17. Aristarku u Gaju kif irreaġixxew għall-​persekuzzjoni?

¹⁶ Jekk aħna niġu persegwitati, nistgħu nkunu fiduċjużi li Ġeħova se jkun magħna. (Rum. 8:35-39) Fit-​teatru fil-​beraħ t’Efesu, Aristarku u Gaju, li kienu jaħdmu spalla maʼ spalla maʼ Pawlu, iffaċċjaw folla nies li x’aktarx kienet tgħodd bl-​eluf. L-​arġentier Demetriju kien qanqal rewwixta. Hu u arġentiera oħrajn kienu jagħmlu niċeċ tal-​fidda taʼ l-​alla mara Artemi, u n-​negozju tagħhom li kien irendi ħafna flus kien qed jiġi mhedded għaliex ix-​xogħol taʼ l-​ippridkar taʼ Pawlu qanqal lil ħafna mir-​residenti tal-​belt biex jabbandunaw il-​qima taʼ l-​idoli. Il-​folla tan-​nies kaxkru lil Aristarku u lil Gaju fit-​teatru u baqgħu jgħajtu: “Kbira Artemi taʼ l-​Efesin!” Aristarku u Gaju x’aktarx li ħasbu li se jiġu maqtulin, imma r-​reġistratur tal-​belt ikkalma lill-​folla.—Atti 19:23-41.

¹⁷ Kieku int għaddejt minn esperjenza bħal din, kont tipprova tgħix ħajja iktar faċli? M’hemm ebda ħjiel li Aristarku u Gaju naqsilhom il-​kuraġġ. Minħabba li kien minn Tessalonika, Aristarku kien jaf li l-​ippridkar taʼ l-​aħbar tajba jistaʼ jirriżulta f’persekuzzjoni. Ftit taż-​żmien qabel, kienet qamet rewwixta meta Pawlu kien ippriedka hemmhekk. (Atti 17:5; 20:4) Peress li Aristarku u Gaju mxew fit-​triqat taʼ Ġeħova, huma esperjenzaw is-​saħħa u l-​kuraġġ mingħand Alla biex jissaportu l-​persekuzzjoni.

Fittex l-​Interessi t’Oħrajn

18. Priska u Akwila kif kienu qed ‘ifittxu’ l-​interessi t’oħrajn?

¹⁸ Kemm jekk qed niġu persegwitati issa u kemm jekk le, għandna nkunu konċernati dwar sħabna l-​Kristjani. Priska u Akwila kienu qed ‘ifittxu’ l-​interessi t’oħrajn. (Aqra Filippin 2:4.) Din il-​koppja miżżewġa eżemplari għandha mnejn tat lil Pawlu post fejn joqgħod meta kien f’Efesu, fejn l-​arġentier Demetriju kien qanqal ir-​rewwixta li ssemmiet qabel. Din is-​sitwazzjoni forsi qanqlet lil Akwila u Priska biex ‘jissograw ħajjithom’ għal Pawlu. (Rum. 16:3, 4; 2 Kor. 1:8) Illum, interess f’ħutna li qed jiġu persegwitati jagħmilna “għaqlin bħas-​sriep.” (Mt. 10:16-18) Aħna nwettqu x-​xogħol tagħna b’għaqal u nirrifjutaw li nittradixxu lil ħutna billi nikxfu isimhom jew nagħtu xi informazzjoni oħra dwarhom lil dawk li jippersegwitawhom.

19. Liema affarijiet tajbin għamlet Dorka għal oħrajn?

¹⁹ Hemm diversi modi kif nistgħu nfittxu l-​interessi t’oħrajn. Xi Kristjani għandhom ċerti bżonnijiet, u aħna forsi nistgħu nissodisfaw  dawn il-​bżonnijiet. (Efes. 4:28; Ġak. 2:14-17) Fil-​kongregazzjoni taʼ l-​ewwel seklu f’Ġoppa, kien hemm mara ġeneruża jisimha Dorka. (Aqra Atti 9:36-42.) Dorka “kienet tagħmel ħafna għemejjel tajbin u tagħti ħafna għotjiet taʼ ħniena,” u milli jidher dawn inkludew li kienet tagħmel il-​ħwejjeġ għar-​romol fil-​bżonn. Il-​mewta tagħha, fis-​sena 36 E.K., ikkaġunat ħafna niket fost ir-​romol. Alla uża lill-​appostlu Pietru biex jirxoxta lil Dorka, u x’aktarx li hi qattgħet il-​kumplament taʼ ħajjitha fuq l-​art tippriedka l-​aħbar tajba bil-​ferħ u twettaq affarijiet tajbin għal oħrajn. Kemm aħna ferħanin li fostna llum għandna nisa Kristjani mhux egoisti, proprju bħalma kienet din il-​mara!

20, 21. (a) L-​inkuraġġiment kif għandu x’jaqsam maʼ li nfittxu l-​interessi t’oħrajn? (b) X’tistaʼ tagħmel biex tkun taʼ inkuraġġiment?

²⁰ Aħna nfittxu l-​interessi t’oħrajn billi ninkuraġġuhom. (Rum. 1:11, 12) Sila, li kien jaħdem flimkien maʼ Pawlu, kien sors taʼ inkuraġġiment. Madwar is-​sena 49 E.K., wara li ġiet deċiża l-​kwistjoni taċ-​ċirkonċiżjoni, il-​ġemgħa li tiggverna f’Ġerusalemm bagħtet rappreżentanti biex iwasslu ittra lill-​Kristjani sħabhom f’postijiet oħrajn. Sila, Ġuda, Barnaba, u Pawlu ħaduha Antjokja. Hemmhekk, Sila u Ġuda “inkuraġġew lill-​aħwa b’ħafna taħditiet u saħħewhom.”—Atti 15:32.

²¹ Iktar tard, Pawlu u Sila ntefgħu l-​ħabs f’Filippi imma nħelsu minħabba li seħħ terremot. Min jaf kemm ħassewhom ferħanin meta taw xiehda lill-​kalzrier u raw lilu u lil dawk taʼ daru jsiru Kristjani! Qabel ma telqu mill-​belt, Sila u Pawlu inkuraġġew lill-​aħwa. (Atti 16:12, 40) Bħal Pawlu u Sila, stinka biex tinkuraġġixxi lil oħrajn bil-​kummenti, bit-​taħditiet, u bil-​ministeru żeluż tiegħek. M’għandniex xi ngħidu, u meta jkollok ‘xi kelma taʼ inkuraġġiment, għidha.’—Atti 13:15.

Ibqaʼ Miexi fit-​Triqat taʼ Ġeħova

22, 23. Kif nistgħu verament nibbenefikaw mir-​rakkonti Bibliċi?

²² Tassew għandna nkunu grati għar-​rakkonti li seħħew fir-​realtà dokumentati fil-​Kelma taʼ Ġeħova, “l-​Alla taʼ kull inkuraġġiment”! (2 Kor. 1:3, Byington) Sabiex nibbenefikaw minn dawn l-​esperjenzi, għandna napplikaw il-​lezzjonijiet tal-​Bibbja f’ħajjitna u nħallu l-​ispirtu qaddis t’Alla jmexxina.—Gal. 5:22-25.

²³ Jekk nimmeditaw fuq ir-​rakkonti Bibliċi se niġu megħjunin nuru kwalitajiet li jogħġbu lil Alla. Dan se jsaħħaħ ir-​relazzjoni tagħna maʼ Ġeħova, li jagħtina “għerf, [“għarfien,” NW] u hena.” (Koħ. 2:26) B’riżultat taʼ dan, nistgħu nferrħu l-​qalb kollha mħabba t’Alla. (Prov. 27:11) Jalla nkunu determinati li nagħmlu dan billi nibqgħu mexjin fit-​triqat taʼ Ġeħova.

Int Kif Twieġeb?

• Kif tistaʼ turi li int taʼ min jafdak?

• Għala għandna nkunu “umli”?

• Ir-rakkonti Bibliċi kif jistgħu jgħinuna nkunu kuraġġużi?

• B’liema modi nistgħu nfittxu l-​interessi t’oħrajn?

[Mistoqsijiet taʼ Studju]

[Stampa f’paġna 8]

Ġefta, li kien bniedem taʼ min jafdah, u bintu wettqu l-​wegħda tiegħu, għalkemm ma kienx faċli għalihom

[Stampa f’paġna 10]

Żgħażagħ, x’tgħallimtu mit-​tifla Iżraelija?

[Stampa f’paġna 11]

Dorka kif issodisfat il-​bżonnijiet tal-​Kristjani sħabha?