Il-​Kelma taʼ Ġeħova Hi Ħajja

Punti Prinċipali mill-​Ktieb taʼ Marku

L-​EVANĠELJU taʼ Marku huwa l-​iqsar wieħed mill-​erbaʼ Evanġelji. Miktub minn Ġwanni Marku xi 30 sena wara l-​mewt u l-​irxoxt taʼ Ġesù Kristu, huwa rakkont mexxej u mimli azzjoni dwar it-​tliet snin u nofs taʼ ministeru taʼ Ġesù.

Il-ktieb taʼ Marku, li milli jidher kien miktub għal nies li ma kinux Lhud, b’mod partikulari għar-​Rumani, jippreżenta lil Ġesù bħala l-​Iben t’Alla li jagħmel il-​mirakli u li jwettaq kampanja vigoruża taʼ ppridkar. L-​enfasi qiegħda fuq dak li wettaq Ġesù iktar milli fuq dak li għallem. Jekk nagħtu attenzjoni għall-​Evanġelju taʼ Marku se nsaħħu l-​fidi tagħna fil-​Messija u se nitqanqlu biex inkunu xandara żelużi tal-​messaġġ t’Alla fil-​ministeru Kristjan.—Ebr. 4:12.

MINISTERU KBIR FIL-​GALILIJA

(Marku 1:1–9:50)

Wara li fl-​ewwel 14-il vers jirrakkonta fil-​qosor dwar l-​attività taʼ Ġwanni l-​Għammied u dwar l-​40 jum li Ġesù qattaʼ fix-​xagħri, Marku jibda jikteb rapport eċċitanti dwar il-​ministeru taʼ Ġesù fil-​Galilija. L-​użu ripetut taʼ l-​espressjoni “minnufih” jagħti sens t’urġenza lir-​rakkont.—Mk. 1:10, 12.

F’inqas minn tliet snin, Ġesù jlesti tliet kampanji taʼ ppridkar fil-​Galilija. Fil-​biċċa l-​kbira Marku jippreżenta r-​rakkont fl-​ordni skond kif seħħew il-​ġrajjiet. Il-​Priedka taʼ fuq il-​Muntanja u ħafna mit-​taħditiet twal taʼ Ġesù tħallew barra.

Mistoqsijiet Skritturali Mweġbin:

1:15—“Iż-​żmien stabbilit” għal liema ħaġa kien twettaq? Ġesù kien qed jgħid li ż-​żmien stabbilit kien twettaq biex hu jibda l-​ministeru tiegħu. Peress li hu kien preżenti u kien ġie nominat bħala Sultan, is-​Saltna t’Alla kienet qorbot. Nies b’attitudni xierqa setgħu jiġu mqanqlin permezz tax-​xogħol tiegħu taʼ ppridkar u jieħdu passi li jwassluhom biex jiksbu l-​approvazzjoni t’Alla.

1:44; 3:12; 7:36—Ġesù għala ma riedx li tingħata pubbliċità għall-​mirakli tiegħu? Hu ma riedx li n-​nies jaslu għal konklużjonijiet ibbażati fuq rapporti sensazzjonali jew forsi anki mhux korretti. Ġesù ried li huma stess jaraw l-​evidenza li hu kien il-​Kristu u jieħdu deċiżjoni persunali bbażata fuq din l-​evidenza. (Is. 42:1-4; Mt. 8:4; 9:30; 12:15-21; 16:20; Lq. 5:14) Eċċezzjoni waħda kienet il-​każ tar-​raġel li qabel kien maħkum mid-​demonji fl-​art tal-​Gerasin. Ġesù qallu biex imur id-​dar u jgħid b’kulma ġralu lil qrabatu. Ġesù kien ġie mitlub jitlaq minn dawk l-​inħawi, u għalhekk ma kien se jkollu ebda kuntatt, jew ftit li xejn, man-​nies t’hemmhekk. Il-​preżenza u x-​xiehda taʼ raġel li miegħu Ġesù kien għamel opra tajba setgħu għenu biex ipattu għal xi kliem negattiv dwar it-​telfa tal-​ħnieżer.—Mk. 5:1-20; Lq. 8:26-39.

2:28—Ġesù għala jissejjaħ “saħansitra Sid is-​Sabat”? “Il-​Liġi hi biss dell taʼ l-​affarijiet tajbin li għandhom jiġu,” kiteb l-​appostlu Pawlu. (Ebr. 10:1) Bħalma stqarret il-​Liġi, is-​Sabat kien jiġi wara sitt ijiem taʼ xogħol, u Ġesù wettaq ħafna mill-​mirakli tiegħu taʼ fejqan f’dan il-​jum. Dan iffigura bil-​quddiem il-​mistrieħ taʼ paċi u barkiet oħrajn li l-​bnedmin se jgawdu taħt ir-​Renju t’Elf Sena taʼ Kristu wara t-​tmiem tal-​ħakma ħarxa taʼ Satana. Għalhekk, is-​Sultan taʼ din is-​Saltna huwa wkoll “Sid is-​Sabat.”—Mt. 12:8; Lq. 6:5.

3:5; 7:34; 8:12—Marku kif setaʼ jkun jaf id-​dettalji dwar l-​istat emozzjonali taʼ Ġesù?  Marku la kien wieħed mit-​12-il appostlu u lanqas xi ħabib mill-​qrib taʼ Ġesù. Skond it-​tradizzjoni tal-​qedem, ħafna mill-​informazzjoni taʼ Marku ġiet mingħand l-​appostlu Pietru, ħabib intimu taʼ Marku.—1 Pt. 5:13.

6:51, 52—X’kienet “it-​tifsira tal-​ħobż” li d-​dixxipli ma fehmux? Ftit sigħat biss qabel, Ġesù kien temaʼ 5,000 raġel, kif ukoll nisa u tfal, b’ħames ħobżiet u żewġ ħutiet. “It-​tifsira tal-​ħobż” li d-​dixxipli kien imisshom fehmu minn din il-​ġrajja kien li Ġesù kien ngħata s-​setgħa mingħand Alla Ġeħova li jwettaq il-​mirakli. (Mk. 6:41-44) Kieku fehmu l-​kobor tas-​setgħa li Ġesù kien ngħata, ma kinux ikunu tant mistagħġbin meta hu mexa fuq l-​ilma b’mod mirakoluż.

8:22-26—Ġesù għala fejjaq lir-​raġel agħma f’pass wara l-​ieħor? Ġesù għandu mnejn għamel dan biex juri konsiderazzjoni lejn dan ir-​raġel. Il-​fejqan bil-​mod taʼ dan ir-​raġel agħma li kien dara fid-​dlam għal żmien twil għandu mnejn ippermettielu jadatta ruħu għad-​dija tax-​xemx.

Lezzjonijiet Għalina:

2:18; 7:11; 12:18; 13:3. Marku jispjega d-​drawwiet, it-​termini, it-​twemmin, u l-​postijiet li setgħu ma kinux familjari mal-​qarrejja li ma kinux Lhud. Hu jispjega b’mod ċar li l-​Fariżej “kienu jsumu regolarment,” li qorban huwa “għotja dedikata lil Alla,” li s-​Sadduċej “jgħidu li m’hemmx irxoxt,” u li t-​tempju kien jidher minn fuq “il-​Muntanja taż-​Żebbuġ.” Peress li l-​arblu tar-​razza tal-​Messija kien taʼ interess primarjament għal-​Lhud, hu jħallih barra għalkollox. B’hekk, Marku jipprovdi eżempju għalina. Aħna għandna nagħtu kas l-​ambjent li jkunu ġejjin minnu dawk li jkunu qed jisimgħuna meta nieħdu sehem fil-​ministeru Kristjan jew meta nagħtu xi taħdita fil-​laqgħat tal-​kongregazzjoni.

3:21. Il-​qraba taʼ Ġesù ma kinux taʼ l-​istess twemmin. Għalhekk, hu juri empatija maʼ dawk li minħabba l-​fidi tagħhom ikollhom l-​oppożizzjoni jew jiġu ridikolati minn membri tal-​familja li ma jkunux taʼ l-​istess twemmin.

3:31-35. Fil-​magħmudija tiegħu, Ġesù sar l-​Iben spiritwali t’Alla, u “Ġerusalemm taʼ fuq” kienet ommu. (Gal. 4:26) Minn dakinhar ’il quddiem, id-​dixxipli taʼ Ġesù saru eqreb u egħżeż għalih minn qrabatu. Dan jgħallimna li għandna npoġġu l-​interessi spiritwali l-​ewwel f’ħajjitna.—Mt. 12:46-50; Lq. 8:19-21.

8:32-34. Għandna nkunu ħfief biex nindunaw u nwarrbu xi suġġerimenti minn oħrajn biex nitħassru lilna nfusna. Wieħed li jsegwi lil Kristu jrid ikun lest li “jiċħad lilu nnifsu,” jiġifieri jiċċaħħad u jgħid le għal xewqat u ambizzjonijiet egoistiċi. Irid ikun lest li “jerfaʼ  z-​zokk tat-​tortura tiegħu,” jiġifieri li jsofri, jekk ikun hemm bżonn, jew jiġi umiljat jew persegwitat jew saħansitra jingħata l-​mewt għaliex hu Kristjan. U jrid “jibqaʼ miexi” wara Ġesù, billi jfassal ħajtu fuq il-​mudell Tiegħu. Bħala dixxipli jeħtieġ li niżviluppaw u nżommu spirtu taʼ sagrifiċċju bħalma wera Kristu Ġesù.—Mt. 16:21-25; Lq. 9:22, 23.

9:24. M’għandniex nistħu nistqarru l-​fidi tagħna jew nitolbu għal iktar fidi.—Lq. 17:5.

L-​AĦĦAR XAHAR

(Marku 10:1–16:8)

Lejn tmiem is-​sena 32 E.K., Ġesù mar “fil-​fruntieri tal-​Lhudija u n-​naħa l-​oħra tal-​Ġordan,” u għal darb’oħra ġew ħdejh folol taʼ nies. (Mk. 10:1) Wara li ppriedka hemmhekk, hu rħielha lejn Ġerusalemm.

Fit-8 taʼ Nisan, Ġesù kien f’Betanja. X’ħin kien qiegħed mal-​mejda biex jiekol, daħlet mara u ferrgħet żejt ifuħ fuq rasu. Il-​ġrajjiet mid-​daħla trijonfanti taʼ Ġesù f’Ġerusalemm sa l-​irxoxt tiegħu huma deskritti fl-​ordni skond kif seħħew.

Mistoqsijiet Skritturali Mweġbin:

10:17, 18—Ġesù għala kkoreġa lil wieħed raġel talli sejjaħlu “Għalliem Tajjeb”? Ġesù rrifjuta li jaċċetta dan it-​titlu bħala kumpliment, u b’dan il-​mod hu ta l-​glorja lil Ġeħova u wera li l-​Alla l-​veru hu s-​sors taʼ l-​affarijiet tajbin kollha. Iktar minn hekk, Ġesù ġibed l-​attenzjoni lejn il-​verità fundamentali li l-​Ħallieq taʼ kollox, Alla Ġeħova, biss għandu d-​dritt li jistabbilixxi l-​livelli taʼ x’inhu tajjeb u x’inhu ħażin.—Mt. 19:16, 17; Lq. 18:18, 19.

14:25—Ġesù x’ried ifisser meta qal lill-​appostli leali tiegħu: “Żgur li ma nixrobx iżjed mill-​prodott tad-​dielja sa dak il-​jum meta nixorbu ġdid fis-​saltna t’Alla”? Ġesù ma kienx qed jindika li fis-​sema hemm l-​inbid letterali. Madankollu, peress li xi drabi l-​inbid jissimbolizza l-​ferħ, Ġesù kien qed jirreferi għall-​ferħ li se jkun hemm meta hu jkun fis-​Saltna mas-​segwaċi midlukin tiegħu li jiġu rxoxtati.—Salm 104:15; Mt. 26:29.

14:51, 52—Min kien iż-​żagħżugħ li “ħarab għarwien”? Marku biss isemmi din il-​ġrajja, u għalhekk nistgħu bir-​raġun nikkonkludu li hu kien qed jitkellem dwaru nnifsu.

15:34—Il-​kliem “Alla tiegħi, Alla tiegħi, għala abbandunajtni?” jindika xi nuqqas taʼ fidi min-​naħa taʼ Ġesù? Le. Għalkemm m’aħniex ċerti x’kienu l-​motivi taʼ Ġesù meta qal dan, kliemu forsi jindika li Ġesù kien jaf li Ġeħova kien neħħa l-​protezzjoni Tiegħu sabiex l-​integrità taʼ Ibnu tkun tistaʼ tiġi mġarrba bis-​sħiħ. Huwa possibbli wkoll li Ġesù qal dan għaliex ried iwettaq dak li bassar dwaru Salm 22:1.—Mt. 27:46.

Lezzjonijiet Għalina:

10:6-9. L-​iskop t’Alla hu li l-​imseħbin fiż-​żwieġ jibqgħu flimkien. Għalhekk, minflok ma jfittxu li jiddivorzjaw malajr, l-​irġiel u n-​nisa miżżewġin għandhom iħabirku biex japplikaw il-​prinċipji tal-​Bibbja ħalli jegħlbu xi diffikultajiet li jistgħu jqumu fiż-​żwieġ.—Mt. 19:4-6.

12:41-44. L-​eżempju taʼ l-​armla fqira jgħallimna li m’għandniex inkunu egoisti biex nappoġġaw il-​qima vera.

[Stampa f’paġna 29]

Ġesù għala qal lil dan ir-​raġel biex jgħid lil qrabatu dwar dak kollu li kien ġralu?