L-​Istorja t’Emilia Pederson

Kif rakkontata minn Ruth E. Pappas

OMMI, Emilia Pederson, twieldet fl-​1878. Għalkemm saret għalliema taʼ l-​iskola, dak li verament xtaqet kien li tuża ħajjitha biex tgħin lin-​nies jersqu qrib lejn Alla. Evidenza tax-​xewqa t’ommi kienet il-​bagoll kbir li kellna d-​dar tagħna, f’Jasper, belt żgħira fil-​Minnesota, l-​Istati Uniti. Din kienet akkwistatha biex iġġorr l-​affarijiet tagħha lejn iċ-​Ċina, fejn xtaqet taqdi bħala missjunarja. Madankollu, meta mietet ommha, kellha tbiddel il-​pjanijiet tagħha u tibqaʼ d-​dar biex tieħu ħsieb ħutha iżgħar minnha. Fl-​1907 żżewġet lil Theodore Holien. Jien twilidt fit-​2 taʼ Diċembru, 1925—l-​iżgħar minn sebaʼ aħwa.

Ommi kellha xi mistoqsijiet fuq il-​Bibbja u kienet tfittex bis-​serjetà t-​tweġibiet għalihom. Mistoqsija waħda kienet dwar it-​tagħlim li l-​infern hu post taʼ turment bin-​nar għall-​ħżiena. Hi staqsiet lil supervisor tal-​Knisja Luterana, li kien qed iżurhom, fejn setgħet issib fil-​Bibbja dak li kien jappoġġa dan it-​tagħlim. Fi kliem ieħor, hu qalilha li ma jimpurtax x’tgħid il-​Bibbja—kien hemm bżonn li jiġi mgħallem infern taʼ turment bin-​nar.

Taqtaʼ x-​Xewqa li Ssir Taf il-​Verità

Ftit wara l-​1900, Emma, oħt ommi, marret Northfield, il-​Minnesota, biex tistudja l-​mużika. Hi qagħdet fid-​dar taʼ l-​għalliem tagħha Milius Christianson u martu, li kienet Studenta tal-​Bibbja, kif kienu magħrufin dak iż-​żmien ix-​Xhieda taʼ Ġeħova. Emma semmiet li kellha oħtha li kienet qarrejja devota tal-​Bibbja. Is-​Sinjura Christianson ma damitx ma kitbet ittra lil ommi u wiġbitilha l-​mistoqsijiet li kellha fuq il-​Bibbja.

Darba waħda, Studenta tal-​Bibbja jisimha Lora Oathout ġiet bil-​ferrovija minn Sioux Falls, fis-​South Dakota, biex tippriedka f’Jasper. Ommi studjat il-​letteratura tal-​Bibbja li kienet irċiviet, u fl-​1915 bdiet taqsam il-​veritajiet tal-​Bibbja m’oħrajn, u qassmet il-​letteratura li pprovditilha Lora.

Fl-1916, ommi semgħet li kien se jkun hemm Charles Taze Russell fil-​konvenzjoni fil-​Belt taʼ Sioux, f’Iowa. Riedet tattendi. Sa dan iż-​żmien, ommi kellha ħamest itfal, u Marvin, l-​iżgħar wieħed, kellu biss ħames xhur. Minkejja dan, bit-​tfal kollha magħha, hi vjaġġat bil-​ferrovija madwar 160 kilometru sal-​Belt taʼ Sioux biex tattendi l-​konvenzjoni. Hi semgħet it-​taħditiet taʼ Ħuna Russell, rat il-​“Photo Drama of Creation,” u tgħammdet. Malli waslet lura d-​dar kitbet artiklu dwar il-​konvenzjoni, li ġie pubblikat fil-​Jasper Journal.

Fl-1922, ommi kienet fost it-​18,000 ruħ li attendew il-​konvenzjoni taʼ Cedar Point, f’Ohio. Wara din il-​konvenzjoni, qatt ma waqfet tirreklama s-​Saltna t’Alla. Fil-​fatt, kienet tħeġġiġna  biex nagħtu kas it-​twissija: “Din hi t-​triq. Imxu fiha.”—Is. 30:21.

Il-​Ministeru tas-​Saltna Jagħti l-​Frott

Kmieni fis-​snin għoxrin tas-​seklu l-​ieħor, il-​ġenituri tiegħi marru joqogħdu f’dar ’il barra minn Jasper. Missieri kellu negozju li kien sejjer tajjeb u familja kbira x’jieħu ħsieb. Hu ma kienx jistudja l-​Bibbja daqs ommi, imma appoġġa x-​xogħol taʼ l-​ippridkar b’qalbu kollha u kien jistieden lill-​ministri li jivvjaġġaw, li dak iż-​żmien kienu magħrufin bħala pellegrini, biex joqogħdu għandna. Spiss, meta wieħed mill-​aħwa li jivvjaġġaw kien jagħti xi taħdita fid-​dar tagħna, kien ikun hemm mal-​mitt ruħ jew iktar—ippakkjati fis-​salott, fil-​kamra taʼ l-​ikel, u fil-​kamra tas-​sodda tagħna.

Meta kelli madwar sebaʼ snin, ziti Lettie ċemplet u qalet li l-​ġirien tagħha, Ed Larson u martu, riedu jistudjaw il-​Bibbja. Huma aċċettaw bil-​ħerqa l-​veritajiet tal-​Bibbja u iktar tard stiednu waħda mill-​ġirien tagħhom jisimha Martha Van Daalen, omm taʼ tmint itfal, biex tingħaqad magħhom fl-​istudju. Martha u l-​familja tagħha kollha saru Studenti tal-​Bibbja. a

Dik il-​ħabta, Gordon Kammerud, żagħżugħ li kien jgħix ftit kilometri ’l bogħod minna, beda jaħdem maʼ missieri. Gordon kien ġie mwissi: “Oqgħod attent mill-​bniet taʼ l-​imgħallem. Għandhom reliġjon stramba.” Madankollu, Gordon beda jistudja l-​Bibbja u ma damx ma kkonvinċa ruħu li kien sab il-​verità. Tliet xhur wara, hu tgħammed. Il-​ġenituri tiegħu wkoll ħaddnu l-​verità, u l-​familji tagħna—il-​familja Holien, il-​familja Kammerud, u l-​familja Van Daalen—saru ħbieb tal-​qalb.

Imsaħħin mill-​Konvenzjonijiet

Ommi tant kienet inkuraġġita mill-​konvenzjoni taʼ Cedar Point li minn dakinhar qatt ma riedet titlef konvenzjoni oħra. Għalhekk, l-​ewwel memorji li għandi huma l-​vjaġġi twal li għamilna biex nattendu dawn il-​laqgħat. Il-​konvenzjoni taʼ Columbus, f’Ohio, fl-​1931 kienet speċjali għax kien dakinhar li ġie adottat l-​isem Xhieda taʼ Ġeħova. (Is. 43:10-12) Jien niftakar sew ukoll il-​konvenzjoni taʼ Washington, D.C., fl-​1935, li fiha kien hemm taħdita storika li identifikat il-​“kotra kbira,” jew il-​“folla kbira,” li tissemma f’Rivelazzjoni. (Riv. 7:9; Għaqda Biblika Maltija) Ħuti Lilian u Eunice kienu fost l-​iktar minn 800 ruħ li tgħammdu hemmhekk.

Il-familja tagħna vvjaġġat lejn il-​konvenzjonijiet f’Columbus, Ohio, fl-​1937; f’Seattle, Washington, fl-​1938; u fil-​Belt taʼ New York fl-​1939. Il-​familji Van Daalen u Kammerud u xi oħrajn ġew magħna, u aħna kkampjajna matul it-​triq. Eunice żżewġet lil Leo Van Daalen fl-​1940, u saru pijunieri. Dik l-​istess sena, Lilian iżżewġet lil Gordon Kammerud, u huma wkoll saru pijunieri.

 Il-​konvenzjoni fl-​1941 li saret f’St. Louis, fil-​Missouri, kienet speċjali. Hemmhekk, eluf taʼ żgħażagħ irċivew il-​ktieb Children. Dik il-​konvenzjoni biddlitli ħajti. Ftit wara, fl-​1 taʼ Settembru, 1941, sirt pijuniera flimkien maʼ ħija Marvin u martu, Joyce. Kelli 15-il sena.

Ħafna min-​nies fil-​komunità tagħna kienu bdiewa, u għalhekk kien diffiċli għall-​aħwa rġiel li jattendu l-​konvenzjonijiet għaliex spiss dawn kienu jkunu fi żmien il-​ħsad. Għalhekk, wara l-​konvenzjonijiet, konna nagħmlu reviżjonijiet tal-​konvenzjoni fil-​bitħa taʼ wara tad-​dar tagħna għall-​benefiċċju taʼ dawk li ma kinux ikunu jistgħu jattendu. Dawn kienu laqgħat ferriħija.

Gilegħad u Inkarigi Barranin

Fi Frar taʼ l-​1943 ġiet stabbilita l-​iskola taʼ Gilegħad għat-​taħriġ taʼ pijunieri għas-​servizz missjunarju. L-​ewwel klassi kienet tinkludi sitt membri tal-​familja Van Daalen—l-​aħwa rġiel Emil, Arthur, Homer, u Leo; il-​kuġin tagħhom Donald; u oħti Eunice, mart Leo. Sellimna lil xulxin u konna emozzjonati, bejn ferħanin u bejn imdejqin għax ma konniex nafu meta se nerġgħu narawhom. Wara l-​gradwazzjoni, is-​sitta li huma ġew assenjati biex imorru Puerto Rico, fejn kien hemm inqas minn tużżana Xhieda dak iż-​żmien.

Sena wara, Lilian u Gordon kif ukoll Marvin u Joyce attendew it-​tielet klassi taʼ Gilegħad. Huma wkoll intbagħtu Puerto Rico. Imbagħad, f’Settembru taʼ l-​1944, fl-​età taʼ 18-il sena, attendejt ir-​rabaʼ klassi taʼ Gilegħad. Wara li ggradwajt fi Frar taʼ l-​1945, mort ħdejn ħuti Puerto Rico. X’dinja interessanti kelli quddiemi! Għalkemm kienet sfida biex nitgħallmu l-​Ispanjol, xi wħud minna ma tantx domna biex bdejna nikkonduċu iktar minn 20 studju tal-​Bibbja kull wieħed. Ġeħova bierek ix-​xogħol. Illum, hemm madwar 25,000 Xhud f’Puerto Rico!

Traġedji Jolqtu lill-​Familja Tagħna

Leo u Eunice baqgħu Puerto Rico wara t-​twelid taʼ binhom Mark, fl-​1950. Fl-​1952 ippjanaw li jieħdu vaganza biex iżuru lil qrabathom lura f’pajjiżhom. Fil-​11 t’April telqu bl-​ajruplan. Diżgrazzjatament, ftit wara li telaq, l-​ajruplan ikkraxxja fl-​oċean. Leo u Eunice mietu. Mark, li kellu sentejn, instab f’wiċċ l-​oċean. Xi ħadd li salva tefgħu fuq dgħajsa tas-​salvataġġ u ngħata r-​respirazzjoni artifiċjali—u baqaʼ ħaj. b

Ħames snin wara, fis-​7 taʼ Marzu, 1957, ommi u missieri kienu sejrin bil-​karozza lejn is-​Sala tas-​Saltna u ħadu panċer. Waqt li kien qed ibiddel it-​tajer fil-​ġenb tat-​triq, missieri laqtitu karozza u miet mad-​daqqa. Madwar 600 ruħ attendew it-​taħdita tal-​funeral, u ngħatat xiehda mill-​aqwa lill-​komunità, fejn missieri kien rispettat ħafna.

Inkarigi Ġodda

Eżatt qabel il-​mewt taʼ missieri, irċivejt l-​inkarigu biex immur naqdi fl-​Arġentina. F’Awissu taʼ l-​1957, wasalt fil-​belt taʼ Mendoza fl-​għoljiet biswit il-​Muntanji Andes. Fl-​1958, George Pappas, li kien iggradwa mit-​30 klassi taʼ l-​iskola taʼ Gilegħad, intbagħat l-​Arġentina. Jien u George sirna ħbieb tal-​qalb, u żżewwiġna f’April taʼ l-​1960. Fl-​1961 mietet ommi fl-​età taʼ 83 sena. Kienet imxiet fedelment  fit-​triq tal-​qima vera u għenet lil ħafna u ħafna oħrajn jagħmlu l-​istess.

Jien u George qdejna għal għaxar snin maʼ missjunarji oħrajn f’diversi djar tal-​missjunarji. Imbagħad qattajna sebaʼ snin fix-​xogħol tas-​circuit. Fl-​1975 morna lura lejn l-​Istati Uniti biex ngħinu lill-​membri tal-​familja li kienu morda. Fl-​1980, żewġi ġie mistieden għax-​xogħol tas-​circuit fil-​qasam tal-​lingwa Spanjola. Dak iż-​żmien, fl-​Istati Uniti kien hemm madwar 600 kongregazzjoni li jitkellmu bl-​Ispanjol. Għal 26 sena, aħna żorna lil ħafna minnhom u rajna n-​numru tal-​kongregazzjonijiet jiżdied għal iktar minn 3,000.

Huma Mxew fit-​“Triq”

Ommi kellha wkoll il-​ferħ li tara lill-​membri żgħar tal-​familja tagħha jidħlu fil-​ministeru full-time. Per eżempju, Carol, bint oħti l-​kbira Ester, bdiet taqdi bħala pijuniera fl-​1953. Hi żżewġet lil Dennis Trumbore, u flimkien ilhom jaqdu fil-​ministeru full-time minn dakinhar. Lois, it-​tifla l-​oħra t’Ester, iżżewġet lil Wendell Jensen. Huma attendew il-​41 klassi taʼ Gilegħad u qdew bħala missjunarji għal 15-il sena fin-​Niġerja. Mark, li l-​ġenituri tiegħu mietu fl-​ajruplan li kkraxxja, ġie adottat u mrobbi minn oħt Leo, Ruth La Londe, u żewġha Curtiss. Mark u martu, Lavonne, qdew bħala pijunieri għal snin sħaħ u rabbew l-​erbat itfal tagħhom fit-​“triq” tal-​verità.—Is. 30:21.

Orlen, l-​uniku wieħed minn ħuti li għadu ħaj, għandu madwar 95 sena. Hu għadu jaqdi lil Ġeħova fedelment. Jien u George għadna naqdu bil-​ferħ fil-​ministeru full-time.

Dak li Ħalliet Ommi

Jien issa għandi waħda mill-​iktar affarijiet prezzjużi li kellha ommi—l-​iskrivanija tagħha. Din kien tahielha missieri bħala rigal tat-​tieġ. F’wieħed mill-​kxaxen hemm l-​iscrapbook qadim tagħha, li fih ittri u artikli pubblikati fuq il-​gazzetti li kienet kitbet hi u li kienu taw xiehda mill-​aqwa dwar is-​Saltna. Xi wħud minnhom kienu miktubin kmieni fis-​seklu 20. Fl-​iskrivanija hemm ukoll l-​ittri li ommi rċiviet mingħand uliedha missjunarji. Kemm nieħu gost naqrahom u nerġaʼ naqrahom! U l-​ittri li kitbet lilna kienu dejjem inkuraġġanti ħafna, mimlijin bi ħsibijiet pożittivi. Ommi qatt ma qatgħet xewqitha biex tkun missjunarja. Madankollu, kellha żelu għas-​servizz missjunarju li qanqal il-​qlub t’oħrajn għall-​ġenerazzjonijiet taʼ warajha. Kemm inħares ’il quddiem lejn iż-​żmien meta bħala familja ningħaqdu mill-​ġdid m’ommi u missieri fil-​ġenna taʼ l-​art!—Riv. 21:3, 4.

[Noti taʼ taħt]

[Stampa f’paġna 17]

Emilia Pederson

[Stampa f’paġna 18]

1916: Ommi, missieri (iżomm lil Marvin); isfel, mix-​xellug għal-​lemin: Orlen, Ester, Lilian, Mildred

[Stampa f’paġna 19]

Leo u Eunice, ftit qabel ma mietu

[Stampa f’paġna 20]

1950: Mix-​xellug għal-​lemin, fuq: Ester, Mildred, Lilian, Eunice, Ruth; isfel: Orlen, ommi, missieri, u Marvin

[Stampa f’paġna 20]

George u Ruth Pappas fix-​xogħol tas-​“circuit,” 2001