“Ejja Kun Segwaċi Tiegħi”
“Jekk xi ħadd irid jiġi warajja, ħa jiċħad lilu nnifsu u jerfaʼ z-zokk tat-tortura tiegħu jum wara l-ieħor u jibqaʼ miexi warajja.”—LQ. 9:23.
1, 2. (a) Ġesù liema stedina b’qalb tajba offra? (b) Int kif wiġibt għall-istedina taʼ Ġesù?
LEJN l-aħħar tal-ministeru tiegħu, Ġesù kien qed jagħti xiehda fil-Perija, reġjun fuq in-naħa l-oħra tal-Ġordan, lejn il-grigal tal-Lhudija. Hu ġie avviċinat minn żagħżugħ li staqsieh x’kellu jagħmel biex jiret il-ħajja taʼ dejjem. Wara li rrealizza li ż-żagħżugħ kien qed josserva lealment il-Liġi Mosajka, Ġesù għamillu stedina mill-aqwa. Hu qallu: “Mur, bigħ dak li għandek u agħti lill-foqra, u jkollok teżor fis-sema, u ejja kun segwaċi tiegħi.” (Mk. 10:21) Aħseb ftit—stedina biex issegwi lil Ġesù, l-Iben uniġenitu taʼ l-Alla l-Iktar Għoli!
2 Dan iż-żagħżugħ irrifjuta l-istedina, imma oħrajn aċċettawha. Qabel, Ġesù kien qal lil Filippu: “Kun segwaċi tiegħi.” (Ġw. 1:43) Filippu aċċetta u iktar tard sar appostlu. Ġesù rripeta l-istedina lil Mattew, u hu wkoll aċċettaha. (Mt. 9:9; 10:2-4) Tabilħaqq, Ġesù offra l-istess stedina lil dawk kollha li jħobbu s-sewwa meta qal: “Jekk xi ħadd irid jiġi warajja, ħa jiċħad lilu nnifsu u jerfaʼ z-zokk tat-tortura tiegħu jum wara l-ieħor u jibqaʼ miexi warajja.” (Lq. 9:23) Għaldaqstant, kulħadd jistaʼ jkun is-segwaċi taʼ Ġesù jekk verament irid. Għandek int din ix-xewqa? Ħafna minna diġà wiġibna b’mod pożittiv għall-istedina b’qalb tajba taʼ Ġesù, u fil-ministeru taʼ l-għalqa, aħna nagħmlu din l-istedina lil oħrajn.
3. Kif nistgħu nevitaw li ninġarru mal-kurrent u ma nibqgħux insegwu lil Ġesù?
3 Iżda, b’sogħba xi wħud li juru interess fil-verità tal-Bibbja ma jibqgħux jistudjaw. Minflok, huma jnaqqsu l-pass u eventwalment ‘jinġarru mal-kurrent’ u ma jibqgħux isegwu lil Ġesù. (Ebr. 2:1) Kif nistgħu nevitaw li naqgħu f’din in-nassa? Ikun t’għajnuna jekk nistaqsu lilna nfusna: ‘X’inhi fil-fatt ir-raġuni għala nagħżlu li nsegwu lil Ġesù? Xi jfisser li ssegwih?’ Jekk inżommu dawn iż-żewġ mistoqsijiet f’moħħna se niġu megħjunin insaħħu d-determinazzjoni tagħna sabiex nibqgħu fit-triq għaqlija li għażilna. Se niġu megħjunin ukoll biex ninkuraġġixxu lil oħrajn isegwu lil Ġesù.
Għala Nsegwu lil Ġesù?
4, 5. Ġesù għala huwa kwalifikat biex imexxi?
4 Il-profeta Ġeremija qal: “Jien naf, O Ġeħova, li triq il-bniedem m’hijiex f’idejh. Lanqas min jimxi ma jistaʼ jidderieġi l-passi tiegħu.” (Ġer. 10:23) L-istorja tikkonferma kemm hu veru l-kliem taʼ Ġeremija. Sar iktar evidenti li l-bnedmin imperfetti ma jistgħux imexxu lilhom infushom b’suċċess. Aħna aċċettajna l-istedina biex insegwu lil Ġesù minħabba li tgħallimna li hu kwalifikat biex ikun il-Mexxej tagħna b’tali mod li l-ebda bniedem ma jistaʼ jimita. Ikkunsidra ftit mill-kwalifiki li għandu Ġesù.
5 L-ewwel, Ġesù ntgħażel bħala l-Messija l-Mexxej minn Ġeħova nnifsu. Min jaf aħjar mill-Ħallieq tagħna lil min għandu jaħtar bħala Mexxej fuqna? It-tieni, Ġesù għandu kwalitajiet li nistgħu nammiraw u nimitaw. (Aqra Isaija 11:2, 3.) Ġesù huwa eżempju perfett. (1 Pt. 2:21) It-tielet, Ġesù jimpurtah profondament minn dawk li jsegwuh, bħalma wera meta miet għalihom. (Aqra Ġwanni 10:14, 15.) U hu juri li huwa ragħaj li jimpurtah hekk kif jiggwidana lejn ħajja li ġġib hena issa u twassal għal futur etern u glorjuż. (Ġw. 10:10, 11; Riv. 7:16, 17) Għal dawn ir-raġunijiet u għal raġunijiet oħrajn, aħna ħadna deċiżjoni għaqlija meta għażilna li nsegwuh. Madankollu, x’tinvolvi din id-deċiżjoni?
6. X’jinvolvi li nsegwu lil Ġesù?
6 Il-fatt li nkunu segwaċi taʼ Kristu jfisser iktar milli sempliċement insejħu lilna nfusna Kristjani. Illum, madwar żewġ biljun ruħ jgħidu li huma Kristjani, imma l-azzjonijiet tagħhom juru li ‘jiksru l-liġi.’ (Aqra Mattew 7:21-23.) Meta xi wħud juru interess fl-istedina biex isegwu lil Ġesù, aħna nispjegawlhom li l-Kristjani veri jfasslu ħajjithom kollha skond it-tagħlim u l-eżempju tiegħu—u jagħmlu dan kull jum taʼ ħajjithom. Sabiex nagħtu eżempju dwar dan xi jfisser, ikkunsidra xi ftit mill-affarijiet li nafu dwar Ġesù.
Imita l-Eżempju taʼ l-Għerf taʼ Ġesù
7, 8. (a) X’inhu l-għerf, u Ġesù għala kellu abbundanza t’għerf? (b) Ġesù kif wera l-għerf, u aħna kif nistgħu nimitawh?
7 Ġesù wera ħafna kwalitajiet li jispikkaw fil-personalità tiegħu, imma aħna se niffokaw fuq erbgħa: l-għerf, l-umiltà, iż-żelu, u l-imħabba tiegħu. L-ewwel, ikkunsidra l-għerf tiegħu—l-abbiltà tiegħu li japplika l-għarfien u l-fehma b’mod prattiku. L-appostlu Pawlu kiteb: “[F’Ġesù] hemm moħbijin bil-għaqal it-teżori kollha taʼ l-għerf u taʼ l-għarfien.” (Kol. 2:3) Ġesù minfejn ġabu dan l-għerf? Hu nnifsu qal: “Dan ngħidu skond kif għallimni l-Missier.” (Ġw. 8:28) L-għerf tiegħu oriġina minn Ġeħova, u għalhekk m’aħniex sorpriżi li Ġesù kien raġunevoli.
8 Per eżempju, Ġesù uża l-għaqal meta għażel x’kien se jagħmel b’ħajtu. Hu ddeċieda li jżomm ħajtu sempliċi, billi jiffoka biss fuq ħaġa waħda: li jagħmel ir-rieda t’Alla. B’mod għaqli, hu ddedika l-ħin u l-enerġija tiegħu biex iġib ’il quddiem l-interessi tas-Saltna. Aħna nsegwu l-eżempju taʼ Ġesù billi nistinkaw biex inżommu ‘għajn sempliċi,’ u b’hekk nevitaw li ntaqqlu lilna nfusna b’affarijiet mhux neċessarji li jieħdu ħafna mill-enerġija u l-attenzjoni tagħna. (Mt. 6:22) Ħafna Kristjani ħadu passi biex jissimplifikaw ħajjithom ħalli jkunu jistgħu jiddedikaw iktar ħin għall-ministeru. Xi wħud setgħu jidħlu fis-servizz taʼ pijunier. Jekk int wieħed minn dawn ħaqqek prosit. Il-fatt li wieħed ‘ifittex l-ewwel is-saltna’ jġib hena u sodisfazzjon kbir.—Mt. 6:33.
Kun Umli Bħal Ġesù
9, 10. Ġesù kif wera l-umiltà tiegħu?
9 It-tieni aspett tal-personalità taʼ Ġesù li se nikkunsidraw hu l-umiltà tiegħu. Meta l-bnedmin imperfetti jingħataw l-awtorità, ħafna drabi jsiru minfuħin bihom infushom. Kemm kien differenti Ġesù! Minkejja l-irwol vitali li kellu fit-twettiq taʼ l-iskop taʼ Ġeħova, Ġesù kien ħieles minn saħansitra l-inqas traċċa taʼ suppervja. U aħna inkuraġġiti li nimitawh f’dan. L-appostlu Pawlu kiteb: “Żommu din l-attitudni mentali fikom li kienet ukoll fi Kristu Ġesù, li, għalkemm kien jeżisti fis-sura t’Alla, ma qagħadx jaħseb li għandu jaħtaf, jiġifieri, li għandu jkun ugwali m’Alla. Le, iżda xejjen lilu nnifsu u ħa s-sura taʼ lsir u sar jixbah lill-bnedmin.” (Flp. 2:5-7) Dan x’kien jinvolvi?
10 Ġesù kellu l-privileġġ glorjuż li jgħix fil-preżenza taʼ Missieru fis-sema, imma hu kien lest li ‘jxejjen lilu nnifsu.’ Ħajtu ġiet trasferita għal ġol-ġuf taʼ verġni Lhudija, biex hemmhekk jiżviluppa għal disaʼ xhur sakemm twieled bħala tarbija bla difiża fil-familja taʼ mastrudaxxa umli. F’dar Ġużeppi, Ġesù bil-mod il-mod beda jitfarfar, sar tfajjel, u mbagħad adoloxxenti. Hu kien bla dnub. Madankollu, matul żgħożitu hu baqaʼ sottomess lejn ġenituri li kienu midinbin imperfetti. (Lq. 2:51, 52) X’umiltà straordinarja!
11. B’liema modi nistgħu nimitaw l-umiltà taʼ Ġesù?
11 Aħna nimitaw l-umiltà taʼ Ġesù meta minn jeddna naċċettaw inkarigi li jistgħu jidhru umiljanti. Per eżempju, ikkunsidra l-inkarigu li nippridkaw l-aħbar tajba. Dan ix-xogħol għandu mnejn jidher umiljanti, speċjalment meta n-nies juru apatija, jirridikolawna, jew jopponuna. Madankollu, billi nippersistu fix-xogħol taʼ l-ippridkar, aħna ngħinu lil oħrajn iwieġbu għall-istedina taʼ Ġesù biex isegwuh. B’hekk, ngħinu biex insalvaw il-ħajjiet. (Aqra t-2 Timotju 4:1-5.) Eżempju ieħor hu x-xogħol taʼ manutenzjoni fis-Sala tas-Saltna tagħna. Dan jistaʼ jinvolvi li niżvojtaw il-bramel taʼ l-iskart, naħslu l-art, u nnaddfu t-tojlits—kollha huma xogħlijiet umiljanti! Xorta waħda, aħna nirrikonoxxu li l-manutenzjoni tas-Sala tas-Saltna tagħna—iċ-ċentru taʼ qima pura fil-lokalità—hi parti mis-servizz sagru tagħna. Billi minn jeddna nagħmlu xogħlijiet li jistgħu jidhru umiljanti, aħna nuru l-umiltà, u b’hekk insegwu l-passi taʼ Kristu.
Kun Żeluż Bħal Ġesù
12, 13. (a) Ġesù kif wera żelu, u x’kien dak li mmotivah? (b) X’se jimmotivana biex inkunu żelużi fil-ministeru?
12 Ikkunsidra ż-żelu taʼ Ġesù fil-ministeru. Ġesù għamel ħafna affarijiet meta kien fuq l-art. Fi tfulitu, hu x’aktarx li ħadem bħala mastrudaxxa maʼ missieru tar-rispett Ġużeppi. Matul il-ministeru tiegħu, Ġesù wettaq il-mirakli, inkluż li jfejjaq lill-morda u jqajjem lill-mejtin. Imma x-xogħol prinċipali tiegħu kien li jippriedka l-aħbar tajba u jgħallem lil dawk li riedu jisimgħu. (Mt. 4:23) Bħala s-segwaċi tiegħu, aħna għandna l-istess xogħol x’nagħmlu. Kif nistgħu nsegwu l-eżempju tiegħu? Mod wieħed hu billi nikkultivaw motivi bħal dawk taʼ Ġesù.
13 Fuq kollox, l-imħabba għal Alla mmotivat lil Ġesù biex jippriedka u jgħallem. Imma Ġesù kien ukoll iħobb il-veritajiet li kien jgħallem. Għalih, dawn il-veritajiet kienu teżori taʼ valur kbir, u kien ħerqan li jaqsamhom m’oħrajn. Aħna bħala għalliema, jew bħala wħud ‘li ngħallmu fil-pubbliku,’ inħossuna bħalu. Aħseb dwar ftit mill-veritajiet prezzjużi li tgħallimna mill-Kelma t’Alla! Aħna nafu dwar il-kwistjoni tas-sovranità universali u kif se tiġi solvuta. Nifhmu sewwa x’tgħallem l-Iskrittura dwar il-kundizzjoni tal-mejtin u l-barkiet li ġejjin fid-dinja l-ġdida t’Alla. Kemm jekk tgħallimna dawn il-veritajiet dan l-aħħar u kemm jekk żmien twil ilu, il-valur tagħhom qatt ma jonqos. Kemm jekk ġodda u kemm jekk qodma, dawn il-veritajiet huma tabilħaqq teżori taʼ valur kbir. (Aqra Mattew 13:52.) Billi nippridkaw b’entużjażmu mill-qalb, lil oħrajn ngħaddulhom l-imħabba tagħna għal dak li għallimna Ġeħova.
14. Kif nistgħu nimitaw lil Ġesù fil-mod kif kien jgħallem?
14 Innota wkoll kif għallem Ġesù. Hu kien dejjem jidderieġi lis-semmiegħa tiegħu lejn l-Iskrittura. Hu spiss kien jintroduċi xi punt importanti billi jgħid: “Hu miktub.” (Mt. 4:4; 21:13) Fil-kliem tiegħu li nsibu dokumentat, hu kkwota direttament minn iktar minn nofs il-kotba taʼ l-Iskrittura Ebrajka jew inkella rrefera indirettament għalihom. Bħal Ġesù, aħna dejjem nistrieħu fuq il-Bibbja fil-ministeru tagħna u nistinkaw biex nużaw l-Iskrittura kulmeta jkun possibbli. B’dan il-mod, aħna ngħinu lil uħud li għandhom attitudni xierqa biex jaraw għalihom infushom li aħna qed ngħallmu l-ħsibijiet t’Alla, mhux tagħna nfusna. Kemm nieħdu gost meta xi ħadd jaċċetta li jaqra mill-Bibbja u jiddiskuti magħna l-valur u t-tifsir tal-Kelma t’Alla! U meta wħud bħal dawn jaċċettaw l-istedina biex isegwu lil Ġesù, il-ferħ tagħna jkun bla tarf.
Li Nsegwu lil Ġesù Jfisser li Nħobbu lil Oħrajn
15. Liema kwalità kienet tispikka f’Ġesù, u jekk nirriflettu fuqha kif nistgħu niġu effettwati?
15 L-aħħar aspett tal-personalità taʼ Ġesù li se niddiskutu hu l-iktar wieħed li jqawwilna qalbna—l-imħabba tiegħu għall-umanità. L-appostlu Pawlu kiteb: “L-imħabba li għandu l-Kristu ġġegħelna.” (2 Kor. 5:14) Meta nimmeditaw dwar l-imħabba li għandu Ġesù għall-umanità in ġenerali u għalina bħala individwi, qalbna titqanqal u nħossuna mġegħlin insegwu l-eżempju tiegħu.
16, 17. Ġesù b’liema modi wera mħabbtu għal oħrajn?
16 Ġesù kif wera mħabba għal oħrajn? Il-fatt li kien lest li jagħti ruħu għall-umanità kien l-aqwa espressjoni taʼ mħabbtu. (Ġw. 15:13) Madankollu, matul il-ministeru tiegħu, Ġesù wera wkoll imħabbtu b’modi oħrajn. Per eżempju, hu kien iħoss għal dawk li kienu qed ibatu. Meta ra lil Marija u lil dawk li kienu magħha jibku minħabba l-mewt taʼ Lazzru, hu ħassu mqanqal ħafna minħabba n-niket tagħhom. Għalkemm dalwaqt kien se jirxoxta lil Lazzru, Ġesù tant tqanqal li “qabiżlu d-dmugħ.”—Ġw. 11:32-35.
17 Fil-bidu tal-ministeru taʼ Ġesù, raġel imġiddem avviċina lil Ġesù u qallu: “Jekk trid, tistaʼ tnaddafni.” Ġesù kif wieġbu? Ir-rakkont jgħid: “Ħassu mqanqal u tħassru.” Imbagħad għamel xi ħaġa straordinarja. “Ħareġ idu, messu, u qallu: ‘Irrid. Indaf.’ U minnufih il-ġdiem għab minn fuqu, u ndaf.” Skond il-Liġi Mosajka, l-imġiddmin ma kinux nodfa, u Ġesù żgur li kien kapaċi jfejjaq lil dan ir-raġel mingħajr kuntatt fiżiku. Madankollu, hekk kif Ġesù fejjaq lill-imġiddem, hu ħallieh iħoss bniedem ieħor imissu, forsi għall-ewwel darba fi snin sħaħ. X’ġest teneru taʼ mogħdrija!—Mk. 1:40-42.
18. Kif nistgħu nuru li ‘nħossu għal xulxin’?
18 Bħala segwaċi taʼ Kristu, ġejna kmandati biex nuru mħabbitna billi ‘nħossu għal xulxin.’ (1 Pt. 3:8) Jistaʼ ma jkunx faċli li nifhmu xi jkun qed iħoss seħibna fit-twemmin li jkun qed ibati minn marda kronika jew dipressjoni qawwija—speċjalment jekk qatt m’esperjenzajna affarijiet bħal dawn aħna stess. Xorta waħda, Ġesù wera empatija mal-morda avolja hu stess qatt ma marad. Kif nistgħu nikkultivaw empatija simili? Billi nisimgħu bil-paċenzja hekk kif dawk li jkunu qed ibatu jiftħu qalbhom magħna. Nistgħu wkoll nistaqsu lilna nfusna, ‘Kieku kont fis-sitwazzjoni tagħhom, kif kont inħossni?’ Jekk nitgħallmu nkunu iktar sensittivi għas-sentimenti t’oħrajn, se nkunu nistgħu iktar ‘nikkonslaw lid-dipressi.’ (1 Tess. 5:14) B’hekk, inkunu qed insegwu lil Ġesù.
19. B’liema modi aħna effettwati mill-eżempju taʼ Ġesù?
19 X’qasam taʼ studju kommoventi nsibu fil-kliem u l-għemejjel taʼ Ġesù Kristu! Iktar ma nitgħallmu dwaru, iktar inkunu rridu nkunu bħalu—u iktar inkunu rridu ngħinu lil oħrajn jagħmlu l-istess. Mela, ejja nagħmlu kulma nistgħu u nsibu l-għaxqa tagħna f’li nsegwu lis-Sultan Messjaniku—issa u għal dejjem!
Tistaʼ Tispjega?
• Kif nistgħu nuru l-għerf, bħalma wrieh Ġesù?
• B’liema modi nistgħu nuru l-umiltà?
• Kif nistgħu nikkultivaw żelu għall-ministeru?
• B’liema modi nistgħu nimitaw lil Ġesù f’li nuru mħabba għal oħrajn?
[Mistoqsijiet taʼ Studju]
[Kaxxa/Stampa f’paġna 5]
PUBBLIKAZZJONI LI TGĦINNA NIMITAW LIL KRISTU
Matul il-programm tal-konvenzjoni distrettwali taʼ l-2007, inħareġ ktieb taʼ 192 paġna bl-Ingliż intitolat “Come Be My Follower” (“Ejja Kun Segwaċi Tiegħi”). Din il-pubblikazzjoni hi disinjata biex tgħin lill-Kristjani jiffokaw fuq Ġesù, speċjalment fuq il-kwalitajiet u l-azzjonijiet tiegħu. Wara żewġ kapitli taʼ introduzzjoni, l-ewwel sezzjoni tipprovdi ġabra fil-qosor tal-kwalitajiet li jispikkaw taʼ Ġesù—l-umiltà, il-kuraġġ, l-għerf, l-ubbidjenza, u s-sabar tiegħu.
Wara dan, hemm sezzjonijiet li jitkellmu dwar l-attivitajiet taʼ Ġesù bħala għalliem u predikatur taʼ l-aħbar tajba u dwar xi modi kif intweriet l-imħabba kbira tiegħu. Matul il-ktieb, l-informazzjoni hi preżentata biex tgħin lil Kristjan jimita lil Ġesù.
Aħna fiduċjużi li din il-pubblikazzjoni se tqanqal lil kull wieħed minna biex jeżamina lilu nnifsu u jistaqsi: ‘Qiegħed jien verament insegwi lil Ġesù? Kif nistaʼ nsegwih iktar mill-qrib?’ Se tgħin ukoll lil “dawk kollha li [għandhom] attitudni xierqa lejn il-ħajja taʼ dejjem” isiru segwaċi taʼ Kristu.—Atti 13:48.
[Stampa f’paġna 4]
Ġesù aċċetta li jiġi fuq l-art u jitwieled bħala tarbija umana. Dan liema kwalità kien jirrikjedi?
[Stampa f’paġna 6]
X’se jimmotivana biex inkunu żelużi fil-ministeru?