Sib il-Ferħ fix-Xogħol taʼ li Tagħmel Dixxipli
“Għalhekk, morru u agħmlu dixxipli.”—MT. 28:19.
1-3. (a) Ħafna kif iħossuhom dwar l-opportunità li jikkonduċu studji tal-Bibbja? (b) Liema mistoqsijiet se nikkunsidraw?
“I LNI nistudja maʼ familja mill-Pakistan għal dawn l-aħħar 11-il ġimgħa,” kitbet oħt li qed taqdi fi grupp tal-Ħindi fl-Istati Uniti. “M’għandniex xi ngħidu,” kompliet tgħid hi, “aħna sirna ħbieb. Jaqbiżli d-dmugħ meta naħseb dwar din il-familja li dalwaqt se titlaq lura l-Pakistan. U nibki mhux biss għax jiddispjaċini li se nitlef il-kumpanija tagħhom imma wkoll minħabba l-ferħ li esperjenzajt waqt li kont qed ngħallimhom dwar Ġeħova.”
2 Qatt esperjenzajt int, bħal din l-oħt, il-ferħ li jiġi milli tistudja l-Bibbja maʼ xi ħadd? Ġesù u d-dixxipli tiegħu taʼ l-ewwel seklu sabu ferħ kbir fix-xogħol taʼ li jagħmlu dixxipli. Meta s-70 dixxiplu li Ġesù kien ħarreġ ġew lura ferħanin bir-rapport tagħhom, Ġesù nnifsu “ħass ferħ kbir bl-ispirtu qaddis.” (Lq. 10:17-21) B’mod simili, ħafna llum isibu ferħ kbir f’li jagħmlu dixxipli. Fil-fatt, fl-2007, xi pubblikaturi henjin li jaħdmu iebes ikkonduċew madwar sitt miljun u nofs studju tal-Bibbja kull xahar.
3 Iżda, xi pubblikaturi s’issa għad ma kellhomx l-opportunità li jikkonduċu studju tal-Bibbja. Oħrajn forsi ma kinux qed jikkonduċu wieħed fis-snin reċenti. Liema sfidi nistgħu niffaċċjaw hekk kif nistinkaw biex nikkonduċu studju tal-Bibbja? Kif nistgħu negħlbu dawn l-isfidi? U liema premjijiet nirċievu meta nagħmlu dak kollu li nistgħu sabiex nobdu l-kmand taʼ Ġesù: “Għalhekk, morru u agħmlu dixxipli”?—Mt. 28:19.
Sfidi li Jistgħu Jisirqulna l-Ferħ
4, 5. (a) Ħafna nies kif jirreaġixxu f’ċerti partijiet tad-dinja? (b) Liema sfidi jiffaċċjaw xi pubblikaturi f’postijiet oħrajn?
4 F’xi partijiet tad-dinja, in-nies jaċċettaw bil-qalb il-letteratura tagħna u huma ħerqanin li jibdew jistudjaw il-Bibbja magħna. Koppja mill-Awstralja li kienu qed jaqdu temporanjament fiz-Zambja kitbu: “L-istejjer huma veri. Iz-Zambja hija ġenna għall-ippridkar. L-għoti taʼ xiehda fit-toroq huwa inkredibbli! In-nies javviċinawna, u xi wħud saħansitra jistaqsu għal ħarġiet partikulari tar-rivisti.” Fl-2007, l-aħwa fiz-Zambja kkonduċew iktar minn 200,000 studju tal-Bibbja—jiġifieri, bħala medja, iktar minn studju tal-Bibbja wieħed kull pubblikatur.
5 Madankollu, f’postijiet oħrajn, il-pubblikaturi jistgħu jsibuha diffiċli biex iħallu l-letteratura u biex jikkonduċu studji tal-Bibbja regulari. Għala? Spiss, in-nies ma jkunux id-dar meta pubblikatur iħabbtilhom il-bieb, filwaqt li oħrajn li jkunu d-dar għandhom mnejn juru apatija lejn ir-reliġjon. Huma għandhom mnejn ikunu trabbew f’familja li ma tipprattika l-ebda reliġjon jew forsi jħossuhom hekk minħabba li jistmerru l-ipokrisija li hija evidenti fir-reliġjon falza. Ħafna nies ġew feruti spiritwalment, maltrattati u mferrxin minn rgħajja foloz. (Mt. 9:36) Tistaʼ tifhem għala wħud bħal dawn għandhom mnejn joqogħdu attenti li ma jinvolvux ruħhom f’diskussjonijiet dwar il-Bibbja.
6. Xi wħud maʼ liema limitazzjonijiet għandhom mnejn jitqabdu?
6 Xi pubblikaturi leali jiffaċċjaw sfida differenti li tistaʼ tisirqilhom il-ferħ. Għalkemm xi darba huma kienu attivi ħafna fix-xogħol taʼ li jagħmlu dixxipli, illum il-ġurnata huma dgħajfin minħabba saħħa batuta jew minħabba l-limitazzjonijiet t’età avanzata. Ikkunsidra wkoll xi limitazzjonijiet li għandna mnejn nimponu fuqna nfusna. Per eżempju, tħossok int li m’intix kwalifikat biex tikkonduċi studju tal-Bibbja? Għandek mnejn tħossok bħalma ħassu Mosè meta Ġeħova inkarigah biex jitkellem mal-Fargħun. Mosè qal: “Skużani, Ġeħova, imma jien m’iniex kelliemi tajjeb, la mill-bieraħ, [u lanqas] minn qabel il-bieraħ.” (Eżo. 4:10) Il-biżaʼ mill-falliment jistaʼ jkun konness mill-qrib mal-fatt li ma tħossokx kapaċi. Forsi noqogħdu ninkwetaw li individwu mhux se jsir dixxiplu minħabba li m’aħniex għalliema perfetti. Sabiex ma ngħaddux minn din l-esperjenza, għandna mnejn nitilfu l-opportunità li nikkonduċu studju. Kif nistgħu nittrattaw l-isfidi li għadna kif semmejna?
Ħejji Qalbek
7. Xi mmotiva lil Ġesù fil-ministeru tiegħu?
7 L-ewwel pass hu li nħejju qalbna stess. Ġesù qal: ‘Mill-abbundanza li [ikun hemm] fil-qalb jitkellem il-fomm.’ (Lq. 6:45) Fil-ministeru tiegħu, Ġesù kien motivat mill-interess sinċier li kellu għall-benesseri t’oħrajn. Per eżempju, meta osserva l-kundizzjoni spiritwali fqira tal-Lhud sħabu, hu “tħassarhom.” Hu qal lid-dixxipli tiegħu: “Il-ħsad hu kbir . . . Itolbu bil-ħrara lil Sid il-ħsad biex jibgħat il-ħaddiema fil-ħsad tiegħu.”—Mt. 9:36-38.
8. (a) Dwar xiex nagħmlu tajjeb li naħsbu? (b) X’nistgħu nitgħallmu mill-kummenti taʼ studenta tal-Bibbja?
8 Hekk kif nieħdu sehem fix-xogħol taʼ li nagħmlu dixxipli, nagħmlu tajjeb li naħsbu bis-serjetà dwar kemm ibbenefikajna minħabba li xi ħadd ħa l-ħin biex jistudja l-Bibbja magħna. Aħseb ukoll dwar in-nies li se niltaqgħu magħhom fil-ministeru u dwar kif se jibbenefikaw meta jisimgħu l-messaġġ li nxandru. Waħda mara kitbet lill-uffiċċju tal-fergħa tal-pajjiż fejn toqgħod: “Nixtieq ngħidilkom kemm napprezza lix-Xhieda li jgħallmuni f’dari. Naf li kultant forsi jħossuhom frustrati minħabba fija peress li għandi ħafna mistoqsijiet u dejjem inżommhom wara l-ħin. Imma huma paċenzjużi miegħi u ħerqanin biex jaqsmu dak li tgħallmu. Nirringrazzja lil Ġeħova u lil Ġesù li dawn in-nies daħlu f’ħajti.”
9. Ġesù fuq xiex iffoka, u kif nistgħu nimitawh?
9 M’għandniex xi ngħidu, mhux kulħadd wieġeb b’mod favorevoli għall-isforzi taʼ Ġesù biex jgħinhom. (Mt. 23:37) Xi wħud segwewh għal xi żmien imma mbagħad oġġezzjonaw għat-tagħlim tiegħu u “ma baqgħux mexjin warajh.” (Ġw. 6:66) Madankollu, Ġesù ma ħalliex il-fatt li xi wħud ma wiġbux b’mod favorevoli jġiegħlu jħossu li l-messaġġ tiegħu ma kellux valur. Għalkemm ħafna miż-żerriegħa li żeraʼ ma tatx frott, Ġesù ffoka fuq il-ġid li kien qed jagħmel. Hu ra li l-għelieqi kienu bojod għall-ħsad u kiseb ferħ kbir minħabba li għen f’dak il-ħsad. (Aqra Ġwanni 4:35, 36.) Minflok ma naraw l-art vojta bejn l-isbul tal-qamħ, nistgħu aħna bl-istess mod niffokaw fuq il-ħsad li jistaʼ jkun hemm fit-territorju assenjat lilna? Ejja neżaminaw kif nistgħu nżommu attitudni pożittiva bħal din.
Iżraʼ bl-Iskop li Taħsad
10, 11. X’tistaʼ tagħmel sabiex tibqaʼ żżomm il-ferħ?
10 Bidwi jiżraʼ ż-żerriegħa bl-iskop li jaħsad il-ħsad. Bl-istess mod, aħna nippridkaw bl-iskop li nibdew studji tal-Bibbja. Imma xi ngħidu jekk tqattaʼ ħin regulari fil-ministeru taʼ l-għalqa imma ssib ftit nies id-dar jew ikun jidher li ma tkunx tistaʼ terġaʼ tikkuntattja liż-żjajjar lura li jkollok? Dan jistaʼ jkun frustranti. Għandek int taqtaʼ qalbek mill-ministeru minn bieb għal bieb? Dażgur li le! Ħafna nies għadhom qed jiġu kuntattjati l-ewwel permezz taʼ dan il-metodu taʼ ppridkar li ilu jintuża għal ħafna żmien.
11 Madankollu, sabiex iżżomm il-ferħ, tistaʼ int iżżid metodi oħrajn taʼ ppridkar, forsi billi tinkludi modi oħrajn taʼ kif tilħaq lin-nies? Per eżempju, ipprovajt int tagħti xiehda lin-nies fit-toroq jew fil-post tax-xogħol tagħhom? Tistaʼ tikkuntattja lin-nies bit-telefon jew tikseb in-numru tat-telefon taʼ dawk li diġà qsamt magħhom il-messaġġ tas-Saltna sabiex tkun tistaʼ żżomm kuntatt magħhom? Billi turi perseveranza u tkun taf tadatta ruħek fil-ministeru tiegħek, int se tesperjenza l-ferħ li jiġi meta ssib individwi li jwieġbu b’mod favorevoli għall-messaġġ tas-Saltna.
Inkampaw maʼ l-Apatija
12. X’nistgħu nagħmlu jekk ħafna fit-territorju tagħna huma apatetiċi?
12 Xi ngħidu jekk fit-territorju tiegħek ħafna juru apatija lejn ir-reliġjon? Tistaʼ int tadatta l-mod kif tavviċina lin-nies sabiex tqanqlilhom l-interess? L-appostlu Pawlu kiteb lil sħabu fit-twemmin f’Korintu: “Għal-Lhud sirt bħal Lhudi . . . Għal dawk mingħajr liġi sirt bħal wieħed mingħajr liġi, għalkemm m’iniex mingħajr il-liġi t’Alla.” X’kien il-motiv taʼ Pawlu? “Sirt kollox għal nies taʼ kull xorta,” qal hu, “biex b’kull mezz insalva lil xi wħud.” (1 Kor. 9:20-22) Nistgħu aħna bl-istess mod insibu suġġetti li jolqtu lil dawk fit-territorju tagħna? Ħafna nies li m’humiex interessati fir-reliġjon jixtiequ jtejbu l-kwalità tar-relazzjonijiet tal-familja tagħhom. Għandhom mnejn ikunu wkoll qed ifittxu skop fil-ħajja. Nistgħu aħna nippreżentaw il-messaġġ tas-Saltna lil nies bħal dawn b’mod li jiġbidhom?
13, 14. Kif nistgħu nżidu l-ferħ li niksbu mix-xogħol taʼ li nagħmlu dixxipli?
13 Iktar u iktar pubblikaturi żiedu l-ferħ li jiksbu mix-xogħol taʼ li jagħmlu dixxipli, anki fi nħawi fejn il-maġġuranza tan-nies jidhru li huma apatetiċi. Kif? Billi tgħallmu lingwa barranija. Koppja li għandhom ’il fuq minn 60 sena rrealizzaw li eluf taʼ studenti Ċiniżi u l-familji tagħhom kienu qed jgħixu fit-territorju assenjat lill-kongregazzjoni tagħhom. “Minħabba dan, aħna konna inkuraġġiti nitgħallmu l-lingwa Ċiniża,” jgħid ir-raġel. “Għalkemm dan kien ifisser li kellna nqattgħu ħin kuljum nistudjaw il-lingwa,” ikompli jgħid hu, “konna ferħanin għax dan irriżulta f’ħafna studji tal-Bibbja maʼ Ċiniżi fl-inħawi tagħna.”
14 Anki jekk ma tistax titgħallem lingwa barranija, tistaʼ tagħmel użu tajjeb mill-ktejjeb Good News for People of All Nations meta tiltaqaʼ maʼ dawk li jitkellmu lingwa oħra. Ġeneralment tistaʼ tikseb ukoll letteratura bil-lingwa tan-nies li tiltaqaʼ magħhom. M’għandniex xi ngħidu, jirrikjedi iktar ħin u sforz biex tikkomunika maʼ dawk li għandhom lingwa u kultura differenti. Imma tinjorax il-prinċipju misjub fil-Kelma t’Alla: “Min jiżraʼ bil-kotra jaħsad ukoll bil-kotra.”—2 Kor. 9:6.
Il-Kongregazzjoni Kollha Hija Involuta
15, 16. (a) Ix-xogħol taʼ li nagħmlu dixxipli għala jinvolvi l-isforz tal-kongregazzjoni kollha? (b) Liema rwol għandhom dawk li huma mdaħħlin fiż-żmien?
15 Tabilħaqq, li nagħmlu dixxipli ma jiddependix mill-isforzi taʼ individwu wieħed biss. Minflok, jiddependi mill-isforz tal-kongregazzjoni kollha. Għala? Ġesù qal: “B’dan ikun jaf kulħadd li intom dixxipli tiegħi, jekk ikollkom l-imħabba bejnietkom.” (Ġw. 13:35) U tabilħaqq, meta l-istudenti tal-Bibbja jattendu l-laqgħat, huma spiss jiġu impressjonati bl-atmosfera kollha mħabba fil-laqgħat tagħna. Studenta tal-Bibbja kitbet: “Vera nieħu pjaċir nattendi l-laqgħat. In-nies verament ġegħluni nħossni milqugħa!” Ġesù qal li dawk li jsiru segwaċi tiegħu għandhom mnejn ikollhom oppożizzjoni mill-familja letterali tagħhom. (Aqra Mattew 10:35-37.) Madankollu, hu wiegħed li fil-kongregazzjoni huma kienu se jiksbu għadd t’“aħwa subien u aħwa bniet u ommijiet u tfal” spiritwali.—Mk. 10:30.
16 Ħutna mdaħħlin fiż-żmien b’mod speċjali għandhom irwol vitali li jgħinu lill-istudenti tal-Bibbja jagħmlu progress. B’liema mod? Anki jekk xi ftit minn dawn l-uħud imdaħħlin fiż-żmien ma jkunux jistgħu jikkonduċu studji tal-Bibbja huma stess, il-kummenti inkuraġġanti tagħhom fil-laqgħat tal-kongregazzjoni jsaħħu l-fidi taʼ dawk kollha li jisimgħuhom. Il-fatt li ilhom jimxu “fit-triq tas-sewwa” jżid mas-sbuħija tal-kongregazzjoni u jiġbed lil dawk taʼ qalb onesta lejn l-organizzazzjoni t’Alla.—Prov. 16:31.
Negħlbu l-Biżaʼ Tagħna
17. X’nistgħu nagħmlu sabiex ma nħossuniex li m’aħniex kapaċi nikkonduċu studju tal-Bibbja?
17 X’tistaʼ tagħmel jekk ma tħossokx kapaċi tikkonduċi studju tal-Bibbja? Ftakar li Ġeħova għen lil Mosè billi pprovdielu l-ispirtu qaddis u sieħeb, ħuh Aron. (Eżo. 4:10-17) Ġesù wiegħed li l-ispirtu t’Alla kien se jappoġġa x-xogħol taʼ l-ippridkar tagħna. (Atti 1:8) Barra minn hekk, Ġesù bagħat ħaddiema biex jippridkaw tnejn tnejn. (Lq. 10:1) Għalhekk, jekk tħossha sfida biex tikkonduċi studju tal-Bibbja, itlob għall-ispirtu t’Alla biex jagħtik l-għerf u mbagħad sib lil xi ħadd biex jakkumpanjak fl-ippridkar li jistaʼ jgħinek ikollok fiduċja fik innifsek u li l-esperjenza tiegħu tistaʼ tgħinek. Il-fidi tiegħek se tissaħħaħ jekk tiftakar li Ġeħova għażel li juża nies komuni—“lid-dgħajfin tad-dinja”—biex iwettqu dan ix-xogħol straordinarju.—1 Kor. 1:26-29.
18. Kif nistgħu negħlbu l-biżaʼ mill-falliment?
18 Kif nistgħu negħlbu l-biżaʼ mill-falliment? Ikun tajjeb li niftakru li biex tagħmel dixxiplu m’huwiex bħal meta tipprepara xi ikla li s-suċċess jew il-falliment tagħha jiddependi primarjament minn individwu wieħed—il-kok. Minflok, li tagħmel dixxiplu jinvolvi minn taʼ l-inqas tliet individwi. Ġeħova jagħmel l-iktar parti importanti, jiġifieri, jiġbed lill-individwu lejh. (Ġw. 6:44) Aħna u oħrajn fil-kongregazzjoni nagħmlu l-aħjar tagħna biex nużaw l-arti tat-tagħlim sabiex ngħinu lill-istudent jagħmel progress. (Aqra t-2 Timotju 2:15.) U l-istudent irid jaġixxi fuq dak li jitgħallem. (Mt. 7:24-27) Jistaʼ jkun taʼ diżappunt jekk individwu ma jibqax jistudja l-Bibbja. Aħna nittamaw li l-istudenti tal-Bibbja jagħmlu l-aħjar għażla, imma kull individwu jrid “jagħti kont tiegħu nnifsu lil Alla.”—Rum. 14:12.
X’Inhuma l-Premjijiet?
19-21. (a) X’benefiċċji nirċievu meta nikkonduċu studji tal-Bibbja? (b) Ġeħova kif iqis lil dawk kollha li jieħdu sehem fix-xogħol taʼ l-ippridkar?
19 Meta nikkonduċu studji tal-Bibbja niġu megħjunin nibqgħu ffokati fuq li nfittxu l-ewwel is-Saltna. Ukoll niġu megħjunin biex innaqqxu l-veritajiet tal-Kelma t’Alla iktar fil-fond f’moħħna u f’qalbna. Għala? Pijunier li jismu Barak jispjega: “Meta tikkonduċi studju tal-Bibbja jkollok tkun student aħjar tal-Kelma t’Alla. Jien insib li rrid insaħħaħ il-konvinzjonijiet persunali tiegħi qabel ma nkun nistaʼ ngħallem sew lil ħaddieħor.”
20 Jekk m’intix qed tikkonduċi studju tal-Bibbja, ifisser li s-servizz tiegħek m’għandux valur f’għajnejn Alla? Dażgur li le! Ġeħova japprezza ħafna l-isforzi tagħna biex infaħħruh. Dawk kollha li jieħdu sehem fix-xogħol taʼ l-ippridkar huma “ħaddiema sħab m’Alla.” Madankollu, li nikkonduċu studju tal-Bibbja jżidilna l-ferħ hekk kif naraw li Alla jkabbar iż-żerriegħa li nkunu żrajna. (1 Kor. 3:6, 9) “Meta tara student jagħmel progress,” tgħid pijuniera jisimha Amy, “tħoss sens kbir taʼ gratitudni lejn Ġeħova talli ħalliek tintuża biex tagħti lil dak l-individwu rigal taʼ l-għaġeb—l-opportunità li jsir jaf lil Ġeħova u li jirċievi l-ħajja taʼ dejjem.”
21 Jekk nagħmlu l-aħjar tagħna biex nibdew u nikkonduċu studji tal-Bibbja se niġu megħjunin nibqgħu ffokati fuq li naqdu lil Alla issa u nsaħħu t-tama tagħna li nsalvaw għal ġod-dinja l-ġdida. Bl-appoġġ taʼ Ġeħova, aħna għandna mnejn ukoll ngħinu lil dawk li jisimgħuna biex isalvaw. (Aqra l-1 Timotju 4:16.) Kemm ikollna għalfejn nifirħu!
Tiktakar Int?
• Liema sfidi għandhom mnejn iżommu lil xi wħud milli jikkonduċu studji tal-Bibbja?
• X’nistgħu nagħmlu jekk ħafna fit-territorju tagħna jidhru li huma apatetiċi?
• Liema premjijiet nirċievu meta nikkonduċu studju tal-Bibbja?
[Mistoqsijiet taʼ Studju]
[Stampi f’paġna 9]
Iżżid int metodi oħrajn taʼ ppridkar sabiex tkun tistaʼ ssib individwi taʼ qalb onesta?