Ħalli Kliem Ġesù Jeffettwa l-Attitudni Tiegħek
“Dak li ntbagħat minn Alla jgħid il-kliem t’Alla.”—ĠW. 3:34.
1, 2. Kliem Ġesù fil-Priedka taʼ fuq il-Muntanja maʼ xiex jistaʼ jiġi mxebbah, u għala nistgħu ngħidu li kien ibbażat fuq “il-kliem t’Alla”?
WIEĦED mill-akbar djamanti maqtugħin u magħrufin illum hu l-Istilla taʼ l-Afrika li tiżen 530 karat. Din hi verament ħaġra prezzjuża! Madankollu, ferm iktar taʼ valur hu l-ħaġar prezzjuż spiritwali li jinsab fil-Priedka taʼ fuq il-Muntanja li ta Ġesù. Dan m’għandux għalfejn jissorprendina, għax is-Sors tal-kliem taʼ Kristu hu Ġeħova! Filwaqt li tirreferi għal Ġesù, il-Bibbja tgħid: “Dak li ntbagħat minn Alla jgħid il-kliem t’Alla.”—Ġw. 3:34-36.
2 Għalkemm il-Priedka taʼ fuq il-Muntanja forsi ngħatat f’inqas minn nofs siegħa, kien fiha 21 kwotazzjoni minn tmien kotba taʼ l-Iskrittura Ebrajka. Għalhekk, kienet ibbażata b’mod sod fuq “il-kliem t’Alla.” Ejja issa naraw kif nistgħu napplikaw ftit mill-ħafna kliem imprezzabbli li jinsab f’din il-priedka li l-Iben maħbub t’Alla ta b’sengħa kbira.
“L-Ewwel Agħmel Paċi maʼ Ħuk”
3. Wara li wissa lid-dixxipli tiegħu dwar l-effetti tal-korla, Ġesù liema parir ta?
3 Bħala Kristjani, aħna henjin u nġibu l-paċi għaliex għandna l-ispirtu qaddis t’Alla, u l-frott tiegħu jinkludi l-ferħ u l-paċi. (Gal. 5:22, 23) Ġesù ma riedx li d-dixxipli tiegħu jitilfu l-paċi u l-hena tagħhom, u għalhekk wissiehom dwar l-effetti li jġibu l-mewt meta xi ħadd jibqaʼ inkorlat għal żmien twil. (Aqra Mattew 5:21, 22.) Hu mbagħad iddikjara: “Allura, jekk waqt li tkun qed iġġib l-għotja tiegħek lejn l-artal tiftakar li ħuk għandu xi ħaġa kontrik, itlaq l-għotja tiegħek hemmhekk quddiem l-artal, u mur l-ewwel agħmel paċi maʼ ħuk, u mbagħad, meta tkun ġejt lura, offri l-għotja tiegħek.”—Mt. 5:23, 24.
4, 5. (a) X’kienet l-“għotja” li saret referenza għaliha fl-istqarrija taʼ Ġesù dokumentata f’Mattew 5:23, 24? (b) Kemm hu importanti li tagħmel paċi maʼ ħu li ġie offiż?
4 L-“għotja” li semma Ġesù kienet kwalunkwe offerta preżentata fit-tempju f’Ġerusalemm. Per eżempju, is-sagrifiċċji taʼ l-annimali kienu importanti għaliex dak iż-żmien kienu parti mill-qima mogħtija lil Ġeħova mill-poplu tiegħu. Madankollu, Ġesù enfasizza xi ħaġa taʼ importanza akbar—li wieħed jagħmel paċi maʼ ħu li ġie offiż qabel ma joffri għotja lil Alla.
5 Il-frażi “agħmel paċi” tfisser ‘li tasal għal rikonċiljazzjoni.’ Għalhekk, liema lezzjoni nistgħu nieħdu minn dan il-kliem taʼ Ġesù? Żgur li l-lezzjoni hi li l-mod kif nittrattaw maʼ l-oħrajn jeffettwa direttament ir-relazzjoni tagħna maʼ Ġeħova. (1 Ġw. 4:20) Tabilħaqq, offerti magħmulin lil Alla fil-qedem ma kienu jfissru xejn jekk dak li kien jagħmilhom ma kienx jittratta lill-bnedmin sħabu kif jixraq.—Aqra Mikea 6:6-8.
L-Umiltà Hi Meħtieġa
6, 7. L-umiltà għala hi meħtieġa meta nagħmlu ħilitna kollha biex jerġaʼ jkollna relazzjonijiet paċifiċi maʼ ħu li nkunu offendejnieh?
6 Il-fatt li nagħmlu paċi maʼ ħu li ġie offiż x’aktarx li juri jekk aħniex umli. Nies umli ma jargumentawx jew iħaqquha maʼ sħabhom fit-twemmin fi sforz biex jistabbilixxu xi drittijiet li jistaʼ jkollhom. Dan kieku joħloq sitwazzjoni li xejn m’hi xierqa—waħda bħal dik li darba kienet teżisti fost il-Kristjani f’Korintu tal-qedem. Dwar din is-sitwazzjoni, l-appostlu Pawlu għamel dan il-punt li jqanqal il-ħsieb: “Dan ifisser telfa sħiħa għalikom li qed tiftħu kawżi l-qorti kontra xulxin. Minflok għax ma tħallux min jonqoskom? Għax ma tħallux min jimbroljakom?”—1 Kor. 6:7.
7 Ġesù ma qalx li għandna mmorru għand ħuna sempliċement biex nikkonvinċuh li aħna għandna raġun u hu għandu tort. Il-mira tagħna għandha tkun li jerġaʼ jkollna relazzjonijiet paċifiċi. Sabiex nagħmlu paċi, irridu nesprimu kif inħossuna b’mod onest. Għandna bżonn ukoll nirrikonoxxu li s-sentimenti tal-persuna l-oħra ġew imweġġgħin. U jekk konna aħna li żbaljajna, żgur li nkunu rridu nitolbu apoloġija bl-umiltà.
‘Jekk Għajnek il-Leminija Tfixklek’
8. Għid fil-qosor x’qal Ġesù f’Mattew 5:29, 30.
8 Fil-Priedka tiegħu taʼ fuq il-Muntanja, Ġesù ta parir f’loku fuq il-moralità. Hu kien jaf li l-membri imperfetti taʼ ġisimna jistaʼ jkollhom influwenza perikoluża fuqna. Għalhekk, Ġesù qal: “Issa, jekk għajnek il-leminija qed tfixklek, aqlagħha u armiha ’l bogħod minnek, għax ikun aħjar għalik li titlef wieħed mill-membri taʼ ġismek milli ġismek kollu jintefaʼ f’Geħenna. Ukoll, jekk idek il-leminija qed tfixklek, aqtagħha u armiha ’l bogħod minnek, għax ikun aħjar għalik li titlef wieħed mill-membri taʼ ġismek milli ġismek kollu jispiċċa f’Geħenna.”—Mt. 5:29, 30.
9. ‘Għajna’ jew ‘idna’ kif tistaʼ ġġegħelna ‘nitfixklu’?
9 L-‘għajn’ li tkellem dwarha Ġesù tirrappreżenta l-qawwa jew l-abbiltà li niffokaw l-attenzjoni tagħna fuq xi ħaġa, u l-‘id’ hi relatata maʼ dak li nagħmlu b’idejna. Jekk ma noqogħdux attenti, dawn il-partijiet tal-ġisem jistgħu jġegħluna ‘nitfixklu’ u ma nibqgħux ‘nimxu m’Alla.’ (Ġen. 5:22; 6:9) Għalhekk, meta niġu ttantati biex ma nobdux lil Ġeħova jkollna bżonn nieħdu azzjoni drastika, billi b’mod figurattiv naqilgħu għajn jew naqtgħu id barra.
10, 11. X’jistaʼ jgħinna nevitaw l-immoralità sesswali?
10 Kif nistgħu rrażżnu għajnejna biex ma nikkonċentrawx fuq affarijiet immorali? “Patt m’għajnejja għamilt,” qal ir-raġel Ġob, li kien jibżaʼ minn Alla. “Għalhekk, kif nistaʼ nkun moħħni f’xi verġni?” (Ġob 31:1) Ġob kien raġel miżżewweġ li kien determinat li ma jiksirx il-liġijiet morali t’Alla. Din għandha tkun l-attitudni tagħna sew jekk aħna miżżewġin u sew jekk m’aħniex. Sabiex nevitaw l-immoralità sesswali, għandna bżonn li nkunu gwidati mill-ispirtu qaddis t’Alla, li jipproduċi r-rażna f’dawk li jħobbu lil Alla.—Gal. 5:22-25.
11 Sabiex nevitaw l-immoralità sesswali, nagħmlu tajjeb li nistaqsu lilna nfusna, ‘Inħalli jien lil għajnejja jqanqlu ġo fija aptit għal materjal immorali li jinsab faċilment fil-kotba, fuq it-televixin, jew fuq l-Internet?’ Ejja niftakru wkoll dan il-kliem tad-dixxiplu Ġakbu: “Kull bniedem jiġi provat billi jkun miġbud u mħajjar mix-xewqa tiegħu stess. Imbagħad, meta x-xewqa ssir fertili, tiled id-dnub; u meta d-dnub jitwettaq, iġib il-mewt.” (Ġak. 1:14, 15) Fil-fatt, jekk xi individwu dedikat lil Alla “jibqaʼ jħares” b’motivi immorali lejn xi ħadd tas-sess oppost, hu għandu bżonn jagħmel bidliet drastiċi li jitqabblu maʼ li jaqlaʼ l-għajn u jarmiha ’l bogħod minnu.—Aqra Mattew 5:27, 28.
12. Liema parir taʼ Pawlu jistaʼ jgħinna niġġieldu kontra x-xewqat immorali?
12 Peress li l-użu mhux xieraq taʼ idejna jistaʼ jirriżulta fi ksur serju tal-livelli morali taʼ Ġeħova, irridu nkunu determinati b’mod sod li nibqgħu nodfa moralment. Għalhekk, għandna nagħtu kas il-parir taʼ Pawlu: “Mewtu l-membri taʼ ġisimkom li qegħdin fuq l-art fejn tidħol iż-żína, in-nuqqas taʼ ndafa, l-aptit sesswali, ix-xewqa li twassal għall-ħsara, u x-xenqa b’għira, li hi idolatrija.” (Kol. 3:5) Il-kelma “mewtu” tenfasizza l-miżuri drastiċi li jridu jittieħdu biex niġġieldu kontra x-xewqat immorali tal-laħam.
13, 14. Għala hu vitali li nevitaw ħsibijiet u atti immorali?
13 Sabiex jibqaʼ ħaj, individwu x’aktarx li jkun lest li jħalli li riġlu jew driegħu jiġi maqtugħ permezz t’operazzjoni. Ir-‘rimi ’l bogħod’ figurattiv taʼ l-għajn u taʼ l-id huwa vitali biex nevitaw ħsibijiet u azzjonijiet immorali li jistgħu jiswewlna l-ħajja spiritwali tagħna. L-uniku mod biex niskansaw il-qerda taʼ dejjem simbolizzata minn Geħenna hu li nibqgħu nodfa mentalment, moralment, u spiritwalment.
14 Minħabba d-dnub u l-imperfezzjoni li writna rridu nagħmlu sforz biex inżommu l-indafa morali. “Insawwat lil ġismi u njassru,” qal Pawlu, “sabiex, wara li nkun ippridkajt lil oħrajn, jien stess ma niġix diżapprovat b’xi mod.” (1 Kor. 9:27) Għalhekk, ejja nkunu determinati li napplikaw il-parir taʼ Ġesù dwar il-moralità, u qatt ma nħallu lilna nfusna naġixxu b’modi li juru nuqqas taʼ gratitudni għas-sagrifiċċju tiegħu bħala fidwa.—Mt. 20:28; Ebr. 6:4-6.
‘Idra Agħti’
15, 16. (a) Ġesù kif kien t’eżempju fil-ġenerożità? (b) Xi jfisser il-kliem taʼ Ġesù dokumentat f’Luqa 6:38?
15 Il-kliem u l-eżempju superlattiv taʼ Ġesù jippromwovu spirtu ġeneruż. Hu wera ġenerożità kbira billi ġie fuq l-art għall-benefiċċju taʼ l-umanità imperfetta. (Aqra t-2 Korintin 8:9.) Ġesù minn rajh ħalla l-glorja tas-sema biex isir bniedem u jagħti ħajtu għal bnedmin midinbin, li xi wħud minnhom kienu se jiksbu rikkezzi fis-sema bħala werrieta sħab miegħu fis-Saltna. (Rum. 8:16, 17) U Ġesù ċertament li inkuraġġixxa l-ġenerożità meta qal:
16 “Idraw agħtu, u n-nies jagħtukom. Iferrgħulkom f’ħoġorkom kejl tajjeb, marsus, mheżżeż, u mfawwar. Għax bil-kejl li tkejlu, ikejlulkom lura.” (Lq. 6:38) Il-frażi “jferrgħulkom f’ħoġorkom” tirreferi għad-drawwa taʼ xi bejjiegħa li jimlew il-parti wiesgħa tal-libsa taʼ fuq taʼ xerrej li kienet tkun marbuta bi ħżiem u li setgħu jagħmluha bħala ħorġa biex iġorru l-affarijiet. Il-ġenerożità spontanja tagħna tistaʼ tirriżulta f’li nirċievu kejl tajjeb biex ipattulna, forsi meta jkollna bżonn.—Ekk. 11:2.
17. Ġeħova kif ta l-aqwa eżempju f’dak li hu għoti, u liema tip t’għoti jistaʼ jġibilna l-ferħ?
17 Ġeħova jħobb u jippremja lil dawk li jagħtu bil-ferħ. Hu nnifsu ta l-aqwa eżempju, billi ta l-Iben uniġenitu tiegħu “biex kulmin jeżerċita l-fidi fih ma jinqeridx imma jkollu l-ħajja taʼ dejjem.” (Ġw. 3:16) Pawlu kiteb: “Min jiżraʼ bil-kotra jaħsad ukoll bil-kotra. Ħa jagħmel kull wieħed bħalma jkun iddeċieda f’qalbu, mhux kontra qalbu jew bilfors, għax Alla jħobb lil min jagħti bil-ferħ.” (2 Kor. 9:6, 7) Il-fatt li nagħtu mill-ħin, mill-enerġija, u mir-riżorsi materjali tagħna biex nippromwovu l-qima vera żgur li jġibilna ferħ u premjijiet għonja.—Aqra Proverbji 19:17; Luqa 16:9.
“Toqgħodx Iddoqq it-Trombi”
18. F’liema ċirkustanzi ma ‘jkollna ebda premju’ mingħand Missierna tas-sema?
18 “Oqogħdu attenti li s-sewwa li tagħmlu ma tagħmluhx għal għajn in-nies, biex tidhru; inkella ma jkollkom l-ebda premju mingħand Missierkom li hu fis-smewwiet.” (Mt. 6:1) Bis-“sewwa,” Ġesù ried ifisser kondotta li hi fi qbil mar-rieda divina. Ma riedx ifisser li għemejjel li jogħġbu lil Alla m’għandhom qatt isiru fil-pubbliku, għax hu kien qal lid-dixxipli tiegħu biex iħallu ‘d-dawl tagħhom jiddi quddiem il-bnedmin.’ (Mt. 5:14-16) Imma ma ‘jkollna ebda premju’ mingħand Missierna tas-sema jekk nagħmlu l-affarijiet ‘biex nidhru’ u niġu ammirati, bħal xi atturi li jirreċtaw fuq il-palk f’teatru. Jekk ikollna dawn il-motivi, ma ngawdux relazzjoni mill-qrib m’Alla jew il-barkiet eterni tal-ħakma tas-Saltna.
19, 20. (a) Ġesù x’ried ifisser meta tkellem kontra li ‘ndoqqu t-trombi’ meta nagħmlu “għotjiet taʼ ħniena”? (b) Kif ma nħallux l-id ix-xellugija tkun taf x’qed tagħmel il-leminija?
19 Jekk ikollna attitudni xierqa, se nsegwu t-twissija taʼ Ġesù: “Għalhekk, meta tagħti għotjiet taʼ ħniena, toqgħodx iddoqq it-trombi, bħalma jagħmlu l-ipokriti fis-sinagogi u fit-toroq, sabiex ifaħħruhom in-nies. Tassew ngħidilkom, Dawn qed jieħdu l-premju tagħhom bis-sħiħ.” (Mt. 6:2) L-“għotjiet taʼ ħniena” kienu donazzjonijiet mogħtijin biex jappoġġaw lil dawk fil-bżonn. (Aqra Isaija 58:6, 7.) Ġesù u l-appostli tiegħu kellhom fond komuni biex jużawh ħalli jgħinu lill-foqra. (Ġw. 12:5-8; 13:29) Ladarba l-għoti lill-foqra ma kienx preċedut letteralment mid-daqq tat-trombi, Ġesù b’mod evidenti uża iperbole, jew esaġerazzjoni, meta qal li m’għandniex ‘indoqqu t-trombi’ meta nagħmlu “għotjiet taʼ ħniena.” M’għandniex ngħidu lil kulħadd dwar għotjiet bħal dawn, bħalma kienu jagħmlu l-Fariżej Lhud. Ġesù sejħilhom ipokriti għax irreklamaw id-donazzjonijiet taʼ karità tagħhom “fis-sinagogi u fit-toroq.” Dawn l-ipokriti kienu “qed jieħdu l-premju tagħhom bis-sħiħ.” Il-premju kollu li kienu se jieħdu kien jikkonsisti mit-tifħir tan-nies u possibbilment xi wieħed mis-siġġijiet taʼ quddiem fis-sinagoga maġenb xi rabbini magħrufin, għax Ġeħova ma kien se jagħtihom xejn. (Mt. 23:6) Iżda, id-dixxipli taʼ Kristu kif kellhom jaġixxu? Ġesù qal lilhom—u lilna:
20 “Imma int, meta tagħti għotjiet taʼ ħniena, tħallix lil idek ix-xellugija tkun taf x’qed tagħmel il-leminija, biex l-għotjiet taʼ ħniena tiegħek isiru fil-moħbi; imbagħad Missierek li jara dak li hu moħbi se jroddlok lura.” (Mt. 6:3, 4) Idejna ġeneralment jaħdmu flimkien. Għalhekk, li ma nħallux l-id ix-xellugija tkun taf x’inhi tagħmel il-leminija jfisser li ma nirreklamawx l-għemejjel taʼ karità tagħna, saħansitra quddiem dawk li huma qribna daqskemm l-id ix-xellugija tagħna hi qrib l-id il-leminija tagħna.
21. Fost affarijiet oħrajn, il-Wieħed “li jara dak li hu moħbi” xi jroddilna lura?
21 Jekk ma niftaħrux dwar il-karità li nagħtu, l-“għotjiet taʼ ħniena” tagħna jsiru fil-moħbi. Imbagħad Missierna, “li jara dak li hu moħbi,” se jroddilna lura. Peress li jgħammar fis-smewwiet u hu inviżibbli għal għajnejn il-bniedem, Missierna tas-sema jibqaʼ “fil-moħbi” safejn huma konċernati l-bnedmin. (Ġw. 1:18) Ġeħova, il-Wieħed “li jara dak li hu moħbi,” iroddilna lura billi, fost affarijiet oħrajn, idaħħalna f’relazzjoni intima miegħu, jaħfrilna dnubietna, u jagħtina ħajja eterna. (Prov. 3:32; Ġw. 17:3; Efes. 1:7) Dan hu ferm u ferm aħjar milli jfaħħruna l-bnedmin!
Kliem Prezzjuż li Għandek Tgħożż
22, 23. Għala għandna ngħożżuh kliem Ġesù?
22 Il-Priedka taʼ fuq il-Muntanja ċertament li hi mimlija ħaġar prezzjuż spiritwali li għandu ħafna aspetti sbieħ. Bla dubju, fiha kliem imprezzabbli li jistaʼ jġibilna l-ferħ anki f’din id-dinja mimlija inkwiet. Iva, se nkunu henjin jekk ngħożżu kliem Ġesù u nħalluh jeffettwa l-attitudni u l-mod taʼ ħajja tagħna.
23 Kulmin “jismaʼ” u ‘jagħmel’ dak li għallem Ġesù se jkun imbierek. (Aqra Mattew 7:24, 25.) Għalhekk, ejja nkunu determinati li naġixxu fi qbil mal-pariri taʼ Ġesù. Fl-aħħar artiklu taʼ din is-serje se nikkunsidraw iktar kliem mill-Priedka tiegħu taʼ fuq il-Muntanja.
Int Kif Twieġeb?
• Għala hu importanti li tagħmel paċi maʼ ħu li jkun offiż?
• Kif nistgħu nevitaw li niġu mfixklin minn ‘għajna l-leminija’?
• X’għandha tkun l-attitudni tagħna rigward l-għoti?
[Mistoqsijiet taʼ Studju]
[Stampa f’paġna 11]
Kemm hu tajjeb li ‘tagħmel paċi’ maʼ sieħeb offiż taʼ l-istess twemmin!
[Stampi f’paġna 12, 13]
Ġeħova jbierek lil dawk li jagħtu bil-ferħ