ĦSEJJES taʼ niket jinstemgħu kullimkien. Dawk bil-​vistu lebsin ilbies iswed speċjali u qed jibku u jintefgħu maʼ l-​art b’mod iddisprat minħabba n-​niket tagħhom. Żeffiena jiċċaqalqu mar-​ritmu taʼ mużika qawwija. Jerġaʼ oħrajn qed jieklu u jiċċelebraw b’daħq storbjuż u briju. Xi wħud jinxteħtu maʼ l-​art, fis-​sakra minħabba l-​ħafna nbid u birra. X’inhi l-​okkażjoni? F’ċerti partijiet tad-​dinja, dawn huma karatteristiki tipiċi li ssib fil-​funerali li għalihom mijiet taʼ nies jinġabru biex jagħtu l-​aħħar tislima lill-​mejtin.

Ħafna mix-​Xhieda taʼ Ġeħova jgħixu f’komunitajiet fejn il-​qraba u l-​ġirien huma superstizzjużi ħafna u jibżgħu mill-​mejtin. Miljuni taʼ nies jemmnu li meta xi ħadd imut, hu jsir wieħed mill-​ispirti taʼ l-​antenati bl-​abbiltà li jgħin jew jagħmel ħsara lill-​ħajjin. Dan it-​twemmin huwa konness mill-​qrib mal-​ħafna drawwiet tal-​funerali. M’għandniex xi ngħidu, huwa normali li titnikket meta jmut xi ħadd. F’okkażjoni waħda, Ġesù u d-​dixxipli tiegħu tnikktu minħabba l-​mewt taʼ xi maħbubin. (Ġw. 11:33-35, 38; Atti 8:2; 9:39) Madankollu, qatt ma wrew espressjonijiet estremi taʼ niket li kienu komuni fi żmienhom. (Lq. 23:27, 28; 1 Tess. 4:13) Għala? Waħda mir-​raġunijiet kienet li huma kienu jafu l-​verità dwar il-​mewt.

Il-Bibbja tgħid b’mod ċar: “Il-​ħajjin jafu li għad imutu; imma l-​mejtin ma jafu assolutament xejn . . . L-​imħabba u l-​mibegħda u l-​għira tagħhom diġà għabu . . . La hemm xogħol, la ppjanar, la għarfien, u lanqas għerf fil-​Qabar, il-​post fejn int sejjer.” (Ekk. 9:5, 6, 10) Dawn il-​versi Bibliċi ispirati jagħmluha ċara li meta xi ħadd imut ma jibqax konxju. Hu ma jistax jaħseb, iħoss, jikkomunika, jew jifhem xi ħaġa. Il-​fatt li nifhmu din il-​verità Biblika importanti kif se jeffettwa l-​mod kif isiru l-​funerali Kristjani?

“Tibqgħux Tmissu Dak li Mhux Nadif”

Minkejja l-​isfond etniku jew kulturali, ix-​Xhieda taʼ Ġeħova jevitaw b’mod strett kwalunkwe drawwa li hija assoċjata mat-​twemmin li l-​mejtin huma konxji u jistgħu jinfluwenzaw lill-​ħajjin. Drawwiet bħal meta xi ħadd jibqaʼ għassa mal-​mejjet, iċ-​ċelebrazzjonijiet tal-​funerali, l-​anniversarji tal-​funerali, is-​sagrifiċċji għall-​mejtin, u r-​riti tar-​romol huma kollha mhux nodfa u ma jogħġbux lil Alla minħabba li huma konnessi mat-​tagħlim mhux Skritturali u demoniku li r-​ruħ jew l-​ispirtu ma jmutx. (Eżek. 18:4) Il-​Kristjani veri ‘ma jistgħux jieħdu sehem mill-​“mejda taʼ Ġeħova” u mill-​mejda tad-​demonji,’ u għalhekk ma jissiħbux f’dawn id-​drawwiet. (1 Kor. 10:21) Huma jobdu l-​kmand: “Oħorġu minn ġo nofshom, . . . u tibqgħux tmissu dak li mhux nadif.” (2 Kor. 6:17) Madankollu, li tieħu waqfa bħal din m’huwiex dejjem faċli.

Fl-Afrika u f’postijiet oħrajn, huwa komuni t-​twemmin li jekk ċerti drawwiet ma jiġux segwiti, l-​ispirti taʼ l-​antenati joffendu ruħhom. Il-​fatt li dawn ir-​riti ma jsirux huwa kunsidrat bħala offiża serja li tistaʼ tirriżulta f’saħta jew fi sfortuna għall-​komunità. Minħabba li jirrifjutaw li jipparteċipaw f’riti taʼ funerali mhux Skritturali, ħafna min-​nies taʼ Ġeħova ġew kritikati, insultati, u trattati bħala wħud imkeċċijin mill-​komunitajiet tal-​villaġġi jew mill-​familji estiżi tagħhom. Xi wħud ġew akkużati li huma antisoċjali u li juru diżrispett lejn il-​mejtin. Kultant, dawk li ma jemmnux ħadu ħsieb bil-​forza l-​arranġamenti taʼ  funerali Kristjani. Għalhekk, kif nistgħu nevitaw konflitti maʼ dawk li jinsistu b’mod sod biex iżommu mad-​drawwiet tal-​funerali li ma jogħġbux lil Alla? U saħansitra iktar importanti minn hekk, x’nistgħu nagħmlu sabiex inżommu lilna nfusna separati minn riti u prattiki mhux nodfa li jistgħu jħassru r-​relazzjoni tagħna maʼ Ġeħova?

Uri X’Inhi l-​Waqfa Tiegħek b’Mod Ċar

F’xi partijiet tad-​dinja hija drawwa li l-​anzjani tat-​tribù u l-​qraba li m’humiex mill-​familja immedjata jinvolvu ruħhom fid-​deċiżjonijiet li jittieħdu dwar id-​difna tal-​mejtin. Għalhekk, Kristjan leali għandu jagħmilha ċara li l-​funeral se jkun organizzat u se jsir mix-​Xhieda taʼ Ġeħova skond il-​prinċipji Bibliċi. (2 Kor. 6:14-16) Dak li jsir f’funeral Kristjan m’għandux jiddisturba l-​kuxjenzi taʼ sħabna fit-​twemmin jew ifixkel lil oħrajn li jafu x’nemmnu u x’ngħallmu dwar il-​mejtin.

Meta rappreżentant tal-​kongregazzjoni Kristjana tintalab biex tieħu ħsieb funeral, l-​anzjani maħturin jistgħu joffru suġġerimenti t’għajnuna u jipprovdu appoġġ spiritwali sabiex l-​arranġamenti kollha jkunu fi qbil mal-​prinċipji Skritturali. Jekk xi wħud li m’humiex Xhieda jkunu jixtiequ jinkludu prattiki mhux nodfa, huwa vitali li tibqaʼ sod u b’kuraġġ tispjega l-​waqfa tagħna bħala Kristjani b’qalb tajba u b’rispett. (1 Pt. 3:15) Imma xi ngħidu jekk xi qraba li ma jemmnux xorta jinsistu biex jinkludu riti mhux nodfa fl-​arranġamenti? Imbagħad il-​familja Kristjana tistaʼ tiddeċiedi li titlaq mill-​funeral. (1 Kor. 10:20) Meta jiġri dan, għandu mnejn tingħata taħdita sempliċi tal-​funeral fis-​Sala tas-​Saltna tal-​lokal jew f’post xieraq ieħor sabiex jingħata “faraġ mill-​Iskrittura” lil dawk li sinċerament huma mnikktin mill-​mewt taʼ xi ħadd maħbub. (Rum. 15:4) Avolja l-​ġisem tal-​mejjet ma jkunx preżenti, arranġament bħal dan ikun dinjituż u assolutament xieraq. (Dt. 34:5, 6, 8) Indħil mhux xieraq minn dawk li ma jemmnux jistaʼ jżid maʼ l-​istress u n-​niket taʼ l-​okkażjoni, imma nistgħu nsibu l-​faraġ f’li nkunu nafu li d-​determinazzjoni tagħna biex nagħmlu dak li hu tajjeb huwa notat minn Alla, il-​Wieħed li jistaʼ jagħtina l-​“qawwa iktar min-​normal.”—2 Kor. 4:7.

Ħalli bil-​Miktub Dak li Tixtieq

Meta individwu jħalli bil-​miktub l-​istruzzjonijiet persunali tiegħu rigward l-​arranġamenti tal-​funeral tiegħu, ikun iktar faċli biex tirraġuna mal-​membri tal-​familja li m’humiex Xhieda ladarba huma wisq probabbli se jirrispettaw ix-​xewqat tal-​mejjet. Xi dettalji importanti li jridu jitniżżlu bil-​miktub huma kif għandu jsir il-​funeral, fejn għandu jsir, u min biss għandu jkun awtorizzat li jorganizzah u jagħmlu. (Ġen. 50:5) L-​iktar ħaġa effettiva hi li jkollok dokument iffirmat u li jkollok ix-​xhieda. Dawk li jippjanaw għall-​futur b’dehen u b’għerf ibbażati fuq il-​prinċipji Bibliċi jafu li  m’għandhomx għalfejn jistennew sakemm jixjieħu ħafna jew li jkollhom xi mard li ma jitfejjaqx qabel ma jikkunsidraw li jagħmlu dan.—Prov. 22:3; Ekk. 9:12.

Xi wħud ma ħassewhomx komdi jniżżlu dawn l-​istruzzjonijiet f’dokument bil-​miktub. Madankollu, meta dan isir ikun hemm evidenza taʼ maturità Kristjana u tħassib kollu mħabba għal oħrajn. (Flp. 2:4) Huwa ħafna aħjar li tieħu ħsieb dawn l-​affarijiet int personalment milli tħalli arranġamenti bħal dawn jiġu setiljati minn membri tal-​familja mnikktin li għandu mnejn issirilhom pressjoni biex jaċċettaw prattiki mhux nodfa li l-​mejjet la kien jaċċetta u lanqas japprova.

Żomm il-​Funeral Sempliċi

F’ħafna partijiet taʼ l-​Afrika, hemm twemmin komuni li funeral għandu jkun kbir u impressjonanti sabiex l-​ispirti taʼ l-​antenati ma jirrabjawx. Oħrajn jużaw il-​funerali bħala opportunità sabiex ‘jiffanfraw’ bl-​istat soċjali u ekonomiku tagħhom. (1 Ġw. 2:16) Sabiex il-​mejjet ikollu difna “xierqa,” jiġu dedikati ħafna ħin u sforzi kif ukoll ħafna riżorsi. Sabiex jiġbdu kemm jistaʼ jkun nies, jitpoġġew kartelluni kbar b’ritratt tal-​mejjet f’postijiet differenti, u b’hekk isir reklam pubbliku tal-​funeral. Jintgħamlu u jitqassmu flokkijiet bir-​ritratt taʼ wiċċ il-​mejjet sabiex ikunu jistgħu jintlibsu minn dawk li jkunu bil-​vistu. Twiebet elaborati u li jiswew ħafna jinxtraw sabiex jimpressjonaw lil dawk li jkunu qed jaraw il-​funeral. F’pajjiż Afrikan minnhom, xi wħud jaslu sal-​punt li jagħmlu twiebet forma taʼ karozzi, ajruplani, dgħajjes, u oġġetti oħrajn sabiex juru l-​ġid, il-​kobor, u l-​lussu tagħhom. Il-​ġisem mejjet jistaʼ jitneħħa mit-​tebut u jintwera fuq sodda mżejna b’mod speċjali. Mara tistaʼ tiġi mlibbsa libsa bajda tat-​tieġ u tiġi mżejna b’ħafna ġojjelli, ġawhar, u makeup. Huwa xieraq għall-​poplu t’Alla li jieħu sehem fi prattiki bħal dawn?

Kristjani maturi jaraw l-​għerf li jevitaw l-​estremi li jieħdu sehem fihom in-​nies li la jafu l-​prinċipji t’Alla u lanqas jimpurtahom minnhom. Aħna konxji li drawwiet u prattiki mhux xierqa u mhux Skritturali ‘ma joriġinawx mill-​Missier, imma mid-​dinja li qed tgħaddi.’ (1 Ġw. 2:15-17) Irridu noqogħdu attenti ħafna li ma ninġibdux lejn spirtu taʼ kompetizzjoni li m’huwiex Kristjan, billi nipprovaw inkunu aħjar minn oħrajn. (Gal. 5:26)  L-​esperjenza turi li meta l-​biżaʼ mill-​mejtin ikun parti importanti minn ħajja kulturali u soċjali taʼ xi pajjiż, il-​funerali spiss ikunu kbar u diffiċli biex tieħu ħsiebhom, u għalhekk il-​kontroll tas-​sitwazzjoni malajr jistaʼ jintilef. Il-​qima tal-​mejtin tistaʼ malajr twassal lil dawk li ma jemmnux biex jieħdu sehem f’kondotta mhix nadifa. F’funerali bħal dawn, jistaʼ jkun hemm min jibki ħafna u bla kontroll, jgħannaq il-​ġisem mejjet, jitkellem miegħu daqslikieku kien għadu ħaj, u jqiegħed flus u oġġetti oħrajn fuq il-​ġisem. Li kieku dan kellu jiġri f’funeral Kristjan, kien iġib tmaqdir kbir fuq isem Ġeħova u l-​poplu tiegħu.—1 Pt. 1:14-16.

Minħabba li nafu l-​kundizzjoni vera tal-​mejtin żgur li se jkollna l-​kuraġġ biex il-​funerali tagħna jkunu mingħajr ebda traċċa dinjija. (Efes. 4:17-19) Għalkemm Ġesù kien l-​akbar u l-​iktar raġel importanti li qatt għex, hu ndifen b’mod diskret u sempliċi. (Ġw. 19:40-42) Dawk li għandhom “il-​moħħ taʼ Kristu” ma jħossux li huwa għajb li jkollok funeral sempliċi. (1 Kor. 2:16) Tabilħaqq, li nżommu l-​funerali Kristjani sempliċi u raġunevoli huwa l-​aħjar mod sabiex nevitaw dak li Skritturalment m’huwiex nadif u biex inżommu atmosfera kalma li hija dinjituża, f’postha, u xierqa għal dawk li jħobbu lil Alla.

Għandu Jkun Hemm Iffesteġġjar?

Wara d-​difna, għandha mnejn tkun id-​drawwa għal xi qraba, ġirien, u oħrajn li jinġabru fi gruppi kbar biex jiffesteġġaw u jiżfnu għal mużika tgħajjat. Dawn iċ-​ċelebrazzjonijiet spiss huma assoċjati maʼ xorb żejjed u atti immorali. Xi wħud jirraġunaw li briju bħal dan jgħin biex ineħħi d-​dwejjaq li ġġib magħha l-​mewt. Oħrajn iħossu li din hija sempliċement parti mill-​kultura tagħhom. Madankollu, ħafna jemmnu li xalar bħal dan huwa rit neċessarju li għandu jsir biex jonora u jfaħħar lill-​mejtin u biex permezz tiegħu ruħ il-​mejjet tinħeles u tkun tistaʼ tingħaqad maʼ l-​antenati tagħha.

Il-Kristjani veri jaraw l-​għerf li jinsab fit-​twissija Skritturali: “Aħjar id-​dwejjaq mid-​daħq, għax minħabba wiċċ serju l-​qalb issir aħjar.” (Ekk. 7:3) Iktar minn hekk, huma jafu l-​benefiċċji li jiġu meta timmedita fil-​kwiet fuq kemm hi qasira l-​ħajja u fuq it-​tama taʼ l-​irxoxt. Tabilħaqq, għal dawk li għandhom relazzjoni mill-​qrib maʼ Ġeħova, “jum il-​mewt aħjar minn jum it-​twelid” tagħhom. (Ekk. 7:1) Għalhekk, minħabba li jafu li l-​briju fil-​funerali huwa assoċjat maʼ twemmin spiritistiku u m’attività immorali, verament ma jkunx xieraq li l-​Kristjani veri jorganizzaw jew saħansitra jattendu ċelebrazzjonijiet bħal dawn. Jekk nissieħbu maʼ wħud li jħobbu jixxalaw fil-​funerali nkunu qed nuru nuqqas taʼ rispett lejn Alla u lejn il-​kuxjenzi taʼ sħabna l-​aduraturi taʼ Ġeħova.

Ħalli lil Oħrajn Jaraw id-​Distinzjoni

Kemm aħna grati li aħna meħlusin mill-​biżaʼ mill-​mejtin li jwaħħxek u li hu tant komuni fost dawk li huma fi dlam spiritwali! (Ġw. 8:32) Bħala “wlied id-​dawl,” aħna nesprimu d-​diqa u n-​niket tagħna b’tali mod li jirrifletti tidwil spiritwali, b’mod li huwa raġunevoli, mimli rispett, u influwenzat mit-​tama ċerta taʼ l-​irxoxt. (Efes. 5:8; Ġw. 5:28, 29) Tama bħal din se żżommna milli niġu influwenzati mill-​espressjonijiet eċċessivi taʼ niket li spiss juru dawk li “m’għandhomx tama.” (1 Tess. 4:13) Din se tagħtina l-​kuraġġ biex nieħdu waqfa soda għall-​qima pura, u ma nċedux għall-​biżaʼ mill-​bniedem.—1 Pt. 3:13, 14.

Jekk b’mod leali nimxu skond il-​prinċipji Skritturali se nagħtu lin-​nies l-​opportunità li ‘jaraw id-​distinzjoni bejn dawk li jaqdu lil Alla u dawk li ma jaqduhx.’ (Mal. 3:18) Xi darba, il-​mewt ma tkunx iktar. (Riv. 21:4) Sakemm nistennew li sseħħ din il-​wegħda grandjuża, jalla Ġeħova jsibna bla tebgħa, bla difett, u kompletament separati minn din id-​dinja mill-​agħar u l-​prattiki tagħha li jiddiżonoraw lil Alla.—2 Pt. 3:14.

[Stampa f’paġna 30]

Huwa għaqli li nħallu bil-​miktub x’inhuma x-​xewqat persunali tagħna dwar l-​arranġamenti tal-​funeral

[Stampa f’paġna 31]

Il-​funerali Kristjani għandhom ikunu sempliċi u dinjitużi