Punti Prinċipali mill-Ktieb tar-Rivelazzjoni—II
Il-Kelma taʼ Ġeħova Hi Ħajja
X’HEMM jistenna lil dawk li jqimu lil Alla Ġeħova u lil dawk li ma jqimuhx? X’futur hemm għal Satana u d-demonji tiegħu? X’barkiet se tesperjenza l-umanità ubbidjenti matul ir-Renju t’Elf Sena taʼ Kristu? It-tweġibiet għal dawn il-mistoqsijiet u għal mistoqsijiet vitali oħrajn huma rivelati f’Rivelazzjoni 13:1–22:21. a F’dawn il-kapitli hemm l-aħħar 9 mis-16-il viżjoni li l-appostlu Ġwanni rċieva qrib it-tmiem taʼ l-ewwel seklu E.K.
“Hieni min jaqra b’leħen għoli u dawk li jisimgħu l-kliem taʼ din il-profezija,” jikteb Ġwanni, “u josservaw dak li hemm miktub fiha.” (Riv. 1:3; 22:7) Il-qari u l-applikar taʼ dak li nitgħallmu mill-ktieb tar-Rivelazzjoni jistgħu jeffettwawlna qalbna, isaħħulna l-fidi f’Alla u f’Ibnu, Ġesù Kristu, u jagħtuna tama sabiħa għall-futur. b—Ebr. 4:12.
JITFERRGĦU S-SEBAʼ BWIEQI TAR-RABJA T’ALLA
“Il-ġnus imtlew bil-korla,” jgħid Rivelazzjoni 11:18, “u ġiet il-korla [t’Alla], u wasal iż-żmien stabbilit . . . biex teqred lil dawk li qed jeqirdu l-art.” Biex turi għala ġiet il-korla t’Alla, it-tmien viżjoni turi l-attività taʼ “bhima salvaġġa . . . b’għaxart iqrun u b’sebat irjus.”—Riv. 13:1.
Fid-disaʼ viżjoni, Ġwanni jara “l-Ħaruf wieqaf fuq il-Muntanja Sijon,” u miegħu “mija u erbgħa u erbgħin elf.” Dawn “inxtraw minn fost il-bnedmin.” (Riv. 14:1, 4) Imbagħad ikun hemm xi dikjarazzjonijiet anġeliċi. Fil-viżjoni li jmiss, Ġwanni jara “sebaʼ anġli b’sebaʼ kastigi.” B’mod evidenti, Ġeħova nnifsu jikkmanda lil dawn l-anġli biex ‘iferrgħu s-sebaʼ bwieqi tar-rabja t’Alla’ fuq diversi karatteristiki tad-dinja taʼ Satana. Il-bwieqi fihom dikjarazzjonijiet u twissijiet tal-ġudizzji li Alla se jesegwixxi. (Riv. 15:1; 16:1) Dawn iż-żewġ viżjonijiet jagħtu dettalji taʼ iktar ġudizzji tas-Saltna konnessi mat-tielet gwaj u mad-daqq tas-sebaʼ trumbetta.—Riv. 11:14, 15.
Mistoqsijiet Skritturali Mweġbin:
13:8—X’inhu r-“romblu tal-ħajja tal-Ħaruf”? Dan hu romblu figurattiv li fih biss l-ismijiet taʼ dawk li jaħkmu maʼ Ġesù Kristu fis-Saltna tiegħu fis-sema. Dan jinkludi l-ismijiet tal-Kristjani midlukin li għadhom fuq l-art u li għandhom it-tama li jirċievu l-ħajja fis-sema.
13:11-13—Il-bhima salvaġġa b’żewġt iqrun kif taġixxi bħal dragun u ġġiegħel in-nar jinżel mis-sema? Il-fatt li l-bhima salvaġġa b’żewġt iqrun—il-Qawwa Dinjija Anglo-Amerikana—titkellem bħal dragun jindika li tuża t-theddid, il-pressjoni, u l-vjolenza biex tisforza lin-nies jaċċettaw il-forma taʼ ħakma tagħha. Din il-bhima ġġiegħel li nar jinżel mis-sema fis-sens li tassumi l-irwol taʼ profeta billi ssostni li rebħet lill-forzi tal-ħażen fiż-żewġ gwerer dinjin tas-seklu 20 u li kellha rebħa fuq il-Komuniżmu.
16:17—X’inhi “l-arja” li fuqha titferraʼ s-sebaʼ bieqja? L-“arja” tissimbolizza l-ħsieb sataniku, “l-ispirtu [l-inklinazzjoni mentali] li issa qed jaħdem f’ulied id-diżubbidjenza.” Is-sistema kollha kemm hi taʼ Satana qed tiblaʼ din l-arja velenuża.—Efes. 2:2.
Lezzjonijiet Għalina
13:1-4, 18. “Bhima salvaġġa” li tissimbolizza l-gvernijiet tal-bniedem titlaʼ “mill-baħar,” jiġifieri, mill-mases instabbli taʼ bnedmin. (Is. 17:12, 13; Dan. 7:2-8, 17) Din il-bhima, maħluqa u mogħtija l-qawwa minn Satana, għandha n-numru 666, li jenfasizza l-imperfezzjoni tagħha. Meta nifhmu x’inhi din il-bhima niġu megħjunin biex la nsegwuha b’ammirazzjoni u lanqas inqimuha kif jagħmlu l-bnedmin in ġenerali.—Ġw. 12:31; 15:19.
13:16, 17. Minkejja t-tbatijiet li nistgħu niltaqgħu magħhom meta nkunu għaddejjin b’attivitajiet taʼ kuljum bħal ‘li nixtru jew inbigħu,’ m’għandniex inċedu għall-pressjonijiet u nħallu lill-bhima salvaġġa taħkem lil ħajjitna. Jekk naċċettaw il-‘marka tal-bhima salvaġġa f’idna jew fuq ġbinna’ nkunu qisna qed nippermettu lill-bhima salvaġġa tikkontrollalna l-azzjonijiet tagħna jew teffettwalna l-ħsibijiet tagħna.
14:6, 7. Il-proklamazzjoni anġelika tgħallimna li għandna niddikjaraw b’urġenza l-aħbar tajba tas-Saltna stabbilita t’Alla. Għandna ngħinu lill-istudenti tal-Bibbja li nistudjaw magħhom biex jiżviluppaw biżaʼ bnin minn Alla u biex jagħtu glorja lil Ġeħova.
14:14-20. Meta “l-prodott taʼ l-art,” jiġifieri, il-ħsad taʼ dawk li se jiġu salvati, ikun inġabar, se jkun wasal iż-żmien biex l-anġlu jitfaʼ l-ġbir tad-“dielja taʼ l-art . . . fil-magħsar taʼ l-inbid il-kbir tar-rabja t’Alla.” Din id-dielja—is-sistema korrotta taʼ gvernijiet viżibbli taʼ Satana li tmexxi lill-bnedmin, bl-“għenieqed” tagħha taʼ frott mill-agħar—imbagħad se tiġi meqruda għal dejjem. Aħna għandna nkunu determinati li ma niġux influwenzati mid-dielja taʼ l-art.
16:13-16. L-“espressjonijiet imnebbħin, li ma kinux nodfa” jissimbolizzaw il-propaganda demonika li l-iskop tagħha hu li tagħmel ċert li s-slaten taʼ l-art ma jiġux influwenzati mit-tferrigħ tas-sebaʼ bwieqi tar-rabja t’Alla, imma minflok jiġu manuvrati biex jopponu lil Ġeħova.—Mt. 24:42, 44.
16:21. Hekk kif joqrob it-tmiem taʼ din id-dinja, il-proklamazzjoni tal-ġudizzji taʼ Ġeħova kontra s-sistema mill-agħar taʼ Satana tistaʼ tinvolvi espressjonijiet verbali serji ħafna tal-ġudizzji t’Alla, li x’aktarx tingħata stampa tagħhom mis-silġ. Xorta waħda, il-biċċa l-kbira mill-bnedmin se jkomplu jidgħu b’Alla.
IS-SULTAN TRIJUNFANTI JAĦKEM
“Babilonja l-Kbira,” l-imperudinji taʼ reliġjon falza, hija parti moqżieża mid-dinja taʼ Satana. Il-11-il viżjoni tagħti stampa tagħha bħala ‘prostituta kbira’—mara immorali—“bil-qiegħda fuq bhima salvaġġa lewn l-iskarlat.” Hi għandha tiġi meqruda għalkollox mill-“għaxart iqrun” taʼ l-istess bhima li qed iġġorrha. (Riv. 17:1, 3, 5, 16) Billi xxebbah lil din il-prostituta maʼ ‘belt kbira,’ il-viżjoni li jmiss tħabbar il-waqgħa tagħha u toħroġ għajta urġenti lin-nies t’Alla biex ‘joħorġu minnha.’ Ħafna jitnikktu minħabba l-waqgħa taʼ din il-belt il-kbira. Madankollu, fis-sema hemm ferħ kbir minħabba “ż-żwieġ tal-Ħaruf.” (Riv. 18:4, 9, 10, 15-19; 19:7) Fit-13-il viżjoni, ir-rikkieb taʼ “żiemel abjad” joħroġ jiggwerra kontra l-ġnus. Hu jtemm id-dinja mill-agħar taʼ Satana.—Riv. 19:11-16.
Xi ngħidu dwar “is-serp oriġinali, li hu x-Xitan u Satana”? Meta se jiġi “mixħut fl-għadira tan-nar”? Dan hu wieħed mis-suġġetti taʼ l-14-il viżjoni. (Riv. 20:2, 10) L-aħħar żewġ viżjonijiet jagħtu idea taʼ kif se tkun il-ħajja matul il-Millennju. Hekk kif ir-“rivelazzjoni” tasal fi tmiemha, Ġwanni jara ‘xmara taʼ ilma tal-ħajja nieżla min-nofs it-triq il-prinċipali,’ u toħroġ stedina meraviljuża għal “kulmin hu bil-għatx.”—Riv. 1:1; 22:1, 2, 17.
Mistoqsijiet Skritturali Mweġbin:
17:16; 18:9, 10—“Is-slaten taʼ l-art” għala jitnikktu minħabba dik l-istess ħaġa li qerdu huma nfushom? Ir-raġuni għan-niket tagħhom hi biss egoistika. Wara l-qerda taʼ Babilonja l-Kbira, is-slaten taʼ l-art b’mod evidenti jibdew jirrealizzaw kemm kienet utli għalihom. Hi pprovditilhom skuża biex l-għemejjel oppressivi tagħhom jidhru aċċettabbli reliġjożament. Babilonja l-Kbira għenithom ukoll biex jingaġġaw żgħażagħ għall-kampijiet tal-battalja. Iktar minn hekk, hi kellha parti importanti biex iżżomm lin-nies sottomessi.
19:12—Kif inhu li ħadd ħlief Ġesù nnifsu ma jaf l-isem tiegħu li qatt ma tlissen? Dan l-isem jidher li jirrappreżenta l-pożizzjoni u l-privileġġi, bħal dawk li nsibu f’Isaija 9:6, li Ġesù jgawdi matul jum il-Mulej. Ħadd ma jaf dan l-isem ħliefu fis-sens li l-privileġġi tiegħu huma uniċi u hu biss jistaʼ jifhem xi jfisser li jkollok pożizzjoni għolja bħal din. Madankollu, Ġesù jaqsam xi ftit minn dawn il-privileġġi mal-membri tal-klassi taʼ l-għarusa tiegħu, billi fil-fatt ‘jikteb fuqhom l-isem il-ġdid tiegħu.’—Riv. 3:12.
19:14—Min se jirkeb maʼ Ġesù f’Armageddon? Inklużi fost ‘l-armati fis-sema’ li jingħaqdu maʼ Ġesù fil-gwerra t’Alla se jkun hemm l-anġli kif ukoll il-midlukin li kkonkwistaw u li diġà rċivew il-premju tagħhom fis-sema.—Mt. 25:31, 32; Riv. 2:26, 27.
20:11-15—L-ismijiet taʼ min huma miktubin fir-“romblu [jew, “fil-ktieb”] tal-ħajja”? Dan hu r-romblu li fih l-ismijiet taʼ dawk kollha li se jingħataw il-ħajja taʼ dejjem—il-Kristjani midlukin, il-membri tal-folla l-kbira, u l-qaddejja leali t’Alla li se jesperjenzaw ‘l-irxoxt tan-nies sewwa.’ (Atti 24:15; Riv. 2:10; 7:9) Dawk li se jerġgħu jieħdu l-ħajja fl-‘irxoxt tan-nies li m’humiex sewwa’ se jkollhom isimhom miktub fir-“romblu tal-ħajja” biss jekk jaġixxu fi qbil maʼ “dak li kien miktub fir-rombli” taʼ istruzzjonijiet li jinfetħu matul il-Millennju. Madankollu, l-ismijiet ma jinkitbux b’linka li ma titħassarx. L-ismijiet tal-midlukin isiru permanenti meta huma jagħtu prova tal-fedeltà tagħhom sal-mewt. (Riv. 3:5) L-ismijiet taʼ dawk li jirċievu l-ħajja fuq l-art isiru permanenti meta jgħaddu mill-prova finali fi tmiem l-elf sena.—Riv. 20:7, 8.
Lezzjonijiet Għalina
17:3, 5, 7, 16. “L-għerf li ġej minn fuq” jgħinna nifhmu “l-misteru tal-mara u tal-bhima salvaġġa [lewn l-iskarlat] li qed iġġorrha.” (Ġak. 3:17) Din il-bhima salvaġġa simbolika bdiet bħala l-Lega tan-Nazzjonijiet u iktar tard reġgħet ħadet il-ħajja bħala l-Ġnus Magħquda. M’għandux il-fatt li nistgħu nifhmu dan il-misteru jqanqalna biex inkunu żelużi fl-ippridkar taʼ l-aħbar tajba tas-Saltna t’Alla u nipproklamaw jum il-ġudizzju taʼ Ġeħova?
21:1-6. Aħna nistgħu nkunu assolutament ċerti li l-barkiet li kienu mbassrin taħt il-ħakma tas-Saltna se jsiru realtà. Għala? Għaliex dwarhom jintqal: “Dan seħħ!”
22:1, 17. Ix-“xmara taʼ ilma tal-ħajja” tirrappreżenta l-provvedimenti taʼ Ġeħova biex jeħles lill-bnedmin ubbidjenti mid-dnub u l-mewt. Ftit minn dan l-ilma huwa disponibbli issa. Jalla aħna mhux biss naċċettaw bi gratitudni l-istedina biex niġu u ‘nieħdu l-ilma tal-ħajja b’xejn,’ imma wkoll nistiednu bil-ħeġġa lil oħrajn biex jagħmlu l-istess!
[Noti taʼ taħt]
a Għal diskussjoni taʼ Rivelazzjoni 1:1–12:17, ara “Punti Prinċipali mill-Ktieb tar-Rivelazzjoni—I” fil-ħarġa tat-Torri taʼ l-Għassa tal-15 taʼ Jannar, 2009.
b Għal konsiderazzjoni vers b’vers tal-ktieb tar-Rivelazzjoni, ara l-ktieb Revelation—Its Grand Climax At Hand!
[Stampa f’paġna 5]
X’barkiet meraviljużi se jesperjenzaw il-bnedmin ubbidjenti taħt il-ħakma tas-Saltna!