“Qorob it-​tmiem taʼ kollox. . . . Oqogħdu attenti u tittraskurawx it-​talb.”—1 PT. 4:7.

1. X’kienet it-​tema tat-​tagħlim taʼ Ġesù?

 META Ġesù Kristu kien fuq l-​art, it-​tema tat-​tagħlim tiegħu kienet is-​Saltna t’Alla. Permezz taʼ dik is-​Saltna, Ġeħova se jivvindika s-​sovranità universali tiegħu u se jqaddes ismu. B’hekk, Ġesù għallem lid-​dixxipli tiegħu biex jitolbu lil Alla: “Ħa tiġi saltnatek. Ħa jkun li trid int, kif fis-​sema, ukoll fuq l-​art.” (Mt. 4:17; 6:9, 10) Dak il-​gvern tas-​Saltna dalwaqt se jtemm id-​dinja taʼ Satana u mbagħad se jara li ssir ir-​rieda t’Alla maʼ l-​art kollha. Bħalma bassar Danjel, is-​Saltna t’Alla “se tfarrak u ttemm dawn is-​saltniet kollha [taʼ llum], u hi tibqaʼ wieqfa għal dejjem.”—Dan. 2:44.

2. (a) Is-​segwaċi taʼ Ġesù kif kellhom ikunu jafu li kien preżenti fil-​qawwa tas-​Saltna? (b) Is-​sinjal x’kellu jindika wkoll?

² Minħabba li l-​miġja tas-​Saltna t’Alla kienet importanti ħafna għas-​segwaċi taʼ Ġesù, huma staqsewh: “X’se jkun is-​sinjal tal-​preżenza tiegħek u tal-​konklużjoni tas-​sistema?” (Mt. 24:3) Kien se jingħata sinjal viżibbli minħabba l-​fatt li l-​preżenza taʼ Kristu fil-​qawwa tas-​Saltna kellha tkun inviżibbli għal dawk fuq l-​art. Dan is-​sinjal kellu jkun kompost minn diversi karatteristiki mbassrin fl-​Iskrittura. Għaldaqstant, is-​segwaċi taʼ Ġesù li kellhom ikunu ħajjin dak iż-​żmien kienu se jindunaw li hu kien beda jaħkem fis-​sema. Kien se jimmarka wkoll il-​bidu tal-​perijodu taʼ żmien li fil-​Bibbja huwa magħruf bħala l-​“aħħar jiem” tas-​sistema mill-​agħar li issa qed tiddomina lill-​art.—2 Tim. 3:1-5, 13; Mt. 24:7-14.

Oqgħod Attent fl-​Aħħar Jiem

3. Il-​Kristjani għala kellhom bżonn joqogħdu attenti?

³ L-​appostlu Pietru kiteb: “Qorob it-​tmiem taʼ kollox. Għalhekk, kunu moħħkom f’loku, u oqogħdu attenti u tittraskurawx it-​talb.” (1 Pt. 4:7) Is-​segwaċi taʼ Ġesù kellhom bżonn joqogħdu attenti, għassa għal ġrajjiet  tad-​dinja li jindikaw li kien preżenti fil-​qawwa tas-​Saltna. U iktar ma joqrob it-​tmiem taʼ din is-​sistema mill-​agħar, iktar kien se jkun urġenti li joqogħdu attenti. Ġesù qal lid-​dixxipli tiegħu: “Ibqgħu għassa, għax ma tafux meta ġej sid id-​dar [biex jesegwixxi ġudizzju fuq id-​dinja taʼ Satana].”—Mk. 13:35, 36.

4. Uri l-​kuntrast li hemm bejn l-​attitudni tan-​nies li huma parti mid-​dinja taʼ Satana u dik tal-​qaddejja taʼ Ġeħova. (Inkludi l-​kaxxa.)

⁴ In-​nies in ġenerali huma dominati minn Satana, u ma joqogħdux għassa għas-​sinifikat tal-​ġrajjiet dinjin. Ma jindunawx bil-​preżenza taʼ Kristu fil-​qawwa tas-​Saltna. Imma s-​segwaċi veri taʼ Kristu qagħdu attenti u indunaw bis-​sinifikat veru taʼ dak li ġara fl-​aħħar seklu. Mill-​1925 ’l hawn, ix-​Xhieda taʼ Ġeħova rrikonoxxew li l-​ewwel gwerra dinjija u l-​ġrajjiet li ġew wara huma evidenza ċerta li l-​preżenza taʼ Kristu fil-​qawwa tas-​Saltna fis-​sema bdiet fl-​1914. B’hekk, kienu bdew l-​aħħar jiem taʼ din is-​sistema mill-​agħar taħt il-​ħakma taʼ Satana. Ħafna nies li josservaw, għalkemm ma jafux is-​sinifikat, jirrikonoxxu d-​differenza drammatika bejn il-​perijodu qabel l-​ewwel gwerra dinjija u l-​perijodu minn dakinhar ’l hawn.—Ara l-​kaxxa  “Iż-​Żmien taʼ Taqlib Beda.”

5. Għala huwa vitali li nibqgħu noqogħdu attenti?

⁵ Għal kważi seklu issa, ġrajjiet li jkexkxu u li seħħew madwar id-​dinja huma evidenza li qed ngħixu fl-​aħħar jiem. Fadal biss ftit żmien qabel ma Ġeħova jagħti l-​kmand lil Kristu biex imexxi l-​forzi anġeliċi qawwijin kontra d-​dinja taʼ Satana. (Riv. 19:11-21) Il-​Kristjani veri jintqalilhom biex jibqgħu għassa. Għaldaqstant huwa urġenti li nibqgħu nagħmlu dan hekk kif nistennew it-​tmiem taʼ din is-​sistema. (Mt. 24:42) Irridu nibqgħu għassa, u fi qbil mad-​direzzjoni taʼ Kristu, għandna nwettqu xogħol speċifiku madwar l-​art kollha.

Xogħol Madwar l-​Art Kollha

6, 7. Ix-​xogħol taʼ l-​ippridkar tas-​Saltna kif avanza matul l-​aħħar jiem?

⁶ Ix-​xogħol li jridu jagħmlu l-​qaddejja taʼ  Ġeħova ġie mbassar bħala li hu parti mis-​sinjal kompost li jindika li qegħdin fl-​aħħar jiem taʼ din is-​sistema mill-​agħar. Ġesù ddeskriva dan ix-​xogħol globali meta semma lista taʼ diversi affarijiet li kellhom jiġru fiż-​żmien tat-​tmiem. Inkluża fil-​profezija tiegħu kien hemm din l-​istqarrija sinifikanti: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.”—Mt. 24:14.

⁷ Aħseb dwar ftit mill-​fatti relatati maʼ dan id-​dettall tal-​profezija taʼ Ġesù. In-​numru taʼ nies li pproklamaw l-​aħbar tajba kien żgħir ħafna meta bdew l-​aħħar jiem fl-​1914. S’issa, dak in-​numru kiber ħafna. Hemm iktar minn 7,000,000 Xhud taʼ Ġeħova jippridkaw madwar l-​art kollha, organizzati f’iktar minn 100,000 kongregazzjoni. Barra minn dawn, fl-​2008, 10,000,000 ruħ oħra nġabru max-​Xhieda taʼ Ġeħova għall-​okkażjoni tat-​Tifkira tal-​mewt taʼ Kristu. Din kienet żjieda sinifikanti fl-​attendenza fuq is-​sena taʼ qabel.

8. L-​oppożizzjoni għala ma waqqfitx l-​ippridkar tagħna milli jkollu suċċess?

⁸ X’xiehda mill-​aqwa dwar is-​Saltna t’Alla qed tingħata fil-​ġnus kollha qabel jiġi t-​tmiem taʼ din is-​sistema! U dan qed iseħħ minkejja l-​fatt li Satana huwa “l-​alla taʼ din is-​sistema.” (2 Kor. 4:4) L-​elementi politiċi, reliġjużi, u kummerċjali kollha taʼ din id-​dinja kif ukoll il-​mezzi tagħha biex ixxerred il-​propaganda qed jiġu influwenzati minnu. Mela, xi jwassal għas-​suċċess mill-​aqwa tax-​xogħol taʼ l-​għoti taʼ xiehda? Huwa l-​appoġġ taʼ Ġeħova. B’hekk, ix-​xogħol taʼ l-​ippridkar tas-​Saltna għadu għaddej b’mod meraviljuż minkejja l-​attentati taʼ Satana biex iwaqqfu.

9. Il-​prosperità spiritwali għala tistaʼ tissejjaħ miraklu?

⁹ Is-​suċċess tax-​xogħol taʼ l-​ippridkar tas-​Saltna u ż-​żjieda u l-​prosperità spiritwali tal-​poplu taʼ Ġeħova jistgħu jiġu deskritti bħala miraklu. Mingħajr l-​appoġġ t’Alla, li jinkludi l-​gwida u l-​protezzjoni li jagħti lill-​poplu tiegħu, ix-​xogħol taʼ l-​ippridkar ma jkunx  possibbli. (Aqra Mattew 19:26.) Nistgħu nibqgħu ċerti li sakemm l-​ispirtu qaddis t’Alla jaħdem fil-​qlub taʼ wħud li huma attenti u li huma lesti li jaqdu, dan ix-​xogħol taʼ l-​ippridkar se jibqaʼ għaddej u jkollu konklużjoni taʼ suċċess, “u mbagħad jiġi t-​tmiem.” Dan iż-​żmien riesaq bil-​ħeffa.

‘It-​Tribulazzjoni l-​Kbira’

10. Ġesù kif iddeskrivieha t-​tribulazzjoni l-​kbira li ġejja?

¹⁰ It-​tmiem taʼ din is-​sistema mill-​agħar se jiġi f’dik li tissejjaħ ‘it-​tribulazzjoni l-​kbira.’ (Riv. 7:14) Il-​Bibbja ma tgħidilniex kemm se ddum din, imma Ġesù qal: “Imbagħad ikun hemm tribulazzjoni kbira li qatt ma kien hawn bħalha mill-​bidu tad-​dinja s’issa, le, lanqas jerġaʼ jkun hawn.” (Mt. 24:21) Meta nikkunsidraw it-​tribulazzjoni li din id-​dinja diġà esperjenzat, bħalma ġara fit-​tieni gwerra dinjija meta mietu madwar 50 sa 60 miljun ruħ, it-​tribulazzjoni l-​kbira li ġejja se tkun ħarxa ferm tabilħaqq. Se tilħaq il-​quċċata tagħha fil-​battalja t’Armageddon. Dan se jseħħ meta Ġeħova se jibgħat lill-​forzi tiegħu biex jagħmlu esekuzzjoni ħalli jeqirdu kull traċċa tas-​sistema dinjija taʼ Satana.—Riv. 16:14, 16.

11, 12. Liema ġrajja se tindika li t-​tribulazzjoni l-​kbira tkun bdiet?

¹¹ Il-​profezija Biblika ma tgħidx x’inhi d-​data taʼ meta se tibda l-​ewwel fażi tat-​tribulazzjoni l-​kbira, imma fil-​fatt tgħidilna liema ġrajja straordinarja se tindika l-​bidu tagħha. Din il-​ġrajja hija l-​qerda tar-​reliġjon falza kollha mill-​qawwiet politiċi. Fil-​profeziji Bibliċi misjubin f’Rivelazzjoni kapitli 17 u 18, ir-​reliġjon falza hija mxebbha maʼ prostituta li kellha relazzjoni immorali mas-​sistemi politiċi taʼ l-​art. Rivelazzjoni 17:16 juri li ż-​żmien dalwaqt jiġi meta dawn l-​elementi politiċi “se jobogħdu lill-​prostituta u jħarbtuha u jneżżgħuha, u jiklulha laħamha u jaħarquha għalkollox bin-​nar.”

¹² Meta jasal iż-​żmien biex dan iseħħ, Alla se ‘jdaħħlilhom fi qlubhom [lill-ħakkiema politiċi] li jwettqu l-​ħsieb tiegħu’ biex jeqirdu lir-​reliġjon falza kollha. (Riv. 17:17) Għalhekk, jistaʼ jingħad li din il-​qerda ġejja minn Alla. Hija l-​ġudizzju tiegħu kontra r-​reliġjon ipokrita li għal żmien twil għallmet duttrini li huma kontra r-​rieda t’Alla u li ppersegwitat lill-​qaddejja tiegħu. Id-​dinja in ġenerali m’hijiex qed tistenna din il-​qerda li ġejja fuq ir-​reliġjon falza. Imma l-​qaddejja leali taʼ Ġeħova iva. U matul dawn l-​aħħar jiem, huma għadhom qed jgħidu lin-​nies dwarha.

13. X’jindika li t-​tmiem tar-​reliġjon falza se jseħħ malajr?

¹³ Se jkun xokk kbir għan-​nies meta jaraw ir-​reliġjon falza meqruda. Il-​profezija tal-​Bibbja turi li saħansitra xi wħud mis-​“slaten taʼ l-​art” se jiddikjaraw dwar din il-​qerda: “Jaħasra, jaħasra, . . . għax f’siegħa waħda wasal il-​ġudizzju tiegħek!” (Riv. 18:9, 10, 16, 19) Meta l-​Bibbja tuża l-​kliem “siegħa waħda” turi li din il-​ġrajja se sseħħ relattivament malajr.

14. Meta l-​għedewwa taʼ Ġeħova finalment iduru kontra l-​qaddejja tiegħu, Alla kif se jirreaġixxi?

¹⁴ Aħna nafu li ftit wara li tkun inqerdet ir-​reliġjon falza se jkun hemm attakk fuq il-​qaddejja taʼ Ġeħova, li kienu u għadhom qed jipproklamaw il-​messaġġi taʼ ġudizzju tiegħu. (Eżek. 38:14-16) Meta jibda dan l-​attakk, dawk li jattakkaw se jkollhom iħabbtu wiċċhom maʼ Ġeħova, li jwiegħed li se jipproteġi lill-​poplu leali tiegħu. Ġeħova jiddikjara: “Fil-​ħeġġa  tiegħi, fin-​nar tal-​qilla tiegħi, se jkolli nitkellem. . . . U se jkollhom ikunu jafu li jien Ġeħova.” (Aqra Eżekjel 38:18-23.) Alla jgħid fil-​Kelma tiegħu: “Dak li qed imisskom [il-qaddejja leali tiegħu] qed imiss il-​mimmi t’għajnejja.” (Żakk. 2:8) Għalhekk, meta l-​għedewwa tiegħu jibdew l-​attakk globali tagħhom kontra l-​qaddejja tiegħu, Ġeħova se jirreaġixxi. Hu se jieħu azzjoni li se twassal għall-​fażi finali tat-​tribulazzjoni l-​kbira—il-​quċċata tagħha, Armageddon. Taħt il-​kmand taʼ Kristu, il-​forzi anġeliċi qawwijin se jesegwixxu l-​ġudizzji taʼ Ġeħova kontra d-​dinja taʼ Satana.

Kif Għandna Niġu Effettwati

15. Kif għandna niġu effettwati mill-​fatt li nafu li qorob it-​tmiem taʼ din is-​sistema?

¹⁵ Kif għandu jeffettwana l-​fatt li nafu li t-​tmiem taʼ din is-​sistema mill-​agħar riesaq bil-​ħeffa? L-​appostlu Pietru kiteb: “Ladarba dawn kollha għad idubu b’dan il-​mod, oqogħdu attenti x’tip taʼ persuni għandkom tkunu f’dawk li huma atti taʼ kondotta qaddisa u għemejjel taʼ devozzjoni lejn Alla”! (2 Pt. 3:11) Dan il-​kliem jenfasizza li għandna bżonn nibqgħu għassa sabiex inkunu ċerti li l-​kondotta tagħna hi fi qbil mal-​ħtiġijiet t’Alla u li l-​ħajja tagħna tinkludi għemejjel taʼ devozzjoni lejn Alla, li jirriflettu l-​imħabba tagħna għal Ġeħova. Għemejjel bħal dawn jinkludu li nagħmlu l-​aħjar li nistgħu fl-​ippridkar taʼ l-​aħbar it-​tajba tas-​Saltna qabel jiġi t-​tmiem. Pietru kiteb ukoll: “Qorob it-​tmiem taʼ kollox. . . . Oqogħdu attenti u tittraskurawx it-​talb.” (1 Pt. 4:7) Jekk induru lejn Ġeħova bit-​talb il-​ħin kollu, billi nitolbuh jagħtina l-​gwida permezz taʼ l-​ispirtu qaddis tiegħu u l-​kongregazzjoni tiegħu taʼ madwar id-​dinja, aħna se nersqu qrib Ġeħova u se nuru li nħobbuh.

16. Għala hemm bżonn li nżommu mill-​qrib mal-​pariri t’Alla?

¹⁶ F’dawn iż-​żminijiet perikolużi, hemm bżonn li nżommu mill-​qrib mal-​pariri tal-​Kelma t’Alla: “Oqogħdu attenti bis-​sħiħ li ma timxux bħal nies bla għaqal imma bħal nies għorrief, u użaw il-​ħin bl-​aħjar mod, għax il-​jiem huma ħżiena.” (Efes. 5:15, 16) Illum il-​ġurnata hawn iktar ħażen milli qatt kien hawn f’xi żmien ieħor fl-​istorja. Satana vvinta ħafna affarijiet biex iżomm lin-​nies milli jagħmlu r-​rieda taʼ Ġeħova jew sempliċement biex jaljenahom. Bħala qaddejja t’Alla, aħna dan nafuh, u ma rridu nħallu xejn idgħajjef il-​lealtà tagħna lejn Alla. Nafu wkoll dak li se jiġri dalwaqt, u aħna npoġġu l-​fiduċja tagħna f’Ġeħova u l-​iskopijiet tiegħu.—Aqra l-​1 Ġwanni 2:15-17.

17. Iddeskrivi kif se jirreaġixxu dawk li jibqgħu ħajjin wara Armageddon meta jseħħ l-​irxoxt.

¹⁷ Il-​wegħda meraviljuża li Alla se jġib lill-​mejtin lura għall-​ħajja se sseħħ, għax “se jkun hemm irxoxt kemm tan-​nies sewwa u kemm taʼ dawk li m’humiex sewwa.” (Atti 24:15) Innota x’enfasi hemm f’din il-​wegħda: “Se jkun hemm irxoxt”! M’hemm l-​ebda dubju dwarha, għax Ġeħova ta kelmtu! Isaija 26:19 iwiegħed: “Il-​mejtin tiegħek se jgħixu. . . . Stenbħu u għajtu bil-​ferħ, O residenti tat-​trab! . . . L-​art se tħalli jitwieldu lil dawk bla qawwa fil-​mewt.” Dan il-​kliem kellu l-​ewwel twettiq meta l-​poplu t’Alla tal-​qedem mar lura f’art twelidu, u jagħtina fiduċja fit-​twettiq letterali li ġej fid-​dinja l-​ġdida. X’ferħ kbir se jkun hemm hekk kif dawk li jiġu rxoxtati jerġgħu jingħaqdu mal-​maħbubin tagħhom! Iva, it-​tmiem tad-​dinja taʼ Satana huwa fil-​qrib, u d-​dinja l-​ġdida t’Alla hija qrib ferm. Kemm hu vitali li nibqgħu attenti!

Tiftakar Int?

• X’kienet it-​tema tat-​tagħlim taʼ Ġesù?

• Kemm hu mifrux illum ix-​xogħol taʼ l-​ippridkar tas-​Saltna?

• Għala huwa vitali li noqogħdu attenti?

• Xi ssib inkuraġġanti dwar il-​wegħda li hemm f’Atti 24:15?

[Mistoqsijiet taʼ Studju]

[Kaxxa/​Stampa f’paġna 16, 17]

 IŻ-​ŻMIEN TAʼ TAQLIB BEDA

The Age of Turbulence: Adventures in a New World huwa t-​titlu taʼ ktieb maħruġ fl-​2007, miktub minn Alan Greenspan. Għal kważi 20 sena, hu kien chairman tal-​Bord tar-​Riserva Federali taʼ l-​Istati Uniti, li jieħu ħsieb is-​sistema bankarja ċentrali kollha taʼ dan il-​pajjiż. Greenspan jiġbed l-​attenzjoni lejn il-​kuntrast qawwi li hemm bejn is-​sitwazzjoni tad-​dinja taʼ qabel l-​1914 u dak li ġie wara:

“Mir-​rakkonti kontemporanji kollha, id-​dinja taʼ qabel l-​1914 kienet tidher li kienet dejjem riesqa lejn livelli ogħla taʼ ċiviltà u ċivilizzazzjoni; is-​soċjetà umana kienet tidher li riesqa lejn il-​perfezzjoni. Is-​seklu dsatax kien temm l-​ittraffikar kiefer taʼ l-​iskjavi. Il-​vjolenza brutali kienet tidher li qed tonqos. . . . Il-​pass taʼ l-​invenzjonijiet madwar id-​dinja kien avanza matul is-​seklu dsatax, u dan ġab miegħu l-​ferrovija, it-​telefon, id-​dawl elettriku, iċ-​ċinema, il-​karozza, u l-​kumditajiet tad-​dar li huma numerużi ħafna biex issemmihom kollha. Ix-​xjenza medika, l-​ikel aħjar, u t-​tqassim iktar mifrux taʼ ilma tajjeb għax-​xorb kien tawwal it-​tul tal-​ħajja . . . Kulħadd kien iħoss li dan il-​progress kien se jibqaʼ sejjer.”

Imma . . . “L-​ewwel gwerra dinjija ħarbtet iċ-​ċiviltà u ċ-​ċivilizzazzjoni iktar mit-​tieni gwerra dinjija li fiżikament kienet ferm iktar qerrieda: l-​ewwel gwerra qerdet idea. Ma nistax inneħħi minn moħħi dawk is-​snin taʼ qabel l-​ewwel gwerra dinjija, meta l-​futur taʼ l-​umanità kien jidher li hu mingħajr xkiel u mingħajr limitu. Illum il-​ħarsa tagħna hija ħafna differenti minn dik taʼ seklu ilu imma naħseb li taqbel ftit iktar mar-​realtà. Sejrin il-​biżaʼ, is-​sħana globali, jew il-​populiżmu, li qed jerġaʼ jidher, ikollhom l-​istess effett fuq l-​era taʼ llum tal-​globalizzazzjoni li qed iġġib progress fil-​ħajja, bħalma kellha l-​ewwel gwerra dinjija fuq l-​era taʼ qabel? Ħadd ma jistaʼ jkun ċert mit-​tweġiba.”

Greenspan ftakar, minn meta kien għadu student, stqarrija li kienet saret mill-​Professur taʼ l-​Ekonomija Benjamin M. Anderson (1886-1949): “Dawk li huma kbar biżżejjed fl-​età biex jiftakru u jifhmu kif kienet id-​dinja qabel l-​ewwel gwerra dinjija jħarsu lura lejha b’nostalġija kbira. Dak iż-​żmien kien hemm sens taʼ sigurtà li qatt ma reġaʼ eżista minn dakinhar ’l hawn.”—Economics and the Public Welfare.

G. J. Meyer, li kiteb il-​ktieb A World Undone, pubblikat fl-​2006, wasal għall-​istess konklużjoni. Naqraw: “Spiss jingħad li l-​ġrajjiet storiċi ‘biddlu kollox.’ Fil-​każ tal-​Gwerra l-​Kbira [1914-1918] dan, għal darba, huwa minnu. Il-​gwerra fil-​veru sens tal-​kelma biddlet kollox: mhux biss il-​fruntieri, mhux biss il-​gvernijiet u d-​destin tal-​ġnus, imma wkoll il-​mod kif in-​nies qiesu d-​dinja u lilhom infushom minn dakinhar ’l hawn. Saret bħal qasma fl-​istorja, li ħalliet id-​dinja taʼ wara l-​gwerra maqtugħa b’mod permanenti minn dak kollu li kien ġie qabel.”

[Stampa f’paġna 18]

F’Armageddon, Ġeħova se jibgħat forzi anġeliċi qawwijin