META Ġeħova jtemm din is-​sistema mill-​agħar f’Armageddon, x’se jiġrilhom l-​individwi retti? Proverbji 2:21, 22 iwieġeb: “Huma r-​retti li se jgħammru fuq l-​art, u dawk bla ħtija se jibqgħu fiha. Rigward in-​nies mill-​agħar, dawn se jitqaċċtu mill-​art; u t-​tradituri jinqalgħu minnha.”

Iżda, dawk bla ħtija kif se jibqgħu fl-​art? Se jkun hemm post taʼ refuġju għalihom? Fejn għandhom ikunu r-​retti meta jiġi t-​tmiem? Erbaʼ rakkonti Skritturali taʼ sopravivenza jixħtu dawl fuq dawn il-​kwistjonijiet.

Meta l-​Post Kien Importanti

Dwar il-​ħelsien tal-​patrijarki Noè u Lot, fit-​2 Pietru 2:5-7 naqraw: “[Alla] ma żammx lura milli jikkastiga dinja tal-​qedem, imma lil Noè, predikatur tal-​ġustizzja, żammu qawwi u sħiħ maʼ sebgħa oħrajn meta ġab dilluvju fuq dinja taʼ nies bla devozzjoni lejn Alla; u billi għamel irmied il-​bliet taʼ Sodoma u Gomorra, ikkundannahom, u b’hekk lill-​bnedmin bla devozzjoni lejn Alla ħallielhom mudell taʼ dak li għandu jiġri; u ħeles lil Lot, raġel sewwa li kien imnikket ferm bil-​kondotta laxka u bla rażan taʼ nies li kienu jisfidaw il-​liġi.”

Noè kif salva mid-​Dilluvju? Alla qal lil Noè: “Wasal quddiemi t-​tmiem tal-​bnedmin kollha, għaliex minħabba fihom l-​art imtliet bil-​vjolenza; hawn jien se neqridhom flimkien maʼ l-​art. Agħmel għalik arka mill-​injam tas-​siġra tar-​raża.” (Ġen. 6:13, 14) Noè bena l-​arka sewwasew bħalma kien ikkmandah Ġeħova. Sebat ijiem qabel ma beda d-​Dilluvju, Ġeħova qallu biex jiġbor l-​annimali fl-​arka u jidħol fiha flimkien man-​nies kollha taʼ daru. Fis-​sebaʼ jum, il-​bieb ngħalaq warajh, “u x-​xita bil-​qliel baqgħet nieżla fuq l-​art għal erbgħin jum u erbgħin lejl.” (Ġen. 7:1-4, 11, 12, 16) Noè u l-​familja tiegħu “nġarrew mill-​ilma u ġew salvati.” (1 Pt. 3:20) Is-​salvazzjoni tagħhom kienet tiddependi milli jkunu ġo l-​arka. Ebda post ieħor fuq l-​art ma setaʼ joffri sigurtà.—Ġen. 7:19, 20.

Fil-każ taʼ Lot, l-​istruzzjonijiet kienu kemxejn differenti. Żewġ anġli informawh dwar fejn ma kellux ikun. “Kulmin hu tiegħek fil-​belt [taʼ Sodoma],” qalu ż-​żewġ anġli lil Lot, ‘oħorġu minn dan il-​post! Għax dan il-​post se nagħmluh ħerba.’ Kellhom ‘jaħarbu lejn ir-​reġjun muntanjuż.’—Ġen. 19:12, 13, 17.

L-esperjenzi taʼ Noè u Lot juru li “Ġeħova jaf kif jeħles mill-​provi lil dawk li huma devoti lejh, imma jżomm lil dawk li huma inġusti għall-​qtugħ f’jum il-​ġudizzju.” (2 Pt. 2:9) F’dawn iż-​żewġ każi taʼ ħelsien, il-​post kien fattur deċiżiv. Noè kellu jidħol fl-​arka; Lot kellu joħroġ minn Sodoma. Imma dejjem hekk jiġri? Jistaʼ Ġeħova jsalva lill-​ġusti kulfejn ikunu, mingħajr ma jkollhom għalfejn imorru xi mkien ieħor? Biex inwieġbu din il-​mistoqsija, innota żewġ rakkonti oħrajn taʼ ħelsien.

Huwa l-​Post Dejjem Importanti?

Qabel ma Ġeħova għamel ħerba mill-​Eġittu billi bagħat l-​għaxar kastig fi żmien Mosè, Hu kkmanda lill-​Israelin biex iroxxu d-​demm taʼ l-​annimal tal-​Qbiż fuq il-​blata taʼ fuq il-​bieb u fuq il-​koxox tal-​bieb tad-​djar tagħhom. Għala? Sabiex ‘meta Ġeħova jgħaddi biex jikkastiga lill-​Eġizzjani u jara d-​demm fuq il-​parti taʼ fuq tad-​daħla tal-​bieb u fuq iż-​żewġ koxox tal-​bieb, hu jaqbeż il-​bieb  u ma jħallix ir-​rovina tidħol fi djarhom biex jikkastigahom.’ Dak il-​lejl stess, “Ġeħova laqat lil kull l-​ewwel imwieled fl-​art taʼ l-​Eġittu, mill-​ewwel imwieled tal-​Fargħun, bil-​qiegħda fuq it-​tron tiegħu, sa l-​ewwel imwieled taʼ l-​ilsir, li kien fil-​ħofra fil-​ħabs, u lil kull l-​ewwel imwieled tal-​bhejjem.” Ħadd mill-​ewwel imweldin taʼ l-​Israelin ma kellu għalfejn imur xi mkien ieħor biex jiġi salvat.—Eżo. 12:22, 23, 29.

Ikkunsidra wkoll il-​każ taʼ Raħab, prostituta li kienet tgħix fil-​belt taʼ Ġeriko. L-​Israelin kienu se jibdew il-​konkwista tagħhom taʼ l-​Art Imwiegħda. Meta Raħab irrealizzat li Ġeriko kienet kundannata, hi qalet liż-​żewġ spiji Israelin li l-​belt kienet paralizzata bil-​biżaʼ mill-​Israelin li kienu qed javanzaw. Hi ħbiet lill-​ispiji u talbithom jaħilfulha li hi u l-​familja tagħha kollha kemm hi jibqgħu ħajjin meta tiġi mirbuħa Ġeriko. L-​ispiji qalu lil Raħab biex tiġbor flimkien lill-​familja tagħha ġo darha, li kienet fuq is-​sur tal-​belt. Jekk jitilqu mid-​dar ikun ifisser qerda għalihom mal-​bqija tal-​belt. (Ġoż. 2:8-13, 15, 18, 19) Madankollu, iktar tard Ġeħova qal lil Ġożwè li “s-​sur tal-​belt [irid] jaqaʼ ċatt maʼ l-​art.” (Ġoż. 6:5) Dak li l-​ispiji kienu qalu li hu l-​post taʼ sigurtà issa kien jidher li qiegħed fil-​periklu. Raħab u n-​nies taʼ darha kif kellhom jinħelsu?

Meta wasal iż-​żmien biex tintrebaħ Ġeriko, l-​Israelin għajtu u daqqew il-​qarn. “Malli s-​suldati [taʼ Israel] semgħu l-​ħoss tal-​qarn u s-​suldati bdew jgħajtu għajta kbira tal-​gwerra,” jistqarr Ġożwè 6:20, “imbagħad is-​sur waqaʼ ċatt maʼ l-​art.” Ħadd ma setaʼ issa jikkontrolla l-​waqgħa tas-​sur. Iżda, b’mod mirakoluż, il-​waqgħa tas-​sur tal-​belt waqfet ħdejn id-​dar taʼ Raħab. Ġożwè ordna liż-​żewġ spiji: “Morru fid-​dar tal-​mara, il-​prostituta, u oħorġu minn hemmhekk lill-​mara u lil dawk kollha li huma tagħha, sewwasew bħalma ħliftulha.” (Ġoż. 6:22) Kulħadd fid-​dar taʼ Raħab ġie salvat.

X’Kien Jgħodd l-​Iktar?

X’nistgħu nitgħallmu mill-​ħelsien taʼ Noè, Lot, l-​Israelin fi żmien Mosè, u Raħab? Dawn ir-​rakkonti kif jgħinuna niddeterminaw fejn għandna nkunu meta jiġi t-​tmiem taʼ din is-​sistema mill-​agħar?

Huwa minnu li Noè sab is-​salvazzjoni fl-​arka. Imma għala kien hemmhekk? Mhux għaliex eżerċita l-​fidi u kien ubbidjenti? “Noè għamel skond kulma kien ordnalu Alla,” tgħid il-​Bibbja. “Għamel preċiż hekk.” (Ġen. 6:22; Ebr. 11:7) Xi ngħidu għalina? Qegħdin aħna nagħmlu kulma kkmandana Alla? Noè kien ukoll “predikatur tal-​ġustizzja.” (2 Pt. 2:5) Żelużi aħna bħalu fix-​xogħol  taʼ l-​ippridkar, anki jekk in-​nies fit-​territorju tagħna ma jwiġbux favorevolment?

Lot skansa l-​qerda billi ħarab minn Sodoma. Hu baqaʼ ħaj għax kien ġust f’għajnejn Alla u kien imnikket ferm minħabba l-​kondotta laxka tan-​nies taʼ Sodoma u Gomorra li kienu jisfidaw il-​liġi. Tnikkitna tassew il-​kondotta laxka li llum tant hi komuni? Jew tant aħna mdorrijin biha li ma ddejjaqniex? Qegħdin aħna nagħmlu l-​almu kollu tagħna biex inkunu “bla tebgħa u bla difett u fil-​paċi”?—2 Pt. 3:14.

Għall-Israelin fl-​Eġittu u għal Raħab f’Ġeriko, il-​ħelsien kien jiddependi milli jibqgħu fi djarhom. Dan kien jirrikjedi fidi u ubbidjenza. (Ebr. 11:28, 30, 31) Immaġina kif kull familja Israelija ma qalgħetx għajnejha minn fuq l-​ewwel imwieled tagħha hekk kif “beda jinstemaʼ għajat kbir” f’dar Eġizzjana waħda wara l-​oħra. (Eżo. 12:30) Immaġina kif tgeddset Raħab mal-​familja tagħha hekk kif ħasset l-​irbombjar tas-​swar taʼ Ġeriko li kienu qed jaqgħu riesaq eqreb u eqreb. Min-​naħa tagħha kellha bżonn fidi vera biex tibqaʼ ubbidjenti u tibqaʼ f’dik id-​dar.

Dalwaqt jasal it-​tmiem għad-​dinja mill-​agħar taʼ Satana. Kif Ġeħova se jipproteġi lill-​poplu tiegħu “f’jum ir-​rabja” tiegħu li jqanqal il-​biżaʼ, għadna ma nafux. (Sof. 2:3) Madankollu, inkunu fejn inkunu u tkun xi tkun is-​sitwazzjoni tagħna f’dak iż-​żmien, nistgħu nkunu ċerti li s-​sopravivenza tagħna se tkun tiddependi mill-​fidi tagħna f’Ġeħova u mill-​ubbidjenza tagħna lejh. Sadanittant, għandna nikkultivaw attitudni xierqa lejn dawk li l-​profezija taʼ Isaija tirreferi għalihom bħala l-​“kmamar taʼ ġewwa” tagħna.

“Idħol fil-​Kmamar taʼ Ġewwa Tiegħek”

“Mur, poplu tiegħi, idħol fil-​kmamar taʼ ġewwa tiegħek, u agħlaq il-​bibien tiegħek warajk,” jistqarr Isaija 26:20. “Inħeba għal mument wieħed sakemm tgħaddi l-​kundanna.” Jistaʼ jkun li din il-​profezija kellha l-​ewwel twettiq tagħha fis-​sena 539 Q.E.K. meta l-​Medi u l-​Persjani rebħu lil Babilonja. Malli daħal Babilonja, Ċiru l-​Persjan milli jidher ikkmanda lil kulħadd biex jibqaʼ ġewwa għaliex is-​suldati tiegħu kienu ordnati biex joqtlu lil kulmin isibu barra.

Fi żmienna, il-​“kmamar taʼ ġewwa” taʼ din il-​profezija jistgħu jkunu assoċjati mill-​qrib maʼ l-​iktar minn 100,000 kongregazzjoni tax-​Xhieda taʼ Ġeħova madwar id-​dinja. Dawn il-​kongregazzjonijiet għandhom irwol importanti f’ħajjitna. U se jkompli jkollhom irwol importanti matul it-​“tribulazzjoni l-​kbira.” (Riv. 7:14) Il-​poplu t’Alla hu kmandat biex jidħol “fil-​kmamar taʼ ġewwa” tiegħu u jinħeba “sakemm tgħaddi l-​kundanna.” Huwa vitali li niżviluppaw u nżommu attitudni tajba lejn il-​kongregazzjoni u nkunu deċiżi b’mod sod li nibqgħu fi sħubija mill-​qrib magħha. Għandna nieħdu bis-​serjetà t-​twissija taʼ Pawlu: “Ħa nagħtu kas xulxin biex nitqanqlu għall-​imħabba u l-​għemejjel tajbin, u ma nabbandunawx il-​laqgħat tagħna flimkien, bħalma ħaduha drawwa jagħmlu xi wħud, imma ninkuraġġixxu lil xulxin, u dan iktar u iktar hekk kif [naraw] joqrob il-​jum.”—Ebr. 10:24, 25.

[Stampi f’paġna 7]

X’nistgħu nitgħallmu mill-​atti taʼ ħelsien t’Alla fil-​passat?

[Stampa f’paġna 8]

Fi żmienna, il-​“kmamar taʼ ġewwa” maʼ xiex jistgħu jkunu assoċjati?