“Jekk xi ħadd irid jiġi warajja, ħa jiċħad lilu nnifsu . . . u jibqaʼ miexi warajja.”—LQ. 9:23.

1, 2. Għala hu importanti għalina li nikkunsidraw għala għandna nimxu wara “l-​Kristu”?

 MIN jaf kemm jitgħaxxaq Ġeħova meta jara fost il-​qtajjiet miġburin flimkien t’aduraturi tiegħu fuq l-​art lilkom il-​ġodda li qed turu interess u lilkom iż-​żgħażagħ! Hekk kif tkomplu tistudjaw il-​Bibbja, tattendu l-​laqgħat Kristjani regolarment, u tikbru fl-​għarfien tagħkom dwar il-​verità li ssalva l-​ħajja u li tinsab fil-​Kelma t’Alla, għandkom bżonn tieħdu bis-​serjetà din l-​istedina taʼ Ġesù: “Jekk xi ħadd irid jiġi warajja, ħa jiċħad lilu nnifsu u jerfaʼ z-​zokk tat-​tortura tiegħu jum wara l-​ieħor u jibqaʼ miexi warajja.” (Lq. 9:23) Ġesù qed jgħid li l-​fatt li tiċħad lilek innifsek u ssir segwaċi tiegħu hu xi ħaġa li għandek tkun trid tagħmilha. Għalhekk, hu importanti għalina li nikkunsidraw għala għandna nimxu wara “l-​Kristu.”—Mt. 16:13-16.

² Xi ngħidu għal dawk minna li diġà qed jimxu wara l-​passi taʼ Ġesù Kristu? Aħna mħeġġin biex ‘inkomplu nagħmlu dan iktar bis-​sħiħ.’ (1 Tess. 4:1, 2) Sew jekk ħaddanna l-​qima vera dan l-​aħħar u sew jekk ħafna snin ilu, jekk nirriflettu dwar ir-​raġunijiet għala għandna nimxu wara l-​Kristu se niġu megħjunin napplikaw it-​twissija taʼ Pawlu u nimxu wara l-​Kristu dejjem iktar bis-​sħiħ fil-​ħajja tagħna taʼ kuljum. Ejja nikkunsidraw ħames raġunijiet għala għandna nkunu rridu nimxu wara l-​Kristu.

Biex Nersqu Eqreb Lejn Ġeħova

3. B’liema żewġ modi nistgħu nsiru nafu lil Ġeħova?

³ Meta indirizza lill-​Atenjani hekk kif ‘kien  wieqaf f’nofs l-​Arjopagu,’ l-​appostlu Pawlu qalilhom: “[Alla] b’digriet ordna ż-​żminijiet stabbiliti u l-​limiti fissi fejn jgħammru l-​bnedmin, biex huma jfittxu ’l Alla, jekk iteftfu fid-​dlam għalih u jirnexxilhom isibuh, għalkemm, fil-​fatt, m’huwiex ’il bogħod minn kull wieħed minna.” (Atti 17:22, 26, 27) Aħna nistgħu nfittxu lil Alla u tassew insiru nafuh. Per eżempju, il-​ktieb tal-​ħolqien fih volumi sħaħ dwar il-​kwalitajiet u l-​abbiltajiet t’Alla. Jekk nirriflettu b’apprezzament fuq l-​għemejjel taʼ ħolqien tiegħu nkunu nistgħu nitgħallmu ħafna dwar il-​Ħallieq. (Rum. 1:20) Ġeħova rrivela wkoll xi dettalji dwaru nnifsu fil-​Kelma miktuba tiegħu, il-​Bibbja. (2 Tim. 3:16, 17) Iktar ma ‘nimmeditaw fuq l-​attività tiegħu’ u ‘nikkunsidraw għemilu,’ iktar inkunu nistgħu nsiru nafu lil Ġeħova.—Salm 77:12.

4. Il-​fatt li nimxu wara l-​Kristu kif jistaʼ jgħinna nersqu eqreb lejn Ġeħova?

⁴ Wieħed mill-​aqwa modi biex tersaq saħansitra eqreb lejn Ġeħova hu li timxi wara l-​Kristu. Immaġina biss il-​glorja li kellu Ġesù maġenb Missieru “qabel ma kienet teżisti d-​dinja”! (Ġw. 17:5) Hu “l-​bidu tal-​ħolqien li għamel Alla.” (Riv. 3:14) Bħala “l-​ewwel imwieled mill-​ħolqien kollu,” hu għex għal żmien twil ħafna fis-​sema maʼ Missieru, Ġeħova. Matul l-​eżistenza tiegħu qabel ma sar bniedem, Ġesù għamel iktar milli sempliċement qattaʼ l-​ħin maʼ Missieru. Kien is-​sieħeb persunali t’Alla, jaħdem bil-​ferħ flimkien maʼ Dak li Jistaʼ Kollox, u fforma miegħu l-​iktar rabta b’saħħitha taʼ mħabba li qatt eżistiet. Ġesù mhux biss osserva l-​mod taʼ kif Missieru jagħmel l-​affarijiet, billi nnota s-​sentimenti u l-​attributi Tiegħu, imma wkoll assorba u adotta kulma tgħallem dwar Missieru. Minħabba f’hekk, dan l-​Iben ubbidjenti sar preċiż bħal Missieru—tant hu hekk li l-​Bibbja tirreferi għalih bħala “x-​xbieha t’Alla li ma jidhirx.” (Kol. 1:15) Billi nimxu mill-​qrib wara l-​Kristu, aħna nistgħu nersqu eqreb lejn Ġeħova.

Biex Nimitaw lil Ġeħova Iktar bis-​Sħiħ

5. X’se jgħinna nimitaw lil Ġeħova iktar bis-​sħiħ, u għala?

⁵ Aħna ‘magħmulin fix-​xbieha t’Alla, skond suritu,’ u għalhekk għandna l-​kapaċità li nirriflettu l-​attributi t’Alla. (Ġen. 1:26) L-​appostlu Pawlu ħeġġeġ lill-​Kristjani biex ‘jimitaw lil Alla, bħala wlied maħbubin.’ (Efes. 5:1) Jekk nimxu wara l-​Kristu niġu megħjunin biex nimitaw lil Missierna tas-​sema. Dan hu għaliex Ġesù rrifletta l-​ħsieb, is-​sentimenti, u l-​personalità t’Alla aħjar u ddeskrivieh iktar bis-​sħiħ milli setaʼ jagħmel xi ħadd ieħor. Meta kien fuq l-​art, Ġesù mhux biss għarraf l-​isem taʼ Ġeħova, imma wkoll irrivela l-​Persuna li dak l-​isem jirrappreżenta. (Aqra Mattew 11:27.) Ġesù għamel dan bil-​kliem u bl-​għemejjel tiegħu, bit-​tagħlim u bl-​eżempju tiegħu.

6. It-​tagħlim taʼ Ġesù x’jirrivela dwar Ġeħova?

 ⁶ Bit-​tagħlim tiegħu, Ġesù wera x’jirrikjedi minna Alla u kif iħossu dwar l-​aduraturi tiegħu. (Mt. 22:36-40; Lq. 12:6, 7; 15:4-7) Per eżempju, wara li kkwota wieħed mill-​Għaxar Kmandamenti—“tagħmilx adulterju”—Ġesù spjega l-​ħarsa t’Alla dwar dak li jiġri fil-​qalb taʼ bniedem ħafna qabel ma jikkommetti dan l-​att. Hu qal: “Kulmin jibqaʼ jħares lejn mara biex jixtieqha jkun diġà għamel adulterju magħha f’qalbu.” (Eżo. 20:14; Mt. 5:27, 28) Wara li stqarr l-​interpretazzjoni Fariżajka taʼ stqarrija li hemm fil-​Liġi—“ħobb lill-​proxxmu tiegħek u obgħod lill-​għadu tiegħek”—Ġesù għarraf il-​ħsieb taʼ Ġeħova, billi qal: “Komplu ħobbu lill-​għedewwa tagħkom u itolbu għal dawk li qed jippersegwitawkom.” (Mt. 5:43, 44; Eżo. 23:4; Lev. 19:18) Jekk nifhmu kif jaħseb u jħossu Alla u x’jirrikjedi minna se niġu megħjunin biex nimitawh iktar bis-​sħiħ.

7, 8. X’nitgħallmu dwar Ġeħova mill-​eżempju taʼ Ġesù?

⁷ Ġesù rrivela wkoll il-​personalità taʼ Missieru bl-​eżempju tiegħu. Meta naqraw fl-​Evanġelji li Ġesù kien iħoss il-​mogħdrija għal dawk fil-​bżonn, l-​empatija għal dawk li kienu jsofru, u l-​għadab għad-​dixxipli tiegħu li ċanfru lit-​tfal żgħar, ma nimmaġinawhx aħna lill-​Missier iħoss l-​istess emozzjonijiet? (Mk. 1:40-42; 10:13, 14; Ġw. 11:32-35) Immaġina kif l-​aġir taʼ Ġesù jitfaʼ dawl fuq l-​attributi kardinali t’Alla. Ma jurux il-​mirakli li wettaq Kristu l-​qawwa tremenda li kellu għad-​dispożizzjoni tiegħu? Madankollu, hu qatt m’uża dik il-​qawwa għall-​gwadann persunali tiegħu jew bl-​intenzjoni li jagħmel ħsara lil ħaddieħor. (Lq. 4:1-4) Kemm turi b’mod ċar is-​sens taʼ ġustizzja tiegħu l-​azzjoni li ħa meta xeħet lil merkanti rgħibin ’il barra mit-​tempju! (Mk. 11:15-17; Ġw. 2:13-16) It-​tagħlim tiegħu u l-​kliem ħelu li uża biex jilħaq il-​qlub tan-​nies jindikaw li hu kien “akbar minn Salamun” fl-​għerf. (Mt. 12:42) X’nistgħu ngħidu dwar l-​imħabba li wera Ġesù billi ċeda ruħu għan-​nom t’oħrajn ħlief li “ħadd m’għandu mħabba akbar minn din”?—Ġw. 15:13.

⁸ L-​Iben t’Alla tant irrappreżenta lil Ġeħova b’mod perfett f’kulma qal u għamel li setaʼ jgħid: “Min ra lili ra wkoll lill-​Missier.” (Aqra Ġwanni 14:9-11.) Il-​fatt li nimxu wara l-​Kristu huwa ugwali għal li nimitaw lil Ġeħova.

Ġesù Hu l-​Midluk taʼ Ġeħova

9. Ġesù meta u kif sar il-​Midluk t’Alla?

⁹ Ikkunsidra x’ġara fil-​ħarifa tas-​sena 29 E.K. meta Ġesù, li kellu 30 sena, mar għand Ġwanni l-​Għammied. “Wara li tgħammed, Ġesù minnufih telaʼ mill-​ilma; u, ara, is-​smewwiet infetħu, u hu ra l-​ispirtu t’Alla nieżel bħal ħamiema u ġej fuqu.” Dakinhar, hu sar il-​Kristu, jew Messija. Dakinhar, Ġeħova nnifsu għarraf li Ġesù kien il-​Midluk tiegħu, billi qal: “Dan hu Ibni, il-​maħbub, li lilu jien approvajt.” (Mt. 3:13-17) Kemm hi raġuni tajba din għalina biex inkunu rridu nimxu wara l-​Kristu!

10, 11. (a) It-​titlu “Kristu” b’liema modi jintuża b’referenza għal Ġesù? (b) Għala m’għandniex nonqsu li nimxu wara Ġesù Kristu?

¹⁰ Fil-​Bibbja, it-​titlu “Kristu” jintuża b’referenza għal Ġesù b’diversi modi, bħal per eżempju, Ġesù Kristu,  Kristu Ġesù, u l-​Kristu. Ġesù nnifsu kien l-​ewwel li uża t-​terminu “Ġesù Kristu”—l-​isem segwit mit-​titlu. Meta talab lil Missieru, hu qal: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.” (Ġw. 17:3) Dan l-​użu b’mod ċar jiġbed l-​attenzjoni lejn il-​wieħed li ntbagħat minn Alla u sar il-​Midluk tiegħu. Meta t-​titlu jitqiegħed qabel l-​isem, bħal fi “Kristu Ġesù,” l-​enfasi ma tibqax fuq il-​persuna imma tmur fuq il-​pożizzjoni, jew il-​kariga, li għandu. (2 Kor. 4:5) L-​użu taʼ l-​espressjoni “l-​Kristu,” it-​titlu bl-​artiklu definit quddiemu, hu mod ieħor kif tiġi enfasizzata l-​kariga taʼ Ġesù bħala l-​Messija.—Atti 5:42.

¹¹ Jintuża kif jintuża t-​titlu “Kristu” b’referenza għal Ġesù, jenfasizza din il-​verità importanti: Avolja l-​Iben t’Alla ġie fuq l-​art bħala bniedem u għarraf ir-​rieda taʼ Missieru, hu la kien bniedem ordinarju u lanqas sempliċement profeta; hu sar il-​Midluk taʼ Ġeħova. M’għandniex nonqsu li nimxu wara dan il-​Wieħed.

Ġesù Hu l-​Unika Triq għas-​Salvazzjoni

12. Liema stqarrija li saret lill-​appostlu Tumas għandha tifsir għalina?

¹² Raġuni vitali oħra biex nibqgħu mexjin wara l-​Messija tinsab fil-​kliem li qal Ġesù lill-​appostli leali tiegħu, kliem li ntqal ftit sigħat biss qabel ma miet. Biex iwieġeb il-​mistoqsija taʼ Tumas dwar l-​istqarrija taʼ Ġesù li se jmur u jħejji post għalihom, Ġesù qal: “Jien it-​triq, il-​verità, u l-​ħajja. Ħadd ma jiġi għand il-​Missier ħlief permezz tiegħi.” (Ġw. 14:1-6) Dak il-​ħin Ġesù kien qed ikellem lill-​11-il appostlu leali. Hu wegħedhom post fis-​sema, imma kliemu għandu tifsir ukoll għal dawk li jittamaw li jiksbu l-​ħajja taʼ dejjem fuq l-​art. (Riv. 7:9, 10; 21:1-4) Kif?

13. Ġesù f’liema sens hu “t-​triq”?

¹³ Ġesù Kristu hu “t-​triq.” Jiġifieri, hu l-​uniku wieħed li permezz tiegħu huwa possibbli għalina li nersqu lejn Alla. Dan hu minnu fil-​kwistjoni tat-​talb, għax huwa biss billi nitolbu permezz taʼ Ġesù li jkollna l-​assiguranza li l-​Missier se jagħtina kulma nitolbuh fi qbil mar-​rieda Tiegħu. (Ġw. 15:16) Madankollu, Ġesù hu “t-​triq” ukoll f’sens ieħor. Id-​dnub biegħed lill-​bnedmin minn Alla. (Is. 59:2) Ġesù ta “ruħu b’fidwa għal ħafna.” (Mt. 20:28) Minħabba f’hekk, il-​Bibbja tispjega: “Id-​demm taʼ . . . Ġesù jnaddafna minn kull dnub.” (1 Ġw. 1:7) B’hekk, l-​Iben fetaħ it-​triq taʼ rikonċiljazzjoni m’Alla. (Rum. 5:8-10) Huwa billi jkollna l-​fidi f’Ġesù u billi nobduh li jistaʼ jkollna relazzjoni approvata m’Alla.—Ġw. 3:36.

14. Ġesù kif inhu “l-​verità”?

¹⁴ Ġesù hu “l-​verità” mhux biss għaliex dejjem qal u għex il-​verità imma wkoll għaliex il-​profeziji kollha miktubin dwar il-​Messija—li huma ħafna—twettqu fih. “Il-​wegħdi kollha t’Alla, huma kemm huma,” kiteb l-​appostlu Pawlu, “saru Iva permezz tiegħu.” (2 Kor. 1:20) Saħansitra “dell taʼ l-​affarijiet tajbin li għandhom jiġu” u li jinsab fil-​Liġi Mosajka sar realtà fi Kristu Ġesù. (Ebr. 10:1; Kol. 2:17) Ġesù hu l-​punt ċentrali li fuqu jikkonċentraw il-​profeziji kollha, u dawn jixħtu dawl fuq l-​irwol ċentrali tiegħu fit-​twettiq taʼ l-​iskop taʼ Ġeħova. (Riv. 19:10) Sabiex nibbenefikaw mit-​twettiq taʼ l-​iskop li Alla għandu  għalina, aħna għandna bżonn nimxu wara l-​Messija.

15. Ġesù f’liema sens hu “l-​ħajja”?

¹⁵ Ġesù hu “l-​ħajja” għaliex hu xtara lir-​razza umana bid-​demm taʼ ħajtu, u l-​ħajja taʼ dejjem hi għotja li jagħti Alla “bi Kristu Ġesù, il-​Mulej tagħna.” (Rum. 6:23) Ġesù hu “l-​ħajja” wkoll għal dawk li mietu. (Ġw. 5:28, 29) Iktar minn hekk, immaġina x’se jagħmel bħala Qassis il-​Kbir matul ir-​Renju Millennjali tiegħu. Hu se jikseb ħelsien għal dejjem mid-​dnub u l-​mewt għas-​sudditi tiegħu fuq l-​art!—Ebr. 9:11, 12, 28.

16. X’raġuni għandna biex nimxu wara Ġesù?

¹⁶ Għalhekk, it-​tweġiba taʼ Ġesù lil Tumas għandha tifsir kbir għalina. Ġesù hu t-​triq u l-​verità u l-​ħajja. Hu l-​wieħed li Alla bagħat fid-​dinja biex id-​dinja tiġi salvata permezz tiegħu. (Ġw. 3:17) U ħadd ma jmur għand il-​Missier ħlief permezz tiegħu. Il-​Bibbja tistqarr b’mod ċar: “F’ħadd iżjed m’hemm salvazzjoni, għax m’hemmx isem ieħor taħt is-​sema li ngħata lill-​bnedmin u li bih nistgħu niġu salvati.” (Atti 4:12) Għalhekk, minkejja dak li konna nemmnu qabel, ikun għaqli li nemmnu b’Ġesù, nimxu warajh, u b’hekk niksbu l-​ħajja.—Ġw. 20:31.

Kmandati Biex Nisimgħu mill-​Kristu

17. Għala huwa importanti għalina li nisimgħu mill-​Iben t’Alla?

¹⁷ Pietru, Ġwanni, u Ġakbu raw b’għajnejhom stess it-​trasfigurazzjoni. F’dik l-​okkażjoni, huma semgħu leħen mis-​sema jgħid: “Dan hu Ibni, il-​magħżul. Isimgħu minnu.” (Lq. 9:28, 29, 35) Il-​fatt li nobdu l-​kmand biex nisimgħu mill-​Messija hu kwistjoni serja.—Aqra Atti 3:22, 23.

18. Kif nistgħu nisimgħu minn Ġesù Kristu?

¹⁸ Il-​fatt li nisimgħu minn Ġesù jinvolvi li ‘nħarsu fiss lejh, nirriflettu sew l-​eżempju tiegħu.’ (Ebr. 12:2, 3) Għaldaqstant nagħmlu sew li “noqogħdu attenti iktar mis-​soltu għal dak li” naqraw dwaru fil-​Bibbja u fil-​pubblikazzjonijiet taʼ “l-​ilsir leali u għaqli,” kif ukoll għal dak li nisimgħu dwaru fil-​laqgħat Kristjani. (Ebr. 2:1; Mt. 24:45) Bħala n-​nagħaġ tiegħu, ejja nkunu ħerqanin biex nisimgħu minn Ġesù u nimxu warajh.—Ġw. 10:27.

19. X’se jgħinna nibqgħu mexjin wara l-​Kristu?

¹⁹ Jistaʼ jirnexxilna nibqgħu mexjin wara l-​Kristu, huma x’inhuma d-​diffikultajiet li niffaċċjaw? Iva, jistaʼ jirnexxilna, bil-​patt li ‘nibqgħu nżommu l-​mudell taʼ kliem mimli saħħa’ billi nipprattikaw dak li nitgħallmu “bil-​fidi u l-​imħabba li huma fi Kristu Ġesù.”—2 Tim. 1:13.

X’Tgħallimt?

• Għala nistgħu nersqu eqreb lejn Ġeħova jekk nimxu wara “l-​Kristu”?

• Il-​fatt li nimitaw lil Ġesù għala huwa ugwali għal li nimitaw lil Ġeħova?

• Ġesù kif inhu “t-​triq, il-​verità, u l-​ħajja”?

• Għala għandna nisimgħu mill-​Midluk taʼ Ġeħova?

[Mistoqsijiet taʼ Studju]

[Stampa f’paġna 29]

It-​tagħlim taʼ Ġesù rrifletta l-​ħsieb superjuri taʼ Ġeħova

[Stampa f’paġna 30]

Għandna nimxu fedelment wara l-​Midluk taʼ Ġeħova

[Stampa f’paġna 32]

Ġeħova ddikjara: “Dan hu Ibni . . . isimgħu minnu”