L-​IDDELEGAR beda jeżisti ħafna qabel ma bdiet teżisti l-​pjaneta Art. Ġeħova ħalaq lill-​Iben uniġenitu tiegħu u mbagħad, billi uża lil Ibnu bħala “ħaddiem tas-​sengħa,” għamel l-​univers. (Prov. 8:22, 23, 30; Ġw. 1:3) Meta ħalaq lill-​ewwel koppja umana, Alla qalilhom biex ‘jimlew l-​art u jrażżnuha.’ (Ġen. 1:28) Il-​Ħallieq ta lill-​bnedmin ix-​xogħol biex jespandu l-​Ġenna taʼ l-​Għeden ħalli timla l-​art kollha kemm hi. Iva, mill-​bidu, l-​iddelegar kien u għadu karatteristika taʼ l-​organizzazzjoni taʼ Ġeħova.

X’hemm involut fl-​iddelegar? L-​anzjani Kristjani għala għandhom jitgħallmu jiddelegaw ċerti xogħlijiet tal-​kongregazzjoni lil oħrajn, u dan kif jistgħu jagħmluh?

Xi Jfisser li Tiddelega?

“Li tiddelega” jfisser “li tafda lil ħaddieħor; li taħtar bħala r-​rappreżentant tiegħek; li tagħti responsabbiltà jew awtorità.” (Merriam-Webster’s Collegiate Dictionary, 11th Edition) Għalhekk, l-​iddelegar jirrikjedi li tinvolvi lil oħrajn biex iwettqu xi objettivi. Naturalment, dan iwassal għal li tagħti l-​awtorità.

Dawk li jingħataw xi biċċa xogħol x’jagħmlu fil-​kongregazzjoni Kristjana hu mistenni minnhom li jwettqu l-​inkarigu, li jagħtu rapporti  tal-​progress li jsir, u ġeneralment li jikkonsultaw maʼ dak li ddelegalhom il-​biċċa xogħol. Iżda, ir-​responsabbiltà bażika tibqaʼ tal-​ħu maħtur li ddelega x-​xogħol. Hu għandu jiċċekkja l-​progress u jagħti pariri skond il-​ħtieġa. Madankollu, xi wħud jistgħu jistaqsu, ‘Għala tiddelega x-​xogħol jekk tistaʼ tagħmlu int stess?’

Għala Tiddelega?

Aħseb ftit dwar kif Ġeħova ħalaq lill-​Iben uniġenitu tiegħu u involvieh fil-​bqija tax-​xogħol tal-​ħolqien. Iva, “permezz tiegħu nħolqu l-​affarijiet l-​oħrajn kollha fis-​smewwiet u fuq l-​art, dawk viżibbli u dawk inviżibbli.” (Kol. 1:16) Il-​Ħallieq setaʼ għamel kollox waħdu, u madankollu ddeċieda li Ibnu jkollu sehem fil-​ferħ taʼ li jwettaq xogħol produttiv. (Prov. 8:31) Dan għen lill-​Iben biex jitgħallem iktar dwar il-​kwalitajiet t’Alla. F’ċertu sens, il-​Missier uża l-​opportunità biex iħarreġ lil Ibnu uniġenitu.

Meta kien fuq l-​art, Ġesù Kristu imita lil Missieru billi ddelega r-​responsabbiltà. Hu ħarreġ gradwalment lid-​dixxipli tiegħu. Hu bagħat qablu lit-​12-il appostlu u iktar tard 70 dixxiplu ieħor biex ikunu minn taʼ quddiem fix-​xogħol taʼ l-​ippridkar. (Lq. 9:1-6; 10:1-7) Meta Ġesù iktar tard wasal f’dawn il-​postijiet, kien tpoġġa għalih pedament tajjeb biex jibni fuqu. Meta telaq minn fuq l-​art, Ġesù ddelega responsabbiltajiet akbar lid-​dixxipli mħarrġin tiegħu, inkluż ix-​xogħol taʼ l-​ippridkar madwar id-​dinja.—Mt. 24:45-47; Atti 1:8.

L-iddelegar u t-​taħriġ saru karatteristiki tal-​kongregazzjoni Kristjana. L-​appostlu Pawlu qal lil Timotju: “Dak li smajt . . . għaddih lil nies leali li, mill-​banda l-​oħra, ikunu kwalifikati biżżejjed biex jgħallmu lil oħrajn.” (2 Tim. 2:2) Iva, dawk taʼ l-​esperjenza għandhom iħarrġu lil dawk li, mill-​banda l-​oħra, se jħarrġu jerġaʼ lil oħrajn.

Billi jiddelega ftit mix-​xogħol assenjat lilu, anzjan jistaʼ jaqsam m’oħrajn il-​ferħ taʼ li jgħallem u li jirgħa. Billi jirrikonoxxu li l-​abbiltajiet umani huma limitati, l-​anzjani għandhom saħansitra iktar raġuni biex jitolbu lil oħrajn jaqsmu magħhom ir-​responsabbiltajiet tal-​kongregazzjoni. Il-​Bibbja tistqarr: “L-​għerf hu mal-​modesti.” (Prov. 11:2) Il-​modestja tinkludi li wieħed ikun konxju tal-​limitazzjonijiet tiegħu. Jekk tipprova tagħmel kollox int, tistaʼ tegħja u ċċaħħad lill-​familja tiegħek mill-​ħin li kieku tkun tistaʼ tqattaʼ magħhom. Għalhekk, hu tabilħaqq għaqli li taqsam maʼ ħaddieħor it-​tagħbija taʼ responsabbiltà. Per eżempju, ikkunsidra l-​ħu li jaqdi bħala l-​koordinatur tal-​ġemgħa taʼ l-​anzjani. Hu jistaʼ jitlob lil anzjani oħrajn biex jawditjaw il-​kontijiet tal-​kongregazzjoni. Billi jiflu dawn il-​kontijiet, dawk l-​anzjani jistgħu jsiru familjari mal-​kundizzjoni finanzjarja tal-​kongregazzjoni.

Filwaqt li l-​iddelegar jagħti opportunità lil oħrajn biex jiksbu s-​sengħa u l-​esperjenza meħtiġin, jippermetti wkoll lil min jiddelega r-​responsabbiltà biex josserva l-​abbiltajiet taʼ dawk li jkunu ngħataw ix-​xogħol. B’hekk, billi jiddelegaw dmirijiet xierqa fil-​kongregazzjoni, l-​anzjani jistgħu jgħaddu minn prova lil xi wħud biex jaraw “jekk jistħoqqilhomx” isiru qaddejja ministerjali.—1 Tim. 3:10.

Finalment, billi jiddelegaw, l-​anzjani juru li jafdaw lil ħaddieħor. Pawlu ħarreġ lil Timotju billi ħadem miegħu fis-​servizz missjunarju. Rabta mill-​qrib żviluppat bejn iż-​żewġt irġiel. Pawlu sejjaħlu “iben ġenwin fil-​fidi” lil Timotju. (1 Tim. 1:2) B’mod simili, rabta qawwija żviluppat bejn Ġeħova u Ġesù hekk kif ħadmu  flimkien biex joħolqu l-​affarijiet l-​oħrajn kollha. Billi jafdaw xi xogħol f’idejn ħaddieħor, l-​anzjani jistgħu jiżviluppaw relazzjoni kordjali magħhom.

Għala Xi Wħud Jaħsbuha Darbtejn

Għalkemm jafu li hemm il-​vantaġġi, xi anzjani jsibuha diffiċli biex jiddelegaw, forsi billi jżommu lura għax iħossu li issa għandhom inqas awtorità. Għandhom mnejn jaħsbu li huma dejjem għandu jkollhom it-​tmun f’idejhom, biex ngħidu hekk. Madankollu, ftakar li qabel ma telaʼ s-​sema, Ġesù awtorizza lid-​dixxipli tiegħu biex iwettqu inkarigu taʼ responsabbiltà kbira, u sadanittant kien jaf li huma kienu se jwettqu għemejjel akbar minn tiegħu!—Mt. 28:19, 20; Ġw. 14:12.

Anzjani oħrajn forsi ddelegaw fil-​passat imma ma kellhomx riżultati sodisfaċenti. Għandhom mnejn iħossu li huma stess jistgħu jagħmlu x-​xogħol aħjar u iktar bl-​għaġla. Madankollu, ikkunsidra l-​eżempju taʼ Pawlu. Hu kien jaf kemm jiswa li tiddelega, imma rrealizza wkoll li dawk li ġew imħarrġin mhux dejjem kienu se jagħmlu x-​xogħol tagħhom tajjeb daqskemm kien jistenna hu. Fl-​ewwel vjaġġ missjunarju tiegħu, Pawlu ħarreġ lil Marku, sieħbu żagħżugħ li vvjaġġa miegħu. Pawlu ddiżappunta ruħu ferm meta Marku telaq mill-​inkarigu li kellu u mar lura d-​dar. (Atti 13:13; 15:37, 38) Xorta waħda, dan ma waqqafx lil Pawlu milli jħarreġ lil oħrajn. Kif issemma diġà, hu stieden liż-​żagħżugħ Kristjan Timotju biex ikun sieħbu li jivvjaġġa miegħu. Meta Timotju kien lest biex iġorr responsabbiltà akbar, Pawlu ħallieh f’Efesu u fdalu l-​awtorità li jaħtar indokraturi u qaddejja ministerjali tal-​kongregazzjoni.—1 Tim. 1:3; 3:1-10, 12, 13; 5:22.

B’mod simili, fi żmienna, l-​anzjani m’għandhomx jaqtgħu qalbhom biex iħarrġu lill-​aħwa rġiel sempliċement għaliex wieħed minnhom ma jwiġibx kif jistennew huma. Huwa għaqli u importanti li titgħallem tafda lil oħrajn u li tħarriġhom. Iżda, l-​anzjani liema fatturi għandhom iżommu f’moħħhom meta jiddelegaw?

Kif Tiddelega

Meta tiddelega xi responsabbiltajiet, ikkunsidra l-​kwalifiki taʼ l-​aħwa rġiel li għandek f’moħħok. Meta f’Ġerusalemm qamet il-​ħtieġa biex jieħdu ħsieb it-​tqassim taʼ l-​ikel taʼ kuljum, l-​appostli għażlu “sebat irġiel kwalifikati, . . . mimlijin bl-​ispirtu u l-​għerf.” (Atti 6:3) Jekk titlob lil individwu li ma tistax torbot fuqu biex jagħmel xi biċċa xogħol, hu għandu mnejn sempliċement ma jagħmilhiex. Għalhekk, għall-​ewwel iddelega xi biċċa xogħol żgħira. Meta individwu juri li hu leali, jistaʼ jkollu l-​ħila jerfaʼ iktar responsabbiltà.

Madankollu, hemm iktar involut. Il-​personalitajiet u l-​abbiltajiet ivarjaw. L-​esperjenza wkoll tvarja minn individwu għal ieħor. Ħu li għandu karattru ħelu u li hu dħuli jistaʼ jmur tajjeb bħala attendant, waqt li wieħed li hu ordinat u sistematiku jistaʼ jkun t’għajnuna kbira bħala assistent tas-​segretarju tal-​kongregazzjoni. Oħt li għandha abbiltà artistika tistaʼ tiġi fdata biex tirranġa l-​fjuri għat-​Tifkira.

Meta tagħti r-​responsabbiltajiet, speċifika b’mod ċar x’inhu mistenni. Qabel ma Ġwanni l-​Battista bagħat xi messaġġiera għand Ġesù, hu spjegalhom x’ried ikun jaf u kif ipoġġu l-​kliem tal-​mistoqsija. (Lq. 7:18-20) Mill-​banda l-​oħra, meta istruwixxa lid-​dixxipli tiegħu biex  jiġbru l-​bċejjeċ li kien fadal mill-​ikel provdut mirakolożament, Ġesù ħalla d-​dettalji għalihom. (Ġw. 6:12, 13) Ħafna jiddependi min-​natura tal-​biċċa xogħol u mill-​kwalifiki taʼ dak li jgħin. Kemm dak li jiddelega u kemm dak li jkun mistieden biex iwettaq il-​biċċa xogħol għandhom jifhmu sew x’inhu mistenni fl-​aħħar mill-​aħħar u kemm spiss dak li jiddelega għandu jiġi informat dwar il-​progress. It-​tnejn li huma għandhom ikunu jafu kemm se jitħalla għad-​diskrezzjoni taʼ l-​individwu li jagħmel ix-​xogħol. Jekk il-​biċċa xogħol trid titlesta sa ċerta data, ikun ferm aħjar jekk id-​data tiġi diskussa u jkun hemm qbil fuqha minflok ma sempliċement tiġi imposta.

Il-wieħed assenjat għandu jkollu l-​fondi, l-​għodod, u l-​għajnuna li jkollu bżonn. Jistaʼ jkun t’għajnuna li tgħarraf lil ħaddieħor bl-​arranġament. Meta Ġesù fada lil Pietru bl-​“imfietaħ tas-​saltna tas-​smewwiet,” dan għamlu fil-​preżenza taʼ dixxipli oħrajn. (Mt. 16:13-19) Bl-​istess mod, f’xi każi għandu mnejn ikun tajjeb li tinforma lill-​kongregazzjoni dwar min hu responsabbli minn ċertu xogħol.

L-attenzjoni hi meħtieġa wkoll. Jekk int xorta waħda tipprova timmaniġġa x-​xogħol li ddelegajt lil xi ħadd, int tkun qed tgħidlu, “Jien mhux veru nafdak.” Huwa minnu li kultant ir-​riżultat ma jkunx eżattament dak li kont qed tistenna. Madankollu, jekk il-​ħu li ngħata xi responsabbiltà titħallielu ċerta libertà, hu x’aktarx li se jikseb il-​kunfidenza u l-​esperjenza. Naturalment, dan ma jfissirx li wieħed ma jagħtix kas kif l-​ieħor jittratta x-​xogħol li ngħata. Għalkemm lil Ibnu fdalu rwol fil-​proċess tal-​ħolqien, Ġeħova xorta waħda involva ruħu fix-​xogħol. Hu qal lill-​Ħaddiem tas-​Sengħa: “Ħa nagħmlu l-​bniedem fix-​xbieha tagħna.” (Ġen. 1:26) Għalhekk, b’dak li tgħid u tagħmel, appoġġa x-​xogħol li jkun qed isir, u faħħar lill-​individwu għall-​isforzi tiegħu. Jekk tirrivedu fil-​qosor ir-​riżultat, dan jistaʼ jkun t’għajnuna għalih. Jekk ix-​xogħol ma jkunx qed isir kif jixraq, taħsibhiex darbtejn biex toffri iktar pariri jew għajnuna. Ftakar, ir-​responsabbiltà finali hija tiegħek bħala l-​wieħed li qed tiddelega.—Lq. 12:48.

Ħafna bbenefikaw għax kellhom xogħlijiet tal-​kongregazzjoni delegati lilhom mill-​anzjani li wrew interess sinċier fihom. Tabilħaqq, l-​anzjani kollha għandhom bżonn jitgħallmu għala u kif jiddelegaw, biex jimitaw lil Ġeħova.

[Kaxxa f’paġna 29]

L-​IDDELEGAR HU

• mod kif tħalli lil oħrajn ikollhom il-​ferħ taʼ li jwettqu xi ħaġa

• mod kif twettaq iktar

• manifestazzjoni t’għerf u modestja

• mod kif tħarreġ lil oħrajn

• mod kif turi l-​fiduċja f’oħrajn

[Kaxxa f’paġna 30]

KIF TIDDELEGA

• Agħżel individwi xierqa għax-​xogħol

• Spjega/ikkomunika b’mod ċar

• Iċċara x’għandu jitwettaq

• Ipprovdi r-​riżorsi neċessarji

• Kun konċernat dwar ix-​xogħol, u esprimi l-​fiduċja tiegħek

• Kun lest li tieħu r-​responsabbiltà finali

[Stampi f’paġna 31]

L-​iddelegar jinkludi li tinkariga lil xi ħadd b’xi biċċa xogħol u li tara xi progress qed isir