“Għamilna l-​qalb . . . biex ngħidulkom l-​aħbar tajba.”—1 TESS. 2:2.

1. L-​aħbar tajba tas-​Saltna għala tiġbdek daqshekk?

 KEMM hu pjaċevoli li tismaʼ aħbarijiet tajbin! U l-​aqwa aħbar minnhom kollha hi l-​aħbar tajba tas-​Saltna t’Alla. Din l-​aħbar tajba tassigurana dwar tmiem għas-​sofferenza, għall-​mard, għall-​uġigħ, għan-​niket, u għall-​mewt. Tiftaħ it-​triq għall-​ħajja taʼ dejjem, tirrivela l-​iskop t’Alla, u turina kif nistgħu nidħlu f’relazzjoni kollha mħabba miegħu. Forsi taħseb li kulħadd kien se jithenna meta jismaʼ din l-​aħbar li Ġesù qasam maʼ l-​umanità. Iżda, b’sogħba, dan m’huwiex il-​każ.

2. Spjega l-​istqarrija taʼ Ġesù: “Jien ġejt biex nifred.”

² Ġesù qal lid-​dixxipli tiegħu: “Taħsbux li ġejt inġib il-​paċi fuq l-​art; ma ġejtx inġib il-​paċi, imma sejf. Għax jien ġejt biex nifred, raġel minn missieru, u bint minn ommha, u mara żagħżugħa mill-​kunjata tagħha. Tabilħaqq, bniedem ikollu n-​nies taʼ daru stess għedewwa tiegħu.” (Mt. 10:34-36) Minflok ma jħaddnu l-​aħbar tajba, il-​biċċa l-​kbira min-​nies jiċħduha. Xi wħud jagħmlu lilhom infushom għedewwa taʼ dawk li jxandruha, anki jekk dawn ikunu membri mill-​qrib taʼ l-​istess familja.

3. X’għandna bżonn sabiex inwettqu l-​inkarigu tagħna biex nippridkaw?

³ Aħna nxandru l-​istess veritajiet li xandar Ġesù, u malli jisimgħuhom, in-​nies jirreaġixxu kontrina llum bħalma rreaġixxew ħafna kontrih lura f’dak iż-​żmien. Hekk tistenna li jsir. Ġesù qal lid-​dixxipli tiegħu: “Ilsir mhux  akbar minn sidu. Jekk ippersegwitaw lili, jippersegwitaw lilkom ukoll.” (Ġw. 15:20) F’ħafna pajjiżi ma niffaċċjawx persekuzzjoni diretta, imma żgur li niltaqgħu maʼ l-​istmerrija u l-​apatija. Għaldaqstant għandna bżonn il-​fidi u l-​kuraġġ biex nissaportu fix-​xogħol tagħna taʼ li nippridkaw l-​aħbar tajba bil-​qlubija.—Aqra t-​2 Pietru 1:5-8.

4. Pawlu għala kellu bżonn ‘jagħmel il-​qalb’ biex jippriedka?

⁴ Forsi kultant issibha diffiċli biex tieħu sehem fil-​ministeru, jew xi aspett minnu għandu mnejn jidher li jintimidak. Jekk inhu hekk, m’intix waħdek. L-​appostlu Pawlu kien predikatur qalbieni u ma jibżax u kellu qabda soda mal-​verità, u madankollu kien hemm drabi meta saħansitra hu kellu jissielet biex jippriedka. Lill-​Kristjani f’Tessalonika, Pawlu kitbilhom: “Wara li sofrejna u konna mżebilħin f’Filippi, bħalma tafu, għamilna l-​qalb permezz t’Alla tagħna biex ngħidulkom l-​aħbar tajba t’Alla b’taħbit kbir.” (1 Tess. 2:2) Ġo Filippi l-​awtoritajiet kienu sawtu lil Pawlu u lil sieħbu Sila bil-​bsaten, tefgħuhom il-​ħabs, u rabtulhom saqajhom fil-​qjud. (Atti 16:16-24) Minkejja dan, Pawlu u Sila ‘għamlu l-​qalb’ biex ikomplu jippridkaw. Aħna kif nistgħu nagħmlu l-​istess? Biex inwieġbu din il-​mistoqsija, ejja nikkunsidraw x’kien li għen lill-​qaddejja t’Alla fi żminijiet Bibliċi biex jgħidu bil-​qlubija l-​verità dwar Ġeħova, u ejja nitgħallmu kif nistgħu nimitaw l-​eżempju tagħhom.

Meħtieġa l-​Qlubija Biex Niffaċċjaw l-​Għadwa

5. Il-​qlubija għala dejjem kienet meħtieġa minn dawk leali lejn Ġeħova?

⁵ M’għandniex xi ngħidu, l-​eżempju suprem tal-​kuraġġ u l-​qlubija kien Ġesù Kristu. Xorta waħda, mill-​bidu taʼ l-​istorja tal-​bniedem ’l hawn, il-​qlubija dejjem kienet meħtieġa minn dawk kollha leali lejn Ġeħova. Għala? Wara r-​ribelljoni fl-​Għeden, Ġeħova bassar li kellu jkun hemm għadwa bejn dawk li jaqdu lil Alla u dawk li jaqdu lil Satana. (Ġen. 3:15) Din l-​għadwa malajr saret evidenti meta Abel, raġel sewwa, inqatel minn ħuh. Iktar tard, l-​għadwa kienet diretta kontra Enok, raġel leali ieħor li għex qabel id-​Dilluvju. Hu pprofetizza li Alla kellu jiġi bil-​mirjadi mqaddsa Tiegħu biex jagħmel ġudizzju minn dawk li m’għandhomx devozzjoni lejn Alla. (Ġuda 14, 15) Dan il-​messaġġ żgur li ma kienx popolari. In-​nies kienu jobogħduh lil Enok, u b’mod evidenti kienu joqtluh kieku ma ħadux Ġeħova. Xi qlubija wera Enok!—Ġen. 5:21-24.

6. Mosè għala kellu bżonn il-​qlubija meta kellem lill-​Fargħun?

⁶ Aħseb, ukoll, dwar il-​qlubija li wera Mosè meta kellem lill-​Fargħun, ħakkiem li ma kienx meqjus bħala sempliċi rappreżentant taʼ l-​allat, imma bħala alla nnifsu, bin Ra, l-​alla xemx. Jistaʼ jkun li hu, bħall-​Fargħunijiet l-​oħrajn, kien iqim ix-​xbieha tiegħu stess. Il-​kelma tal-​Fargħun kienet liġi; il-​ħakma tiegħu kienet titmexxa permezz taʼ digrieti. Peress li kien potenti, arroganti, u stinat, il-​Fargħun ma kienx imdorri li jkollu lil oħrajn jgħidulu x’għandu jagħmel. Kien quddiem dan ir-​raġel li Mosè, ragħaj ġwejjed, deher kemm-il darba—bla mistieden u mhux milqugħ. U x’bassar Mosè? Kastigi qerrieda. U x’esiġa? Permess biex diversi miljuni taʼ lsiera tal-​Fargħun jitilqu mill-​pajjiż! Kellu bżonn qlubija Mosè? Assolutament!—Num. 12:3; Ebr. 11:27.

7, 8. (a) Uħud leali taʼ żmien twil ilu minn liema provi għaddew? (b) X’għen lil dawk li għexu qabel żmien il-​Kristjanità biex juru l-​qlubija sabiex jappoġġaw u jippromwovu l-​qima pura?

⁷ Matul is-​sekli taʼ wara, il-​profeti u qaddejja leali oħrajn t’Alla komplew jieħdu waqfa kuraġġuża favur il-​qima pura. Id-​dinja taʼ Satana ma kinitx ħanina magħhom. Pawlu jistqarr: “Kienu mħaġġrin, kienu provati, kienu mħanxrin min-​nofs, mietu minfudin bis-​sejf,  iġġerrew lebsin il-​ġlud tan-​nagħaġ u l-​ġlud tal-​mogħoż, waqt li kienu fil-​bżonn, fit-​tribulazzjoni, u trattati ħażin.” (Ebr. 11:37) X’għen lil dawk il-​qaddejja leali t’Alla biex jibqgħu sodi? Ftit versi qabel, l-​appostlu semma x’kien li saħħaħ lil Abel, Abraham, Sara, u oħrajn biex jissaportu. Hu stqarr: “Ma qalgħux it-​twettiq tal-​wegħdi, imma [bil-fidi] rawhom mill-​bogħod u laqgħuhom.” (Ebr. 11:13) Bla dubju, profeti bħal Elija, Ġeremija, u wħud leali oħrajn li għexu qabel żmien il-​Kristjanità u li ddefendew bil-​qlubija l-​qima vera kienu megħjunin bl-​istess mod biex jissaportu billi żammew għajnejhom iffokati fuq il-​wegħdi taʼ Ġeħova.—Titu 1:2.

⁸ Dawk l-​uħud leali li għexu qabel żmien il-​Kristjanità ħarsu lejn futur mill-​isbaħ u taʼ min jixtiequ. Malli jiġu rxoxtati, huma eventwalment se jaslu għall-​perfezzjoni u se ‘jinħelsu mill-​jasar tat-​taħsir’ permezz tas-​servizzi saċerdotali taʼ Kristu Ġesù u l-​144,000 li huma sotto-qassisin tiegħu. (Rum. 8:21) Iktar minn hekk, Ġeremija u qaddejja qalbenin oħrajn t’Alla fi żmien il-​qedem għamlu l-​kuraġġ minħabba l-​assiguranza taʼ Ġeħova, riflessa fil-​wegħda tiegħu lil Ġeremija: “Dawn jiġġieldu kontrik imma ma jegħlbukx, għax ‘jien miegħek,’ hija l-​kelma taʼ Ġeħova, ‘biex neħilsek.’” (Ġer. 1:19) Illum, meta nirriflettu fuq il-​wegħdi t’Alla għall-​futur tagħna u l-​assiguranza tiegħu taʼ protezzjoni spiritwali, aħna niġu msaħħin bl-​istess mod.—Prov. 2:7; aqra t-​2 Korintin 4:17, 18.

L-​Imħabba Qanqlet lil Ġesù Biex Jippriedka bil-​Qlubija

9, 10. Ġesù b’liema modi wera l-​qlubija quddiem (a) il-​mexxejja reliġjużi, (b) ġemgħa taʼ suldati, (ċ) il-​qassis il-​kbir, (d) Pilatu?

⁹ Ġesù, ix-​Xempju tagħna, wera l-​qlubija tiegħu b’diversi modi. Per eżempju, għalkemm kien mibgħud minn dawk li kellhom il-​qawwa u l-​awtorità, Ġesù ma dgħajjifx il-​messaġġ li Alla ried li n-​nies ikunu jafuh. Hu bla biżaʼ kixef lill-​mexxejja reliġjużi potenti bħala li kienu sewwa f’għajnejhom stess kif ukoll li kienu jgħallmu tagħlim falz. Dawn l-​irġiel kienu kundannati, u Ġesù qalilhom hekk bi kliem kemm dirett kif ukoll ċar. Darba minnhom, hu qalilhom: “Gwaj għalikom, skribi u Fariżej, ipokriti! Għax qiskom oqbra mbajda, li minn barra veru jidhru sbieħ imma minn ġewwa mimlijin bl-​għadam taʼ nies mejtin u b’kull nuqqas taʼ ndafa. Bl-​istess mod intom ukoll, minn barra veru tidhru nies sewwa f’għajnejn ħaddieħor, imma minn ġewwa mimlijin ipokrisija u ksur tal-​liġi.”—Mt. 23:27, 28.

¹⁰ Konfrontat minn ġemgħa taʼ suldati fil-​ġnien tal-​Ġetsemani, Ġesù bil-​kuraġġ kollu qalilhom min kien. (Ġw. 18:3-8) Iktar tard ittieħed quddiem is-​Sinedriju u ġie interrogat mill-​qassis il-​kbir. Avolja kien jaf li l-​qassis il-​kbir kien qed ifittex skuża biex joqtlu, Ġesù bla biżaʼ kkonferma li Hu kien kemm Kristu kif ukoll Bin Alla. Hu żied li huma kellhom jarawh “bil-​qiegħda fuq il-​lemin tal-​qawwa u ġej mas-​sħab tas-​sema.” (Mk. 14:53, 57-65) Ftit wara dan, Ġesù, marbut, kien wieqaf quddiem Pilatu, li setaʼ jeħilsu. Imma Ġesù baqaʼ sieket bi tweġiba għall-​akkużi li kienu  qed jinġiebu kontrih. (Mk. 15:1-5) Dan kollu kien jirrikjedi kuraġġ kbir.

11. Il-​qlubija kif inhi relatata maʼ l-​imħabba?

¹¹ Lil Pilatu, Ġesù fil-​fatt qallu: “Għal dan jien twilidt, u għal dan ġejt fid-​dinja, biex nixhed għall-​verità.” (Ġw. 18:37) Ġeħova kien inkariga lil Ġesù biex jippriedka l-​aħbar tajba, u Ġesù kienet l-​għaxqa tiegħu li jagħmel dan għaliex kien iħobb lil Missieru tas-​sema. (Lq. 4:18, 19) Ġesù kellu wkoll imħabba għan-​nies. Kien jaf li l-​ħajjiet tagħhom kienu diffiċli. Bl-​istess mod, l-​għoti taʼ xiehda tagħna bil-​qlubija u bla biżaʼ għandu għeruq fondi fl-​imħabba lejn Alla u fl-​imħabba lejn il-​proxxmu.—Mt. 22:36-40.

L-​Ispirtu Qaddis Jagħtina l-​Qawwa Biex Nippridkaw bil-​Qlubija

12. X’ġabilhom ferħ lid-​dixxipli tal-​bidu?

¹² Fil-​ġimgħat taʼ wara l-​mewt taʼ Ġesù, id-​dixxipli kellhom raġun għalxiex jithennew hekk kif Ġeħova kien qed iżid dixxipli ġodda biex jingħaqdu magħhom. Tabilħaqq, f’jum wieħed biss ġew mgħammdin xi 3,000 Lhudi u proselit, minn ħafna pajjiżi, li kienu f’Ġerusalemm biex jiċċelebraw Pentekoste! Min jaf kemm sar diskors dwar dan f’dik il-​fortizza Lhudija! Il-​Bibbja tgħid: “Beda jaqaʼ biżaʼ fuq kull ruħ, u bdew iseħħu ħafna għeġubijiet u sinjali permezz taʼ l-​appostli.”—Atti 2:41, 43.

13. L-​aħwa għala talbu għall-​qlubija, u b’liema riżultat?

¹³ Irrabjati, il-​mexxejja reliġjużi arrestaw lil Pietru u lil Ġwanni, żammewhom maqfulin matul il-​lejl, u ordnawlhom biex ma jitkellmux dwar Ġesù. Malli ġew meħlusin, it-​tnejn li huma rrapportaw lill-​aħwa x’kien ġara, u lkoll talbu dwar l-​oppożizzjoni li ffaċċjaw, billi għamlu din ir-​rikjesta: “Ġeħova, . . . agħmel li l-​ilsiera tiegħek jibqgħu jitkellmu l-​kelma tiegħek bil-​qlubija kollha.” X’kien ir-​riżultat? “Ilkoll imtlew bl-​ispirtu qaddis u bdew ixandru l-​kelma t’Alla bil-​qlubija.”—Atti 4:24-31.

14. L-​ispirtu qaddis kif jgħinna fl-​ippridkar tagħna?

¹⁴ Innota li kien l-​ispirtu qaddis u qawwi taʼ Ġeħova li għen lid-​dixxipli jitkellmu l-​kelma t’Alla bil-​qlubija. Il-​kuraġġ biex ngħidu l-​verità lil oħrajn, saħansitra lil dawk li jopponu l-​messaġġ tagħna, ma jiddependix minna. Ġeħova jistaʼ u se jagħtina l-​ispirtu qaddis tiegħu jekk nitolbuh jagħmel dan. Bl-​għajnuna taʼ Ġeħova, aħna wkoll nistgħu nuru l-​qlubija meħtieġa biex noħorġu rebbiħin meta niffaċċjaw kwalunkwe oppożizzjoni.—Aqra Salm 138:3.

Il-​Kristjani Llum Jippridkaw bil-​Qlubija

15. Il-​verità llum kif tifred lin-​nies?

¹⁵ Fi żmienna, bħal fl-​imgħoddi, il-​verità tkompli tifred lin-​nies. Xi wħud iwieġbu favorevolment, filwaqt li oħrajn la jifhmu u lanqas japprezzaw il-​forma taʼ qima tagħna. Xi wħud jikkritikawna, jirridikolawna, jew saħansitra jobogħduna, sewwasew bħalma bassar Ġesù. (Mt. 10:22) Kultant, aħna nkunu l-​mira taʼ informazzjoni żbaljata u propaganda malizzjuża permezz tal-​mezzi tax-​xandir. (Salm 109:1-3) Madankollu, maʼ l-​art kollha, in-​nies taʼ Ġeħova jiddikjaraw l-​aħbar tajba bil-​qlubija.

16. Liema esperjenza turi li l-​qlubija tistaʼ tbiddel il-​ħarsa taʼ dawk li nippridkawlhom?

¹⁶ Il-​qlubija tagħna tistaʼ ġġiegħel lin-​nies ibiddlu l-​attitudni tagħhom lejn il-​messaġġ tas-​Saltna. Oħt f’Kirgiżstan tirrakkonta: “Waqt li kont barra fix-​xogħol taʼ l-​ippridkar, inkwilin qalli: ‘Jien nemmen b’Alla imma mhux bl-​Alla Kristjan. Jekk terġaʼ tiġi qrib dan ir-​rixtellu, inkeskislek il-​kelb!’ Warajh kien hemm bulldog kbir ħafna marbut b’katina. Imma matul il-​kampanja biex inqassmu l-​fuljett Aħbar tas-​Saltna Nru. 37, ‘It-​Tmiem tar-​Reliġjon Falza Hu Qrib!,’ jien iddeċidejt li mmur lura fl-​istess dar bit-​tama li niltaqaʼ maʼ xi ħadd ieħor mill-​membri l-​oħrajn tal-​familja taʼ dak ir-​raġel. Madankollu,  l-​istess raġel fetaħ il-​bieb. Jien tlabt malajr lil Ġeħova u mbagħad lir-​raġel għedtlu: ‘Kif int? Niftakar x’konversazzjoni kellna tlett ijiem ilu, u niftakar ukoll il-​kelb tiegħek. Imma ma stajtx nibqaʼ għaddejja għaliex preċiż bħalek, jien nemmen bl-​Alla wieħed u veru. Alla dalwaqt se jikkastiga lir-​reliġjonijiet li jiddiżonorawh. Tistaʼ ssir taf iktar dwar dan billi taqra dan il-​fuljett.’ Ħaġa taʼ l-​iskantament, ir-​raġel aċċetta l-​fuljett Aħbar tas-​Saltna. Imbagħad mort inħabbat bieb ieħor. Ftit minuti wara, ir-​raġel ġie jiġri warajja bil-​fuljett Aħbar tas-​Saltna f’idu. ‘Qrajtu,’ qalli. ‘X’għandi bżonn nagħmel biex il-​korla t’Alla ma tiġix fuqi?’” Ir-​raġel beda jistudja u beda jattendi l-​laqgħat Kristjani.

17. Il-​qlubija t’oħt kif saħħet lil studenta tal-​Bibbja li kellha l-​biżaʼ mill-​bniedem?

¹⁷ Il-​qlubija tagħna tistaʼ wkoll tinkuraġġixxi lil oħrajn biex ikunu qalbenin. Fir-​Russja waħda oħt li kienet qed tivvjaġġa bil-​karozza tal-​linja offriet rivista lil passiġġiera oħra. Meta ra dan, raġel qam mis-​sit tiegħu, ħataf ir-​rivista minn idejn l-​oħt, għaffiġha, u xeħitha maʼ l-​art. Waqt li beda jgħajjat u jidgħilha, hu insista li l-​oħt tagħtih l-​indirizz tagħha u wissieha biex ma tippridkax fir-​raħal. L-​oħt talbet lil Ġeħova għall-​għajnuna u fakkret lilha nfisha l-​kliem taʼ Ġesù: “Tibżgħux minn dawk li joqtlu l-​ġisem.” (Mt. 10:28) Bil-​kalma, hi qamet bil-​wieqfa u qalet lir-​raġel, “M’iniex se nagħtik l-​indirizz tiegħi, u se nkompli nippriedka fir-​raħal.” Imbagħad niżlet mill-​karozza tal-​linja. L-​oħt ma kinitx taf li studenta tal-​Bibbja tagħha inzertat li kienet fuq l-​istess karozza tal-​linja. Din il-​mara kienet ħalliet il-​biżaʼ mill-​bniedem iżommha milli tattendi l-​laqgħat Kristjani. Madankollu, wara li osservat il-​qlubija t’oħtna, l-​istudenta tal-​Bibbja ddeċidiet li tibda tattendi l-​laqgħat.

18. X’se jgħinek tippriedka bil-​qlubija, kif għamel Ġesù?

¹⁸ F’din id-​dinja mbiegħda minn Alla teħtieġ il-​qlubija biex tippriedka kif għamel Ġesù. X’se jgħinek tagħmel dan? Ħares lejn il-​futur. Żomm imħabbtek lejn Alla u l-​proxxmu b’saħħitha. Itlob lil Ġeħova għall-​kuraġġ. Ftakar dejjem li qatt m’int waħdek, għax Ġesù hu miegħek. (Mt. 28:20) L-​ispirtu qaddis se jsaħħek. U Ġeħova se jbierkek u jappoġġak. Għalhekk, jalla nkunu mimlijin kuraġġ u ngħidu: “Ġeħova hu dak li jgħinni; m’iniex se nibżaʼ. X’jistaʼ jagħmilli l-​bniedem?”—Ebr. 13:6.

Int Kif Twieġeb?

• Il-​qlubija għala hi meħtieġa mill-​qaddejja t’Alla?

• Sabiex inkunu qalbenin, x’nitgħallmu . . .

minn uħud leali li għexu qabel Kristu?

minn Ġesù Kristu?

mill-​Kristjani tal-​bidu?

minn sħabna l-​Kristjani llum?

[Mistoqsijiet taʼ Studju]

[Stampa f’paġna 21]

Ġesù kixef bla biżaʼ lill-​mexxejja reliġjużi

[Stampa f’paġna 23]

Ġeħova jagħtina l-​kuraġġ biex nippridkaw