“[Ħa] ikollkom bejnietkom l-​istess attitudni mentali li kellu Kristu Ġesù.”—RUM. 15:5.

1. Għala għandna nfittxu li nadottaw l-​attitudni mentali taʼ Kristu?

 “EJJEW għandi,” qal Ġesù Kristu. “Tgħallmu minni, għax jien ġwejjed u umli f’qalbi, u intom issibu serħan għal ruħkom.” (Mt. 11:28, 29) Din l-​istedina mill-​qalb tesprimi tajjeb l-​attitudni mentali kollha mħabba taʼ Ġesù. Ebda bniedem ma jistaʼ jkun t’eżempju aħjar biex insegwuh. Għalkemm kien l-​Iben setgħan t’Alla, Ġesù wera empatija u tenerezza, speċjalment maʼ dawk fil-​bżonn.

2. Liema aspetti tal-​attitudni taʼ Ġesù se nikkunsidraw?

² F’dan l-​artiklu u fit-​tnejn taʼ warajh se nikkunsidraw kif nistgħu niżviluppaw u nżommu l-​istess attitudni mentali bħal taʼ Ġesù u nirriflettu “l-​moħħ taʼ Kristu” f’ħajjitna. (1 Kor. 2:16) Se niffokaw primarjament fuq ħames aspetti: l-​attitudni ġwejda u l-​umiltà taʼ Ġesù, il-​qalb tajba tiegħu, l-​ubbidjenza tiegħu lejn Alla, il-​kuraġġ tiegħu, u l-​imħabba tiegħu li ma tonqos qatt.

Tgħallem mill-​Attitudni Ġwejda taʼ Kristu

3. (a) Ġesù x’lezzjoni fl-​umiltà għallem lid-​dixxipli tiegħu? (b) Ġesù kif irreaġixxa meta d-​dixxipli tiegħu wrew dgħufijiet?

³ Ġesù, l-​Iben perfett t’Alla, kien lest li jinżel fuq l-​art biex jaqdi fost nies imperfetti u midinbin. Xi wħud minn dawn iktar tard kienu se joqtluh. Madankollu, Ġesù dejjem baqaʼ ferħan u baqaʼ juri r-​rażna. (1 Pt. 2:21-23) Il-​fatt “li nħarsu fiss” lejn l-​eżempju taʼ Ġesù jistaʼ jgħinna nagħmlu l-​istess meta jeffettwawna n-​nuqqasijiet u l-​imperfezzjonijiet t’oħrajn. (Ebr. 12:2) Ġesù stieden lid-​dixxipli tiegħu biex jidħlu taħt il-​madmad tiegħu, u b’hekk jitgħallmu minnu. (Mt. 11:29) X’setgħu jitgħallmu? Ħaġa waħda hi li Ġesù kien ġwejjed, u kien paċenzjuż mad-​dixxipli tiegħu minkejja n-​nuqqasijiet tagħhom. Fil-​lejl taʼ qabel mewtu, Ġesù ħaslilhom saqajhom, u b’hekk għallimhom lezzjoni f’li jkunu ‘umli f’qalbhom,’ lezzjoni li qatt ma kienu se jinsew. (Aqra Ġwanni 13:14-17.) Iktar tard, meta Pietru, Ġakbu, u Ġwanni naqsu milli ‘jibqgħu għassa,’ Ġesù b’qalb tajba għaraf id-​dgħufija tagħhom. “Xmun, mela rqadt?” staqsa hu. “Ibqgħu għassa u itolbu, sabiex ma tidħlux fit-​tentazzjoni. Naturalment, l-​ispirtu hu ħerqan imma l-​laħam dgħajjef.”—Mk. 14:32-38.

4, 5. L-​eżempju taʼ Ġesù kif jistaʼ jgħinna niffaċċjaw in-​nuqqasijiet t’oħrajn?

⁴ Aħna kif nirreaġixxu meta xi ħadd minn ħutna jkun kompetittiv, jieħu għalih malajr, jew idum biex iwieġeb għal parir mingħand l-​anzjani jew “l-​ilsir leali u għaqli”? (Mt. 24:45-47) Filwaqt li għandna mnejn inkunu lesti li naċċettaw karatteristiki tal-​laħam bħala li huma normali fid-​dinja taʼ Satana, jistaʼ jkun partikolarment taʼ sfida li niffaċċjaw imperfezzjonijiet bħal dawn fost ħutna. Jekk in-​nuqqasijiet t’oħrajn idejquna faċilment, irridu nistaqsu lilna nfusna, ‘Kif nistaʼ nirrifletti aħjar “il-​moħħ taʼ Kristu”?’ Ipprova żomm f’moħħok li Ġesù ma rrabjax mad-​dixxipli tiegħu, anki meta wrew xi dgħufija spiritwali.

⁵ Ikkunsidra l-​każ tal-​appostlu Pietru. Meta Ġesù stieden lil Pietru biex jinżel mid-​dgħajsa u jimxi Lejh fuq l-​ilma, Pietru fil-​fatt hekk  għamel għal ftit. Imbagħad Pietru ħares lejn il-​maltempata u beda jegħreq. X’għamel Ġesù? Irrabja u qallu: “Aħjar għalik! Ħudha bħala lezzjoni”? Le! “Minnufih Ġesù ħareġ idu, qabdu, u qallu: ‘Int taʼ fidi żgħira, għala ddubitajt?’” (Mt. 14:28-31) Jekk qatt ikollna niffaċċjaw dak li jidher li hu nuqqas taʼ fidi minn xi ħadd minn ħutna, nistgħu b’mod figurattiv noħorġu idna u ngħinuh jikseb iktar fidi? Din żgur hi lezzjoni li tidher fil-​mod ġwejjed kif Ġesù ttratta lil Pietru.

6. Ġesù x’għallimhom lill-​appostli tiegħu dwar li jfittxu l-​prominenza?

⁶ Pietru kien involut ukoll fit-​tilwima kontinwa tal-​appostli dwar min kien l-​akbar fosthom. Ġakbu u Ġwanni riedu joqogħdu bilqiegħda wieħed fuq il-​lemin u l-​ieħor fuq ix-​xellug taʼ Ġesù f’Saltnatu. Pietru u l-​appostli l-​oħrajn inkorlaw meta semgħu dwar dan. Ġesù kien jaf li x’aktarx żviluppaw din l-​attitudni mis-​soċjetà li kienu trabbew fiha. Hu sejħilhom ħdejh u qalilhom: “Intom tafu li l-​ħakkiema tal-​ġnus jiddominawhom u l-​kbarat għandhom awtorità fuqhom. Dan m’għandux ikun fostkom; imma kulmin irid isir kbir fostkom irid ikun il-​qaddej tagħkom, u kulmin irid ikun l-​ewwel fostkom irid ikun l-​ilsir tagħkom.” Ġesù mbagħad ipponta lejn l-​eżempju tiegħu stess: “Bħalma Bin il-​bniedem ma ġiex biex ikun moqdi, imma biex jaqdi u jagħti ruħu b’fidwa għal ħafna.”—Mt. 20:20-28.

7. Kull wieħed u waħda minna kif jistaʼ jikkontribwixxi għall-​unità fil-​kongregazzjoni?

⁷ Jekk nirriflettu fuq l-​attitudni mentali umli taʼ Ġesù nistgħu niġu megħjunin biex ‘inġibu ruħna bħal wieħed mill-​iżgħar’ fost ħutna. (Lq. 9:46-48) Jekk nagħmlu hekk, inkunu qed nikkontribwixxu għall-​unità. Ġeħova, bħall-​missier taʼ familja kbira, irid li t-​tfal tiegħu “jgħammru flimkien f’unità,” li jingwalawha. (Salm 133:1) Ġesù talab lil Missieru biex il-​Kristjani veri kollha jkunu magħqudin, sabiex “id-​dinja jkollha l-​għarfien li int bgħattni u li ħabbejthom bħalma ħabbejt lili.” (Ġw. 17:23) Għalhekk, l-​unità tagħna tgħin biex tidentifikana bħala s-​segwaċi taʼ Kristu. Sabiex ingawdu din l-​unità, irridu nqisu l-​imperfezzjonijiet t’oħrajn bħalma kien iqishom Kristu. Ġesù kien jaħfer, u għallem li nistgħu niksbu l-​maħfra biss jekk naħfru.—Aqra Mattew 6:14, 15.

8. X’nistgħu nitgħallmu mill-​eżempju taʼ wħud li ilhom jaqdu lil Alla?

⁸ Nistgħu nitgħallmu ħafna wkoll billi nimitaw il-​fidi taʼ dawk li qattgħu ħafna snin jimitaw lil Kristu. Bħal Ġesù, dawn ġeneralment jagħdru l-​imperfezzjonijiet t’oħrajn. Huma tgħallmu li l-​mogħdrija bħal taʼ Kristu mhux biss tgħinna “nerfgħu d-​dgħjufijiet taʼ dawk li m’humiex b’saħħithom,” imma wkoll tikkontribwixxi għall-​unità. Iżjed minn hekk, tħeġġeġ lill-​kongregazzjoni kollha kemm hi biex tirrifletti l-​attitudni mentali taʼ Kristu. Huma jridu għal ħuthom dak li l-​appostlu Pawlu ried għall-​Kristjani f’Ruma: “L-​Alla li jipprovdi s-​sabar u l-​faraġ jagħtikom li jkollkom bejnietkom l-​istess attitudni mentali li kellu Kristu Ġesù, biex b’fehma waħda tigglorifikaw b’fomm wieħed lil Alla u Missier il-​Mulej tagħna Ġesù Kristu.” (Rum. 15:1, 5, 6) Iva, il-​qima tagħna f’unità ġġib tifħir lil Ġeħova.

9. Għala neħtieġu l-​ispirtu qaddis sabiex nimitaw l-​eżempju taʼ Ġesù?

 ⁹ Ġesù wera li hemm konnessjoni bejn li tkun ‘umli f’qalbek’ u li turi l-​ħlewwa, li hija parti mill-​frott tal-​ispirtu qaddis t’Alla. Għalhekk, minbarra li nistudjaw l-​eżempju taʼ Ġesù, neħtieġu l-​ispirtu qaddis taʼ Ġeħova sabiex inkunu nistgħu nimitaw dan l-​eżempju b’mod xieraq. Għandna nitolbu għall-​ispirtu qaddis t’Alla u nistinkaw biex nikkultivaw il-​frott tiegħu—“l-​imħabba, il-​ferħ, il-​paċi, is-​sabar fit-​tul, il-​qalb tajba, it-​tjubija, il-​fidi, il-​ħlewwa, ir-​rażna.” (Gal. 5:22, 23) B’hekk, billi nsegwu l-​eżempju t’umiltà u ħlewwa li ħalla Ġesù, se nogħġbu lil Missierna tas-​sema, Ġeħova.

Ġesù Ttratta lil Oħrajn b’Qalb Tajba

10. Ġesù kif wera qalb tajba?

¹⁰ Il-​qalb tajba wkoll hija parti mill-​frott tal-​ispirtu qaddis. Ġesù dejjem ittratta lil oħrajn b’qalb tajba. Dawk kollha li fittxew lil Ġesù bis-​sinċerità sabu li “laqagħhom b’qalb tajba.” (Aqra Luqa 9:11.) X’nistgħu nitgħallmu mill-​qalb tajba li wera Ġesù? Individwu qalbu tajba hu dħuli, ġentili, juri simpatija, u grazzjuż. Ġesù hekk kien. Hu tħassarhom lin-​nies “għax kienu maltrattati u mferrxin bħal nagħaġ mingħajr ragħaj.”—Mt. 9:35, 36.

11, 12. (a) Iddeskrivi ġrajja li fiha Ġesù wera l-​mogħdrija fl-​azzjoni. (b) X’tistaʼ titgħallem mill-​eżempju kunsidrat hawnhekk?

¹¹ Ġesù mhux biss tħassar lin-​nies u ħass mogħdrija, imma għamel dak li setaʼ biex jgħinhom. Ikkunsidra eżempju wieħed. Għal 12-il sena sħaħ, waħda mara batiet bi tnixxija taʼ demm mhux normali. Hi kienet taf li skont il-​Liġi Mosajka, minħabba l-​kundizzjoni tagħha, hi u kulmin kien imiss magħha ma kinux nodfa ċerimonjalment. (Lev. 15:25-27) Xorta waħda, ir-​reputazzjoni u l-​imġiba taʼ Ġesù żgur ikkonvinċewha li hu kellu l-​qawwa u x-​xewqa li jfejjaqha. Hi baqgħet tgħid: “Jekk imqar immisslu ħwejġu nfiq.” Billi rabbiet il-​kuraġġ, hekk għamlet u mill-​ewwel ħasset li kienet fieqet.

¹² Ġesù kien jaf li xi ħadd kien messu, u dar biex jara min kien. Il-​mara, minħabba li x’aktarx ħasbet li kien se jċanfarha talli kisret il-​Liġi, inxteħtet f’riġlejh tirtogħod bil-​biżaʼ u qaltlu l-​verità kollha. Ċanfarha Ġesù lil din il-​mara msejkna li kienet ilha tbati? ’Il bogħod minn hekk! “Binti,” qalilha b’mod rassiguranti, “il-​fidi tiegħek fejqitek. Mur fil-​paċi.” (Mk. 5:25-34) Min jaf kemm ħassitha mfarrġa meta semgħet dan il-​kliem mimli ħniena!

13. (a) L-​attitudni taʼ Ġesù kif kienet differenti minn dik tal-​Fariżej? (b) Ġesù kif ittrattahom lit-​tfal?

¹³ Kuntrarju għall-​Fariżej li kienu qalbhom iebsa, Kristu qatt ma uża l-​awtorità tiegħu biex iżid it-​toqol t’oħrajn. (Mt. 23:4) Anzi, hu għallem lil oħrajn it-​triqat taʼ Ġeħova b’qalb tajba u bil-​paċenzja. Ġesù kien ħabib li juri affezzjoni lejn is-​segwaċi tiegħu, dejjem kien juri l-​imħabba u l-​qalb tajba, ħabib taʼ veru. (Prov. 17:17; Ġw. 15:11-15) Anki t-​tfal ħassewhom komdi maʼ Ġesù, u ovvjament hu ħassu komdu magħhom. Qatt ma kellu wisq x’jagħmel li ma setax jieqaf u jqattaʼ ftit ħin maċ-​ċkejknin. F’okkażjoni minnhom, id-​dixxipli tiegħu, li bħall-​mexxejja reliġjużi taʼ madwarhom kienu għadhom qed jaħsbu dwar l-​importanza tagħhom stess, ipprovaw iwaqqfu lin-​nies milli jieħdu lit-​tfal ċkejknin tagħhom għand Ġesù biex imisshom. Ġesù ma ħax pjaċir bid-​dixxipli tiegħu. Qalilhom: “Ħallu t-​tfal żgħar jiġu għandi; tipprovawx twaqqfuhom, għax is-​saltna t’Alla hi taʼ min hu bħalhom.”  Imbagħad, billi uża t-​tfal biex jgħallem lid-​dixxipli lezzjoni importanti, hu qal: “Tassew ngħidilkom, Kulmin ma jilqax is-​saltna t’Alla bħal tifel żgħir żgur ma jidħolx fiha.”—Mk. 10:13-15.

14. It-​tfal liema benefiċċji jiksbu minn attenzjoni bnina?

¹⁴ Aħseb ftit dwar kif uħud minn dawk it-​tfal kienu se jħossuhom snin wara meta bħala rġiel u nisa, kienu se jiftakru li Ġesù Kristu ‘ħaddanhom miegħu u berikhom.’ (Mk. 10:16) It-​tfal tal-​lum ukoll se jħarsu lura b’għożża lejn l-​anzjani u oħrajn li juru interess bnin u bla egoiżmu fihom. Iktar importanti minn hekk, minn età żgħira, tfal li jintwerew interess ġenwin bħal dan fil-​kongregazzjoni jitgħallmu li l-​ispirtu taʼ Ġeħova hu fuq il-​poplu tiegħu.

Uri Qalb Tajba f’Dinja Bla Qalb

15. Għala m’għandniex nissorprendu ruħna li ħafna nies ma jurux qalb tajba llum?

¹⁵ Ħafna nies illum iħossu li m’għandhomx ħin biex juru qalb tajba m’oħrajn. Għalhekk, kuljum, fl-​iskola, fuq ix-​xogħol, waqt l-​ivvjaġġar, u fil-​ministeru, in-​nies taʼ Ġeħova ma jiġux trattati b’qalb tajba. Għalkemm forsi attitudnijiet bla qalb jiddiżappuntawna, m’għandhomx jissorprenduna. Ġeħova nebbaħ lil Pawlu biex iwissina minn qabel li l-​ħajja f’dawn l-​“aħħar jiem” kritiċi kienet se ġġib lill-​Kristjani veri f’kuntatt maʼ dawk li “jħobbu lilhom infushom, . . . mingħajr imħabba naturali.”—2 Tim. 3:1-3.

16. Kif nistgħu ninkuraġġixxu l-​qalb tajba bħal taʼ Kristu fil-​kongregazzjoni?

¹⁶ Mill-​banda l-​oħra, l-​atmosfera fil-​kongregazzjoni Kristjana vera tipprovdi kuntrast rifreskanti maʼ dik tad-​dinja bla qalb. Billi nimitaw lil Ġesù, ilkoll kemm aħna nistgħu nikkontribwixxu għal din l-​atmosfera bnina. Kif nistgħu nagħmlu dan? L-​ewwel ħaġa, ħafna fil-​kongregazzjoni għandhom bżonn l-​għajnuna u l-​inkuraġġiment tagħna għaliex jiffaċċjaw problemi taʼ saħħa jew ċirkustanzi diffiċli oħrajn. F’dawn l-​“aħħar jiem,” problemi bħal dawn għandhom mnejn qed jiżdiedu, imma żgur li mhumiex ġodda. Fi żminijiet Bibliċi, il-​Kristjani ffaċċjaw problemi simili. Għalhekk, azzjonijiet t’għajnuna huma xierqa llum bħalma kienu għall-​Kristjani li kienu qed jgħixu lura dak iż-​żmien. Pereżempju, Pawlu ħeġġeġ lill-​Kristjani biex ‘jikkonslaw lid-​dipressi, iwieżnu lid-​dgħajfin, juru sabar fit-​tul lejn kulħadd.’ (1 Tess. 5:14) Dan jinvolvi li l-​qalb tajba bħal taʼ Kristu nuruha fl-​azzjoni.

17, 18. Liema huma xi modi li bihom nistgħu nimitaw il-​qalb tajba taʼ Ġesù?

¹⁷ Il-​Kristjani għandhom ir-​responsabbiltà li ‘jilqgħu lil ħuthom b’qalb tajba,’ u li jittrattawhom kif kieku kien jittrattahom Ġesù, billi nuru interess ġenwin f’dawk li forsi ilna nafuhom snin sħaħ u f’dawk li forsi qatt ma ltqajna magħhom qabel. (3 Ġw. 5-8) Bħalma Ġesù ħa l-​inizjattiva f’li juri mogħdrija m’oħrajn, hekk ukoll għandna nagħmlu aħna, billi  dejjem inkunu taʼ serħan għal oħrajn.—Is. 32:2; Mt. 11:28-30.

¹⁸ Kull wieħed u waħda minna jistaʼ juri qalb tajba billi jieħu interess attiv fil-​benesseri t’oħrajn. Fittex modi u oħloq opportunitajiet biex tagħmel dan. Agħmel l-​almu tiegħek f’dan ir-​rigward! “Ħa jkollkom affezzjoni tenera lejn xulxin bi mħabba lejn l-​aħwa,” ħeġġeġ Pawlu, u żied jgħid: “Kunu minn taʼ quddiem biex tonoraw lil xulxin.” (Rum. 12:10) Dan ifisser li nsegwu l-​eżempju taʼ Kristu, billi nittrattaw lil oħrajn bi mħabba u qalb tajba, u nitgħallmu nuru “mħabba ħielsa mill-​ipokrisija.” (2 Kor. 6:6) Pawlu ddeskriva din l-​imħabba bħal taʼ Kristu b’dan il-​mod: “L-​imħabba tistabar fit-​tul u qalbha tajba. L-​imħabba ma tgħirx, ma tiftaħarx, ma tintefaħx.” (1 Kor. 13:4) Minflok ma nżommu f’qalbna għal ħutna rġiel u nisa, jalla nagħtu kas it-​twissija: “Kunu qalbkom tajba maʼ xulxin, agħdru b’tenerezza, u aħfru lil xulxin mill-​qalb bħalma Alla wkoll ħafrilkom mill-​qalb bi Kristu.”—Efes. 4:32.

19. Liema riżultati tajbin jiġu meta nuru l-​qalb tajba bħal taʼ Kristu?

¹⁹ Jekk nistinkaw biex nikkultivaw u nuru qalb tajba bl-​imħabba bħal taʼ Kristu f’kull ħin u f’kull sitwazzjoni se niksbu barkiet għonja. L-​ispirtu taʼ Ġeħova se jkun jistaʼ jaħdem bla tfixkil fil-​kongregazzjoni, billi jgħin lil kulħadd jiżviluppa l-​frott tal-​ispirtu. Barra minn dan, meta nsegwu l-​eżempju li ħalla Ġesù u ngħinu lil oħrajn jagħmlu l-​istess, il-​qima tagħna li nagħtu b’ferħ u f’unità se tferraħ lil Alla nnifsu. Għalhekk, ejja nistinkaw kontinwament biex nirriflettu l-​attitudni ġwejda u l-​qalb tajba taʼ Ġesù meta nittrattaw m’oħrajn.

Tistaʼ Tispjega?

• Ġesù kif wera li kien ‘ġwejjed u umli f’qalbu’?

• Ġesù kif wera qalb tajba?

• Liema huma xi modi li bihom nuru attitudni ġwejda u qalb tajba bħal taʼ Kristu f’din id-​dinja imperfetta?

[Mistoqsijiet taʼ Studju]

[Stampa f’paġna 8]

Meta l-​fidi taʼ ħu tiżvija xi ftit, bħalma għamlet taʼ Pietru, se noħorġu idna biex ngħinuh?

[Stampa f’paġna 10]

Kif tistaʼ tgħin biex il-​kongregazzjoni tkun kenn taʼ qalb tajba?