Kif rakkontata minn George Warienchuck

ĠIELI smajt xi ħaġa f’waħda mill-​konvenzjonijiet tagħna li tant kemm laqtitek ġejt imqanqal biex tagħmel bidliet kbar f’ħajtek? Lili hekk ġrali. Meta nħares lura, nirrealizza li tliet konvenzjonijiet b’mod partikulari influwenzawli ħajti. L-​ewwel waħda għenitni biex inkun inqas mistħi; it-​tieni, biex inkun iktar kuntent; it-​tielet, biex nagħti iktar. Madankollu, qabel ma ngħidilkom dwar dawn il-​bidliet, ħa nispjegalkom xi ġrajjiet li seħħew snin qabel ma nżammu dawn il-​konvenzjonijiet—ġrajjiet li għandhom x’jaqsmu maʼ tfuliti.

Jien twilidt fl-​1928, l-​iżgħar minn tlett itfal. Jien u ħuti, Margie u Olga, trabbejna f’South Bound Brook, New Jersey, l-​Istati Uniti, li dak iż-​żmien kien raħal b’madwar 2,000 abitant. Għalkemm konna foqra, ommi kienet ġeneruża. Kull meta kellha l-​flus biex tipprepara ikla speċjali, kienet taqsamha mal-​ġirien. Meta kelli disaʼ snin, ommi kellha żjara mingħand Xhud li kienet titkellem bl-​Ungeriż, il-​lingwa t’ommi, u dan qanqalha biex tismaʼ l-​messaġġ tal-​Bibbja. Iktar tard, Bertha, oħt li kellha ftit iktar minn 20 sena, kompliet l-​istudju tal-​Bibbja m’ommi u għenitha ssir qaddejja taʼ Ġeħova.

Għall-kuntrarju t’ommi, jien kont mistħi u kelli nuqqas taʼ fiduċja fija nnifsi. Biex tgħaxxaqha, ommi kellha t-​tendenza li ċċekkinni. Meta bid-​dmugħ f’għajnejja staqsejtha, “Għala dejjem tikkritikani?” hi qaltli li kienet tħobbni imma li ma riditx tfissidni żżejjed. Ommi kellha intenzjonijiet tajbin, imma n-​nuqqas taʼ kliem inkuraġġanti ġegħelni nħossni inferjuri.

Ġurnata minnhom, waħda mill-​ġirien li spiss kienet tkellimni bil-​ħlewwa staqsietni biex immur maʼ wliedha l-​iskola taʼ nhar taʼ Ħadd tal-​knisja tagħhom fejn jitgħallmu r-​reliġjon. Kont naf li Ġeħova ma kienx jieħu pjaċir jekk immur, imma kont nibżaʼ li noffendi lil dik il-​ġara li kienet qalbha tajba. Allura għal ftit xhur, kont immur il-​knisja avolja kont inħossni diżappuntat bija nnifsi. Fl-​iskola, il-​biżaʼ mill-​bniedem wassalni biex naġixxi kontra l-​kuxjenza tiegħi. Is-​surmast tal-​iskola, raġel dominanti, għamel ċert li l-​għalliema u t-​tfal kollha jsellmu lill-​bandiera. Jien ukoll kont insellem lill-​bandiera. Dan kompla għal madwar sena, u mbagħad seħħet bidla.

Tgħallimt li Għandu Jkolli l-​Kuraġġ

Fl-​1939, grupp tal-​istudju tal-​ktieb beda jiltaqaʼ d-​dar tagħna. Ben Mieszkalski, ħu żagħżugħ li kien pijunier, kien jikkonduċih. Konna nsejħulu Big Ben—u bir-​raġun. Għalija, kien jidher twil u wiesaʼ daqs il-​bieb taʼ barra tagħna. Madankollu, minkejja l-​istatura kbira tiegħu, hu kien qalbu tajba ħafna u t-​tbissima dħulija tiegħu malajr ġegħlitni nħossni komdu. Għalhekk, meta Ben staqsieni biex noħroġ fil-​ministeru miegħu, aċċettajt mill-​qalb. Sirna ħbieb. Meta kont inħossni mdejjaq, kien ikellimni bil-​mod li ħu akbar li jinteressah kien ikellem lil  ħuh iż-​żgħir. Dan kien ifisser ħafna għalija, u sirt inħobbu ħafna.

Fl-1941, Ben stieden lill-​familja tagħna biex imorru miegħu bil-​karozza tiegħu għal konvenzjoni f’St. Louis, Missouri. Immaġina kemm ħassejtni eċċitat! Qatt ma kont ivvjaġġajt iktar minn 80 kilometru mid-​dar, u issa kont sejjer f’post iktar minn 1,500 kilometru ’l bogħod! Madankollu, kien hemm il-​problemi f’St. Louis. Il-​kleru kien ordna biex il-​parruċċani jikkanċellaw kwalunkwe arranġament li kienu għamlu biex iżommu lix-​Xhieda fi djarhom. Ħafna kkanċellaw. Il-​familja li konna se noqogħdu magħha wkoll kienet ġiet mhedda. Huma xorta waħda laqgħuna. Dawk li qgħadna magħhom qalu li ma kinux se jiksru l-​wegħda tagħhom li jipprovdu kamra. Il-​kuraġġ tagħhom impressjonani.

Ħuti tgħammdu f’dik il-​konvenzjoni. L-​istess ġurnata, Ħuna Rutherford, mill-​Betel taʼ Brooklyn, ta taħdita kommoventi li fiha staqsa lit-​tfal kollha li riedu jagħmlu r-​rieda t’Alla biex iqumu bilwieqfa. Xi 15,000 qamu bilwieqfa. Jien kont wieħed minnhom. Imbagħad staqsa lil dawk li riedu jagħmlu l-​almu tagħhom fix-​xogħol tal-​ippritkar biex jgħidu, “Iva.” Flimkien mat-​tfal l-​oħrajn, jien b’leħen għoli għedt, “Iva!” Wara kien hemm ċapċip kbir. Ħassejtni mimli entużjażmu.

Wara l-​konvenzjoni, morna nżuru ħu f’West Virginia. Hu rrakkonta li darba waqt li kien fix-​xogħol tal-​ippritkar, grupp taʼ nies irrabjati sawtuh u tefgħulu l-​qatran u r-​rix. Jien qgħadt nismaʼ b’nifsi maqtugħ. “Imma se nkompli nipprietka,” qal il-​ħu. Meta tlaqna mingħand dan il-​ħu, ħassejtni bħal David. Kont lest niffaċċja lil Gulija—is-​surmast tal-​iskola tiegħi.

Lura l-​iskola, avviċinajt lis-​surmast. Hu ħares lejja bl-​ikrah. F’qalbi tlabt lil Ġeħova għall-​għajnuna. Imbagħad malajr għedtlu: “Jien mort konvenzjoni tax-​Xhieda taʼ Ġeħova. M’iniex se nsellem lill-​bandiera iktar!” Kien hemm skiet għal ftit tal-​ħin. Is-​surmast bil-​mod qam minn fuq l-​iskrivanija u mexa lejja. Wiċċu kien aħmar nar daqskemm kien irrabjat. Hu għajjat: “Sellem lill-​bandiera inkella se titkeċċa!” Din id-​darba m’għamiltx kompromess, u ġewwa fija ħassejt ferħ li qatt ma kont esperjenzajt qabel.

Kelli sebaʼ mitt sena biex ngħid lil Ben x’kien ġara. Meta rajtu fis-​Sala tas-​Saltna, għajjatt: “Keċċewni mill-​iskola! Ma sellimtx lill-​bandiera!” Ben dawwar driegħu miegħi, tbissem, u qalli: “Bla dubju, Ġeħova jħobbok.” (Dt. 31:6) Kemm immotivani dan il-​kliem! Fil-​15 taʼ Ġunju, 1942, tgħammidt.

Kif Tgħallimt Inkun Kuntent

Wara t-​Tieni Gwerra Dinjija, l-​ekonomija tal-​pajjiż f’daqqa waħda marret għall-​aħjar, u madwar il-​pajjiż stajt tixtri ħafna affarijiet ġodda. Kelli xogħol b’paga tajba u stajt nixtri affarijiet li qabel kont biss noħlom dwarhom. Xi wħud minn sħabi xtraw muturi; oħrajn irrinovaw id-​djar tagħhom. Jien xtrajt karozza ġdida fjamanta. Minħabba x-​xewqa tiegħi għal iktar kumditajiet materjali ma domtx ma bdejt inwarrab fil-​ġenb l-​interessi tas-​Saltna. Kont naf li kont miexi fid-​direzzjoni l-​ħażina. Fortunatament, fl-​1950, konvenzjoni fil-​belt taʼ New York għenitni naġġusta ħajti mill-​ġdid.

F’dik il-​konvenzjoni, kelliemi wara l-​ieħor inkuraġġixxa lill-​udjenza biex timxi ’l quddiem bix-​xogħol tal-​ippritkar. “Neħħu dak kollu li mhuwiex bżonn, u iġru t-​tiġrija,” ħeġġiġna wieħed mill-​kelliema. Kien qisu qed ikellem lili personalment. Rajt ukoll il-​gradwazzjoni taʼ  klassi taʼ Gilgħad, li ġegħlitni naħseb, ‘Jekk dawn ix-​Xhieda li huma tal-​età tiegħi jistgħu jgħaddu mingħajr kumditajiet materjali biex jaqdu f’pajjiżi barranin, jien għandi nkun lest nagħmel l-​istess hawnhekk f’pajjiżi.’ Sa tmiem il-​konvenzjoni kont iddeċidejt li nsir pijunier.

Sadanittant, kont bdejt noħroġ m’Evelyn Mondak, oħt żeluża fil-​kongregazzjoni li kont nattendi jien. Omm Evelyn, li rabbiet sitt itfal, kienet mara kuraġġuża. Kienet tħobb tagħmel ix-​xogħol tal-​ippritkar fit-​triq quddiem Knisja Kattolika Rumana kbira. Minkejja li l-​qassis kemm-il darba b’rabja qalilha biex titlaq, hi ma ċċaqalqitx. Bħal ommha, Evelyn ma kinitx tibżaʼ mill-​bniedem.—Prov. 29:25.

Fl-1951, jien u Evelyn iżżewwiġna, tlaqna x-​xogħol sekulari, u bdejna naqdu bħala pijunieri. Indokratur tas-​circuit inkuraġġiena biex immorru noqogħdu Amagansett, raħal max-​xatt tal-​Atlantiku xi 160 kilometru mill-​belt taʼ New York. Meta l-​kongregazzjoni qaltilna li ma kellhomx fejn noqogħdu, fittixna karavan imma ma stajniex insibu wieħed għal butna. Imbagħad rajna karavan li ma kienx f’kundizzjoni tajba. Is-​sid ried 900 dollaru għalih—eżatt is-​somma li konna rċivejna bħala rigali tat-​tieġ. Xtrajnieh, irranġajnieh, u ħadnieh fit-​territorju l-​ġdid tagħna. Madankollu, wasalna hemm bla sold u ħsibna dwar kif konna se nkampaw bħala pijunieri.

Evelyn kienet tnaddaf xi djar, u jien sibt xogħol innaddaf restorant Taljan tard filgħaxijiet. “Kwalunkwe ikel li jifdal,” qal is-​sid, “tistaʼ tieħdu d-​dar għall-​mara.” Għalhekk, meta kont nasal id-​dar xi s-​sagħtejn taʼ filgħodu, il-​karavan tagħna kien jimtela bir-​riħa taʼ pizez u għaġin. Dawk l-​ikliet li konna nerġgħu nsaħħnu konna nieħdu pjaċir bihom, speċjalment fix-​xitwa meta konna nirtogħdu bil-​bard fil-​karavan friżat tagħna. Iżjed minn hekk, l-​aħwa fil-​kongregazzjoni kultant kienu jħallu xi ħuta kbira fuq it-​taraġ tal-​karavan. Matul is-​snin li qdejna flimkien maʼ dawk l-​aħwa għeżież f’Amagansett, tgħallimna li jekk inkunu kuntenti bl-​affarijiet bażiċi se jkollna ħajja sodisfaċenti. Matul dawn is-​snin konna ferħanin.

Motivati Biex Nagħmlu Iktar

F’Lulju tal-​1953, ilqajna mijiet taʼ missjunarji li kienu ġew minn inkarigi f’pajjiżi barranin biex jattendu konvenzjoni internazzjonali fil-​belt taʼ New York. Dawn irrakkontaw esperjenzi affaxxinanti. L-​eċċitament tagħhom kien jittieħed. Barra minn hekk, meta kelliemi fil-​konvenzjoni enfasizza li ħafna pajjiżi kienu għadhom ma ntlaħqux bil-​messaġġ tas-​Saltna, konna nafu x’kellna nagħmlu—nagħtu iktar minna nfusna billi nżidu l-​ministeru tagħna. F’dik il-​konvenzjoni stess, applikajna għat-​taħriġ missjunarju. F’dik l-​istess sena, ġejna mistidnin biex nattendu t-​23 klassi tal-​Iskola taʼ Gilgħad, li bdiet fi Frar tal-​1954. Xi privileġġ kien dan!

Kemm fraħna meta sirna nafu li konna ġejna inkarigati biex naqdu fil-​Brażil. Qabel ma tlaqna għall-​vjaġġ tagħna t’14-il ġurnata bil-​vapur, ħu responsabbli f’Betel qalli: “Disaʼ aħwa nisa missjunarji mhux miżżewġin se jivvjaġġaw miegħek u maʼ martek lejn il-​Brażil. Ħu ħsiebhom!” Tistaʼ timmaġina l-​ħarsa fuq l-​uċuħ tal-​baħrin meta rawni tielaʼ fuq il-​vapur b’għaxar nisa għadhom żgħar mexjin warajja? Madankollu, l-​aħwa nisa ttrattaw is-​sitwazzjoni mingħajr ebda problema. Xorta waħda, ħadt ir-​ruħ meta wasalna qawwijin u sħaħ il-​Brażil.

 Wara li tgħallimna l-​Portugiż, ġejt inkarigat biex nagħmel ix-​xogħol tas-​circuit f’Rio Grande do Sul, stat fin-​Nofsinhar tal-​Brażil. L-​indokratur tas-​circuit li kont se naqdi floku, ħu mhux miżżewweġ, qal lili u lil marti: “Qed niskanta kif bagħtu koppja miżżewġa hawnhekk. Dan il-​post hu mħarbat.” Il-​kongregazzjonijiet kienu mferrxin maʼ nħawi rurali kbar ħafna, u ftit minnhom setgħu jintlaħqu biss bi trakk. Jekk kont tixtri ikla għas-​sewwieq, kien iħallik titlaʼ fit-​trakk tiegħu. Konna noqogħdu bilqiegħda bħal rikkieba taż-​żwiemel b’saqajna miftuħin fuq it-​tagħbija, u b’idejna t-​tnejn konna nżommu sod mal-​ħbula li kienu mdawrin mat-​tagħbija. Kull meta t-​trakk kien idur f’daqqa, konna niggranfaw saħansitra iktar mal-​ħbula hekk kif it-​tagħbija għolja kienet ixxaqleb lejn naħa minnhom u aħna konna naraw widien kbar taħtna. Madankollu, meta konna naraw l-​uċuħ ferħanin tal-​aħwa li kienu jkunu qed jistennewna bil-​ħerqa, dawn il-​vjaġġi li kienu jdumu ġurnata sħiħa kienu verament jiswew l-​isforzi li nkunu għamilna.

Konna noqogħdu fid-​djar tal-​aħwa. Kienu fqar ħafna, imma dan ma waqqafhomx milli jkunu ġenerużi. F’reġjun iżolat wieħed, l-​aħwa kollha kienu jaħdmu f’impjant fejn kienu jippakkjaw il-​laħam. Minħabba l-​pagi baxxi tagħhom setgħu jieklu biss darba kuljum. Jekk ma kinux jaħdmu għal ġurnata, ma kinux jitħallsu. Xorta waħda, matul iż-​żjajjar tagħna, kienu jieħdu jumejn leave mix-​xogħol biex jappoġġaw l-​attivitajiet tal-​kongregazzjoni. Poġġew il-​fiduċja tagħhom f’Ġeħova. Dawk l-​aħwa umli għallmuna lezzjonijiet dwar li nagħmlu sagrifiċċji għas-​Saltna t’Alla li qatt ma se ninsew. Matul iż-​żmien li għexna magħhom, irċivejna edukazzjoni li l-​ebda skola ma tistaʼ toffri. Hekk kif inħares lura u niftakar f’dawk l-​aħwa, għajnejja għadhom jimtlew bid-​dmugħ taʼ ferħ.

Fl-1976, aħna rritornajna l-​Istati Uniti sabiex nieħdu ħsieb ommi li kienet marida. Kien diffiċli biex nitilqu mill-​Brażil, imma aħna grati li rajna tkabbir rimarkevoli tal-​interessi tas-​Saltna f’dan il-​pajjiż. Kull meta nirċievu ittri mill-​Brażil, iġibulna ħafna memorji sbieħ taʼ dak iż-​żmien tal-​għaġeb f’ħajjitna.

Nerġgħu Niltaqgħu maʼ Ħbieb Għeżież

Hekk kif ħadna ħsieb ommi, qdejna bħala pijunieri u konna nagħmlu xi xogħol taʼ tindif. Fl-​1980, ommi mietet leali lejn Ġeħova. Wara dan, ġejt mistieden biex naqdi fix-​xogħol tas-​circuit fl-​Istati Uniti. Fl-​1990, jien u marti żorna kongregazzjoni f’Connecticut, u hemmhekk iltqajna maʼ xi ħadd speċjali ħafna. Wieħed mill-​anzjani tal-​kongregazzjoni kien Ben—iva, l-​istess Ben li kien għenni xi 50 sena qabel biex nieħu waqfa għal Ġeħova. Tistaʼ timmaġina l-​ferħ tagħna hekk kif għannaqna lil xulxin?

Mill-1996, jien u Evelyn qdejna bħala pijunieri speċjali b’saħħa batuta fil-​kongregazzjoni tal-​Portugiż f’Elizabeth, New Jersey. Għandi xi problemi taʼ saħħa, imma bl-​għajnuna tal-​għażiża marti, nieħu sehem fil-​ministeru tal-​għalqa spiss kemm jistaʼ jkun. Evelyn tgħin ukoll waħda mill-​ġirien imdaħħla fiż-​żmien u nieqsa mis-​saħħa. Isimha? Bertha—iva, l-​istess Bertha li għenet lil ommi ssir qaddejja taʼ Ġeħova iktar minn 70 sena ilu! Aħna ferħanin li għandna l-​opportunità li nesprimu l-​gratitudni tagħna lejha għal dak kollu li għamlet biex tgħin lil familti ssir taf il-​verità.

Jien grat li dawk il-​konvenzjonijiet tal-​bidu qanqluni biex nieħu l-​waqfa tiegħi għall-​qima vera, biex nissimplifika ħajti, u biex inżid fil-​ministeru tiegħi. Iva, dawk il-​konvenzjonijiet influwenzawli ħajti.

[Stampa f’paġna 23]

Omm Evelyn (xellug) u ommi

[Stampa f’paġna 23]

Il-​ħabib tiegħi Ben

[Stampa f’paġna 24]

Fil-​Brażil

[Stampa f’paġna 25]

M’Evelyn illum