“Alla qiegħed il-​membri fil-​ġisem, kull wieħed minnhom, kif għoġbu.”—1 KOR. 12:18.

1, 2. (a) X’juri li kulħadd fil-​kongregazzjoni jistaʼ jkollu post li jgħożż? (b) Liema mistoqsijiet se nikkunsidraw f’dan l-​artiklu?

 MINN żmien Israel tal-​qedem ’il quddiem, il-​kongregazzjoni kienet l-​arranġament taʼ Ġeħova biex jieħu ħsieb lill-​poplu tiegħu spiritwalment u biex jagħtihom id-​direzzjoni. Pereżempju, wara li l-​Israelin għelbu l-​belt t’Għaj, Ġożwè “qara jgħajjat il-​kliem kollu tal-​liġi, il-​barka u s-​saħta, skond kulma hemm miktub fil-​ktieb tal-​liġi . . . quddiem il-​kongregazzjoni kollha taʼ Israel.”—Ġoż. 8:34, 35.

² Fl-​ewwel seklu E.K., l-​appostlu Pawlu qal lill-​anzjan Kristjan Timotju li l-​kongregazzjoni Kristjana kienet id-​“dar t’Alla” u “pilastru u appoġġ tal-​verità.” (1 Tim. 3:15) Id-​“dar” t’Alla llum hija l-​fratellanza madwar id-​dinja taʼ Kristjani veri. F’kapitlu 12 tal-​ewwel ittra tiegħu ispirata lill-​Korintin, Pawlu jqabbel il-​kongregazzjoni maʼ ġisem uman. Hu jgħid li għalkemm kull membru għandu funzjoni  differenti, kollha huma neċessarji. “Alla qiegħed il-​membri fil-​ġisem,” jikteb Pawlu, “kull wieħed minnhom, kif għoġbu.” Saħansitra jenfasizza li “l-​partijiet tal-​ġisem li naħsbu li huma inqas onorabbli nagħtuhom ferm iktar unur.” (1 Kor. 12:18, 23) B’hekk, l-​irwol t’individwu rett fid-​dar t’Alla la hu aħjar u lanqas agħar minn dak taʼ Kristjan leali ieħor. Sempliċement hu differenti. Allura, kif nistgħu nsibu l-​post tagħna fl-​arranġament t’Alla u ngħożżuh, jew inqisuh taʼ valur? Liema fatturi jistgħu jeffettwaw il-​post li għandna? U kif jistaʼ kulħadd ‘jara li qed navanzaw’?—1 Tim. 4:15.

Ngħożżu l-​Post Tagħna​—Kif?

3. X’inhu mod wieħed kif insibu l-​post tagħna fil-​kongregazzjoni u nuru li ngħożżuh?

³ Mod wieħed kif insibu l-​post tagħna fil-​kongregazzjoni u nuru li ngħożżuh hu billi nikkooperaw bis-​sħiħ mal-​“ilsir leali u għaqli” u l-​Ġemgħa li Tiggverna li tirrappreżentah. (Aqra Mattew 24:45-47.) Irridu neżaminaw kif inwieġbu għad-​direzzjoni li nirċievu mill-​klassi tal-​ilsir. Pereżempju, matul is-​snin irċivejna direzzjoni diretta dwar l-​ilbies u d-​dehra, id-​divertiment, u l-​użu mhux xieraq tal-​Internet. Nagħtu kas dawn il-​pariri tajbin sabiex inkunu protetti spiritwalment? Xi ngħidu dwar it-​twissija biex nistabbilixxu rutina regulari taʼ qima tal-​familja? Ħadna dan il-​parir bis-​serjetà u warrabna lejla għal dan l-​iskop? Jekk aħna waħedna, qed inwarrbu ħin għall-​istudju persunali tal-​Iskrittura? Ġeħova se jberikna individwalment u bħala familji jekk insegwu l-​gwida tal-​klassi tal-​ilsir.

4. X’għandna nikkunsidraw meta nagħmlu għażliet persunali?

⁴ Xi wħud għandhom mnejn jirraġunaw li aspetti bħad-​divertiment u l-​ilbies u d-​dehra huma kwistjonijiet persunali. Però, għal Kristjan dedikat li jgħożż il-​post tiegħu fil-​kongregazzjoni, preferenzi persunali m’għandhomx ikunu l-​uniku fattur meta jieħu deċiżjoni. Trid tingħata konsiderazzjoni b’mod speċjali għall-​ħarsa taʼ Ġeħova kif tidher fil-​Kelma tiegħu, il-​Bibbja. Il-​messaġġ tagħha għandu jkun ‘musbieħ għal sieqna, u dawl għal triqatna.’ (Salm 119:105) Inkunu għaqlin ukoll jekk nikkunsidraw kif l-​għażliet li nagħmlu fi kwistjonijiet persunali jeffettwaw il-​ministeru tagħna u lil nies oħrajn, kemm ġewwa kif ukoll barra l-​kongregazzjoni.—Aqra t-​2 Korintin 6:3, 4.

5. Għala għandna ngħassu kontra l-​ispirtu t’indipendenza?

⁵ “L-​ispirtu li issa qed jaħdem f’ulied id-​diżubbidjenza” tant hu mifrux li hu bħall-​arja li nieħdu. (Efes. 2:2) Dan l-​ispirtu jistaʼ jġegħelna naħsbu li m’għandniex bżonn il-​gwida mill-​organizzazzjoni taʼ Ġeħova. Żgur li ma rridux inkunu bħal Dijotrefe, li ‘ma kien jilqaʼ xejn mingħand l-​appostlu Ġwanni bir-​rispett.’ (3 Ġw. 9, 10) Irridu ngħassu kontra li niżviluppaw spirtu t’indipendenza. Bil-​kliem jew bl-​azzjoni, jalla qatt ma nisfidaw il-​mezz taʼ komunikazzjoni li Ġeħova qed juża llum. (Num. 16:1-3) Għall-​kuntrarju, għandna ngħożżu l-​privileġġ tagħna li nikkooperaw mal-​klassi tal-​ilsir. U m’għandniex aħna nistinkaw biex inkunu ubbidjenti u sottomessi lejn dawk li qed jieħdu t-​tmexxija fil-​kongregazzjoni lokali tagħna?—Aqra Ebrej 13:7, 17.

6. Għala għandna neżaminaw iċ-​ċirkustanzi persunali tagħna?

⁶ Mod ieħor kif nuru li ngħożżu l-​post tagħna fil-​kongregazzjoni hu billi neżaminaw mill-​qrib iċ-​ċirkustanzi persunali tagħna u nagħmlu dak kollu li nistgħu biex ‘nigglorifikaw il-​ministeru tagħna’ u nġibu unur lil Ġeħova. (Rum. 11:13) Xi wħud jistgħu jaqdu bħala pijunieri regulari. Oħrajn jaqdu f’oqsma speċjali taʼ servizz full-time bħala missjunarji, indokraturi li jivvjaġġaw, u membri taʼ familji Betel madwar id-​dinja. Ħafna aħwa rġiel u nisa jgħinu fil-​bini taʼ Swali tas-​Saltna. Il-​biċċa l-​kbira minn dawk li jqimu lil Ġeħova qed jagħmlu l-​almu tagħhom biex jieħdu ħsieb il-​bżonnijiet spiritwali tal-​familji tagħhom u  jkollhom sehem sħiħ fil-​ministeru kull ġimgħa. (Aqra Kolossin 3:23, 24.) Nistgħu nkunu fiduċjużi li meta noffru lilna nfusna minn jeddna fis-​servizz t’Alla u nagħmlu l-​almu tagħna biex naqduh b’ruħna kollha, dejjem hemm post għalina fl-​arranġament tiegħu.

Fatturi li Jagħmlu Differenza

7. Spjega kif iċ-​ċirkustanzi tagħna jistgħu jeffettwaw il-​post li għandna fil-​kongregazzjoni.

⁷ Huwa importanti li niflu ċ-​ċirkustanzi tagħna għaliex, sa ċertu punt, jeffettwaw dak li nistgħu nagħmlu fil-​kongregazzjoni. Pereżempju, il-​post li għandu ħu fil-​kongregazzjoni f’ċerti aspetti huwa differenti minn dak li għandha oħt. L-​età, is-​saħħa, u fatturi oħrajn ukoll jinfluwenzaw dak li nistgħu nagħmlu fis-​servizz taʼ Ġeħova. “Is-​sbuħija taʼ l-​irġiel żgħażagħ hija l-​qawwa tagħhom,” jgħid Proverbji 20:29, “u l-​ġmiel taʼ l-​irġiel xjuħ hu x-​xagħar griż.” Membri iżgħar fil-​kongregazzjoni għandhom mnejn ikunu jistgħu jagħmlu iktar fiżikament minħabba l-​enerġija taż-​żgħożija tagħhom, filwaqt li oħrajn akbar huma taʼ benefiċċju kbir għall-​kongregazzjoni minħabba l-​għerf u l-​esperjenza tagħhom. Irridu wkoll inżommu f’moħħna li dak kollu li nistgħu nagħmlu fl-​organizzazzjoni taʼ Ġeħova jiddependi mill-​qalb tajba mhix mistħoqqa t’Alla.—Atti 14:26; Rum. 12:6-8.

8. Ix-​xewqa kemm teffettwa dak li nagħmlu fil-​kongregazzjoni?

⁸ Tixbiha taʼ żewġ nisa żgħażagħ li huma aħwa tad-​demm tenfasizza fattur ieħor li jeffettwa l-​post tagħna fil-​kongregazzjoni. It-​tnejn li huma jiggradwaw mill-​iskola. Għandhom l-​istess ċirkustanzi. Il-​ġenituri tagħhom għamlu ħilithom biex jinkuraġġuhom it-​tnejn biex jirsistu għas-​servizz taʼ pijunier regulari wara li jkunu ggradwaw. Wara li jiggradwaw, waħda minnhom tidħol fis-​servizz taʼ pijunier, filwaqt li l-​oħra tibda taħdem full-time sekularment. X’kienet id-​differenza? Kienet ix-​xewqa. Fl-​aħħar mill-​aħħar, it-​tnejn għamlu dak li xtaqu huma. Mhuwiex dan minnu għall-​maġġuranza minna? Irridu naħsbu bis-​serjetà dwar x’nixtiequ nagħmlu fis-​servizz t’Alla. Nistgħu nżidu s-​sehem tagħna fih, anki jekk dan ifisser li naġġustaw iċ-​ċirkustanzi tagħna?—2 Kor. 9:7.

9, 10. X’għandna nagħmlu jekk m’għandniex il-​motivazzjoni biex nagħmlu iktar fis-​servizz taʼ Ġeħova?

⁹ Xi ngħidu jekk sempliċement m’għandniex il-​motivazzjoni biex nagħmlu iktar fis-​servizz taʼ Ġeħova u għandna t-​tendenza li nagħmlu l-​inqas possibbli fil-​kongregazzjoni? Fl-​ittra tiegħu lill-​Filippin, Pawlu jgħid: “Alla hu dak li, għax hekk għoġbu, qed jaħdem fikom kemm biex ikollkom ir-​rieda u kemm biex taġixxu.” Iva, Ġeħova jistaʼ jaħdem fina u jeffettwa r-​rieda, jew ix-​xewqat, tagħna.—Flp. 2:13; 4:13.

¹⁰ Għalhekk, m’għandniex aħna nitolbu lil Ġeħova biex iqanqalna nkunu rridu nagħmlu r-​rieda tiegħu? Is-​Sultan David t’Israel tal-​qedem hekk għamel. Hu talab: “Għarrafni triqatek, O Ġeħova; għallimni mogħdijietek. Mexxini fil-​verità tiegħek u għallimni, għax int Alla tas-​salvazzjoni tiegħi. Fik ittamajt il-​jum kollu.” (Salm 25:4, 5) Aħna nistgħu nagħmlu l-​istess billi nitolbu li Ġeħova jqanqalna nkunu rridu nagħmlu dak li jogħġob lilu. Meta nirriflettu dwar kif Alla Ġeħova u Ibnu  jħossuhom dwar dak li nagħmlu biex naqdu l-​interessi tagħhom, qlubna jimtlew b’apprezzament għalihom. (Mt. 26:6-10; Lq. 21:1-4) Dan is-​sentiment taʼ gratitudni jistaʼ jqanqalna nitolbu lil Ġeħova bil-​ħrara biex jagħmilna nkunu rridu nagħmlu progress spiritwali. Il-​profeta Isaija pprovda eżempju tal-​attitudni li għandna nikkultivaw. Meta semaʼ leħen Ġeħova jistaqsi: “Lil min se nibgħat, u min se jmurilna?” il-​profeta wieġeb: “Hawn jien! Ibgħat lili.”—Is. 6:8.

Agħmel Progress—Kif?

11. (a) Xi ħtieġa hemm biex aħwa rġiel jistinkaw għal responsabbiltajiet fl-​organizzazzjoni? (b) Ħu kif jistaʼ jirsisti biex jilħaq privileġġi taʼ servizz?

¹¹ Peress li tgħammdu 289,678 ruħ madwar id-​dinja matul is-​sena taʼ servizz 2008, jidher ċar li hemm bżonn kbir t’aħwa rġiel biex jieħdu t-​tmexxija. Ħu kif għandu jwieġeb għal din il-​ħtieġa? Fi kliem sempliċi, billi jistinka biex jilħaq il-​kwalifiki għall-​qaddejja ministerjali u għall-​anzjani mniżżlin fl-​Iskrittura. (1 Tim. 3:1-10, 12, 13; Titu 1:5-9) Ħu kif jistaʼ jistinka biex jilħaq ħtiġijiet Skritturali bħal dawn? Billi jkollu sehem attiv fil-​ministeru, billi jieħu ħsieb l-​inkarigi tiegħu fil-​kongregazzjoni b’mod diliġenti, billi jaħdem iebes biex itejjeb il-​kwalità tal-​kummenti tiegħu fil-​laqgħat Kristjani, u billi jieħu interess persunali fi sħabu fit-​twemmin. Hu b’hekk juri li jgħożż il-​post tiegħu fil-​kongregazzjoni.

12. Iż-​żgħażagħ kif jistgħu juru ż-​żelu tagħhom għall-​verità?

¹² X’jistgħu jagħmlu aħwa rġiel żgħażagħ, speċjalment dawk fl-​adoloxxenza, biex jagħmlu progress fil-​kongregazzjoni? Jistgħu jagħmlu sforz biex jikbru ‘fl-​għerf u fl-​abbiltà mogħtija mill-​ispirtu t’Alla biex jifhmu b’mod sħiħ’ billi jieħdu għarfien mill-​Iskrittura. (Kol. 1:9) Il-​fatt li jkunu studenti diliġenti tal-​Kelma t’Alla u jkollhom sehem attiv fil-​laqgħat tal-​kongregazzjoni żgur li se jikkontribwixxi għal dan. Irġiel żgħażagħ jistgħu jirsistu wkoll billi jaħdmu biex jikkwalifikaw ħalli jgħaddu mill-​“bieb kbir għax-​xogħol” f’diversi aspetti tas-​servizz full-time. (1 Kor. 16:9) Li wieħed ifittex karriera fis-​servizz taʼ Ġeħova huwa mod taʼ ħajja verament sodisfaċenti u wieħed li jġib barkiet kbar.—Aqra Ekkleżjasti 12:1.

13, 14. L-​aħwa nisa b’liema modi jistgħu juru li jgħożżu l-​irwol tagħhom fil-​kongregazzjoni?

¹³ L-​aħwa nisa wkoll jistgħu juru li jgħożżu l-​privileġġ tagħhom li jieħdu sehem personalment fit-​twettiq taʼ Salm 68:11. Hemmhekk naqraw: “Ġeħova joħroġ il-​kelma; in-​nisa li qed ixandru l-​aħbar tajba huma armata kbira.” Wieħed mill-​iktar modi notevoli li fih l-​aħwa nisa jistgħu juru l-​gratitudni tagħhom għall-​post li għandhom fil-​kongregazzjoni hu billi jipparteċipaw fix-​xogħol taʼ li  jagħmlu dixxipli. (Mt. 28:19, 20) Għalhekk, billi jkollhom sehem sħiħ fil-​ministeru u billi minn jeddhom jagħmlu sagrifiċċji għal dan ix-​xogħol, l-​aħwa nisa juru li jgħożżu l-​irwol tagħhom fil-​kongregazzjoni.

¹⁴ Fl-​ittra tiegħu lil Titu, Pawlu stqarr: “In-​nisa mdaħħlin fiż-​żmien, ħa juru l-​biżaʼ t’Alla fl-​imġiba tagħhom, . . . għalliema taʼ dak li hu tajjeb; b’hekk ikunu jistgħu jġibu f’sensihom lin-​nisa żgħażagħ biex iħobbu lil żwieġhom, iħobbu lil uliedhom, ikunu moħħhom f’loku, safjin, ħaddiema fid-​dar, tajbin, sottomessi lejn żwieġhom, sabiex il-​kelma t’Alla ma tkunx immaqdra.” (Titu 2:3-5) X’effett mill-​aqwa jistaʼ jkollhom aħwa nisa maturi fuq il-​kongregazzjoni! Billi jirrispettaw l-​aħwa rġiel li jieħdu t-​tmexxija u billi jieħdu deċiżjonijiet għaqlin f’aspetti tal-​ħajja bħall-​ilbies u d-​dehra u d-​divertiment, huma jħallu eżempju tajjeb għal oħrajn u juru li jqisu l-​post tagħhom fil-​kongregazzjoni bħala xi ħaġa prezzjuża.

15. Oħt mhix miżżewġa x’tistaʼ tagħmel biex tkampa mas-​solitudni?

¹⁵ Kultant, jistaʼ jkun diffiċli għal oħt mhix miżżewġa biex issib il-​post tagħha fil-​kongregazzjoni. Waħda oħt li esperjenzat dan qalet: “Ħajja bħala mara mhix miżżewġa kultant tistaʼ tkun waħda taʼ solitudni.” Meta ġiet mitluba tesprimi ruħha dwar kif tkampa mas-​sitwazzjoni, hi qalet: “It-​talb u l-​istudju jgħinuni nerġaʼ nsib il-​post tiegħi. Nistudja dwar kif Ġeħova jħares lejja. Imbagħad nirsisti biex nipprova nkun t’għajnuna għal oħrajn fil-​kongregazzjoni. Dan jgħinni ma niffokax fuqi nnifsi.” Skont Salm 32:8, Ġeħova qal lil David: “Se nagħtik pariri u nżomm għajnejja fuqek.” Iva, Ġeħova jieħu interess persunali fil-​qaddejja kollha tiegħu, inkluż aħwa nisa mhux miżżewġin, u se jgħin lil kulħadd isib il-​post tiegħu fil-​kongregazzjoni.

Titlifx il-​Post Tiegħek!

16, 17. (a) Il-​fatt li aċċettajna l-​istedina taʼ Ġeħova biex inkunu parti mill-​organizzazzjoni tiegħu, għala kienet l-​aħjar deċiżjoni li qatt ħadna? (b) Kif nistgħu ma nitilfux il-​post tagħna fl-​organizzazzjoni taʼ Ġeħova?

¹⁶ Ġeħova bi mħabba daħħal lil kull wieħed mill-​qaddejja tiegħu f’relazzjoni miegħu. Ġesù qal: “Ebda bniedem ma jistaʼ jiġi għandi jekk ma jiġbdux il-​Missier li bagħatni.” (Ġw. 6:44) Mill-​biljuni taʼ nies fuq l-​art, Ġeħova għamlilna stedina persunali biex inkunu parti mill-​kongregazzjoni tiegħu llum. L-​aqwa deċiżjoni li qatt ħadna kienet li aċċettajna din l-​istedina. Tat skop lil ħajjitna. U x’ferħ u sodisfazzjon nesperjenzaw minħabba li għandna post fil-​kongregazzjoni!

¹⁷ Is-​salmista qal: “Ġeħova, jien ħabbejtha d-​dar fejn tgħammar int.” Kanta wkoll: “Sieqi se tieqaf fuq art wâtja; fost il-​qtajjaʼ miġburin jien se nbierek lil Ġeħova.” (Salm 26:8, 12) L-​Alla l-​veru għandu post għal kull wieħed u waħda minna fl-​organizzazzjoni tiegħu. Billi nkomplu nsegwu d-​direzzjoni teokratika u billi nibqgħu beżlin fis-​servizz t’Alla, qatt ma se nitilfu l-​post prezzjuż tagħna fl-​arranġament taʼ Ġeħova.

Tiftakar Int?

• Għala huwa raġunevoli li nikkonkludu li l-​Kristjani kollha għandhom post fil-​kongregazzjoni?

• Kif nuru li ngħożżu l-​post tagħna fl-​organizzazzjoni t’Alla?

• Liema fatturi jistgħu jeffettwaw il-​post tagħna fil-​kongregazzjoni?

• Żgħażagħ u adulti Kristjani kif jistgħu juru li jqisu l-​post tagħhom fl-​arranġament t’Alla bħala xi ħaġa prezzjuża?

[Mistoqsijiet taʼ Studju]

[Stampi f’paġna 16]

Aħwa rġiel kif jistgħu jirsistu għal privileġġi fil-​kongregazzjoni?

[Stampa f’paġna 17]

Aħwa nisa kif jistgħu juru li jgħożżu l-​post tagħhom fil-​kongregazzjoni?