“Dawk kollha li jistkennu [f’Ġeħova] se jifirħu; għal dejjem jgħajtu bil-​ferħ.”—SALM 5:11.

1, 2. (a) X’inhuma xi affarijiet li llum jikkaġunaw niket kbir? (b) Minbarra t-​traġedji li jilħqu lil kulħadd, il-​Kristjani veri x’għandhom jissaportu?

 IX-​XHIEDA TAʼ ĠEĦOVA mhumiex meħlusin mit-​traġedji li jolqtu lill-​bnedmin inġenerali. Ħafna min-​nies t’Alla sfaw vittmi taʼ kriminalità, gwerra, u inġustizzji oħrajn. Diżastri naturali, faqar, mard, u mewt jikkaġunaw niket kbir. L-​appostlu Pawlu b’mod xieraq kiteb: “Aħna nafu li s’issa l-​ħolqien kollu għadu jokrob u jħoss l-​uġigħ flimkien.” (Rum. 8:22) Aħna vittmi wkoll tal-​imperfezzjoni tagħna stess. Bħas-​Sultan David tal-​qedem, forsi ngħidu: “L-​iżbalji tiegħi għolew ’il fuq minn rasi; bħal tagħbija tqila huma tqal wisq għalija.”—Salm 38:4.

² Minbarra t-​traġedji li jilħqu lill-​bnedmin kollha, il-​Kristjani veri jġorru z-​zokk tat-​tortura figurattiv. (Lq. 14:27) Iva, bħal Ġesù, id-​dixxipli tiegħu huma mibgħudin u persegwitati. (Mt. 10:22, 23; Ġw. 15:20; 16:2) Għalhekk, biex insegwu lill-​Kristu jeħtieġ sforz ħerqan u sabar waqt li nistennew il-​barkiet tad-​dinja l-​ġdida.—Mt. 7:13, 14; Lq. 13:24.

3. Kif nafu li l-​Kristjani m’għandhomx għalfejn jesperjenzaw ħajja taʼ sofferenza biex jogħġbu lil Alla?

³ Ifisser dan li l-​Kristjani veri jgħixu ħajja nieqsa mill-​ferħ u l-​hena? Għandhom ħajjitna jkunu mimlijin dwejjaq u niket biss sakemm jasal it-​tmiem? Jidher ċar li Ġeħova jridna nkunu ferħanin hekk kif nistennew it-​twettiq tal-​wegħdi tiegħu. Darba wara l-​oħra, il-​Bibbja tiddeskrivi lill-​aduraturi veri bħala  nies henjin. (Aqra Isaija 65:13, 14.) “Dawk kollha li jistkennu [f’Ġeħova] se jifirħu; għal dejjem jgħajtu bil-​ferħ”, jgħid Salm 5:11. Iva, huwa possibbli li nesperjenzaw ferħ, paċi tal-​moħħ, u kuntentizza konsiderevoli saħansitra meta nkunu għaddejjin minn traġedji. Ejja nikkunsidraw kif il-​Bibbja tistaʼ tgħinna niffaċċjaw il-​provi tagħna u xorta waħda nkunu ferħanin.

Ġeħova—“L-​Alla l-​Hieni”

4. Alla kif iħossu meta r-​rieda tiegħu tiġi injorata?

⁴ Pereżempju, ikkunsidra lil Ġeħova. Bħala Alla li Jistaʼ Kollox, hu għandu l-​univers kollu kemm hu fl-​awtorità tiegħu. Ma jonqsu xejn u m’għandu bżonn lil ħadd. Madankollu, minkejja l-​qawwa tiegħu li ma titqabbel maʼ xejn, Ġeħova żgur ħassu xi ftit diżappuntat meta wieħed mill-​ulied spirti tiegħu rribella u sar Satana. Alla ċertament li ġie effettwat iktar tard meta xi anġli oħrajn ngħaqdu fir-​ribelljoni. Aħseb ukoll fl-​uġigħ li ħass Alla meta Adam u Eva, il-​kapolavuri tal-​ħolqien tiegħu fuq l-​art, ċaħduh. Minn dakinhar ’il quddiem, biljuni mid-​dixxendenti tagħhom ċaħdu l-​awtorità taʼ Ġeħova.—Rum. 3:23.

5. B’mod speċjali x’nikket lil Ġeħova?

⁵ Ir-​ribelljoni li beda Satana għadha għaddejja. Għal xi 6,000 sena, Ġeħova osserva atti t’idolatrija, vjolenza, qtil, u perverżjoni sesswali. (Ġen. 6:5, 6, 11, 12) Barra minn hekk, hu semaʼ gideb u dagħa mill-​agħar. Saħansitra anki l-​aduraturi veri t’Alla kultant weġġgħulu s-​sentimenti tiegħu. Il-​Bibbja tiddeskrivi sitwazzjoni waħda bħal din b’dan il-​kliem: “Kemm-​il darba rribellaw kontrih fix-​xagħri, ġegħluh iħossu mweġġaʼ fid-​deżert! Darba wara l-​oħra għaddew lil Alla minn prova, u weġġgħu lill-​Qaddis taʼ Israel.” (Salm 78:40, 41) Ċertament li Ġeħova jħoss uġigħ kbir meta n-​nies tiegħu jiċħduh. (Ġer. 3:1-​10) Jidher ċar li affarijiet ħżiena jiġru u Ġeħova jħossu mnikket ħafna meta dawn iseħħu.—Aqra Isaija 63:9, 10.

6. Alla kif jiffaċċja sitwazzjonijiet taʼ niket?

⁶ Madankollu, l-​uġigħ u d-​diżappunt ma waqqfux lil Ġeħova milli jieħu azzjoni. Meta qamu l-​komplikazzjonijiet, Ġeħova mill-​ewwel ħa passi biex inaqqas il-​konsegwenzi ħżiena taʼ dak li ġara. Hu wkoll ħa passi oħrajn fuq tul taʼ żmien sabiex fl-​aħħar l-​iskop tiegħu jitwettaq. Meta tqis dawn l-​azzjonijiet pożittivi, Ġeħova bil-​ferħ iħares ’il quddiem għall-​vindikazzjoni tas-​sovranità tiegħu u  għall-​barkiet li din se ġġib fuq l-​aduraturi leali tiegħu. (Salm 104:31) Iva, minkejja kemm ġie mmaqdar, Ġeħova jibqaʼ “l-​Alla l-​hieni.”—1 Tim. 1:11; Salm 16:11.

7, 8. Meta l-​affarijiet imorru ħażin, kif nistgħu nimitaw lil Ġeħova?

⁷ Veru, ma nistgħux inqabblu lilna nfusna maʼ Ġeħova f’dik li hi l-​abbiltà tagħna biex insolvu l-​problemi. Xorta waħda, nistgħu nimitaw lil Ġeħova hekk kif niffaċċjaw l-​għawġ tagħna. Huwa normali li nħossuna xi ftit imdejqin meta l-​affarijiet imorru ħażin, imma m’hemmx għalfejn nibqgħu nħossuna hekk. Minħabba li ġejna maħluqin fuq ix-​xbieha taʼ Ġeħova, għandna l-​abbiltà tal-​ħsieb u l-​għaqal u dawn jippermettulna nanalizzaw il-​problemi tagħna u nieħdu azzjoni pożittiva kull meta jkun possibbli.

⁸ Fattur importanti wieħed li jistaʼ jgħinna nkampaw mal-​problemi tal-​ħajja hu li nirrikonoxxu li ċerti affarijiet sempliċement m’għandniex kontroll fuqhom. Li nibqgħu ninkwetaw fuq affarijiet bħal dawn għandu mnejn iżidilna l-​frustrazzjoni u jisirqilna ħafna mill-​ferħ li hu assoċjat mal-​qima vera. Wara li nieħdu passi raġunevoli biex insolvu xi problema, ikun aħjar li nimxu ’l quddiem u niffokaw fuq affarijiet iktar produttivi. Ir-​rakkonti Bibliċi li ġejjin se juru tajjeb dan il-​punt.

Hu Vitali li Nkunu Raġunevoli

9. Ħanna kif uriet li kienet raġunevoli?

⁹ Ikkunsidra l-​eżempju taʼ Ħanna, li eventwalment saret omm il-​profeta Samwel. Hi kienet qalbha maqtugħa għax ma setax ikollha t-​tfal. Hi kienet tiġi mgħajra u mkasbra minħabba f’hekk. Kultant, Ħanna tant kienet tkun skuraġġita li kienet tibki u ma tikolx. (1 Sam. 1:2-​7) Matul waħda miż-​żjarat tagħha fis-​santwarju taʼ Ġeħova, ruħ Ħanna kienet saret “mimlija mrar, u bdiet titlob lil Ġeħova u tibki kemm tiflaħ.” (1 Sam. 1:10) Wara li Ħanna fetħet qalbha maʼ Ġeħova, Għeli l-​qassis il-​kbir resaq lejha u qalilha: “Mur bis-​sliem, u jalla l-​Alla taʼ Israel jismaʼ t-​talba tiegħek u jagħtik dak li tlabtu.” (1 Sam. 1:17) F’dan il-​waqt, Ħanna ċertament li rrealizzat li kienet għamlet dak kollu li setgħet. L-​infertilità tagħha ma setgħetx tikkontrollaha. Ħanna wriet li kienet raġunevoli. Imbagħad “marret għal triqitha u kielet, u wiċċha ma baqax jidher imħasseb bħal qabel.”—1 Sam. 1:18.

10. Pawlu liema attitudni realistika wera meta ffaċċja problema li hu ma setax isolvi?

¹⁰ L-​appostlu Pawlu wera attitudni simili meta ffaċċja l-​għawġ. Hu kellu problema li kkaġunatlu ħafna wġigħ. Hu sejħilha “xewka fil-​laħam.” (2 Kor. 12:7) Kienet x’kienet, Pawlu għamel dak kollu li setaʼ biex ineħħi din il-​problema billi talab lil Ġeħova għall-​għajnuna. Pawlu kemm-​il darba talab bil-​ħerqa lil Ġeħova dwar din il-​kwistjoni? Tliet darbiet. Wara t-​tielet darba, Alla għarraf lil Pawlu li x-​“xewka fil-​laħam” ma kinitx se titneħħa mirakolożament. Pawlu aċċetta dan il-​fatt u kkonċentra fuq li jaqdi lil Ġeħova bis-​sħiħ.—Aqra t-​2 Korintin 12:8-​10.

11. It-​talb u s-​suppliki liema rwol għandhom f’li jgħinuna nkampaw mal-​inkwiet?

¹¹ Dawn l-​eżempji ma jfissrux li għandna nieqfu nitolbu lil Ġeħova dwar l-​affarijiet li jinkwetawna. (Salm 86:7) Għall-​kuntrarju, il-​Kelma t’Alla tgħidilna: “Tkunu ansjużi fuq xejn, imma f’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu.” Ġeħova kif se jwieġeb għal dawn is-​suppliki u l-​petizzjonijiet? Il-​Bibbja żżid tgħid: “U l-​paċi t’Alla li tisboq kull ħsieb tgħasses lil qalbkom u l-​qawwa mentali tagħkom permezz taʼ Kristu Ġesù.” (Flp. 4:6, 7) Iva, Ġeħova forsi ma jneħħilniex il-​problema tagħna, imma jistaʼ jwieġeb talbna billi jgħasses il-​qawwiet mentali tagħna. Wara li  nitolbu dwar xi kwistjoni, nistgħu nindunaw bil-​periklu li jiġi meta jaħkmuna l-​ansjetajiet.

Tgħaxxaq f’li Tagħmel ir-​Rieda t’Alla

12. Perijodi twal taʼ skuraġġiment għala jistgħu jkunu taʼ ħsara?

¹² Proverbji 24:10 jistqarr: “Skuraġġejt ruħek fi żmien l-​hemm? Ma tantx se jkollok qawwa.” Proverbju ieħor jgħid: “Minħabba l-​uġigħ taʼ qalb hemm spirtu mdejjaq.” (Prov. 15:13) Xi Kristjani tant saru skuraġġiti li waqfu l-​qari tal-​Bibbja persunali u l-​meditazzjoni tagħhom fuq il-​Kelma t’Alla. It-​talb tagħhom sar mekkaniku, u jistaʼ jagħti l-​każ li jinqatgħu minn mal-​aduraturi sħabhom. Jidher ċar li jekk jibqgħu f’dan l-​istat jistaʼ jkun taʼ ħsara.—Prov. 18:1, 14.

13. X’inhuma xi attivitajiet li jistgħu jgħinuna negħlbu l-​iskuraġġiment u jagħtuna ċertu ammont taʼ ferħ?

¹³ Min-​naħa l-​oħra, ħarsa pożittiva se tgħinna niffokaw fuq l-​aspetti taʼ ħajjitna li minnhom nistgħu nsibu l-​għaxqa u l-​ferħ. David kiteb: “Jien tgħaxxaqt nagħmel ir-​rieda tiegħek, O Alla tiegħi.” (Salm 40:8) Meta l-​affarijiet imorru ħażin f’ħajjitna, m’għandniex inwaqqfu r-​rutina taʼ qima tajba tagħna. Fil-​fatt, kura għad-​dwejjaq hi li nieħdu sehem f’attivitajiet li jġibu l-​hena. Ġeħova jgħidilna li nistgħu nsibu l-​għaxqa u l-​hena f’li naqraw il-​Kelma tiegħu u f’li nfittxu bir-​reqqa fiha regolarment. (Salm 1:1, 2; Ġak. 1:25) Kemm mill-​Iskrittura Mqaddsa u kemm mil-​laqgħat Kristjani, nirċievu “kliem pjaċevoli” li jistaʼ jinkuraġġina u jferraħ lil qalbna.—Prov. 12:25; 16:24.

14. Liema assiguranza minn Ġeħova tferraħna issa?

¹⁴ Alla jagħtina ħafna raġunijiet biex inkunu ferħanin. Il-​wegħda tiegħu taʼ salvazzjoni hi tabilħaqq sors kbir taʼ hena. (Salm 13:5) Aħna nafu li minkejja dak li qed jiġrilna issa, fl-​aħħar Alla se jippremja lil dawk li jfittxuh bil-​ħeġġa. (Aqra Ekkleżjasti 8:12.) Il-​profeta Ħabakkuk esprima din il-​konvinzjoni b’mod mill-​isbaħ meta kiteb: “Għalkemm is-​siġra tat-​tin tistaʼ ma tarmix, u ma jkunx hemm frott fid-​dwieli; il-​prodott  tas-​siġra taż-​żebbuġ jistaʼ ma joħroġx tajjeb, u r-​rabaʼ mtarraġ ma jipproduċix ikel; in-​nagħaġ għandhom mnejn jitneħħew mill-​maqjel, u ma jkunx hemm baqar fil-​postijiet fejn jinżammu magħluqin; madankollu jien, min-​naħa tiegħi, se nifraħ b’Ġeħova; jien se nithenna bl-​Alla tas-​salvazzjoni tiegħi.”—Ħab. 3:17, 18.

“Hieni l-​Poplu li Alla Tiegħu Hu Ġeħova!”

15, 16. Semmi xi għotjiet li tana Alla li nistgħu ngawdu sakemm nistennew il-​barkiet futuri.

¹⁵ Filwaqt li nistennew il-​futur meraviljuż li hemm lest għalina, ir-​rieda taʼ Ġeħova hi li ngawdu l-​affarijiet tajbin li hu jagħtina. Il-​Bibbja tgħid: “Sirt naf li m’hemm xejn aħjar [għal bnedmin] milli jifirħu u jagħmlu t-​tajjeb matul ħajjithom; u wkoll li kull bniedem għandu jiekol u jixrob u jgawdi affarijiet tajbin għax-​xogħol iebes kollu tiegħu. Din hi l-​għotja t’Alla.” (Ekk. 3:12, 13) Li ‘tagħmel it-​tajjeb’ jinkludi li tagħmel għemejjel tajbin għan-​nom t’oħrajn. Ġesù qal li hemm iktar hena meta tagħti milli meta tirċievi. Atti taʼ qalb tajba lejn l-​imseħbin, it-​tfal, il-​ġenituri, u qraba oħrajn tagħna jġibu sodisfazzjon kbir. (Prov. 3:27) Li nuru tenerezza, ospitalità, u maħfra lejn ħutna spiritwali jirriżulta wkoll f’ħafna ferħ, u jogħġob lil Ġeħova. (Gal. 6:10; Kol. 3:12-​14; 1 Pt. 4:8, 9) U li nwettqu l-​ministeru tagħna bi spirtu taʼ sagrifiċċju persunali huwa verament premjanti.

¹⁶ Il-​kliem li għadu kif ġie kwotat tal-​Ekkleżjasti jsemmi l-​pjaċiri sempliċi tal-​ħajja, bħalma huma l-​ikel u x-​xorb. Iva, saħansitra waqt li nkunu għaddejjin minn provi, nistgħu nsibu l-​ferħ f’kull għotja materjali li rċivejna mingħand Ġeħova. Barra minn hekk, inżul ix-​xemx mill-​isbaħ, pajsaġġ maestuż, buffunati t’annimali żgħar, u meravilji oħrajn tan-​natura ma jiswewx flus, madankollu jistgħu jimlewna bi stagħġib u jferrħuna. Hekk kif nirriflettu fuq affarijiet bħal dawn, tikber l-​imħabba tagħna għal Ġeħova, għax hu d-​Donatur tal-​affarijiet tajbin kollha.

17. X’se jġibilna serħan komplet mill-​problemi, u sadanittant, x’jagħtina faraġ?

¹⁷ Fl-​aħħar mill-​aħħar, l-​imħabba tagħna għal Alla, l-​ubbidjenza lejn il-​kmandamenti tiegħu, u l-​fidi fis-​sagrifiċċju tal-​fidwa se jirriżultaw f’serħan komplet mis-​sofferenzi tal-​ħajja imperfetta u jwassluna għal ferħ dejjiemi. (1 Ġw. 5:3) Sadanittant, insibu faraġ f’li nkunu nafu li Ġeħova hu konxju tal-​affarijiet kollha li jinkwetawna. David kiteb: “Se nifraħ u nithenna bil-​qalb tajba bl-​imħabba tiegħek, għax int rajt is-​sofferenza tiegħi; kont taf bin-​niket taʼ ruħi.” (Salm 31:7) Imqanqal mill-​imħabba tiegħu għalina, Ġeħova se jeħlisna mill-​gwaj.—Salm 34:19.

18. Għala għandu jispikka l-​ferħ fost il-​poplu t’Alla?

¹⁸ Filwaqt li nistennew it-​twettiq tal-​wegħdi tiegħu, jalla nimitaw lil Ġeħova, l-​Alla l-​hieni. Jalla ma nħallux sentimenti negattivi jżommuna lura milli nkomplu naqdu lil Alla. Meta jqumu l-​problemi, jalla nħallu l-​abbiltà tal-​ħsieb u l-​għaqal jiggwidawna. Ġeħova se jgħinna nikkontrollaw l-​emozzjonijiet tagħna u nieħdu kwalunkwe pass possibbli biex innaqqsu l-​effetti ħżiena tal-​gwajijiet taʼ niket. Ejja nsibu l-​għaxqa fl-​affarijiet tajbin li jiġu minn Alla, kemm fiżiċi u kemm spiritwali. Billi nibqgħu qrib tiegħu, se nkunu nistgħu nifirħu għax “hieni l-​poplu li Alla tiegħu hu Ġeħova!”—Salm 144:15.

X’Tgħallimt?

• Meta niffaċċjaw l-​għawġ, kif nistgħu nimitaw lil Ġeħova?

• Il-​fatt li nkunu raġunevoli kif jistaʼ jgħinna nkampaw mal-​għawġ?

• Fi żminijiet taʼ niket, kif nistgħu nsibu l-​għaxqa f’li nagħmlu r-​rieda t’Alla?

[Mistoqsijiet taʼ Studju]

[Stampi f’paġna 16]

Ġeħova jħossu mnikket minħabba l-​affarijiet ħżiena li qed jiġru

[Sors]

© G.M.B. Akash/Panos Pictures

[Stampi f’paġna 18]

Ġeħova tana l-​mezzi biex inżommu l-​ferħ