Għodda Biex Tgħin liż-​Żgħażagħ Jiftakru fil-​Ħallieq Tagħhom

“FTAKAR fil-​Ħallieq tiegħek waqt li għadek żagħżugħ,” kiteb l-​għaref Salamun xi 3,000 sena ilu. (Ekk. 12:1, Today’s English Version) Iż-​żgħażagħ Kristjani issa għandhom għodda oħra biex tgħinhom jagħmlu hekk. Il-​ktieb Questions Young People Ask—Answers That Work, Volume 2, (Iż-​Żgħażagħ Jistaqsu . . . Tweġibiet Prattiċi għall-​Mistoqsijiet Tagħhom, it-​2 Volum) inħareġ fil-​konvenzjonijiet distrettwali tax-​Xhieda taʼ Ġeħova, li nżammu madwar id-​dinja minn Mejju 2008 sa Jannar 2009 u li kellhom it-​titlu “Gwidati mill-​Ispirtu t’Alla.” Għalkemm il-​ktieb għadu mhux disponibbli bil-​Malti, f’dan l-​artiklu, it-​titli ġew tradotti.

Fuq in-​naħa taʼ ġewwa tal-​qoxra taʼ quddiem tal-​ktieb hemm ittra għaż-​żgħażagħ mill-​Ġemgħa li Tiggverna. Parti minnha tgħid: “Aħna nitolbu bil-​ħerqa biex l-​informazzjoni li hemm f’din il-​pubblikazzjoni tgħinek tissaporti l-​pressjonijiet u t-​tentazzjonijiet li jiffaċċjaw iż-​żgħażagħ illum u turik kif tieħu deċiżjonijiet li huma fi qbil mar-​rieda t’Alla.”

Il-​ġenituri bix-​xieraq jixtiequ jrabbu lil uliedhom “fid-​dixxiplina u l-​gwida mentali taʼ Ġeħova.” (Efes. 6:4) Madankollu, meta jsiru adoloxxenti, ħafna żgħażagħ ikollhom nuqqas taʼ fiduċja fihom infushom u jixxennqu għal direzzjoni. Jekk int ġenitur taʼ adoloxxenti, kif tistaʼ tgħin lil uliedek jibbenefikaw l-​iktar minn din il-​pubblikazzjoni? Issa ġejjin xi suġġerimenti.

▪ Ikseb kopja għalik innifsek taʼ dan il-​ktieb u sir familjari sew miegħu. Dan jinvolvi iktar milli sempliċement taqrah. Ipprova wkoll innota l-​mod kif l-​ideat huma espressi fil-​ktieb. Minflok ma sempliċement jgħid liż-​żgħażagħ dak li hu tajjeb u dak li hu ħażin, il-​ktieb jistinka biex iħarreġ “is-​sensi tagħhom.” (Ebr. 5:14) Jagħtihom ukoll suġġerimenti prattiċi dwar kif jieħdu waqfa għal dak li hu tajjeb. Pereżempju, Kapitlu 15 (“Kif  Nistaʼ Nirreżisti l-​Pressjoni Minn Dawk Tampari?”) mhux biss jgħid liż-​żgħażagħ jgħidu le, imma wkoll jispjega kif għandhom jużaw il-​prinċipji tal-​Bibbja biex isolvu l-​problemi u kif iwieġbu f’sitwazzjonijiet reali sabiex ikunu jistgħu ‘jwieġbu lil kulħadd.’—Kol. 4:6.

▪ Uża l-​aspetti tal-​ktieb li jinvolvu l-​qarrej. Għalkemm dawn huma mfasslin għaż-​żgħażagħ, għala ma tiktibx fil-​kopja tiegħek stess fejn ikun xieraq? a Pereżempju, meta tikkunsidra f’paġna 16 iż-​żewġ mistoqsijiet li jinvolvu l-​qarrej dwar in-​namrar, ipprova ftakar kif kont tħossok int meta kellek l-​età taʼ wliedek. Għandek mnejn fl-​ispazji provduti tkun trid tikteb it-​tweġibiet kif kont twieġeb il-​mistoqsijiet f’dak iż-​żmien. Imbagħad tistaʼ tistaqsi lilek innifsek: ‘Is-​sentimenti tiegħi dwar dan is-​suġġett kif tbiddlu maż-​żmien? Liema dehen ksibt minn mindu kont adoloxxenti, u kif nistaʼ b’mod effettiv ngħaddih lil uliedi?’

▪ Irrispetta l-​privatezza tal-​adoloxxenti tiegħek. L-​aspetti taʼ dan il-​ktieb li jinvolvu l-​qarrej huma mfasslin biex iħeġġu lil uliedek jesprimu ruħhom. Dan jagħmluh billi jiktbu dwar is-​suġġett fil-​ktieb tagħhom jew inkella jaħsbu dwar is-​suġġett. Il-​mira tiegħek hi li tara x’hemm f’qalbhom, mhux x’hemm fil-​ktieb tagħhom. F’paġna 3 tas-​sezzjoni intitolata “Nota lill-​Ġenituri,” il-​ktieb jissuġġerixxi: “Biex tinkuraġġixxi lill-​adoloxxenti tiegħek jiktbu fil-​ktieb tagħhom bis-​sinċerità, ħallilhom ammont taʼ privatezza. Iktar tard għandhom mnejn jiftħu qalbhom miegħek dwar il-​kwistjonijiet li kitbu dwarhom.”

Għajnuna għall-​Istudju tal-​Bibbja tal-​Familja

Il-​ktieb Iż-​Żgħażagħ Jistaqsu, it-​2 Volum, huwa għajnuna eċċellenti biex tużah matul il-​Qima tal-​Familja tiegħek. Ladarba l-​ktieb ma fihx mistoqsijiet għall-​istudju għal kull paragrafu, kif tistaʼ tużah? Għala ma tadottax metodu taʼ studju li hu l-​iktar effettiv għal uliedek?

Pereżempju, xi familji forsi jieħdu pjaċir jagħmlu sessjonijiet taʼ prattika meta jikkunsidraw il-​“Pjan Kif Se Niffaċċja l-​Pressjoni Minn Dawk Tampari” f’paġni 132 u 133. L-​ewwel mistoqsija li hemm tistaʼ tgħin lil uliedek jidentifikaw il-​kwistjoni li huma jsibuha l-​iktar taʼ sfida. It-​tieni mistoqsija tidentifika s-​sitwazzjoni fejn x’aktarx li se jkun hemm din il-​pressjoni. Wara li jikkunsidraw il-​konsegwenzi taʼ li jċedu għal pressjoni minn dawk tamparhom jew jirreżistuha, uliedek jintalbu jippjanaw xi tweġibiet. Dawn jistgħu jkunu li jammettu li jinsabu taħt pressjoni, li jistqarru l-​pożizzjoni tagħhom, jew li jagħmlu pressjoni fuq min għamilha fuqhom. Għin lil uliedek biex ikunu kreattivi u għinhom jippreparaw tweġibiet li jħossuhom komdi bihom u li jkunu kapaċi jużawhom b’kunfidenza u b’konvinzjoni.—Salm 119:46.

 Għodda għall-​Komunikazzjoni

Il-​ktieb Iż-​Żgħażagħ Jistaqsu, it-​2 Volum, jinkuraġġixxi liż-​żgħażagħ biex jikkomunikaw mal-​ġenituri tagħhom. Pereżempju, il-​kaxxi “Kif Nistaʼ Nkellem lil Missieri jew lil Ommi Dwar is-​Sess?” (paġni 63-​64) u “Kellem lill-​Ġenituri Tiegħek!” (paġna 189) jipprovdu suġġerimenti prattiċi dwar kif tibda diskussjoni fuq suġġetti sensittivi. Tfajla taʼ 13-​il sena kitbet, “Dan il-​ktieb tani l-​kuraġġ biex inkellem lill-​ġenituri tiegħi dwar affarijiet li kelli fuq moħħi—saħansitra dwar affarijiet li kont għamilt.”

Dan il-​ktieb jippromwovi l-​komunikazzjoni b’modi oħrajn ukoll. Fl-​aħħar taʼ kull kapitlu hemm kaxxa bit-​titlu “Int X’Taħseb?” Iktar minn sempliċi reviżjoni, din il-​kaxxa tistaʼ tintuża bħala bażi għal diskussjoni tal-​familja. Lejn l-​aħħar taʼ kull kapitlu hemm ukoll kaxxa bit-​titlu “X’Azzjoni Se Nieħu!” Din il-​kaxxa tagħti liż-​żgħażagħ opportunità biex iniżżlu bil-​miktub modi speċifiċi kif jistgħu japplikaw dak li tgħallmu minn dak il-​kapitlu. L-​aħħar sentenza taʼ kull kaxxa “X’Azzjoni Se Nieħu!” tgħid: “Dak li nixtieq ngħid lill-​ġenitur(i) dwar dan is-​suġġett hu . . . ” Dan jistaʼ jgħin liż-​żgħażagħ biex iduru lejn il-​ġenituri tagħhom għal pariri siewja.

Ilħaq il-​Qalb!

Bħala ġenitur, il-​mira tiegħek hi li tilħaq qalb uliedek. Il-​ktieb Iż-​Żgħażagħ Jistaqsu, it-​2 Volum, jistaʼ jgħinek tagħmel hekk. Ikkunsidra kif missier kien kapaċi juża dan il-​ktieb biex iħeġġeġ komunikazzjoni sinċiera maʼ bintu.

“Jien u Rebekah għandna xi postijiet sbieħ li nħobbu mmorru fihom bil-​mixi, bir-​rota, jew bil-​karozza. Indunajt li dawn il-​ħarġiet jipprovdu ambjent li jippermettilha tiftaħ qalbha.

“L-​ewwel parti li kkunsidrajna minn dan il-​ktieb kienet l-​ittra mill-​Ġemgħa li Tiggverna u n-​‘Nota lill-​Ġenituri.’ Ridt li binti tkun taf li bħalma hemm miktub f’paġna 3, hi setgħet tħossha komda tikteb dak li trid fil-​ktieb tagħha. Jien ma kontx se nara dak li tkun kitbet hi.

“Ħallejt lil Rebekah tagħżel il-​kapitli li xtaqet tiddiskuti fl-​ordni li xtaqet tiddiskutihom hi. Wieħed mill-​ewwel kapitli li għażlet kien ‘Għandi Nilgħab Logħob Elettroniku?’ Qatt ma kont nobsor li kienet se tagħżel dan il-​kapitlu! Madankollu, hi kellha raġuni. Għadd minn sħabha kienu qed jilagħbu logħba li xejn ma kienet sabiħa. Ma kellix idea tal-​vjolenza espliċita u l-​kliem baxx li kien fiha! Imma dan kollu ħareġ hekk kif iddiskutejna l-​kaxxa “X’Azzjoni Se Nieħu!” f’paġna 251. Din għenet ukoll lil Rebekah biex tipprepara tweġiba fil-​każ li xi ħadd jipprova jagħmlilha pressjoni biex tilgħab il-​logħba.

“Issa, Rebekah ma żżommx lura milli tgħidli x’kitbet fil-​ktieb tagħha. L-​istudju tagħna hu konversazzjoni mill-​bidu sal-​aħħar. Naqraw paragrafu kull wieħed, u mbagħad hi tkun trid titkellem fuq kollox, inkluż l-​istampi u l-​kaxxi. Dan jagħtini l-​opportunità biex ngħidilha dwar kif kienu l-​affarijiet meta kont daqsha, u mbagħad hi tgħidli kif inhuma l-​affarijiet illum. Tkun trid tiftaħ qalbha miegħi fuq kollox!”

Jekk int ġenitur, mingħajr dubju fraħt ħafna meta ħareġ dan il-​ktieb. Issa għandek l-​opportunità li tagħmel użu tajjeb minnu. Hija t-​tama tal-​Ġemgħa li Tiggverna li l-​ktieb Iż-​Żgħażagħ Jistaqsu . . . Tweġibiet Prattiċi għall-​Mistoqsijiet Tagħhom, it-​2 Volum, ikun barka għall-​familja tiegħek. Jalla jgħin lil kulħadd—speċjalment liż-​żgħażagħ għeżież tagħna—biex ‘jibqaʼ miexi bl-​ispirtu qaddis.’—Gal. 5:16.

[Nota taʼ taħt]

[Kaxxa f’paġna 30]

Dak li Qed Jgħidu xi Żgħażagħ

“Dan hu ktieb li għandek toqgħod bilqiegħda b’lapes f’idek u taqrah bil-​ħsieb. Il-​fatt li hu disinjat biex jintuża bħala djarju persunali jippermetti riflessjoni privata bil-​mira li toħloq għalik innifsek l-​aqwa mod taʼ ħajja.”—Nicola.

“Ikolli pressjoni kbira biex noħroġ mal-​ġuvintur, saħansitra minn nies b’intenzjoni tajba. L-​ewwel sezzjoni taʼ dan il-​ktieb ikkonvinċietni li jgħidu x’jgħidu, m’iniex lesta li noħroġ maʼ xi ġuvni.”—Katrina.

“Il-​kaxxa ‘Qed Taħseb Biex Titgħammed?’ għenitni biex nieħu l-​magħmudija tiegħi iktar bis-​serjetà. Immotivatni biex nerġaʼ neżamina d-​drawwa tiegħi tal-​istudju u tat-​talb.” —Ashley.

“Avolja l-​ġenituri Kristjani tiegħi għallmuni minn età żgħira, dan il-​ktieb għinni nirraġuna għalija nnifsi dwar il-​passi li għandi nieħu f’ħajti. Għinni wkoll biex iktar niftaħ qalbi mal-​ġenituri tiegħi.”—Zamira.

[Stampa f’paġna 31]

Ġenituri, siru familjari sew maʼ dan il-​ktieb

[Stampa f’paġna 32]

Agħmilha l-​mira tiegħek li tilħaq qalb uliedek