Merħla Waħda, Ragħaj Wieħed
Merħla Waħda, Ragħaj Wieħed
“Intom li ġejtu warajja toqogħdu wkoll bil-qiegħda fuq tnax-il tron, tiġġudikaw lit-tnax-il tribù taʼ Israel.”—MT. 19:28.
1. Ġeħova kif ittratta mad-dixxendenti taʼ Abraham, u dan għala ma jfissirx li injora għalkollox in-nies l-oħrajn kollha?
ĠEĦOVA ħabb lil Abraham, u għalhekk Hu wera mħabba leali mad-dixxendenti taʼ Abraham. Għal iktar minn 15-il seklu, ħares lejn il-ġens taʼ Israel, li kien dixxendent taʼ Abraham, bħala l-poplu magħżul tiegħu, il-“proprjetà speċjali” tiegħu. (Aqra Dewteronomju 7:6.) Kien ifisser dan li Ġeħova injora għalkollox in-nies taʼ ġnus oħrajn? Le. Matul dak iż-żmien, dawk li ma kinux Israelin u li xtaqu jqimu lil Ġeħova setgħu jingħaqdu mal-ġens speċjali tiegħu. Dawn l-uħud li kkonvertew, jew proseliti, tqiesu bħala parti mill-ġens. Kellhom jiġu trattati bħala aħwa. (Lev. 19:33, 34) U kellhom jobdu l-liġijiet kollha taʼ Ġeħova.—Lev. 24:22.
2. Liema stqarrija allarmanti għamel Ġesù, u liema mistoqsijiet tqajjem?
2 Madankollu, Ġesù għamel din l-istqarrija allarmanti lil-Lhud taʼ żmienu: “Is-saltna t’Alla tittieħed mingħandkom u tingħata lil ġens li jagħti l-frott minnha.” (Mt. 21:43) Min kien se jifforma dan il-ġens il-ġdid, u llum aħna kif niġu effettwati minn din il-bidla?
Il-Ġens il-Ġdid
3, 4. (a) L-appostlu Pietru kif identifika l-ġens il-ġdid? (b) Min jifforma dan il-ġens il-ġdid?
3 L-appostlu Pietru identifika b’mod ċar dan il-ġens il-ġdid. Lill-Kristjani sħabu kitbilhom dan li ġej: “Intom ‘razza magħżula, saċerdozju rjali, ġens qaddis, poplu miksub bħala proprjetà speċjali, sabiex ixxandru ma’ kullimkien il-kwalitajiet eċċellenti’ taʼ dak li sejħilkom mid-dlam għal ġod-dawl tiegħu taʼ l-għaġeb.” (1 Pt. 2:9) Bħalma kien imbassar, il-Lhud naturali li aċċettaw lil Ġesù bħala l-Messija kienu l-ewwel membri taʼ dak il-ġens il-ġdid. (Dan. 9:27a; Mt. 10:6) Iktar tard, ħafna wħud li ma kinux Israelin ġew inklużi wkoll maʼ dan il-ġens, għax Pietru kompla biex jgħid: “Darba ma kontux poplu, imma issa l-poplu t’Alla.”—1 Pt. 2:10.
4 Hawnhekk Pietru lil min kien qed ikellem? Fil-bidu tal-ittra tiegħu jgħid: “[Alla] wilidna mill-ġdid għal tama ħajja permezz taʼ l-irxoxt taʼ Ġesù Kristu mill-imwiet, għal wirt li ma jitħassarx u ma jitniġġisx u ma jispiċċax. Dan hu merfugħ fis-smewwiet għalikom.” (1 Pt. 1:3, 4) Għalhekk, dan il-ġens il-ġdid hu magħmul minn Kristjani midlukin, li għandhom it-tama għas-sema. Dawn huma “l-Israel t’Alla.” (Gal. 6:16) F’viżjoni, l-appostlu Ġwanni ra li dawn l-Israelin spiritwali jgħoddu 144,000. Dawn “inxtraw minn fost il-bnedmin bħala l-ewwel frott għal Alla u għall-Ħaruf” biex jaqdu bħala “qassisin” u biex “isaltnu [maʼ Ġesù] għall-elf sena.”—Riv. 5:10; 7:4; 14:1, 4; 20:6; Ġak. 1:18.
Hemm Oħrajn li Huma Inklużi Wkoll?
5. (a) L-espressjoni “Israel t’Alla” għal min tirreferi? (b) Il-kelma “Israel” għala mhux dejjem tirreferi għall-midlukin biss?
5 Għalhekk, jidher ċar li l-frażi “Israel t’Alla” f’Galatin 6:16 tirreferi biss għall-Kristjani midlukin. Allura, hemm drabi meta Ġeħova juża l-ġens taʼ Israel bħala stampa, jew tixbiha, li tinkludi Kristjani oħrajn minbarra l-midlukin? It-tweġiba tistaʼ tinstab f’dan il-kliem li Ġesù qal lill-appostli leali tiegħu: “Nagħmel patt magħkom għal saltna, bħalma Missieri għamel miegħi, biex tieklu u tixorbu fuq il-mejda tiegħi f’saltnati, u toqogħdu bil-qiegħda fuq tronijiet biex tiġġudikaw lit-tnax-il tribù taʼ Israel.” (Lq. 22:28-30) Dan se jseħħ matul “it-tiġdid taʼ kollox,” jew iż-żmien taʼ tiġdid spiritwali, matul il-Ħakma Millennjali taʼ Kristu.—Aqra Mattew 19:28.
6, 7. L-espressjoni “t-tnax-il tribù taʼ Israel” għal min tirreferi fil-kuntest taʼ Mattew 19:28 u Luqa 22:30?
6 Il-144,000 se jaqdu bħala slaten, qassisin, u mħallfin fis-sema matul ir-Renju taʼ Elf Sena. (Riv. 20:4) Lil min se jiġġudikaw, u fuq min se jaħkmu? F’Mattew 19:28 u f’Luqa 22:30 jintqalilna li se jiġġudikaw “lit-tnax-il tribù taʼ Israel.” F’dan il-kuntest, “it-tnax-il tribù taʼ Israel” taʼ min jagħtu stampa? Jirrappreżentaw lil dawk kollha li għandhom it-tama għall-art—dawk li jpoġġu l-fidi fis-sagrifiċċju taʼ Ġesù, imma li mhumiex inklużi fil-klassi rjali taʼ qassisin. (It-tribù taʼ Levi ma kienx inkluż mal-lista tat-12-il tribù taʼ Israel naturali.) Dawk li f’dan il-kuntest huma rappreżentati mit-12-il tribù taʼ Israel huma l-uħud li se jiksbu benefiċċji spiritwali mis-servizzi saċerdotali tal-144,000. Dawn l-uħud li se jibbenefikaw u li mhumiex qassisin huma wkoll in-nies t’Alla, u hu jħobbhom u jaċċettahom. Huwa xieraq li huma mxebbhin mal-poplu tiegħu tal-qedem.
7 B’mod xieraq, wara li l-appostlu Ġwanni ra l-144,000 Israeli spiritwali jiġu siġillati b’mod permanenti qabel it-tribulazzjoni l-kbira, osserva wkoll “folla kbira” bla għadd, li joħorġu “minn kull ġens.” (Riv. 7:9) Dawn se jgħaddu ħajjin mit-tribulazzjoni l-kbira għal ġor-Renju Millennjali taʼ Kristu. Hemmhekk se jingħaqdu magħhom biljuni taʼ wħud irxoxtati. (Ġw. 5:28, 29; Riv. 20:13) Dawn kollha se jifformaw “it-tnax-il tribù [simboliku] taʼ Israel,” li se jiġu ġudikati minn Ġesù u l-144,000 li jaħkmu bi sħab miegħu.—Atti 17:31; 24:15; Riv. 20:12.
8. Il-ġrajjiet taʼ Jum it-Tpattija, li kien isir darba fis-sena, kif jiffiguraw bil-quddiem ir-relazzjoni bejn il-144,000 u l-bqija tal-bnedmin?
8 Din ir-relazzjoni bejn il-144,000 u l-bqija tal-bnedmin ġiet iffigurata bil-quddiem mill-ġrajjiet taʼ Jum it-Tpattija, li kien isir darba fis-sena. (Lev. 16:6-10) Il-qassis il-kbir l-ewwel kellu jissagrifika barri bħala offerta għad-dnub “għalih innifsu u għal daru.” B’hekk, is-sagrifiċċju taʼ Ġesù japplika l-ewwel għal dawk taʼ daru li huma sotto-qassisin u li se jaqdu miegħu fis-sema. Ukoll, f’Jum it-Tpattija tal-qedem, kienu jiġu provduti żewġ gidjien għad-dnub tal-Israelin l-oħrajn. F’dan il-kuntest, li fih it-tribù saċerdotali jagħti stampa tal-144,000, il-kumplament taʼ Israel jagħti stampa taʼ dawk kollha li għandhom it-tama għall-art. Dan l-applikar juri li l-frażi “t-tnax-il tribù taʼ Israel” f’Mattew 19:28 ma tirreferix għas-sotto-qassisin taʼ Ġesù midlukin bl-ispirtu, imma għall-oħrajn kollha li jpoġġu l-fidi tagħhom fis-sagrifiċċju taʼ Ġesù. a
9. Fil-viżjoni tat-tempju li kellu Eżekjel, il-qassisin lil min jirrappreżentaw, u l-Israelin li ma kinux qassisin lil min jirrappreżentaw?
9 Ikkunsidra eżempju ieħor. Il-profeta Eżekjel ngħata viżjoni estensiva tat-tempju taʼ Ġeħova. (Eżek., kapi. 40-48) F’din il-viżjoni, il-qassisin kienu jaħdmu fit-tempju, billi jipprovdu istruzzjoni u jirċievu l-pariri u l-korrezzjoni mingħand Ġeħova. (Eżek. 44:23-31) Fl-istess viżjoni, membri taʼ tribujiet differenti kienu jmorru jqimu u joffru sagrifiċċji. (Eżek. 45:16, 17) Għalhekk, f’dan il-kuntest, il-qassisin jagħtu stampa tal-midlukin, filwaqt li l-Israelin mit-tribujiet li ma kinux qassisin jagħtu stampa taʼ dawk li għandhom it-tama għall-art. Il-viżjoni tenfasizza li ż-żewġ gruppi jaħdmu flimkien b’mod armonjuż, bil-klassi tal-qassisin tieħu t-tmexxija fil-qima pura.
10, 11. (a) Liema twettiq li jsaħħilna l-fidi rajna tal-kliem taʼ Ġesù? (b) Liema mistoqsija tqum dwar in-nagħaġ l-oħrajn?
10 Ġesù tkellem dwar “nagħaġ oħrajn,” li ma kellhomx ikunu tal-istess “maqjel” tal-“merħla żgħira” tas-segwaċi midlukin tiegħu. (Ġw. 10:16; Lq. 12:32) Hu qal: “Lil dawn ukoll irrid inġibhom, u jisimgħu leħni, u jsiru merħla waħda, ragħaj wieħed.” Kemm isaħħilna l-fidi l-fatt li rajna t-twettiq taʼ dan il-kliem! Żewġ gruppi taʼ nies ngħaqdu flimkien—il-grupp żgħir taʼ wħud midlukin u l-folla l-kbira taʼ nagħaġ oħrajn. (Aqra Żakkarija 8:23.) Għalkemm in-nagħaġ l-oħrajn ma jaqdux b’mod simboliku fil-bitħa taʼ ġewwa tat-tempju spiritwali, huma jaqdu fil-bitħa taʼ barra taʼ dan it-tempju.
11 Imma jekk Ġeħova kultant juża lill-membri taʼ Israel tal-qedem li ma kinux qassisin biex jagħtu stampa taʼ dawn in-nagħaġ l-oħrajn, għandhom dawk b’tama għall-art ukoll jieħdu mill-emblemi tat-Tifkira? Issa se nikkunsidraw it-tweġiba għal din il-mistoqsija.
Il-Patt il-Ġdid
12. Liema arranġament ġdid bassar Ġeħova?
12 Ġeħova bassar arranġament ġdid għall-poplu tiegħu meta qal: “Dan hu l-patt li nagħmel ma’ dar Israel wara dak iż-żmien. . . . Inqiegħed il-liġi tiegħi ġo fihom, u niktibha f’qalbhom. U nsir Alla tagħhom, u huma jsiru l-poplu tiegħi.” (Ġer. 31:31-33) Permezz taʼ dan il-patt il-ġdid, il-wegħda taʼ Ġeħova lil Abraham kellu jkollha twettiq glorjuż u dejjiemi.—Aqra Ġenesi 22:18.
13, 14. (a) Min huma l-parteċipanti fil-patt il-ġdid? (b) Min huma dawk li jibbenefikaw, u kif “iżommu sod” maʼ dan il-patt il-ġdid?
13 Ġesù rrefera għal dan il-patt il-ġdid fil-lejla taʼ qabel mewtu meta qal: “Dan il-kies jirrappreżenta l-patt il-ġdid konfermat b’demmi li se jixxerred għalikom.” (Lq. 22:20; 1 Kor. 11:25) Huma l-Kristjani kollha inklużi f’dan il-patt il-ġdid? Le. Xi wħud, bħall-appostli li xorbu minn dak il-kies dik il-lejla, huma parteċipanti fil-patt il-ġdid. b Ġesù għamel patt ieħor magħhom biex jaħkmu flimkien miegħu fis-Saltna tiegħu. (Lq. 22:28-30) Dawn se jieħdu sehem maʼ Ġesù f’Saltnatu.—Lq. 22:15, 16.
14 Xi ngħidu għal dawk li se jgħixu fuq l-art taħt is-Saltna tiegħu? Dawn huma l-uħud li jibbenefikaw mill-patt il-ġdid. (Gal. 3:8, 9) Għalkemm ma jipparteċipawx, dawn “iżommu sod” maʼ dan il-patt billi jissottomettu ruħhom lejn il-ħtiġijiet tiegħu, sewwasew bħalma kien imbassar mill-profeta Isaija: “Lill-barranin li ntrabtu ma’ Ġeħova biex jaqduh u biex iħobbu l-isem taʼ Ġeħova, sabiex isiru qaddejja tiegħu, dawk kollha li qed iħarsu s-Sabat sabiex ma jkasbruhx u qed iżommu sod mal-patt tiegħi, se nġibhom ukoll lejn il-muntanja qaddisa tiegħi u nferraħhom fid-dar tiegħi tat-talb.” Ġeħova mbagħad jgħid: “Għax dari tissejjaħ dar tat-talb għall-popli kollha.”—Is. 56:6, 7.
Min Għandu Jieħu mill-Emblemi?
15, 16. (a) L-appostlu Pawlu maʼ xiex jorbot il-patt il-ġdid? (b) Dawk li għandhom it-tama għall-art għala m’għandhomx jieħdu mill-emblemi tat-Tifkira?
15 Dawk fil-patt il-ġdid ‘għandhom il-qlubija biex jidħlu fit-triq għal ġol-post qaddis.’ (Aqra Ebrej 10:15-20.) Dawn huma l-uħud li ‘se jirċievu saltna li ma tistax titheżżeż.’ (Ebr. 12:28) Għalhekk, mela, dawk biss li se jkunu slaten u qassisin fis-sema maʼ Ġesù Kristu għandhom jixorbu mill-“kies” li jirrappreżenta l-patt il-ġdid. Dawn il-parteċipanti fil-patt il-ġdid huma l-uħud imwegħdin fiż-żwieġ lill-Ħaruf. (2 Kor. 11:2; Riv. 21:2, 9) L-oħrajn kollha li jattendu għat-Tifkira li ssir kull sena huma osservaturi li juru rispett u li ma jiħdux mill-emblemi.
16 Pawlu jgħinna wkoll biex nifhmu li dawk li għandhom it-tama għall-art ma jiħdux mill-emblemi tat-Tifkira. Hu qal lill-Kristjani midlukin: “Għax kull darba li tieklu din il-ħobża u tixorbu dan il-kies, tibqgħu xxandru l-mewt tal-Mulej, sakemm jasal.” (1 Kor. 11:26) Il-Mulej meta “jasal”? Meta jiġi biex jieħu l-aħħar uħud mill-klassi tal-għarusa midluka fid-dar tagħhom fis-sema. (Ġw. 14:2, 3) Jidher ċar li l-osservanza taʼ kull sena tal-Ikla taʼ Filgħaxija tal-Mulej mhix se tkompli għal dejjem. “Il-bqija” tan-nisel tal-mara li għadhom fuq l-art se jkomplu jieħdu minn din l-ikla sakemm ilkoll kemm huma jkunu ngħataw il-premju tagħhom fis-sema. (Riv. 12:17) Però, kieku dawk li se jgħixu għal dejjem fuq l-art kienu intitolati biex jieħdu mill-emblemi, imbagħad din l-ikla tat-Tifkira kien ikollha bżonn tkompli għal dejjem.
“Huma Jsiru l-Poplu Tiegħi”
17, 18. Il-profezija mniżżla f’Eżekjel 37:26, 27 kif twettqet?
17 Ġeħova bassar l-unità tal-poplu tiegħu b’dan il-kliem: “Se nagħmel magħhom patt taʼ paċi; patt li jdum għal żmien indefinit se jsir magħhom. U nħejji post għalihom u nkattarhom u nqiegħed is-santwarju tiegħi f’nofshom għal żmien indefinit. U t-tinda tiegħi tkun fuqhom, u jien insir Alla tagħhom, u huma jsiru l-poplu tiegħi.”—Eżek. 37:26, 27.
18 In-nies kollha t’Alla għandhom il-privileġġ li jibbenefikaw mit-twettiq taʼ din il-wegħda meraviljuża, dan il-patt tal-paċi. Iva, Ġeħova ggarantixxa l-paċi għall-qaddejja ubbidjenti kollha tiegħu. Il-frott tal-ispirtu tiegħu jidher b’mod ċar fosthom. Is-santwarju tiegħu, li hawnhekk jagħti stampa tal-qima Kristjana pura, jinsab f’nofshom. Verament saru l-poplu tiegħu, għax abbandunaw kull forma taʼ idolatrija u Ġeħova hu l-uniku Alla li jqimu.
19, 20. Min hu inkluż fost dawk li Ġeħova jsejħilhom “il-poplu tiegħi,” u l-patt il-ġdid x’jagħmel possibbli?
19 Kemm kien eċċitanti li naraw din l-għaqda taʼ żewġ gruppi fi żmienna! Għalkemm dawk tal-folla l-kbira, li dejjem qed tikber, m’għandhomx it-tama għas-sema, huma kburin li jissieħbu maʼ dawk li għandhom din it-tama. Dawn ngħaqdu mal-Israel t’Alla. Billi għamlu dan, huma inklużi fost dawk li Ġeħova jsejħilhom “il-poplu tiegħi.” Fihom insibu t-twettiq taʼ din il-profezija: “Ħafna ġnus se jintrabtu ma’ Ġeħova f’dak il-jum, u huma jsiru l-poplu tiegħi; u jien se ngħammar f’nofsok.”—Żak. 2:11; 8:21; aqra Isaija 65:22; Rivelazzjoni 21:3, 4.
20 Permezz tal-patt il-ġdid, Ġeħova għamel dan kollu possibbli. Miljuni taʼ barranin spiritwali saru parti mill-ġens approvat taʼ Ġeħova. (Mik. 4:1-5) Huma determinati li jkomplu jżommu sod maʼ dan il-patt billi jaċċettaw il-provvedimenti tiegħu u jobdu l-ħtiġijiet tiegħu. (Is. 56:6, 7) Billi jagħmlu dan, flimkien mal-Israel t’Alla, igawdu l-barkiet kbar taʼ paċi kontinwa. Jalla int tesperjenza l-istess ħaġa—issa u għal dejjem!
[Noti taʼ taħt]
a B’mod simili, il-kelma “kongregazzjoni” tapplika l-iktar għall-midlukin. (Ebr. 12:23) Madankollu, jistaʼ jkollha tifsira oħra, billi tirreferi għall-Kristjani kollha, hi x’inhi t-tama tagħhom.—Ara t-Torri taʼ l-Għassa tal-15 taʼ April, 2007, paġni 21-23.
b Ġesù hu l-Medjatur taʼ dan il-patt, mhux parteċipant. Bħala l-Medjatur, hu milli jidher ma ħax mill-emblemi.
X’Tiftakar?
• Min huma “t-tnax-il tribù taʼ Israel” li l-144,000 se jiġġudikaw?
• X’inhi r-relazzjoni tal-midlukin u tan-nagħaġ l-oħrajn mal-patt il-ġdid?
• Għandhom il-Kristjani kollha jieħdu mill-emblemi tat-Tifkira?
• Liema unità kienet imbassra għal żmienna?
[Mistoqsijiet taʼ Studju]
[Graff/Stampi f’paġna 25]
(Għall-formazzjoni sħiħa tat-test, ara pubblikazzjoni)
Ħafna issa qed jaqdu flimkien mal-Israel t’Alla
7,313,173
4,017,213
1,483,430
373,430
1950 1970 1990 2009