Mistoqsijiet mill-Qarrejja
Mistoqsijiet mill-Qarrejja
Eżekjel 18:20, li jgħid li “iben ma jitgħabbiex bl-iżball taʼ missieru,” jikkontradixxi lil Eżodu 20:5, li jgħid li Ġeħova ‘għall-iżball tal-missirijiet jikkastiga lill-ulied’?
M’hemm ebda kontradizzjoni. Skrittura waħda tiffoka fuq il-fatt li individwu jrid jagħti kont taʼ għemilu, u l-oħra tirrikonoxxi r-realtà li l-iżball taʼ individwu jistaʼ jkollu konsegwenzi li jeffettwaw lid-dixxendenti tiegħu.
Il-kuntest f’Eżekjel kapitlu 18 juri li qed jiġi enfasizzat il-fatt li individwu jrid jagħti kont tiegħu nnifsu. “Ir-ruħ li qed tidneb—din tmut,” jgħid vers 4. Xi ngħidu għal raġel li “jkun ġust u jkun wettaq il-ġustizzja u s-sewwa”? “Żgur jibqaʼ jgħix.” (Eżek. 18:5, 9) B’hekk, kull individwu, meta jilħaq età li fiha jistaʼ jinżamm responsabbli, jiġi ġudikat “skond triqatu.”—Eżek. 18:30.
Dan il-prinċipju jidher fil-każ taʼ Levita li kien jismu Koraħ. Matul il-vjaġġ taʼ Israel fix-xagħri, Koraħ ma baqax sodisfatt bil-privileġġi tas-servizz tiegħu. Bi sforz biex jakkwista d-dmirijiet taʼ qassis għalih stess, Koraħ u xi oħrajn irribellaw kontra r-rappreżentanti taʼ Ġeħova, Mosè u Aron. Talli bi prużunzjoni rsistew għal din il-kariga—privileġġ li ma kinux intitolati għalih—Ġeħova ta l-mewt lil Koraħ u lil dawk li rribellaw Num. 16:8-11, 31-33) Madankollu, ulied Koraħ ma ngħaqdux fir-ribelljoni. Alla ma żammhomx responsabbli għad-dnub taʼ missierhom. Minħabba l-lealtà tagħhom lejn Ġeħova, baqgħu ħajjin.—Num. 26:10, 11.
miegħu. (Imma xi ngħidu għat-twissija li hemm f’Eżodu 20:5, parti mill-Għaxar Kmandamenti? Għal darb’oħra, ikkunsidra l-kuntest. Ġeħova inawgura l-patt tal-Liġi mal-ġens taʼ Israel. Wara li semgħu l-ħtiġijiet tal-patt, l-Israelin iddikjaraw pubblikament: “Aħna lesti li nagħmlu kulma qalilna Ġeħova.” (Eżo. 19:5-8) B’hekk, il-ġens kollu daħal f’relazzjoni speċjali maʼ Ġeħova. Għalhekk, il-kliem f’Eżodu 20:5 kien indirizzat primarjament lill-ġens kollu kemm hu.
Meta l-Israelin baqgħu leali lejn Ġeħova, il-ġens ibbenefika u gawda ħafna barkiet. (Lev. 26:3-8) L-oppost kien veru wkoll. Meta l-ġens taʼ Israel ċaħad lil Ġeħova u mar wara allat foloz, Hu neħħa l-barka u l-protezzjoni tiegħu; il-ġens sofra gwaj. (Mħ. 2:11-18) Huwa minnu li kien hemm xi wħud li żammew l-integrità tagħhom u osservaw il-kmandamenti t’Alla minkejja l-aġir idolatruż tal-ġens. (1 Slat. 19:14, 18) Uħud leali x’aktarx li batew minħabba d-dnubiet tal-ġens, imma Ġeħova wera qalb tajba bl-imħabba magħhom.
Meta Israel kiser il-prinċipji taʼ Ġeħova b’mod tant sfaċċat li ismu twaqqaʼ għaċ-ċajt fost il-ġnus, Ġeħova ddeċieda li jikkastiga lin-nies tiegħu billi ħalliehom jittieħdu lsiera f’Babilonja. M’għandniex xi ngħidu, dan inkluda kastig għal individwi u għan-nies tiegħu bħala grupp. (Ġer. 52:3-11, 27) Tabilħaqq, il-Bibbja turi li l-ħtija tal-ġens taʼ Israel tant kienet kbira li tliet ġenerazzjonijiet jew erbgħa jew forsi iktar ġew effettwati mill-għemejjel ħżiena taʼ missirijiethom, sewwasew bħalma jgħid Eżodu 20:5.
Il-Kelma t’Alla fiha wkoll rakkonti taʼ familji individwali li ġew effettwati mill-kondotta ħażina tal-ġenituri. Il-Qassis il-Kbir Għeli offenda lil Ġeħova billi ħalla lil uliedu, li ‘ma kienu tajbin għal xejn’ u li kienu immorali, jibqgħu qassisin. (1 Sam. 2:12-16, 22-25) Peress li Għeli onora lil uliedu iktar milli onora lil Ġeħova, Alla ordna li l-familja taʼ Għeli ma tibqax taqdi fil-kariga taʼ qassis il-kbir, u dan beda jgħodd minn Abjatar, li bużbużnannuh kien Għeli. (1 Sam. 2:29-36; 1 Slat. 2:27) Il-prinċipju taʼ Eżodu 20:5 jintwera wkoll mill-eżempju taʼ Geħażi. Dan abbuża mill-pożizzjoni tiegħu bħala l-qaddej taʼ Eliżew, sabiex jibbenefika materjalment mill-fejqan taʼ Nagħman, ġeneral Sirjan. Permezz taʼ Eliżew, Ġeħova lissen ġudizzju billi qal: “Il-ġdiem taʼ Nagħman jibqaʼ mqabbad miegħek u ma’ nislek għal żmien indefinit.” (2 Slat. 5:20-27) Għalhekk, id-dixxendenti taʼ Geħażi ġew effettwati mill-konsegwenzi tal-għemil ħażin tiegħu.
Bħala l-Ħallieq u d-Donatur tal-ħajja, Ġeħova għandu kull dritt li jiddeċiedi liema kastig hu ġust u xieraq. L-eżempji taʼ hawn fuq juru li t-tfal jew id-dixxendenti għandhom mnejn iħossu l-effetti ħżiena tad-dnub tal-antenati tagħhom. Madankollu, Ġeħova “jismaʼ l-għajta tal-magħkusin,” u individwi li jduru lejh bil-ħeġġa jistgħu jirċievu l-approvazzjoni tiegħu u anki xi ftit serħan.—Ġob 34:28.
[Stampa f’paġna 29]
Koraħ u dawk li rribellaw miegħu nżammu responsabbli għall-azzjonijiet tagħhom