L-Irwol tal-Ispirtu Qaddis fit-Twettiq tal-Iskop taʼ Ġeħova
L-Irwol tal-Ispirtu Qaddis fit-Twettiq tal-Iskop taʼ Ġeħova
“Kelmti li toħroġ minn fommi . . . żgur tirnexxi f’dak li bgħattha tagħmel.”—IS. 55:11.
1. Agħti eżempju tad-differenza li hemm bejn pjan u skop.
IMMAĠINA li żewġt irġiel qed iħejju b’mod individwali biex jagħmlu vjaġġ bil-karozza. Wieħed iħejji mappa taʼ rotta speċifika u dettaljata li twasslu sad-destinazzjoni tiegħu. L-ieħor għandu d-destinazzjoni ċara f’moħħu, iżda jaf ukoll b’diversi rotot li jistaʼ jaqbad. Hu lest li jaġġusta r-rotta tiegħu jekk iċ-ċirkustanzi jkunu jitolbu dan. Sa ċertu punt, il-ħarsa differenti taʼ dawn iż-żewġt irġiel tagħti stampa tad-differenza bejn pjan u skop. Pjan jistaʼ jitqabbel maʼ mappa dettaljata taʼ rotta, filwaqt li skop jistaʼ jinvolvi li jkollok f’moħħok mira iżda mhux neċessarjament mod speċifiku wieħed kif tilħaqha.
2, 3. (a) L-iskop taʼ Ġeħova x’jinvolvi, u Hu kif aġixxa fis-sitwazzjoni li qamet meta Adam u Eva dinbu? (b) Għala nagħmlu tajjeb li nkunu konxji tal-mod li bih Ġeħova jwettaq l-iskop tiegħu?
2 Rigward it-twettiq tar-rieda tiegħu, Ġeħova m’għandux pjan fiss, iżda skop li jitwettaq mal-medda taż-żmien. (Efes. 3:11) Dan l-iskop jinvolvi dak li oriġinalment kellu f’moħħu għall-umanità u għall-art, jiġifieri, li dan il-globu jiġi mibdul f’Ġenna tal-art fejn il-bnedmin perfetti jistgħu jgħixu fis-sliem u fl-hena għal dejjem. (Ġen. 1:28) Meta Adam u Eva dinbu, Ġeħova aġixxa f’din is-sitwazzjoni u għamel dak li kien hemm bżonn biex ikun ċert li jitwettaq l-iskop tiegħu. (Aqra Ġenesi 3:15.) Ġeħova ddeċieda bil-quddiem li l-mara simbolika tiegħu tagħti ‘nisel,’ jew Iben, li eventwalment kellu jeqred lil Satana x-xewwiex, u jreġġaʼ lura l-ħsara kollha li dan ikkaġuna.—Ebr. 2:14; 1 Ġw. 3:8.
3 Ebda qawwa fis-smewwiet jew fuq l-art ma tistaʼ żżomm lil Alla lura milli jwettaq dak li jgħid li se jagħmel. (Is. 46:9-11) Għala nistgħu ngħiduh dan? Għax hemm involut l-ispirtu qaddis taʼ Ġeħova. Din il-forza li ħadd u xejn ma jistaʼ jegħlibha tagħti garanzija li l-iskop t’Alla ‘żgur jirnexxi.’ (Is. 55:10, 11) Nagħmlu tajjeb li nkunu konxji tal-mod li bih Alla jwettaq l-iskop tiegħu u naġixxu fi qbil miegħu. Il-prospetti tal-ħajja tagħna fil-futur jiddependu mit-twettiq tal-iskop tiegħu. Iktar minn hekk, l-fidi tagħna tissaħħaħ meta naraw kif Ġeħova juża l-ispirtu qaddis tiegħu. Għalhekk, ejja nikkunsidraw l-irwol tal-ispirtu—fil-passat, fil-preżent, u fil-futur—fit-twettiq tal-iskop taʼ Ġeħova.
L-Irwol tal-Ispirtu Qaddis fil-Passat
4. Ġeħova kif irrivela l-iskop tiegħu ftit ftit?
4 Fi żminijiet Bibliċi, Ġeħova rrivela l-iskop tiegħu ftit ftit. Għall-ewwel, l-identità tan-Nisel imwiegħed kienet “sigriet sagru.” (1 Kor. 2:7) Kien biss madwar 2,000 sena wara li Ġeħova reġaʼ għamel referenza għal nisel. (Aqra Ġenesi 12:7; 22:15-18.) Ġeħova għamel wegħda maʼ Abraham li kellu jkollha twettiq akbar. Il-kliem “permezz taʼ nislek” kien indikazzjoni ċara li n-Nisel kellu jiġi bħala bniedem, dixxendent taʼ Abraham. Nistgħu nibqgħu ċerti li Satana kien qed josserva b’interess kbir hekk kif ġie rivelat dan id-dettall. Bla dubju, dan l-Avversarju ma ried xejn iktar ħlief li jeqred jew jikkorrompi l-linja taʼ dixxendenza taʼ Abraham u b’hekk iħarbat l-iskop t’Alla. Iżda riżultat bħal dan kien impossibbli għax l-ispirtu inviżibbli t’Alla kien fl-azzjoni. B’liema modi?
5, 6. Ġeħova kif uża l-ispirtu tiegħu biex jipproteġi lil individwi fil-linja taʼ dixxendenza li kienet twassal san-Nisel?
5 Ġeħova uża l-ispirtu tiegħu biex jipproteġi lil individwi fil-linja taʼ dixxendenza li kienet twassal san-Nisel. Lil Abram (Abraham), Ġeħova qallu: “Jien tarka għalik.” (Ġen. 15:1) Dan ma kienx kliem fil-vojt. Pereżempju, ikkunsidra x’ġara madwar is-sena 1919 Q.E.K. meta Abraham u Sara marru joqogħdu f’Gerar għal ftit żmien. Mingħajr ma kien jaf li Sara kienet mart Abraham, Abimelek, is-sultan taʼ Gerar, ħa lil Sara bl-intenzjoni li ssir martu. Kien Satana qed jimmanuvra s-sitwazzjoni minn wara l-kwinti, billi pprova jfixkel lil Sara milli tagħti nisel lil Abraham? Il-Bibbja ma tgħid xejn dwar dan. Tgħid biss li Ġeħova interviena. F’ħolma, hu wissa lil Abimelek biex ma jmissx lil Sara.—Ġen. 20:1-18.
6 Din ma kinitx l-unika darba li Ġeħova pproteġiehom. Ġeħova ħeles lil Abraham u lill-membri tal-familja tiegħu bosta drabi. (Ġen. 12:14-20; 14:13-20; 26:26-29) Rigward Abraham u d-dixxendenti tiegħu, is-salmista b’hekk setaʼ jgħid: “[Ġeħova] ma ħalla lil ebda bniedem jimbroljahom, imma minħabba fihom hu widdeb lis-slaten, u qal: ‘Tmissux lill-midlukin tiegħi, u tagħmlux deni lill-profeti tiegħi.’”—Salm 105:14, 15.
7. Ġeħova b’liema modi pproteġa lill-ġens taʼ Israel?
7 Permezz tal-ispirtu tiegħu, Ġeħova pproteġa lill-ġens taʼ Israel tal-qedem li fih kellu jitwieled in-Nisel imwiegħed. Permezz tal-ispirtu tiegħu, Ġeħova ta l-Liġi tiegħu lil Israel, u din ippreservat il-qima vera u pproteġiet lil-Lhud mit-tinġis spiritwali, morali, u fiżiku. (Eżo. 31:18; 2 Kor. 3:3) Fi żmien l-Imħallfin, l-ispirtu taʼ Ġeħova ta s-setgħa lil ċerti rġiel biex jeħilsu lil Israel mill-għedewwa. (Mħ. 3:9, 10) Matul is-sekli taʼ qabel it-twelid taʼ Ġesù, li huwa l-parti primarja min-nisel taʼ Abraham, l-ispirtu qaddis bilfors kien involut f’li jipproteġi lil Ġerusalemm, lil Betlehem, u t-tempju. Dawn il-postijiet kollha kellhom ikunu involuti fit-twettiq tal-profeziji dwar Ġesù.
8. X’juri li l-ispirtu qaddis kien involut direttament fil-ħajja u fil-ministeru tal-Iben t’Alla?
8 L-ispirtu qaddis kien involut direttament fil-ħajja u fil-ministeru taʼ Ġesù. Fil-ġuf tal-verġni Marija, l-ispirtu qaddis wettaq xi ħaġa li qatt ma kienet twettqet qabel u lanqas wara. Dan l-ispirtu ġiegħel li mara imperfetta tikkonċepixxi u tiled Iben perfett li ma kienx taħt il-piena tal-mewt. (Lq. 1:26-31, 34, 35) Iktar tard, l-ispirtu pproteġa lil Ġesù tarbija minn mewt qabel il-waqt. (Mt. 2:7, 8, 12, 13) Meta Ġesù kellu madwar 30 sena, Alla dilku bl-ispirtu qaddis u ħatru biex ikun il-werriet tat-tron taʼ David u inkarigah biex jipprietka. (Lq. 1:32, 33; 4:16-21) L-ispirtu qaddis ta l-qawwa lil Ġesù biex iwettaq mirakli, inkluż li jfejjaq lill-morda, jitmaʼ lill-folol taʼ nies, u jqajjem lill-mejtin. Dawn l-għemejjel setgħanin taw stampa bil-quddiem tal-barkiet li nistgħu nistennew taħt il-ħakma taʼ Ġesù bħala Sultan.
9, 10. (a) Kif kien evidenti li l-ispirtu qaddis kien fuq id-dixxipli taʼ Ġesù tal-ewwel seklu? (b) Liema żvilupp fit-twettiq tal-iskop taʼ Ġeħova kien rivelat fl-ewwel seklu E.K.?
9 Sa minn Pentekoste tas-sena 33 E.K., Ġeħova uża l-ispirtu tiegħu biex jidlek lil uħud mill-parti sekondarja tan-nisel taʼ Abraham, li ħafna minnhom ma kinux dixxendenti taʼ Abraham. (Rum. 8:15-17; Gal. 3:29) Kien evidenti li l-ispirtu qaddis kien fuq id-dixxipli taʼ Ġesù tal-ewwel seklu. Dan tahom l-abbiltà biex jippritkaw biż-żelu u tahom il-qawwa biex iwettqu għemejjel setgħanin. (Atti 1:8; 2:1-4; 1 Kor. 12:7-11) Permezz taʼ dawn l-għotjiet mirakolużi, l-ispirtu qaddis irrivela żvilupp li jispikka fit-twettiq tal-iskop taʼ Ġeħova. Ġeħova ma riedx li n-nies jibqgħu jqimuh bl-istess mod li kien stabbilixxa sekli qabel u li kien ċentrat fuq it-tempju f’Ġerusalemm. Imbagħad, l-approvazzjoni tiegħu kienet fuq il-kongregazzjoni Kristjana li kienet għadha kif ġiet ifformata. Ġeħova ilu sa minn dak iż-żmien juża din il-kongregazzjoni midluka biex iwettaq l-iskop tiegħu.
10 Ftit mill-modi kif Ġeħova kien juża l-ispirtu qaddis fi żminijiet Bibliċi biex jagħti garanzija li l-iskop tiegħu jitwettaq huma billi kien jipproteġi, jqawwi, u jidlek. Iżda xi ngħidu għal żmienna? Ġeħova kif qed juża l-ispirtu tiegħu issa biex iwettaq l-iskop tiegħu? Jeħtieġ li nkunu nafu sabiex naħdmu f’armonija mal-ispirtu. Għalhekk, ejja nikkunsidraw erbaʼ modi kif Ġeħova qed juża l-ispirtu tiegħu fil-preżent.
L-Irwol tal-Ispirtu Qaddis fil-Preżent
11. X’juri li l-ispirtu qaddis jgħin lin-nies t’Alla jkunu nodfa, u kif tistaʼ turi li qed tħalli l-ispirtu jkollu influwenza f’ħajtek?
11 L-ewwel, l-ispirtu qaddis jgħin lin-nies t’Alla jkunu nodfa. Dawk li għandhom sehem fl-iskop taʼ Ġeħova jridu jkunu nodfa moralment. (Aqra l-1 Korintin 6:9-11.) Xi wħud li saru Kristjani veri, qabel kienu jieħdu sehem fi prattiki immorali bħall-fornikazzjoni, l-adulterju, u l-omosesswalità. Ix-xewqat li jwasslu għal għemejjel midinbin jistaʼ jkollhom għeruq fil-fond. (Ġak. 1:14, 15) Madankollu, individwi bħal dawn ‘ġew maħsulin,’ u b’hekk taw indikazzjoni li għamlu l-bidliet meħtiġin f’ħajjithom biex jogħġbu lil Alla. X’jgħin lil individwu li jħobb lil Alla jirnexxilu jirreżisti l-impuls li jaġixxi skont ix-xewqat ħżiena? ‘L-ispirtu t’Alla tagħna,’ jgħid l-1 Korintin 6:11. Billi żżomm ruħek nadif moralment, int turi li qed tħalli dan l-ispirtu jkollu influwenza qawwija f’ħajtek.
12. (a) Skont il-viżjoni taʼ Eżekjel, Ġeħova kif imexxi l-organizzazzjoni tiegħu? (b) Kif tistaʼ turi li qed taħdem fi qbil mal-ispirtu?
12 It-tieni, Ġeħova juża l-ispirtu tiegħu biex imexxi l-organizzazzjoni fid-direzzjoni li jridha tmur. Fil-viżjoni taʼ Eżekjel, il-parti tal-organizzazzjoni taʼ Ġeħova fis-sema hi mpinġija bħala karru ċelestjali li dejjem miexi, bla ħadd u xejn ma jistaʼ jwaqqfu, sabiex iwettaq l-iskop taʼ Ġeħova. Xi jġiegħel il-karru jimxi f’ċerta direzzjoni? L-ispirtu qaddis. (Eżek. 1:20, 21) Ejja niftakru li l-organizzazzjoni taʼ Ġeħova hi magħmula minn żewġ partijiet, waħda fis-sema u waħda fuq l-art. Jekk il-parti fis-sema hi mmexxija mill-ispirtu qaddis, l-istess għandu jkun għall-parti fuq l-art. Billi tkun ubbidjenti u leali lejn id-direzzjoni li tirċievi mill-parti fuq l-art tal-organizzazzjoni t’Alla, int turi li qed iżżomm il-pass mal-karru ċelestjali taʼ Ġeħova u li qed taħdem fi qbil mal-ispirtu qaddis tiegħu.—Ebr. 13:17.
13, 14. (a) “Din il-ġenerazzjoni” li semma Ġesù, minn min hi magħmula? (b) Agħti eżempju li juri kif Ġeħova qed juża l-ispirtu qaddis biex jgħinna nifhmu veritajiet Bibliċi. (Ara l-kaxxa “Qiegħed Int Timxi mad-Dawl li Dejjem Jiżdied?”)
13 It-tielet, Ġeħova juża l-ispirtu qaddis biex jgħinna nifhmu veritajiet Bibliċi. (Prov. 4:18) Din ir-rivista ilha tintuża mill-“ilsir leali u għaqli” bħala l-mezz primarju biex titfaʼ iktar dawl. (Mt. 24:45) Pereżempju, ikkunsidra l-fehma tagħna dwar dawk li jifformaw “din il-ġenerazzjoni” msemmija minn Ġesù. (Aqra Mattew 24:32-34.) Ġesù għal liema ġenerazzjoni kien qed jirreferi? L-artiklu “Il-Preżenza taʼ Kristu—Xi Tfisser Għalik?” spjega li Ġesù ma kienx qed jirreferi għall-uħud mill-agħar, iżda għad-dixxipli tiegħu li fi ftit żmien kellhom jiġu midlukin bl-ispirtu qaddis. a Is-segwaċi midlukin taʼ Ġesù, kemm tal-ewwel seklu kif ukoll taʼ żmienna, kellhom ikunu dawk l-uħud li mhux biss jaraw is-sinjal, iżda wkoll jifhmu t-tifsira tiegħu, jiġifieri, li Ġesù “hu qrib, fil-bieb.”
14 Din l-ispjegazzjoni xi tfisser għalina? Għalkemm ma nistgħux nikkalkulaw bl-eżatt kemm se ddum “din il-ġenerazzjoni,” nagħmlu tajjeb li nżommu f’moħħna diversi affarijiet dwar il-kelma “ġenerazzjoni”: Normalment din tirreferi għal nies taʼ etajiet differenti li jgħixu fl-istess żmien matul perijodu taʼ żmien partikulari; mhijiex twila żżejjed; u għandha tmiem. (Eżo. 1:6) Mela, kif għandna nifhmu l-kliem taʼ Ġesù rigward “din il-ġenerazzjoni”? B’mod evidenti, hu ried ifisser li l-ħajjiet tal-midlukin li raw il-bidu tas-sinjal fl-1914 kellhom jgħixu fl-istess żmien taʼ wħud midlukin oħrajn, li għalkemm ma rawx il-bidu taʼ dan is-sinjal, kellhom jaraw il-bidu tat-tribulazzjoni l-kbira. Din il-ġenerazzjoni kellha bidu, u żgur se jkollha tmiem. It-twettiq tad-diversi karatteristiki tas-sinjal jindikaw ċar li t-tribulazzjoni bilfors li tinsab qrib. Jekk iżżomm is-sens taʼ urġenza u tibqaʼ għassa, int tkun qed turi li qiegħed iżżomm il-pass mad-dawl li dejjem jiżdied u li qed issegwi t-tmexxija tal-ispirtu qaddis.—Mk. 13:37.
15. X’juri li huwa l-ispirtu qaddis li jagħtina l-qawwa biex niddikjaraw l-aħbar tajba?
15 Ir-rabaʼ, l-ispirtu qaddis jagħtina l-qawwa biex niddikjaraw l-aħbar tajba. (Atti 1:8) X’hemm iktar li jistaʼ jispjega kif l-aħbar tajba ġiet pritkata mad-dinja kollha? Aħseb ftit. Għandu mnejn li int wieħed minn dawk li forsi minħabba l-mistħija żejda jew il-biżaʼ, xi darba għedt, ‘Jien qatt ma se mmur nipprietka minn dar għal dar!’ Madankollu, issa qed tieħu sehem biż-żelu f’dan ix-xogħol. b Ħafna Xhieda leali taʼ Ġeħova komplew jippritkaw meta ffaċċjaw oppożizzjoni jew persekuzzjoni. L-ispirtu qaddis t’Alla biss jistaʼ jagħtina s-saħħa biex negħlbu ostakli li jbeżżgħuna u biex nagħmlu affarijiet li jkunu impossibbli li nagħmluhom bis-saħħa tagħna stess. (Mik. 3:8; Mt. 17:20) Jekk tieħu sehem sħiħ fix-xogħol tal-ippritkar, tkun qed turi li qed taħdem fi qbil maʼ dan l-ispirtu.
L-Irwol tal-Ispirtu Qaddis fil-Futur
16. Għala nistgħu nkunu fiduċjużi li Ġeħova se jipproteġi lin-nies tiegħu matul it-tribulazzjoni l-kbira?
16 Fil-futur, Ġeħova se juża l-ispirtu qaddis tiegħu b’modi sinifikanti biex iwettaq l-iskop tiegħu. Ikkunsidra l-ewwel il-kwistjoni tal-protezzjoni. Bħalma rajna, Ġeħova uża l-ispirtu tiegħu fil-passat biex jipproteġi lil individwi kif ukoll lill-ġens taʼ Israel bħala poplu. Għalhekk, għandna kull raġun nemmnu li hu se juża dan l-istess spirtu setgħan biex jipproteġi lin-nies tiegħu matul it-tribulazzjoni l-kbira li ġejja. M’għandniex għalfejn nispekulaw dwar kif eżattament Ġeħova se jieħu ħsiebna f’dan iż-żmien. Minflok, nistgħu nħarsu lejn il-futur b’fiduċja għax nafu li dawk li jħobbu lil Ġeħova qatt mhuma se jkunu moħbijin minnu jew f’post fejn ma jintlaħqux mill-ispirtu qaddis.—2 Kron. 16:9; Salm 139:7-12.
17. Ġeħova kif se juża l-ispirtu qaddis tiegħu fid-dinja l-ġdida?
17 Ġeħova kif se juża l-ispirtu qaddis tiegħu fid-dinja l-ġdida li ġejja? Dan l-ispirtu se jkun il-forza wara l-kitba tar-rombli l-ġodda li se jinfetħu f’dan iż-żmien. (Riv. 20:12) Dawn x’se jkun fihom? B’mod evidenti, dak li jeħtieġ minna Ġeħova bid-dettall matul l-elf sena. Int tħares ’il quddiem biex teżamina l-kontenut taʼ dawn ir-rombli? Aħna qed nistennew id-dinja l-ġdida fuq ix-xwiek. Lanqas biss nistgħu nimmaġinaw kif se tkun il-ħajja f’dan iż-żmien mimli barkiet meta Ġeħova se juża l-ispirtu qaddis tiegħu biex iwettaq l-iskop tiegħu għall-art u għall-bnedmin li jgħixu fiha.
18. X’determinazzjoni soda għandek?
18 Ejja qatt ma ninsew li l-iskop taʼ Ġeħova li qed jitwettaq, żgur se jirnexxi għax biex iwettqu hu juża l-ispirtu qaddis tiegħu—l-iktar forza qawwija fl-univers. Dan l-iskop jinvolvi lilek. Għalhekk, kun determinat b’mod sod li titlob lil Ġeħova bil-ħrara għall-ispirtu tiegħu u taħdem fi qbil mat-tmexxija tiegħu. (Lq. 11:13) B’hekk, jistaʼ jkollok il-prospett li tgħix kif Ġeħova ried li jgħixu l-bnedmin—għal dejjem f’Ġenna fuq l-art.
[Noti taʼ taħt]
a Ara It-Torri tal-Għassa, 15 taʼ Frar, 2008, paġni 21-25.
b Għal eżempju taʼ persuna li għelbet il-mistħija żejda u saret żeluża fil-ministeru, ara l-browxer tal-Artikli taʼ Studju mit-Torri tal-Għassa bl-Ingliż tas-sena 1993, paġna 11.
Tiftakar Int?
• Ġeħova b’liema modi uża l-ispirtu qaddis fi żminijiet Bibliċi biex iwettaq l-iskop tiegħu?
• Ġeħova kif qed juża l-ispirtu tiegħu fil-preżent?
• Ġeħova kif se juża l-ispirtu tiegħu fil-futur biex iwettaq l-iskop tiegħu?
[Mistoqsijiet taʼ Studju]
[Kaxxa f’paġna 10]
Qiegħed Int Timxi mad-Dawl li Dejjem Jiżdied?
Ġeħova jkompli jitfaʼ d-dawl fuq in-nies tiegħu. X’inhu ftit mill-irfinar li ġie pubblikat fit-Torri tal-Għassa?
▪ It-tixbiha li ta Ġesù dwar il-ħmira, liema tagħlima pożittiva tenfasizza dwar il-progress spiritwali? (Mt. 13:33)—15 taʼ Lulju, 2008, paġni 19-20.
▪ Alla meta se jieqaf isejjaħ lill-Kristjani individwali għal tama fis-sema?—1 taʼ Mejju, 2007, paġni 30-31.
▪ Xi jfisser li tqim lil Ġeħova “bl-ispirtu”? (Ġw. 4:24)—15 taʼ Lulju, 2002, paġna 15.
▪ Il-folla l-kbira f’liema bitħa taqdi? (Riv. 7:15)—1 taʼ Mejju, 2002, paġni 30-31.
▪ Il-frid tan-nagħaġ mill-mogħoż meta jseħħ? (Mt. 25:31-33)—1 taʼ Novembru, 1995, paġni 12-22.