X’Tiftakar?
X’Tiftakar?
Ħadt gost taqra l-ħarġiet reċenti tat-Torri tal-Għassa? Ara jekk tistax twieġeb il-mistoqsijiet li ġejjin:
• Il-Messija għala kellu jmut?
Il-mewt taʼ Ġesù tat prova li bniedem perfett jistaʼ jżomm id-devozzjoni lejn Alla minkejja l-iktar provi ħorox. Ukoll, hu ħallas il-piena tad-dnub li ntirtet min-nisel t’Adam, u b’hekk fetaħ it-triq għall-ħajja taʼ dejjem.—12/15, paġni 22-23.
• Kien aħrax wisq il-ġudizzju taʼ Ġeħova li bih ma ħalliex lil Mosè u lil Aron imexxu lil Israel għal ġol-Art Imwiegħda? (Num. 20:2-13)
Le, għal għadd taʼ raġunijiet. (1) Alla ma qalx lil Mosè biex ikellem lin-nies, aħseb u ara biex jiġġudikahom bħala ribelli. (2) Mosè u Aron naqsu milli jigglorifikaw lil Alla. Mosè tkellem bħallikieku kienu hu u Aron li pprovdew l-ilma b’miraklu u mhux Alla. (3) Il-ġudizzju kien konsistenti maʼ ġudizzji oħrajn li saru qabel. Alla ma ħalliex lill-ġenerazzjoni ribelluża taʼ qabel tidħol f’Kangħan, u għalhekk għamel l-istess maʼ Mosè u Aron. (4) Mosè u Aron kienu l-mexxejja taʼ Israel. Dawk li għandhom ħafna responsabbiltà għandhom kont akbar x’jagħtu lil Alla.—1/1, paġna 19.
• L-Israelin għala ntqalilhom biex jeqirdu s-sebaʼ nazzjonijiet li kienu jgħammru fl-art taʼ Kangħan? (Dt. 7:1, 2)
Dawn il-ġnus kienu saru mimlijin idolatrija, tixrid taʼ demm, u prattiki sesswali baxxi. Saħansitra xi tfal ġew maħruqin bħala sagrifiċċji. Il-qdusija, il-ġustizzja, u l-imħabba t’Alla għall-poplu tiegħu qanqluh ineħħi kull nuqqas taʼ ndafa mill-art. Xorta waħda, Ġeħova għarbel qalb kulħadd—xi ħaġa li ebda kmandant militari ma jistaʼ jagħmilha llum—u ħeles lil dawk li kienu lesti jabbandunaw l-għemejjel mill-agħar tagħhom u jaqduh.—1/1, paġna 30.
• Il-komunikazzjoni siewja mat-tfal x’tinkludi?
Tinvolvi iktar milli titkellem magħhom, tinkludi li tistaqsi xi mistoqsijiet u tistenna bil-paċenzja t-tweġibiet tagħhom. Ħafna sabu li waqt l-ikel ikollhom opportunitajiet tajbin għal komunikazzjoni.—1/15, paġni 18-19.
• Il-magħmudija mill-ġdid f’liema ċirkustanzi tistaʼ tiġi kunsidrata?
Dan ikun il-każ jekk fi żmien il-magħmudija, individwu forsi kien qed jgħix ħajja doppja jew jieħu sehem f’xi prattika bil-moħbi li minħabba fiha setaʼ jiġi maqtugħ mis-sħubija li kieku l-magħmudija tiegħu kienet valida diġà.—2/15, paġna 22.
• Fil-parabbola taʼ Ġesù tal-qamħ u s-sikrana, iż-żrigħ, jew it-taħwil, taż-żerriegħa t-tajba x’jirrappreżenta?
Bin il-bniedem, Ġesù, ħejja l-għalqa matul il-ministeru tiegħu fuq l-art. Minn Pentekoste tas-sena 33 E.K. ’l quddiem, iż-żerriegħa t-tajba nżergħet meta l-Kristjani ġew midlukin bħala wlied Alla, ulied is-Saltna.—3/15, paġna 20.
• Il-qamħ simboliku fil-parabbola taʼ Ġesù kif qed jiddaħħal fil-maħżen taʼ Ġeħova? (Mt. 13:30)
It-twettiq sar fuq perijodu taʼ żmien matul il-konklużjoni taʼ din is-sistema. L-ulied midlukin tas-saltna, il-qamħ simboliku, qed jiddaħħlu fil-maħżen taʼ Ġeħova meta jiddaħħlu fil-kongregazzjoni Kristjana li ġiet stabbilita mill-ġdid jew meta jirċievu l-premju tagħhom fis-sema.—3/15, paġna 22.