Aħwa Rġiel—Iżirgħu għall-​Ispirtu u Rsistu!

“Min jiżraʼ għall-​ispirtu jaħsad il-​ħajja taʼ dejjem.”—GAL. 6:8.

1, 2. Mattew 9:37, 38 kif qed jitwettaq, u dan qed jirriżulta f’liema ħtieġa fil-​kongregazzjonijiet?

 INT issa qed tara ġrajjiet li se jibqgħu miftakrin għall-​eternità kollha! Xogħol li tkellem dwaru Ġesù Kristu jinsab fl-​aqwa tiegħu. “Il-​ħsad hu kbir, imma l-​ħaddiema huma ftit,” qal Ġesù. “Għalhekk, itolbu bil-​ħrara lil Sid il-​ħsad biex jibgħat il-​ħaddiema fil-​ħsad tiegħu.” (Mt. 9:37, 38) Alla Ġeħova qed iwieġeb talb bħal dan b’mod li qatt ma kien hawn bħalu. Matul is-​sena taʼ servizz 2009, l-​għadd taʼ kongregazzjonijiet tax-​Xhieda taʼ Ġeħova madwar id-​dinja żdied bʼ2,031, u laħaq total taʼ 105,298. Bħala medja, 757 individwu tgħammdu kull ġurnata!

² Tkabbir bħal dan joħloq il-​ħtieġa għal aħwa rġiel kwalifikati biex jieħdu t-​tmexxija f’li jgħallmu u jirgħu lill-​kongregazzjonijiet. (Efes. 4:11) Matul is-​snin, Ġeħova inkariga lil irġiel kwalifikati biex jieħdu ħsieb il-​bżonnijiet tan-​nagħaġ tiegħu, u aħna fiduċjużi li se jkompli jagħmel hekk. Il-​profezija li nsibu f’​Mikea 5:5 tassigurana li matul l-​aħħar jiem, in-​nies taʼ Ġeħova se jkollhom “sebaʼ rgħajja” u “tmien duki,” u dawn jirrappreżentaw numru konsiderevoli taʼ rġiel kapaċi biex jieħdu t-​tmexxija fosthom.

3. Spjega xi jfisser li ‘tiżraʼ għall-​ispirtu.’

³ Jekk int ħu mgħammed, x’jistaʼ jgħinek biex tkun trid tirsisti għal privileġġi taʼ servizz? Fattur importanti hu li int ‘tiżraʼ għall-​ispirtu.’ (Gal. 6:8) Li tagħmel dan jinvolvi li tgħix b’tali mod li tħalli lill-​ispirtu qaddis t’Alla jinfluwenzak. Kun determinat li ma ‘tiżrax għal-​laħam.’ Tħallix affarijiet bħall-​kumdità, ir-​rikreazzjoni, u d-​divertiment inaqqsulek ix-​xewqa li tagħmel ħiltek fis-​servizz t’Alla. Il-​Kristjani kollha għandhom ‘jiżirgħu għall-​ispirtu,’ u maż-​żmien, irġiel li jagħmlu dan jistgħu jikkwalifikaw għal xi privileġġi fil-​kongregazzjoni. Peress li llum hemm ħtieġa kbira għal qaddejja ministerjali u għal anzjani, dan l-​artiklu hu mmirat speċjalment lejn l-​irġiel Kristjani. Għalhekk, aħwa rġiel, inħeġġukom biex dan l-​artiklu tikkunsidrawh bit-​talb.

Irsisti Għal Xogħol Tajjeb

4, 5. (a) Irġiel mgħammdin huma mħeġġin biex jirsistu għal liema privileġġi fil-​kongregazzjoni? (b) Wieħed kif jirsisti?

⁴ Raġel Kristjan ma jsirx indokratur awtomatikament. Irid jirsisti għal dan ix-​“xogħol tajjeb.” (1 Tim. 3:1) Dan jinkludi li jaqdi lil sħabu fit-​twemmin billi jieħu ħsieb ġenwinament il-​bżonnijiet tagħhom. (Aqra Isaija 32:1, 2.) Raġel li jirsisti b’motivi xierqa ma jkunx ambizzjuż. Minflok, ikollu xewqa mhix egoistika li jibbenefika lil oħrajn.

⁵ Wieħed jistinka biex jikkwalifika bħala qaddej ministerjali u jirsisti għal kariga taʼ indokratur billi jħabrek biex jissodisfa l-​kwalifiki li hemm imniżżlin fl-​Iskrittura. (1 Tim. 3:1-​10, 12, 13; Titu 1:5-​9) Jekk int ħu mgħammed, staqsi lilek innifsek: ‘Għandi sehem sħiħ fix-​xogħol tal-​ippritkar, u qed ngħin lil oħrajn jagħmlu hekk? Qed insaħħaħ lill-​aduraturi sħabi billi nuri interess sinċier fihom?  Għandi r-​reputazzjoni li jien student tajjeb tal-​Kelma t’Alla? Qed intejjeb il-​kwalità tal-​kummenti tiegħi? Nieħu ħsieb b’mod diliġenti l-​inkarigi fdati f’idejja mill-​anzjani?’ (2 Tim. 4:5) Dawn il-​mistoqsijiet jistħoqqilhom li jiġu kunsidrati bis-​serjetà.

6. X’inhu fattur importanti biex tikkwalifika għal responsabbiltajiet fil-​kongregazzjoni?

⁶ Mod ieħor kif tikkwalifika għal responsabbiltajiet fil-​kongregazzjoni hu ‘li tintgħamel setgħan bil-​qawwa permezz taʼ l-​ispirtu [t’Alla] fil-​bniedem li int minn ġewwa.’ (Efes. 3:16) Li ssir qaddej ministerjali jew anzjan fil-​kongregazzjoni Kristjana mhuwiex kwistjoni taʼ li tiġi elett għal xi kariga. Dan il-​privileġġ jistaʼ jinkiseb biss bi tkabbir spiritwali. Kif jinkiseb it-​tkabbir spiritwali? Mod wieħed hu billi ‘tibqaʼ miexi bl-​ispirtu’ u tikkultiva l-​frott tiegħu. (Gal. 5:16, 22, 23) Hekk kif turi l-​kwalitajiet spiritwali meħtiġin biex twettaq iktar privileġġi, u hekk kif tapplika l-​pariri li tingħata dwar kif tistaʼ titjieb, “kulħadd jara li qed tavanza.”—1 Tim. 4:15.

Meħtieġ—Spirtu taʼ Sagrifiċċju Persunali

7. Li taqdi lil oħrajn x’jinvolvi?

⁷ Li taqdi lil oħrajn jinvolvi xogħol iebes u jirrikjedi spirtu taʼ sagrifiċċju persunali. Peress li l-​indokraturi Kristjani huma rgħajja spiritwali, il-​problemi tal-​merħla jinkwetawhom ħafna. Innota kif l-​appostlu Pawlu ġie effettwat mir-​responsabbiltajiet tax-​xogħol pastorali tiegħu. Hu qal lil sħabu fit-​twemmin f’Korintu: “B’ħafna tribulazzjoni u diqa taʼ qalb ktibtilkom b’ħafna dmugħ, mhux biex insewdilkom qalbkom, imma biex tkunu tafu l-​imħabba li għandi speċjalment għalikom.” (2 Kor. 2:4) Huwa evidenti li Pawlu ntefaʼ b’ruħu u b’ġismu fix-​xogħol tiegħu.

8, 9. Agħti eżempji Bibliċi biex turi kif xi rġiel ħadu ħsieb il-​bżonnijiet taʼ oħrajn.

⁸ Spirtu taʼ sagrifiċċju persunali dejjem kien marka li tiddistingwi lill-​irġiel li ħadmu iebes għan-​nom tal-​qaddejja taʼ Ġeħova.  Pereżempju, ma nistgħux nimmaġinaw lil Noè jgħid lil dawk taʼ daru: ‘Għiduli meta titlesta l-​arka sabiex ningħaqad magħkom.’ Mosè ma qalx lill-​Israelin fl-​Eġittu: ‘Niltaqaʼ magħkom ħdejn il-​Baħar l-​Aħmar. Aslu hemmhekk bl-​aħjar mod li tistgħu.’ Ġożwè qatt ma qal: ‘Għiduli meta jaqgħu s-​swar taʼ Ġeriko.’ U Isaija ma ppontax lejn xi ħadd ieħor u qal: ‘Hemm hu! Ibgħat lilu.’—Is. 6:8.

⁹ L-​eżempju prinċipali tagħna taʼ raġel li ħalla lill-​ispirtu t’Alla jimmotivah hu Ġesù Kristu. Hu aċċetta minn rajh l-​inkarigu tiegħu biex jaqdi bħala l-​Feddej tal-​bnedmin. (Ġw. 3:16) M’għandhiex l-​imħabba mhix egoistika taʼ Ġesù tqanqalna wkoll biex nagħmlu sagrifiċċju persunali? Meta ddeskriva s-​sentimenti tiegħu għall-​merħla, wieħed li ilu jaqdi bħala anzjan għal żmien twil qal: “Il-​kliem li Ġesù qal lil Pietru—irgħa n-​nagħaġ ċkejknin tiegħi—jimmotivani profondament. Matul is-​snin, sirt napprezza kif ftit kliem bi mħabba jew att sempliċi taʼ qalb tajba jistaʼ jinkuraġġixxi lil xi ħadd. Jien nieħu pjaċir ħafna nagħmel ix-​xogħol pastorali.”—Ġw. 21:16.

10. X’jistaʼ jqanqal lill-​irġiel Kristjani biex jimitaw l-​eżempju taʼ Ġesù f’li jaqdu lil oħrajn?

¹⁰ B’konnessjoni mal-​merħla t’Alla, irġiel dedikati fil-​kongregazzjoni żgur li jridu jirriflettu l-​attitudni taʼ Ġesù, li qal: “Jien inserraħkom.” (Mt. 11:28) Il-​fidi f’Alla u l-​imħabba għall-​kongregazzjoni jqanqlu lill-​irġiel Kristjani biex jirsistu għal dan ix-​xogħol tajjeb, u ma jaħsbux li dan hu sagrifiċċju kbir ħafna jew li jirrikjedi wisq. Iżda, xi ngħidu jekk wieħed ma jkunx inklinat b’mod partikulari li jirsisti? Jistaʼ ħu jikkultiva x-​xewqa li jaqdi lill-​kongregazzjoni?

Ikkultiva x-​Xewqa li Taqdi

11. Wieħed kif jistaʼ jikkultiva x-​xewqa li jaqdi lil oħrajn?

¹¹ Jekk ma rsistejtx għaliex tħoss li m’għandekx l-​abbiltajiet u l-​kwalitajiet meħtiġin, hu xieraq li titlob għall-​ispirtu qaddis. (Lq. 11:13) L-​ispirtu taʼ Ġeħova se jgħinek tkampa maʼ kwalunkwe tħassib li jistaʼ jkollok f’dan ir-​rigward. Ix-​xewqa stess li taqdi tingħata minn Alla, għax hu l-​ispirtu taʼ Ġeħova li jqanqal lil ħu biex jirsisti u mbagħad jagħti s-​saħħa biex joffri servizz sagru. (Flp. 2:13; 4:13) Għalhekk, huwa xieraq li titlob lil Ġeħova jgħinek biex tikkultiva x-​xewqa li taċċetta xi privileġġi taʼ servizz.—Aqra Salm 25:4, 5.

12. Wieħed kif jistaʼ jikseb biżżejjed għerf biex jittratta r-​responsabbiltajiet fdati lilu?

¹² Peress li f’għajnejh il-​bżonnijiet tal-​merħla jidhru li huma taʼ sfida u komplikati, Kristjan għandu mnejn jiddeċiedi li ma jirsistix. Jew jistaʼ jħoss li m’għandux għerf biżżejjed biex jittratta dawn ir-​responsabbiltajiet. Jekk dan hu l-​każ, forsi jistaʼ jikseb l-​għerf billi jistudja b’iktar diliġenza l-​Kelma t’Alla u pubblikazzjonijiet ibbażati fuq il-​Bibbja. Jistaʼ jistaqsi lilu nnifsu, ‘Qed inwarrab ħin biex nistudja l-​Kelma t’Alla, u qed nitlob għall-​għerf?ʼ Id-​dixxiplu Ġakbu kiteb: “Jekk xi ħadd minnkom jonqsu l-​għerf, ħa jibqaʼ jitlob lil Alla, għax hu jagħti b’mod ġeneruż u mingħajr ma jċanfar lil ħadd; u jingħatalu.” (Ġak. 1:5) Temminha int din l-​istqarrija ispirata? Biex iwieġeb it-​talba taʼ Salamun, Alla tah “qalb għarfa u li tifhem” li għenitu biex jagħraf bejn it-​tajjeb u l-​ħażin meta jiġġudika. (1 Slat. 3:7-​14) Veru, il-​każ taʼ Salamun kien speċjali. Madankollu, aħna nistgħu nkunu fiduċjużi li Alla se jagħti l-​għerf lill-​irġiel fdati bir-​responsabbiltajiet tal-​kongregazzjoni sabiex ikunu jistgħu jieħdu ħsieb in-​nagħaġ b’mod xieraq.—Prov. 2:6.

13, 14. (a) Spjega kif Pawlu kien effettwat mill-​“imħabba li għandu l-​Kristu.” (b) “L-​imħabba li għandu l-​Kristu” kif għandha teffettwana?

¹³ Għajnuna oħra biex tikkultiva x-​xewqa li taqdi lil oħrajn hija dik li taħseb b’mod profond dwar kulma għamlu għalina Ġeħova u Ibnu. Pereżempju, ikkunsidra t-​2 Korintin 5:14, 15. (Aqra.) Kif inhu li “l-​imħabba li għandu  l-​Kristu ġġegħelna”? L-​imħabba li wera Kristu meta ta ħajtu għan-​nom tagħna skont ir-​rieda t’Alla tant tispikka li hekk kif l-​apprezzament tagħna jikber, qalbna titqanqal profondament. L-​imħabba taʼ Kristu influwenzat lil Pawlu. Ma ħallitux jaġixxi bl-​egoiżmu u għenitu biex il-​miri prinċipali tiegħu jkunu li jaqdi lil Alla u lill-​bnedmin sħabu ġewwa u barra l-​kongregazzjoni.

¹⁴ Li nimmeditaw fuq l-​imħabba li għandu Kristu għan-​nies jimmotivana biex inkunu grati. Minħabba f’hekk, nirrealizzaw li tassew ma jkunx xieraq li nibqgħu ‘niżirgħu għal-​laħam,’ billi niġru wara miri egoistiċi u ngħixu biss biex nissodisfaw ix-​xewqat tagħna. Minflok, nagħmlu xi aġġustamenti f’ħajjitna biex nagħtu l-​ewwel post lix-​xogħol li tana Alla biex nagħmlu. Niġu mqanqlin biex ‘nitjassru’ għal ħutna sforz l-​imħabba. (Aqra Galatin 5:13.) Jekk inqisu lilna nfusna bħala lsiera li qed naħdmu bl-​umiltà għan-​nom tal-​qaddejja dedikati taʼ Ġeħova, se nittrattawhom bid-​dinjità u bir-​rispett. Ċertament li m’aħniex se nimitaw l-​attitudni taʼ kritika u taʼ ġudizzju li jippromwovi Satana.—Riv. 12:10.

Sforz Bħala Familja

15, 16. Il-​membri tal-​familja liema rwol għandhom jekk raġel irid jikkwalifika biex jinħatar bħala qaddej ministerjali jew anzjan?

¹⁵ Jekk ħu hu raġel miżżewweġ u għandu t-​tfal, is-​sitwazzjoni li teżisti fil-​familja tiegħu tiġi kunsidrata meta jiġi determinat jekk jikkwalifikax biex ikun qaddej ministerjali jew anzjan. Tabilħaqq, l-​ispiritwalità u r-​reputazzjoni tal-​familja tiegħu jeffettwaw direttament il-​ħatra tiegħu. Dan jenfasizza kemm hu importanti l-​irwol tal-​familja biex tappoġġa lir-​raġel u l-​missier hekk kif jipprova jaqdi l-​interessi tal-​kongregazzjoni bħala qaddej ministerjali jew anzjan.—Aqra l-​1 Timotju 3:4, 5, 12.

¹⁶ Ġeħova jieħu pjaċir meta membri taʼ familja Kristjana jikkooperaw maʼ xulxin. (Efes. 3:14, 15) Hemm bżonn il-​bilanċ biex kap taʼ familja jittratta responsabbiltajiet fil-​kongregazzjoni u jippresiedi fuq dawk taʼ daru “bl-​aħjar mod.” Għaldaqstant huwa vitali li anzjan jew qaddej ministerjali jistudja l-​Bibbja maʼ martu u wliedu sabiex kollha jkunu jistgħu jibbenefikaw mill-​Qima tal-​Familja kull ġimgħa. Għandu jipparteċipa magħhom b’mod regulari fil-​ministeru tal-​għalqa. Għall-​istess raġuni, hu importanti għall-​membri tal-​familja li jikkooperaw mal-​isforzi tal-​kap tal-​familja.

Int Se Terġaʼ Taqdi?

17, 18. (a) Jekk ħu ma jikkwalifikax iktar għal ħatra, x’jistaʼ jkun meħtieġ? (b) Liema ħarsa tistaʼ tittieħed minn ħu li fil-​passat qeda bħala anzjan jew qaddej ministerjali?

¹⁷ Forsi xi darba int kont anzjan jew qaddej ministerjali imma fil-​preżent m’intix taqdi f’din il-​kariga. Int tħobb lil Ġeħova u tistaʼ tibqaʼ ċert li hu għadu jimpurtah minnek. (1 Pt. 5:6, 7) Intqallek li għandek bżonn tagħmel xi aġġustamenti? Kun lest li tammetti xi ħtija u aħdem fuqha bl-​għajnuna t’Alla. Oqgħod attent li ma timteliex bl-​imrar. Kun għaref, u uri attitudni pożittiva. Anzjan li kien qeda għal snin sħaħ imma li tilef il-​privileġġi taʼ servizz tiegħu qal: “Kont determinat li nżomm l-​istess livell taʼ attendenza  għal-​laqgħat, servizz tal-​għalqa, u qari tal-​Bibbja li kelli meta kont naqdi bħala anzjan—mira li stajt inwettaqha. Tgħallimt inkun paċenzjuż għaliex ħsibt li se nerġaʼ nikseb il-​privileġġi tiegħi fi żmien sena jew tnejn, imma għaddew kważi sebaʼ snin qabel ma stajt nerġaʼ naqdi bħala anzjan. Matul dan iż-​żmien, l-​inkuraġġiment biex ma negħjiex imma biex inkompli nirsisti għenni ferm.”

¹⁸ Jekk int ħu li qiegħed fis-​sitwazzjoni li għadna kif iddeskrivejna, tiskuraġġix ruħek. Irrifletti fuq kif Ġeħova qed ibierek il-​ministeru tiegħek u lil dawk taʼ darek. Ibni lill-​familja tiegħek spiritwalment, żur lill-​morda, u inkuraġġixxi lid-​dgħajfin. Fuq kollox, għożż il-​privileġġ tiegħek li tfaħħar lil Alla u li xxandar l-​aħbar tajba tas-​Saltna bħala wieħed mix-​Xhieda taʼ Ġeħova. *—Salm 145:1, 2; Is. 43:10-​12.

Ikkunsidrah mill-​Ġdid

19, 20. (a) L-​irġiel mgħammdin kollha x’inhuma mħeġġin jagħmlu? (b) X’se jiġi diskuss fl-​artiklu li jmiss?

¹⁹ Il-​ħtieġa għal indokraturi u qaddejja ministerjali llum hi akbar minn qatt qabel. Għalhekk, inħeġġu lill-​irġiel mgħammdin kollha biex jikkunsidraw mill-​ġdid iċ-​ċirkustanzi tagħhom u biex jistaqsu lilhom infushom, ‘Jekk m’iniex qaddej ministerjali jew anzjan, għandi nanalizza r-​raġunijiet għala m’iniex naqdi?’ Ħalli l-​ispirtu t’Alla jgħinek tikseb l-​attitudni xierqa dwar din il-​kwistjoni vitali.

²⁰ Il-​membri kollha tal-​kongregazzjoni se jibbenefikaw mill-​isforzi taʼ sagrifiċċju persunali taʼ sħabhom fit-​twemmin. Meta nieħdu sehem f’atti taʼ qalb tajba u bla egoiżmu, aħna naħsdu l-​ferħ li jiġi milli naqdu lil oħrajn u niżirgħu għall-​ispirtu. Madankollu, bħalma se juri l-​artiklu li jmiss, m’għandniex innikktu l-​ispirtu qaddis t’Alla. Dan kif jistaʼ jiġi evitat?

[Nota taʼ taħt]

Int Kif Twieġeb?

• Il-​profezija li nsibu f’​Mikea 5:5 minn xiex tassigurana?

• Spjega x’jinvolvi spirtu taʼ sagrifiċċju persunali.

• Wieħed kif jistaʼ jikkultiva x-​xewqa li jaqdi lil oħrajn?

• Kemm hi importanti l-​kooperazzjoni tal-​familja jekk raġel irid jikkwalifika biex jaqdi bħala qaddej ministerjali jew anzjan?

[Mistoqsijiet taʼ Studju]

[Stampi f’paġna 25]

X’tistaʼ tagħmel biex tirsisti?