Għala Għandek Iġġib Unur lil Dawk Imdaħħlin fiż-Żmien?
Għala Għandek Iġġib Unur lil Dawk Imdaħħlin fiż-Żmien?
TUL il-kosta taʼ Kalifornja, fl-Istati Uniti, tinsab waħda mill-iktar siġar fotografati fid-dinja. Din hi magħrufa bħala l-Lone Cypress. Jingħad li din is-siġra għandha ’l fuq minn 250 sena. Magħrufa għar-reżistenza tagħha, din is-siġra mill-isbaħ ngħatat attenzjoni b’diversi modi. Pereżempju, din ġiet imsaħħa bi ħbula u b’ġebel mal-bażi tagħha.
Is-siġra Lone Cypress tistaʼ tfakkarna fil-Kristjani mdaħħlin fiż-żmien li jinsabu fostna, u li juru sabar, jew reżistenza, notevoli. Mod wieħed li jispikka kif jagħmlu dan huwa billi jipproklamaw l-aħbar tajba. Il-profeta Ġoel bassar li “x-xjuħ” kellhom jiddikjaraw il-messaġġ tal-Bibbja. (Ġoel 2:28-32; Atti 2:16-21) Aħseb ftit dwar il-bosta sigħat li dawn l-uħud iqattgħu biex bil-ħrara jgħinu lil oħrajn jitgħallmu dwar “l-aħbar tajba tas-saltna”! (Mt. 24:14) Xi wħud minn dawn il-proklamaturi tas-Saltna mdaħħlin fiż-żmien issaportew snin sħaħ taʼ persekuzzjoni jew diffikultajiet oħrajn. Jekk sempliċi siġra taċ-ċipress magħrufa għar-reżistenza tagħha tiġi msaħħa bil-ġebel u l-ħbula, kemm iktar l-uħud imdaħħlin fiż-żmien fostna jistħoqqilhom li jkunu apprezzati u trattati b’dinjità u b’unur!
Alla Ġeħova ta dan il-kmand lill-poplu tiegħu tal-qedem: “Quddiem ix-xagħar griż għandek tqum, u uri konsiderazzjoni lejn il-persuna taʼ raġel xiħ.” (Lev. 19:32) Illum, fost il-qaddejja taʼ Ġeħova nsibu eżempji eċċellenti taʼ wħud leali li ilhom ‘jimxu m’Alla’ għal għaxriet taʼ snin. (Mik. 6:8) Hekk kif ikomplu japplikaw il-prinċipji Skritturali, ix-xagħar griż tagħhom ikun tassew “kuruna taʼ sbuħija.”—Prov. 16:31.
L-appostlu Pawlu għallem liż-żagħżugħ Timotju biex ma jikkritikax bl-aħrax lill-irġiel xjuħ. Minflok, Timotju kellu jwissi lill-irġiel xjuħ bħala missirijiet u n-nisa xjuħ bħala ommijiet. (1 Tim. 5:1, 2) Fil-fatt, Timotju kellu ‘jqum’ quddiem dawk taʼ xagħar griż. Mela, b’mod ċar Ġeħova jistenna li l-mod kif nitkellmu jirrifletti dan l-unur.
Rumani 12:10 jgħid: “Kunu minn taʼ quddiem biex tonoraw lil xulxin.” L-indokraturi fil-kongregazzjoni ċertament għandhom jonoraw lill-Kristjani mdaħħlin fiż-żmien. Iżda lkoll kemm aħna għandna nkunu minn taʼ quddiem biex nonoraw lil xulxin.
M’għandniex xi ngħidu, il-membri tal-familja għandhom responsabbiltà speċjali lejn il-ġenituri u n-nanniet tagħhom. Fil-każ tas-siġra Lone Cypress, in-nies fittxew modi kif jippreservawha u qed ikomplu jagħmlu dan. Mela żgur li għandna nfittxu modi kif ngħinu sabiex tiġi preservata d-dinjità tal-ġenituri tagħna li qed jikbru fl-età u tan-nanniet tagħna. Pereżempju, jekk inkunu semmiegħa tajbin se nżommu lura milli ninsistu li nagħmlu l-affarijiet kif irridu aħna mingħajr ma nagħtu kas is-sentimenti tagħhom.—Prov. 23:22; 1 Tim. 5:4.
Dawk imdaħħlin fiż-żmien fostna huma tassew prezzjużi għal Ġeħova. Hu ma jabbandunahomx. (Salm 71:18) Anzi, l-Alla l-veru jsaħħaħhom biex ikomplu jaqduh fedelment. Jalla aħna wkoll inkomplu nappoġġaw u nonoraw lil dawk imdaħħlin fiż-żmien.
[Stampi f’paġna 7]
Bħalma s-siġra Lone Cypress teħtieġ l-appoġġ, hekk ukoll l-uħud imdaħħlin fiż-żmien jeħtieġu l-appoġġ tagħna u għandhom jiġu trattati b’dinjità u b’unur.
[Sors]
American Spirit Images/age fotostock