Ibqaʼ b’Saħħtek Spiritwalment Waqt li Tieħu Ħsieb Qarib Marid

WARA li nstab li kellha tumur viċin ix-​xewka taʼ daharha, Kim, li hi Xhud, intqalilha li kellha kanċer. * “Meta t-​tumur tneħħa permezz taʼ operazzjoni,” jgħid żewġha Steve, “Kim marret għar-​radjuterapija u l-​kimoterapija. Bħala effett ħażin tat-​trattament, hi saret dgħajfa mhux ħażin. L-​abbiltà tagħha biex tiċċaqlaq kienet limitata sew.”

Tistaʼ timmaġina d-​diqa li ħass Steve hekk kif ra lis-​sieħba għażiża tiegħu titqabad maʼ din il-​marda li tħallik bla saħħa? Forsi int għandek membru tal-​familja li qed isofri minn marda qerrieda jew mill-​effetti tax-​xjuħija. (Ekk. 12:1-​7) Jekk inhu hekk, int taf li sabiex tieħu ħsieb lil xi ħadd għażiż b’mod effettiv, trid tieħu ħsieb tiegħek innifsek. Jekk issir dgħajjef spiritwalment, is-​saħħa emozzjonali u fiżika tiegħek ukoll jistgħu jibdew isofru, u għandek mnejn ma tkunx kapaċi tipprovdi l-​appoġġ li jkollu bżonn il-​membru tal-​familja tiegħek. Kif tistaʼ żżomm il-​bilanċ spiritwali tiegħek waqt li tieħu ħsieb qarib li hu marid jew imdaħħal fiż-​żmien? Hemm xi ħaġa li membri oħrajn tal-​kongregazzjoni Kristjana jistgħu jagħmlu biex juru konsiderazzjoni għal dawn l-​uħud morda?

Żomm il-​Bilanċ—Kif?

Biex iżżomm il-​bilanċ spiritwali u s-​saħħa fiżika tiegħek waqt li tieħu ħsieb qarib marid, għandek bżonn tadatta ruħek u tqassam il-​ħin u l-​enerġija tiegħek. “L-​għerf hu mal-​modesti,” jgħid Proverbji 11:2. F’dan il-​kuntest, il-​kelma “modest” tfisser li wieħed ikun konxju tal-​limitazzjonijiet tiegħu. Biex tkun ċert li ma tagħmilx iktar milli tiflaħ, għandu mnejn ikollok bżonn teżamina l-​iskeda tiegħek u r-​responsabbiltajiet tiegħek.

Steve wera l-​għerf u l-​modestja billi reġaʼ eżamina l-​ammont tax-​xogħol tiegħu.  Minbarra x-​xogħol sekulari tiegħu, hu kien jaqdi bħala l-​koordinatur tal-​ġemgħa tal-​anzjani u bħala l-​indokratur tas-​servizz fil-​kongregazzjoni lokali tax-​Xhieda taʼ Ġeħova fl-​Irlanda. Kien ukoll membru tal-​Kumitat taʼ Koordinazzjoni mal-​Isptarijiet għall-​inħawi tiegħu. “Kim qatt ma lmentat li jien kont qed nittraskuraha għax kont qed nagħti ħafna attenzjoni lil dawn ir-​responsabbiltajiet,” jgħid Steve. “Imma kont naf li kont qed nagħti minni nnifsi iktar milli kont niflaħ nagħmel.” Steve kif ittratta s-​sitwazzjoni? “Wara konsiderazzjoni bit-​talb,” jgħid hu, “iddeċidejt li ma nibqax naqdi bħala l-​koordinatur. Bqajt naqdi bħala anzjan, imma billi tajt xi ftit mir-​responsabbiltajiet tiegħi fil-​kongregazzjoni lil oħrajn, stajt nagħti lil Kim il-​ħin u l-​attenzjoni li kellha bżonn.”

Maż-​żmien, is-​saħħa taʼ Kim saret stabbli. Steve u Kim reġgħu qiesu s-​sitwazzjoni tagħhom, u bl-​appoġġ taʼ martu, Steve setaʼ jerġaʼ jieħu r-​responsabbiltajiet li kellu qabel fil-​kongregazzjoni. “It-​tnejn li aħna tgħallimna naħdmu fil-​limiti li ħalqet il-​marda,” jispjega Steve. “Jien grat ħafna lejn Ġeħova għall-​għajnuna tiegħu u lejn marti għall-​appoġġ tagħha mingħajr tgergir minkejja s-​saħħa batuta tagħha.”

 Ikkunsidra wkoll l-​esperjenza taʼ Jerry, indokratur li jivvjaġġa, u taʼ martu Maria. Huma kellhom jaġġustaw il-​miri tagħhom biex jieħdu ħsieb il-​ġenituri tagħhom li kienu mdaħħlin fiż-​żmien. “Kemm jien u kemm żewġi kellna l-​mira li naqdu bħala missjunarji f’art barranija,” tgħid Maria. “Però, Jerry hu tifel waħdu, u l-​ġenituri tiegħu kellhom bżonn min jieħu ħsiebhom. Għalhekk, iddeċidejna li nibqgħu fl-​Irlanda biex nieħdu ħsiebhom. Billi għamilna hekk, stajna nkunu maʼ missier Jerry matul iż-​żmien kollu li hu kien l-​isptar sakemm miet. Issa nżommu kuntatt maʼ omm Jerry kuljum, u jekk ikollha bżonn xi għajnuna m’aħniex ’il bogħod. Il-​kongregazzjoni li omm Jerry tattendi fiha hija taʼ għajnuna u taʼ appoġġ kbir, u b’hekk jippermettulna nibqgħu fix-​xogħol tal-​ivvjaġġar.”

Kif Oħrajn Jistgħu Jgħinu

Meta ddiskuta liema provvedimenti materjali għandhom isiru għar-​romol imdaħħlin fiż-​żmien fil-​kongregazzjoni, l-​appostlu Pawlu kiteb: “Jekk xi ħadd ma jipprovdix għal tiegħu, u speċjalment għall-​membri taʼ daru, ikun ċaħad il-​fidi u jkun agħar minn bniedem mingħajr fidi.” Pawlu fakkar lill-​Kristjani sħabu li jekk riedu li l-​mod kif jaġixxu jkun “aċċettabbli quddiem Alla,” kellhom jieħdu ħsieb finanzjarjament il-​ġenituri u n-​nanniet tagħhom imdaħħlin fiż-​żmien. (1 Tim. 5:4, 8) Madankollu, oħrajn fil-​kongregazzjoni jistgħu u għandhom ikunu taʼ għajnuna.

Innota l-​każ taʼ Hakan u Inger, koppja mdaħħlin fiż-​żmien li jgħixu fl-​Isvezja. “Meta lil marti qalulha li għandha kanċer,” jgħid Hakan, “kien xokk għalina t-​tnejn. Inger dejjem kienet tbigħ is-​saħħa. Issa kellna mmorru l-​isptar kuljum għall-​kura, u l-​effetti ħżiena tal-​mediċina kienu jħalluha bla saħħa. Inger baqgħet id-​dar matul dan iż-​żmien, u jien kelli bżonn noqgħod magħha biex nieħu ħsiebha.” Il-​kongregazzjoni lokali kif għenet lil Hakan u Inger?

L-​anzjani fil-​kongregazzjoni għamlu arranġamenti biex il-​koppja tismaʼ l-​laqgħat Kristjani permezz tat-​telefon. Minbarra dan, l-​aħwa żammew kuntatt permezz taʼ żjajjar persunali u telefonati. Bagħtu wkoll ittri u kartolini. “Ħassejna l-​appoġġ tal-​aħwa kollha kif ukoll l-​għajnuna taʼ Ġeħova,” jgħid Hakan. “Din l-​attenzjoni kienet essenzjali biex aħna nibqgħu b’saħħitna spiritwalment. Fortunatament, Inger fieqet, u għal darb’oħra nistgħu nattendu l-​laqgħat Kristjani fis-​Sala tas-​Saltna.” Meta l-​membri tal-​kongregazzjoni jagħmlu dak li jistgħu biex jgħinu lil dawk fosthom li huma morda u mdaħħlin fiż-​żmien, juru li huma ‘ħbieb veri li jħobbu l-​ħin kollu, u aħwa li huma mweldin għal meta jkun hemm in-​niket.’—Prov. 17:17.

Ġeħova Japprezza l-​Isforzi Tiegħek

Li tieħu ħsieb qarib marid żgur li jeħtieġ sforz. Madankollu, is-​Sultan David kiteb: “Hieni min jaġixxi b’konsiderazzjoni mal-​batut,” bħalma hi persuna li għandha bżonn l-​għajnuna minħabba xi marda.—Salm 41:1.

Dawk li jieħdu ħsieb xi ħadd marid jew li qed ibati, għala jistgħu jkunu henjin? “Min iħenn għall-​batut ikun qed jislef lil Ġeħova,” jgħid Proverbji 19:17, “u Hu se jħallsu lura għal kif ittrattah.” L-​Alla l-​veru juri interess partikulari fil-​qaddejja leali tiegħu li qed isofru b’xi marda, u hu jbierek lil dak li jurihom ħniena. Is-​salmista David kanta: “Ġeħova se jwieżnu [individwu bħal dan] fuq is-​sodda tal-​mard; int tibdillu friexu kollu matul il-​marda tiegħu.” (Salm 41:3) Nistgħu nkunu ċerti li jekk il-​wieħed li jipprovdi għajnuna bl-​imħabba jesperjenza tbatija jew gwaj hu stess, Ġeħova se jgħinu.

Kemm hu tajjeb li nkunu nafu li Alla Ġeħova jinnota u japprova dak li nagħmlu meta nieħdu ħsieb qarib marid! Għalkemm li nagħtu assistenza bħal din għandu mnejn jirrikjedi sforz min-​naħa tagħna, l-​Iskrittura tassigurana li “sagrifiċċji bħal dawn jogħġbu ħafna lil Alla.”—Ebr. 13:16.

[Nota taʼ taħt]

[Stampi f’paġna 18]

Żomm il-​bilanċ spiritwali u aċċetta l-​għajnuna mingħand oħrajn