Mistoqsijiet mill-​Qarrejja

Ladarba Ġeħova jipprojbixxi l-​idolatrija, għala ma kkastigax lil Aron talli għamel l-​għoġol tad-​deheb?

Meta Aron għamel l-​għoġol tad-​deheb, bħalma nsibu f’​Eżodu kapitlu 32, hu kiser il-​liġi t’Alla dwar l-​idolatrija. (Eżo. 20:3-​5) Minħabba f’hekk, “Ġeħova tgħaddab [għal Aron] tant li ried iġibu fix-​xejn; imma [Mosè talab] bil-​ħerqa wkoll għal Aron f’dak iż-​żmien partikulari.” (Dt. 9:19, 20) Kellu t-​talb bil-​ħerqa tar-​raġel ġust Mosè “qawwa kbira” fil-​każ taʼ Aron? (Ġak. 5:16) Iva. Minħabba dan it-​talb bil-​ħerqa u minn tal-​inqas minħabba żewġ raġunijiet oħrajn, jidher li Ġeħova wieġeb it-​talb taʼ Mosè u ma kkastigax lil Aron.

Raġuni waħda milli jidher kellha x’taqsam mar-​reputazzjoni taʼ fedeltà taʼ Aron. Meta Mosè ġie inkarigat biex jidher quddiem il-​Fargħun u biex joħroġ lill-​Israelin mill-​Eġittu, Ġeħova ħatar lil Aron biex imur maʼ Mosè u biex jitkellem bħala r-​rappreżentant tiegħu. (Eżo. 4:10-​16) Dawn iż-​żewġt irġiel b’mod ubbidjenti dehru quddiem is-​sultan tal-​Eġittu ħafna drabi, u kienu huma li kellhom jissaportu l-​iktar il-​qalb iebsa tal-​Fargħun. Għalhekk, filwaqt li kien għadu l-​Eġittu, Aron bena reputazzjoni taʼ servizz leali u sod lil Ġeħova.—Eżo. 4:21.

Ikkunsidra wkoll dak li wassal lil Aron biex jagħmel l-​għoġol tad-​deheb. Mosè kien fuq il-​Muntanja Sinaj għal 40 jum. Meta “n-​nies raw li Mosè kien qed jieħu żmien twil biex jinżel minn fuq il-​muntanja,” huma pperswadew lil Aron biex jagħmlilhom idolu. Aron ikkoopera u għamel statwa taʼ għoġol tad-​deheb. (Eżo. 32:1-​6) Madankollu, l-​azzjonijiet taʼ wara taʼ Aron juru li ma kienx verament japprova din l-​idolatrija. Milli jidher ċeda għall-​pressjoni. Pereżempju, meta Mosè ġab il-​kwistjoni tal-​idolatrija f’quċċata drammatika, l-​ulied kollha taʼ Levi—inkluż Aron—b’mod sod żammew man-​naħa taʼ Ġeħova. Tlett elef idolatru li kellhom ir-​responsabbiltà primarja għall-​kondotta idolatruża nqatlu.—Eżo. 32:25-​29.

Wara dan, Mosè qal lin-​nies: “Intom għamiltu dnub kbir.” (Eżo. 32:30) B’hekk, Aron ma kienx l-​uniku wieħed li kien ħati tal-​ħażen. Kemm hu kif ukoll in-​nies ibbenefikaw mill-​ħniena kbira taʼ Ġeħova.

Wara l-​ġrajja tal-​għoġol tad-​deheb, Ġeħova kkmanda li Aron jinħatar bħala qassis il-​kbir. “Lil Aron libbsu l-​ilbies qaddis u idilku u qaddsu,” qal Alla lil Mosè, “u b’hekk jaqdi bħala qassis għalija.” (Eżo. 40:12, 13) Evidentement, Ġeħova ħafer lil Aron għad-​dgħufija tiegħu. F’qalbu, Aron kien jappoġġa lealment il-​qima vera, u ma kienx ribell idolatruż.