Tnikkitx l-​Ispirtu Qaddis taʼ Ġeħova

“Tnikktux l-​ispirtu qaddis t’Alla, li bis-​siġill tiegħu ġejtu mmarkati.”—EFES. 4:30.

1. Ġeħova x’għamel għal miljuni taʼ nies, u liema dmir għandhom?

 ĠEĦOVA għamel xi ħaġa speċjali għal miljuni taʼ nies li qed jgħixu f’din id-​dinja mimlija inkwiet. Għamilhielhom possibbli li jersqu qrib lejh permezz tal-​Iben uniġenitu tiegħu, Ġesù Kristu. (Ġw. 6:44) Int wieħed jew waħda minn dawn l-​individwi jekk iddedikajt ruħek lil Alla u qed tgħix fi qbil maʼ din id-​dedikazzjoni. Bħala individwu li tgħammidt fl-​isem tal-​ispirtu qaddis, għandek id-​dmir li taġixxi f’armonija maʼ dan l-​ispirtu.—Mt. 28:19.

2. Liema mistoqsijiet se nikkunsidraw?

² Aħna li ‘niżirgħu għall-​ispirtu’ nilbsu l-​personalità l-​ġdida. (Gal. 6:8; Efes. 4:17-​24) Imma l-​appostlu Pawlu jagħtina xi pariri u jwissina biex ma nnikktux l-​ispirtu qaddis  t’Alla. (Aqra Efesin 4:25-​32.) Issa se neżaminaw mill-​qrib il-​pariri tal-​appostlu. X’ried ifisser Pawlu meta tkellem dwar li wieħed inikket l-​ispirtu t’Alla? Wieħed li hu dedikat lil Ġeħova kif qatt jistaʼ jagħmel ħaġa bħal din? Kif nistgħu nevitaw li nnikktu l-​ispirtu taʼ Ġeħova?

X’Ried Ifisser Pawlu

3. Kif tispjega xi jfisser il-​kliem dokumentat f’​Efesin 4:30?

³ L-​ewwel nett, innota l-​kliem taʼ Pawlu dokumentat f’​Efesin 4:30. Hu kiteb: “Tnikktux l-​ispirtu qaddis t’Alla, li bis-​siġill tiegħu ġejtu mmarkati għal jum il-​ħelsien bil-​fidwa.” Pawlu ma riedx li l-​għeżież sħabu fit-​twemmin jipperikolaw l-​ispiritwalità tagħhom. Kien bl-​ispirtu taʼ Ġeħova li kienu ġew ‘immarkati bis-​siġill tiegħu għal jum il-​ħelsien bil-​fidwa.’ L-​ispirtu qaddis t’Alla kien u għadu siġill, jew “garanzija [bil-​quddiem] taʼ dak li għandu jiġi” għall-​midlukin li jżommu l-​integrità. (2 Kor. 1:22) Is-​siġill jissinifika li huma t’Alla u li se jirċievu l-​ħajja fis-​sema. Dawk li fl-​aħħar jiġu mmarkati bis-​siġill jgħoddu 144,000.—Riv. 7:2-​4.

4. Għala hu importanti li nevitaw li nnikktu l-​ispirtu t’Alla?

⁴ L-​ewwel pass li jwassal biex l-​influwenza tal-​forza attiva t’Alla tintilef totalment fil-​ħajja taʼ Kristjan jistaʼ jkun li jnikket l-​ispirtu. Li dan hu possibbli jidher ċar minn dak li qal David wara li kien dineb b’konnessjoni maʼ Bat-​seba. David bi ndiema talab bil-​ħrara lil Ġeħova: “Twarrabnix minn quddiem wiċċek; u l-​ispirtu qaddis tiegħek tneħħihx minn fuqi.” (Salm 51:11) Dawk il-​midlukin biss li jagħtu prova ‘tal-​fedeltà tagħhom sal-​mewt’ se jirċievu l-​“kuruna” tal-​ħajja immortali fis-​sema. (Riv. 2:10; 1 Kor. 15:53) Il-​Kristjani b’tama għall-​art ukoll għandhom bżonn l-​ispirtu qaddis jekk iridu jżommu l-​integrità tagħhom lejn Alla u jirċievu l-​għotja tiegħu tal-​ħajja fuq il-​bażi taʼ fidi fis-​sagrifiċċju taʼ Kristu bħala fidwa. (Ġw. 3:36; Rum. 5:8; 6:23) Għaldaqstant, ilkoll kemm aħna rridu ngħassu kontra li nnikktu l-​ispirtu qaddis taʼ Ġeħova.

Kristjan Kif Jistaʼ Jnikket l-​Ispirtu?

5, 6. Kristjan kif jistaʼ jnikket l-​ispirtu taʼ Ġeħova?

⁵ Bħala Kristjani dedikati, aħna nistgħu nevitaw li nnikktu l-​ispirtu. Dan hu possibbli jekk ‘nibqgħu mexjin u ngħixu bl-​ispirtu,’ għax imbagħad ma ningħelbux minn xewqat ħżiena tal-​laħam u ma nurux karatteristiki mill-​agħar. (Gal. 5:16, 25, 26) Imma dan jistaʼ jinbidel. Nistgħu sa ċertu punt innikktu l-​ispirtu t’Alla billi nħallu lilna nfusna nersqu bil-​mod il-​mod, forsi billi lanqas biss nindunaw, lejn kondotta kundannata fil-​Kelma mnebbħa mill-​ispirtu t’Alla.

⁶ Kieku kellna naġixxu kontinwament kontra d-​direzzjoni tal-​ispirtu qaddis, kieku nkunu qed innikktu l-​ispirtu u lil Ġeħova, is-​Sors taʼ dan l-​ispirtu. Eżaminar taʼ Efesin 4:25-​32 se jurina kif għandna nġibu ruħna, u jistaʼ jgħinna nevitaw li nnikktu l-​ispirtu t’Alla.

Kif Nevitaw li Nnikktu l-​Ispirtu

7, 8. Spjega għala rridu ngħidu l-​verità.

⁷ Irridu ngħidu l-​verità. Skont Efesin 4:25, Pawlu kiteb: “Issa li warrabtu l-​gideb, għidu l-​verità, kull wieħed minnkom lill-​proxxmu tiegħu, għax aħna membri taʼ xulxin.” Ladarba aħna magħqudin bħala “membri taʼ xulxin,” ċertament li m’għandniex inqarrqu jew nipprovaw niżvijaw apposta lill-​aduraturi sħabna, għax dan hu l-​istess bħallikieku qed nigdbulhom. Kull min jippersisti f’aġir bħal dan jispiċċa biex ma jkollu ebda relazzjoni m’Alla.—Aqra Proverbji 3:32.

⁸ Kliem u azzjonijiet qarriqin jistgħu jfixklu l-​unità tal-​kongregazzjoni. Għalhekk, għandna nkunu bħall-​profeta Danjel, li kien taʼ min jafdah u li oħrajn ma setgħu jsibu ebda korruzzjoni fih. (Dan. 6:4) U għandna nżommu f’moħħna l-​parir taʼ Pawlu  lill-​Kristjani b’tama għas-​sema, li kull membru tal-​“ġisem tal-​Kristu” huwa tal-​oħrajn kollha u għandu bżonn jibqaʼ magħqud mas-​segwaċi midlukin taʼ Ġesù li jgħidu l-​verità. (Efes. 4:11, 12) Jekk nittamaw li se ngħixu għal dejjem fuq l-​art magħmula Ġenna, aħna wkoll irridu ngħidu l-​verità, u b’hekk nikkontribwixxu għall-​unità tal-​fratellanza tagħna madwar id-​dinja.

9. Għala hu vitali li nobdu l-​kliem taʼ Efesin 4:26, 27?

⁹ Irridu nopponu lix-​Xitan, u ma nagħtuh ebda opportunità biex jagħmlilna l-​ħsara spiritwalment. (Ġak. 4:7) L-​ispirtu qaddis jgħinna nirreżistu lil Satana. Pereżempju, nistgħu nagħmlu dan billi ngħassu kontra r-​rabja bla rażan. Pawlu kiteb: “Jekk tinkorlaw, tidinbux; tħallux ix-​xemx tinżel waqt li tkunu għadkom inkorlati, u tagħtux wisaʼ lix-​Xitan.” (Efes. 4:26, 27) Jekk nirrabjaw b’mod ġustifikat, talba siekta minnufih tistaʼ tgħinna ‘nżommu spirtu kalm,’ billi nuru r-​rażan minflok ma naġixxu b’tali mod li nistgħu nnikktu l-​ispirtu t’Alla. (Prov. 17:27) Għalhekk, ejja ma nibqgħux inkorlati, u b’hekk nagħtu ċans lil Satana biex iħajjarna nagħmlu xi ħaġa mill-​agħar. (Salm 37:8, 9) Mod wieħed kif nirreżistuh hu billi nirranġaw it-​tilwim malajr fi qbil mal-​pariri taʼ Ġesù.—Mt. 5:23, 24; 18:15-​17.

10, 11. Għala m’għandniex nisirqu jew nagħmlu dak li hu diżonest?

¹⁰ M’għandna nċedu għal ebda tentazzjoni biex nisirqu jew inkunu diżonesti. Rigward is-​serq, Pawlu kiteb: “Min kien jisraq ħa ma jisraqx iktar, imma minflok ħa jaħdem iebes u jagħmel b’idejh xogħol tajjeb, biex ikollu xi ħaġa x’jagħti lil min hu fil-​bżonn.” (Efes. 4:28) Kieku Kristjan dedikat kellu jisraq, kieku jkun qed ‘iżeblaħ isem Alla’ billi jġib tmaqdir fuqu. (Prov. 30:7-​9) Saħansitra lanqas il-​faqar ma jiġġustifika s-​serq. Dawk li jħobbu lil Alla u lill-​proxxmu jirrealizzaw li s-​serq qatt mhu ġustifikat.—Mk. 12:28-​31.

¹¹ Pawlu ma jsemmix biss dak li m’għandniex nagħmlu, imma jindikalna wkoll dak li għandna nagħmlu. Jekk qed ngħixu u nimxu bl-​ispirtu qaddis, se naħdmu iebes sabiex inkunu nistgħu nieħdu ħsieb il-​familja tagħna u wkoll ‘ikollna xi ħaġa x’nagħtu lil min hu fil-​bżonn.’ (1 Tim. 5:8) Ġesù u l-​appostli tiegħu warrbu xi flus biex jgħinu lill-​foqra, imma t-​traditur Ġuda l-​Iskarjota ħa ftit mill-​flus. (Ġw. 12:4-​6) Żgur li ma kienx immexxi mill-​ispirtu qaddis. Aħna li niġu gwidati mill-​ispirtu t’Alla “nġibu ruħna bl-​onestà f’kollox,” bħalma għamel Pawlu. (Ebr. 13:18) B’hekk nevitaw li nnikktu l-​ispirtu qaddis taʼ Ġeħova.

 Modi Oħrajn Kif Nevitaw li Nnikktu l-​Ispirtu

12, 13. (a) Bħalma jintwera f’​Efesin 4:29, liema tip taʼ kliem għandna nevitaw? (b) Kif għandu jkun kliemna?

¹² Irridu ngħassu kliemna. Pawlu ddikjara: “Ħa ma toħroġ minn fommkom ebda kelma mħassra, imma għidu dak li hu tajjeb biex jibni fejn ikun hemm bżonn, sabiex jagħmel il-​ġid lil min jisimgħu.” (Efes. 4:29) Għal darb’oħra, l-​appostlu ma jgħidx biss dak li m’għandniex nagħmlu, imma jgħidilna wkoll dak li suppost qed nagħmlu. Taħt l-​influwenza tal-​ispirtu t’Alla, se niġu mqanqlin ‘ngħidu dak li hu tajjeb biex jibni sabiex jagħmel il-​ġid lil min jisimgħu.’ Barra minn hekk, m’għandniex inħallu xi “kelma mħassra” toħroġ minn fommna. Il-​kelma Griega tradotta “mħassra” ntużat biex tiddeskrivi frott, ħut, jew laħam jinten. Sewwasew bħalma nitqażżuh ikel bħal dan, aħna nobogħdu kliem li Ġeħova jqisu ħażin.

¹³ Kliemna għandu jkun deċenti, ħanin, “imħawwar bil-​melħ.” (Kol. 3:8-​10; 4:6) In-​nies għandhom ikunu jistgħu jindunaw li aħna differenti meta jisimgħuna nitkellmu. Għalhekk, ejja ngħinu lil oħrajn billi ngħidu dak li hu “tajjeb biex jibni.” U jalla nħossuna bħas-​salmista li kanta: “Ħa jkunu kliem fommi u l-​meditazzjoni taʼ qalbi pjaċevoli quddiemek, O Ġeħova, il-​Blata tiegħi u l-​Feddej tiegħi.”—Salm 19:14.

14. Skont Efesin 4:30, 31, minn xiex irridu ninħelsu?

¹⁴ Irridu ninħelsu mill-​imrar, mill-​korla, mit-​tgħajjir, u minn kull ħażen. Wara li wissa kontra li wieħed inikket l-​ispirtu t’Alla, Pawlu kiteb: “Ħa jitwarrab minnkom kull imrar malizzjuż u rabja u korla u twerżiq u tgħajjir flimkien ma’ kull ħażen.” (Efes. 4:30, 31) Bħala bnedmin imperfetti, ilkoll kemm aħna għandna bżonn naħdmu iebes biex nikkontrollaw il-​ħsibijiet u l-​azzjonijiet tagħna. Jekk ma nikkontrollawx l-​‘imrar malizzjuż u r-​rabja u l-​korla,’ inkunu qed innikktu l-​ispirtu t’Alla. L-​istess hu minnu jekk inżommu kont taʼ ħtijiet li jsiru kontrina, nuru attitudni taʼ riżentiment, u nirrifjutaw li nerġgħu nitħabbu maʼ min ikun offendiena. Jekk saħansitra nibdew ninjoraw il-​pariri tal-​Bibbja, nistgħu niżviluppaw karatteristiki li jistgħu jwassluna biex nidinbu kontra l-​ispirtu u nistgħu nesperjenzaw konsegwenzi diżastrużi.

15. Jekk isir xi ħażen kontrina, x’għandna nagħmlu?

¹⁵ Għandna bżonn inkunu qalbna tajba, nagħdru, u naħfru. Pawlu kiteb: “Kunu qalbkom tajba ma’ xulxin, agħdru b’tenerezza, u aħfru lil xulxin mill-​qalb bħalma Alla wkoll ħafrilkom mill-​qalb bi Kristu.” (Efes. 4:32) Anki jekk weġġajna profondament minħabba xi ħażen li sar kontrina, ejja naħfru, bħalma jagħmel Alla. (Lq. 11:4) Suppost li sieħeb fit-​twemmin qal xi ħaġa negattiva dwarna. Fi sforz biex insolvu l-​kwistjoni, aħna navviċinawh. Hu jesprimi dispjaċir veru u jitlob maħfra. Aħna naħfrulu, imma għandna bżonn nagħmlu iktar. “Tivvendikax ruħek u lanqas iżżomm f’qalbek għal  ulied il-​poplu tiegħek,” jgħid Levitiku 19:18, “u ħobb lil għajrek bħalek innifsek. Jien Ġeħova.”

Għandna Bżonn Noqogħdu Attenti

16. Agħti eżempju li juri li għandna mnejn ikollna nagħmlu xi aġġustamenti sabiex ma nnikktux l-​ispirtu taʼ Ġeħova.

¹⁶ Saħansitra fil-​privat, nistgħu niġu mħajrin nagħmlu xi ħaġa li ma togħġobx lil Alla. Pereżempju, ħu forsi kien qed jismaʼ mużika dubjuża. Maż-​żmien, il-​kuxjenza tiegħu tibda tinkwetah għaliex injora l-​pariri tal-​Bibbja preżentati f’pubblikazzjonijiet tal-​“ilsir leali u għaqli.” (Mt. 24:45) Għandu mnejn jitlob dwar din il-​problema u jiftakar fil-​kliem taʼ Pawlu dokumentat f’​Efesin 4:30. Peress li jkun determinat b’mod sod li ma jagħmel xejn li bih jistaʼ jnikket l-​ispirtu t’Alla, hu deċiż li minn issa ’l quddiem jevita mużika dubjuża. Ġeħova se jbierek attitudni bħal din. Għalhekk, ejja ngħassu kontinwament kontra li nnikktu l-​ispirtu t’Alla.

17. X’jistaʼ jiġri jekk ma noqogħdux attenti u ma nitolbux?

¹⁷ Jekk ma noqogħdux attenti u ma nitolbux, nistgħu nċedu għal xi prattika mhix nadifa jew ħażina li biha nnikktu l-​ispirtu. Peress li l-​Missier juża l-​ispirtu qaddis tiegħu f’armonija mal-​personalità tiegħu, meta nnikktu l-​ispirtu, inkunu qed innikktu Lilu —xi ħaġa li żgur ma rridux nagħmlu. (Efes. 4:30) L-​iskribi Lhud tal-​ewwel seklu dinbu meta attribwew il-​mirakli taʼ Ġesù lil Satana. (Aqra Marku 3:22-​30.) Dawn l-​għedewwa taʼ Kristu ‘dgħaw kontra l-​ispirtu qaddis,’ u b’hekk ikkommettew dnub li ma jinħafirx. Jalla aħna qatt ma nispiċċaw hekk!

18. Kif nistgħu niddeterminaw li ma kkommettejniex xi dnub li ma jinħafirx?

¹⁸ Ladarba lanqas saħansitra ma rridu naslu qrib li nikkommettu xi dnub li ma jinħafirx, għandna bżonn niftakru f’dak li qal Pawlu dwar li ma nnikktux l-​ispirtu. Imma xi ngħidu jekk dnibna serjament? Jekk indimna u ġejna megħjunin mill-​anzjani, nistgħu nikkonkludu li Alla ħafrilna u li ma dnibniex kontra l-​ispirtu qaddis. Bl-​għajnuna t’Alla, nistgħu nevitaw ukoll li b’xi mod nerġgħu nnikktu l-​ispirtu.

19, 20. (a) X’inhuma xi affarijiet li għandna bżonn nevitaw? (b) X’għandna nkunu determinati li nagħmlu?

¹⁹ Alla juża l-​ispirtu qaddis tiegħu biex jippromwovi l-​imħabba, il-​ferħ, u l-​unità tal-​poplu tiegħu. (Salm 133:1-​3) Għalhekk, għandna nżommu lura milli nnikktu l-​ispirtu billi ma niħdux sehem f’seksik li jagħmel il-​ħsara jew billi ma ngħidux affarijiet li jnaqqsu r-​rispett lejn dawk li huma rgħajja maħturin bl-​ispirtu. (Atti 20:28; Ġuda 8) Minflok, għandna nippromwovu l-​unità u r-​rispett lejn xulxin fil-​kongregazzjoni. Żgur li m’għandniex ninkuraġġixxu klikek billi nifformaw gruppi esklużivi fost il-​poplu t’Alla. Pawlu kiteb: “Inħeġġiġkom, ħuti, f’isem il-​Mulej tagħna Ġesù Kristu, biex ilkoll titkellmu fi qbil u ma jkunx hemm firdiet fostkom, imma tkunu magħqudin kif jixraq b’fehma waħda u bi ħsieb wieħed.”—1 Kor. 1:10.

²⁰ Ġeħova hu lest u kapaċi jgħinna nevitaw li nnikktu l-​ispirtu tiegħu. Ejja nkomplu nitolbu għall-​ispirtu qaddis u nkunu determinati li ma nnikktuhx. Jalla nibqgħu ‘niżirgħu għall-​ispirtu,’ billi nfittxu bil-​ħeġġa l-​gwida tiegħu issa u għal dejjem.

Int Kif Twieġeb?

• Xi jfisser li tnikket l-​ispirtu t’Alla?

• Individwu dedikat lil Ġeħova kif jistaʼ jnikket l-​ispirtu Tiegħu?

• B’liema modi nistgħu nevitaw li nnikktu l-​ispirtu qaddis?

[Mistoqsijiet taʼ Studju]

[Stampa f’paġna 30]

Irranġa t-​tilwim malajr

[Stampa f’paġna 31]

Kliemek maʼ liema frott tqabblu l-​iktar?